Mateo 12

Saua' lapaxaguenataqa so' Jesús napoquétra'ña jan' jala so' nañiisec jeso' nolo' mataxaqui

(Marcos 2.23-28; Lucas 6.1-5)

1'Uo so' nolo' 'me mataxaqui, qana'chi so' Jesús ỹ'axasoxodeta so' nanaxanqa'. Saua' lapaxaguenataqa ỹátaqta 'uo da' loqouáqa', qana'chi napoquétra'ña na' jala na' trigo, qana'chi ỹalíctrac jan' jala. 2Qana'chi jen' ỹalcapíỹi na' fariseopi joca'li ỹauáachiỹi dójo', qana'chi qoỹinapego' so' Jesús, qoỹinaaco':

—Péga, na' 'adapaxaguenatacpi ỹ'étetac da' n'onataxanaxac 'me sa qoỹisiquiaxaná'a di' nolo' mataxaqui.

3Qana'chi jeso'me 'enaaco':

—¿Sa 'te 'autaxaỹaxañiỹo' da' 'éeta so' David joca'lio' 'uo so' nolo' jeso'me qataxa saua' liquiáxa'u ỹátaqta 'uo da' loqouáqa'? 4Qana'chi jeso'me ỹinoxonóoue so' l'emec ñi' Dios, qana'chi ỹalic jaso' panpi 'me qoỹanot ñi' Dios, 'me qaỹa 'te qoỹasenem da' ỹalic, da' 'uootaxa 'ená'am jeso'me 'uootaxa saua' liquiáxa'u, na'chínata na' letaxaỹáxanaxanecpi na' siỹaxadipi da' qodetaxaỹapégue' ñi' Dios. 5Qataxa ¿sa 'te 'autaxaỹaxañiỹo' naua' laqátaxaco so' Moisés da' jénjo' netaxaỹáxanaxanecpi 'me d'onataxáatapegooue jeso' tamnaxaqui da' jen'me sa 'te da' nematéegue di' nolo' mataxaqui, qaláxasa taqadíta qaỹa ga' lasouaxaset? 6Jaỹim 'ami senapegalo da' 'uo ga' huét'a jénjo' 'me ỹátaqta napacalégue da' l'amaqchic jiñi' 'chi tamnaxaqui di' Jerusalén. 7'Ami sa 'te da' ỹátaqta 'auaỹáchiñii ga' naỹilo naua' nidii's l'aqtaqa ñi' Dios, 'me 'eet'oi: “Jaỹim sétaaque da' 'ami 'auchoxodénataxañii, sa 'te da' naqaida da' 'auañíiuo da' qoỹavíỹaxat ga' síiỹac da' 'adasaqásiqui.” Qá'a da' 'ami 'auaỹáchiñiita dójo', qana'chi sa 'te 'auauóỹaaque toqo' ga' lasouaxaset jega'me qaỹa ga' ỹasouaxat. 8Qá'a jen'me siỹaxaua lec'óxot, jen'me nataq'en 'uo da' 'enec da' 'uo ga' damaxasoxolégue da' qoỹí'et di' nolo' mataxaqui.

Jeso'me siỹaxaua 'me qaqáta na' louaq

(Marcos 3.1-6; Lucas 6.6-11)

9Qana'chi so' Jesús jec, qana'chi tauó'o so' lemáxaqui na' judiopi. 10Huét'a jeso' nemáqa' so' siỹaxaua 'me qaqáta na' louaq. Qá'a sétaaque da' qoỹauana ga' qoỹíit'ec da' qoỹa'uo ga' lasouaxaset so' Jesús, qana'chi qoỹinat, qoỹiit'oi:

—¿Séetapega qoỹaséeta da' qonataden ga' leuaxaic di' nolo' mataxaqui?

11Qana'chi so' Jesús 'enaaco':

—¿Jái'chogamaxa 'oonolec da' 'oñíita, da' 'uootaxa huétooue ga' nolo' mataxaqui, da' jaga' lalo n'aanaxate ta'nỹi jaga' nesede, da' 'uootaxa sa jec da' naqadiséguem? 12Qá'a ¡ga' siỹaxaua ỹátaqta napacalégue da' laso'víỹaxac jaga'me 'chi n'aanaxate! Chan'eesa 'ónaxaic da' qoỹí'et ga' ỹiỹamqáchiiñi naua' noloqo'te 'me mataxaqui'.

13Qana'chi so' Jesús 'enapego' so' siỹaxaua, 'enaaco':

—Ỹa 'auanodéegue na' 'adouaq.

Qana'chi joca'li 'chi nodéegue na' louaq, qana'chi n'óota, 