Marcos 15
15
So' Jesús qoỹasoxona'aguet so' Pilato
(Mateo 27.1-2, 11-14; Lucas 23.1-5; Juan 18.28-38)
1Joca'li sóxote ỹ'oxoñi, qana'chi ỹima'a't so'me lasoxola'pi na' netaxaỹáxanaxanecpi, qataxa na' ỹ'axaicáchiipi, qataxa so'me dapaxaguenataxanapeec na' naqátaxacpi, qataxa ỹima na' net'alpi 'me ló'o na' nasoxocpi. Qana'chi jen'me ỹauec so' Jesús ỹicoñaxada't na' loua' qana'chi qoỹauée'uo so' Pilato. 2Qana'chi so' Pilato ỹachimaxata so'me, 'enaac:
—¿Na'chi'amo' 'me 'am let'a na' judiopi?
Qana'chi so' Jesús 'enaaco':
—Já'a, na'chida da' 'auenaac.
3Qana'chi jen'me lasoxola'pi na' netaxaỹáxanaxanecpi ỹátaqta jalcote jen'me qoỹisouéetapeecpi jeso'me. 4Qana'chi so' Pilato ỹitaxa v'iỹílaxalégue da' ỹinat so'me, 'enaac:
—¿Tóoqo'chi sa 'au'at? Péga, ỹátaqta jalcote jen'me 'am qoỹisouéetapeecpi 'me 'adavíỹaxasetpi.
5Qaláxasa so' Jesús sa ỹ'at. Qana'chi so' Pilato ỹátaqta sa ỹaỹáten ga' 'éet'ec.
So' Jesús qoỹipagaqtená'ac da' nalaataguec
(Mateo 27.15-31; Lucas 23.13-25; Juan 18.38—19.16)
6Da'me mai'chi n'onataguec so' Pilato da' ỹivítalo saua' noloqo'te 'me nemáxaqui', qana'chi ỹisóiỹi ga'me ỹiỹáxane'uo na' siỹaxadipi. 7Qaa'le 'uo so' nétaaue jaso' cointáxanaxaqui lenaxat da' Barrabás. So'me 'uo so' laỹi 'me dalaataxan joca'li qoỹ'odétapegueegue ga' net'a. 8Qana'chi jeso'me siỹaxadipi ỹiỹaxanot so' Pilato, qaidi ỹí'et da' mai'chi n'onataguec, da'me 'uo ga'me qoỹisóiỹi so'me nolo'. 9Qana'chi so' Pilato 'enaaco':
—¿Qo'li sétaaque sesoxóiỹi da'me let'a na' judiopi?
10Qá'a so'me ỹaỹáteeta da' 'chi qoniquiỹá'a so'me Jesús, chan'eesa qaa'le jen'me lasoxola'pi na' netaxaỹáxanaxanecpi ỹaneuo so'me. 11Qaláxasa jen'me lasoxola'pi na' netaxaỹáxanaxanecpi, jen'me ỹiỹáxanooue na' siỹaxadipi, da' qaidi ỹiỹáxane'uo da' qoỹisóiỹi so' Barrabás. 12Qaama'le so' Pilato ỹinatóoue so'me, 'enaac:
—¿Qana'chi jái'chi ga' senqát'ec da'me 'oñíỹapega let'a na' judiopi?
13Qana'chi jeso' siỹaxadipi n'alaxaséguem, 'enaac:
—¡'Aup'iñiỹaséguem na'me!
14Qana'chi so' Pilato 'enapego' so' siỹaxadipi, 'enaac:
—Qaláxasa da'me, ¿ga' huasoilégue 'me 'te hua'ague?
Qaláxasa so' siỹaxadipi ỹitaxa n'alaxaséguem, 'enaac:
—¡Ỹa 'autóuoqoiuo na'me!
15Huá'a, qana'chi so' Pilato ỹisóiỹi so' Barrabás, qá'a sétaaque da' qaỹa 'te gamachaqaiga na' siỹaxadipi. Joca'li ỹimat da' damaxasoxolégue da' qoỹi'uaxan so' Jesús, qana'chi ỹanóoue so' siỹaxadipi, da' qaidi qoỹip'enaséguem.
16Qana'chi na' nesoxonaqapi ỹauéguee'ga so' Jesús ga' nasoxoc ga' l'acháqa' so' net'a. Qana'chi ỹimapega't na' huataxanaqpi. 17Qana'chi so' Jesús qonapoguénaxa'ña so' napoto 'me toomaqalégue, qataxa qonaxad'ónaxanaxa'ña jaso' n'onata ỹaxat. 18Joca'li ỹim, qana'chi qoỹ'alaxalégue, qoỹinaac:
—¡Jéga, 'am 'me let'a na' judiopi!
19Qana'chi qoỹi'uaxáatapiỹi na' laqaic, qoỹidó'oc na' coqta lat'e, qataxa qonatoqot, qataxa qoỹisocoto naua' niliictel da' 'ená'am da' 'uo ga' 'enec qoỹin. 20Joca'li ỹim da' ne'uenáguec jeso'me, qaama'le qonqat so' lapoto 'me toomaqalégue, qataxa ỹipaquet'eeta saua' mai'chi leuo. Qana'chi qoỹauéga so' nep'enaqa' qoỹin.
Qoỹip'enaséguem so' Jesús
(Mateo 27.32-44; Lucas 23.26-43; Juan 19.17-27)
21'Uo so' siỹaxaua 'me l'acháqa' di' Cirene, lenaxat Simón, so'me let'a' saua' Alejandro qataxa Rufo. So'me chiỹaqalégue na' n'ónaxa. Joca'li jeso'me qouada'aguet, qana'chi qoỹachoxónaxanec jaso'me nesodooso so' Jesús. 22Qana'chi qoỹauéguee'ga so' Jesús so' 'aléua, lenaxat Gólgota. Da'me n'aqtac náaue da' naqaic lip'inec l'acháqa'. 23Qana'chi sétaaque da' qoniỹómaxanỹi so' latáxa 'me lale'gue qoỹin jan' 'epaq licha', lenaxat mirra. Qaláxasa so' Jesús sa niỹómỹi. 24Ỹim, qana'chi qoỹip'inỹi jaso' nesodooso. Qana'chi saua' huataxanaxalase' nalichiilo saua' leuo so' Jesús, qaidi qonaloỹilo jesaa'me.
25Qaláqa'chi qaỹásee'megue jaso' c'atena joca'li qoỹip'inỹi jaso' nesodooso. 26Qaa'le so'me qoỹidetalégue 'me huasoilégue qoỹin, 'enaac: “Let'a na' judiopi.” 27Nataq'en qoỹip'ena'to saua' dos cacháxaiqa, so' 'oonolec saa'me na'ague qoỹin na' ỹaỹáten, qataxa so' laqáỹa na'ague na' n'emaq. 28Huá'a, qana'chi ỹátaqta ỹipaquíchiỹi da'me 'enapega't naua' nidii's l'aqtaqa ñi' Dios, 'me 'enaac: “Ga'me qoỹaptenóoue qomle na' loicoló'olpi.”
29Qaa'le jen'me natapee'guedi so' naq'aic, qoỹi'uéetac, qataxa ỹaỹoqóotac na' laqaic. Qana'chi 'enapéga jeso'me, 'enaac:
—¡Jou'! 'Am 'me 'onaac ca'li da' 'anoláxachiñi ñi' tamnaxaqui di' Jerusalén, qana'chi tres noloqo'te, qana'chi ỹitaxa 'aumat da' 'an'oxoséguem, 30ỹa 'anec'alaxatela't naỹi, 'anenótee'guesop jana' 'ansodooso.
31Nataq'en na' lasoxola'pi na' netaxaỹáxanaxanecpi qataxa jen'me dapaxaguenataxanapeec na' naqátaxacpi ỹi'uéetac jeso'me, qataxa mai'chi dosétapega't, 'enaac:
—Ñi'me nec'alaxatéegue ga' laqáỹa, qalqaiga sa ỹaqanatet da' nec'alaxatela't. 32Ñi'me 'éetapega da' nec'alaxaqui, let'a na' lec'oqtepi so' Israel, da'me sauanáqchiỹi naỹi da' huenótee'guesop jan' nesodooso, qana'chi ma'le s'amaqténaq.
Qataxa ỹivid'alo saa'me liquiáxa'u 'me qoỹitóuoqtrauo, saa'me ỹisouéetrac so' Jesús.
Da' 'éeta da' ỹileu so' Jesús
(Mateo 27.45-56; Lucas 23.44-49; Juan 19.28-30)
33Joca'li ma'le laiñi so' nolo', qana'chi 'uo so' n'álaxa ỹimalquéna. Ca'li ma'le dasíiñi jaso' c'atena, qana'chi qaỹa so'me. 34Qaa'le, na'chiso so'me huá'a, qana'chi so' Jesús natot da' l'alaxac, ỹátaqta neten da' ỹ'alaq, 'enaac:
—Eloi, Eloi, ¿lama sabactani? —da'me l'aqtac náaue da' 'eet'oi: 'Am ñitamnaxala', 'am ñitamnaxala', ¿tá'nooqo'chi jaỹim 'ocá'ai?
35Qaa'le 'uo na' huet'edi, qana'chi qodemachi'ỹa't, qana'chi 'enapega't so'me:
—Píiỹa, ỹa 'anaquiáxañiỹa jiñi'me, ỹiỹáxataaque so' l'aqtáxanaxanec ñi' Dios, lenaxat Elías.
36Qana'chi so' 'oonolec jeso'me naqalégaq'a. Qana'chi joca'li ỹim da' ỹisomñi jaso' huol, ỹisomñíỹi so' latáxa 'me 'ouáxaic, ỹanaỹi so' coqta leséenec, qana'chi ỹaasée'mec jeso'me da' sétaaque da' nec'ouóxosoxonaxanec. Qana'chi jeso'me 'enaaco':
—Ỹa 'amachíi'ỹa jena'me, cha'li sec'atenaq ỹ'oxogueto' qomle janac ga' Elías da' naqachiñi jiñi'me.
37Qaama'le ỹátaqta netenec da' l'alaxac so' Jesús, qana'chi ỹileu. 38Huá'a, qana'chi so' lápo' so' chaalataqa' jeso' tamnaxaqui 'me quíinỹi na' laiñi, jeso'me colqáchiinỹi so' laiñi, ỹátaqta ỹivídañi so'me lecolaxa. 39Qana'chi jeso'me let'a na' huataxanaq 'me nichaatétañi, dasot'ot so' Jesús, so'me ca'li ỹauáachiỹi da'me l'alaxac so'me, qataxa da' 'éeta ca'li ỹileu, qana'chi so'me 'enáacjo':
—Ỹátaqchiiñi 'eesása ñi'me siỹaxaua, da'me ỹátaqta lec'óxot ñi' Dios.
40Nataq'en 'uo so' ỹauodipi 'me ỹic'atéetac jeso'me. Qataxa ỹalquétaaue jeso' ỹauodipi jaso' María 'me lase di' Magdala, qataxa jaso' laqáỹa María 'me lat'e so' Jacobo so'me nootolec qataxa so' José, qataxa 'uo jaso' Salomé. 41Saa'me ỹauo', saa'me quétrapegue' joca'li qataxa lecochítrapega joca'li so'me Jesús, ca'li huét'a di' Galilea. Qataxa nataq'en jalcote jaso' laỹi 'me huétauo, so'me náictapegue' so' Jesús joca'li naỹá'uo di' Jerusalén.
So' Jesús ma'le qoỹisiiñi
(Mateo 27.57-61; Lucas 23.50-56; Juan 19.38-42)
42Joca'li ma'le n'álñi so'me nolo' 'me ỹamaxataxaqui 'me p'aiỹet so' nolo' 'me mataxaqui. 43Qana'chi janac so' José 'me Arimatea lé'ec. Jeso'me ỹátaqta naláuo, qana'chi ỹalquétaaue so' net'alpi 'me ló'o na' nasoxocpi. Jeso'me nataq'en ỹiuatétaaque da' nóvi' ga' l'onataxanaxac ñi' Dios da' ỹimata'a'téna. Qana'chi ỹátaqta ỹ'añaxachiỹi di' lauel da' ỹic'áte'uo so' Pilato, qana'chi ỹiỹáxane'uo so' ló'oquiaxac so' Jesús. 44Qana'chi so' Pilato ỹátaqta ỹoqo'chim da' sóxote ma'le ỹileu so' Jesús. Qataxa ỹiỹáxanee'ga so'me let'a na' huataxanaq, qana'chi ỹinatétac da' 'eesa dójo'. 45Qana'chi joca'li ỹ'axátem so'me huataxanaq let'a da' 'eesa, qana'chi so' Pilato ỹanem so' José so' ló'oquiaxac so' Jesús. 46Chan'eesa so' José neuodéna so' netala' pagaxaic 'me nó'in, qana'chi naqachiñi so' ló'oquiaxac so' Jesús, qana'chi lecoxóiỹi. Joca'li ỹim, qana'chi ỹacháaue jaso' napa'lai't 'me náaue so' qa', qana'chi ỹapadénoo'uet jaso'me napa'lai't, dapadénaxana so' qa' let'ádaic. 47Qana'chi jaso' María 'me Magdala lase qataxa jaso' laqáỹa María 'me lat'e so' José, saa'me ỹauáachidiỹi so' qoỹachá'ña so' Jesús.
Currently Selected:
Marcos 15: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.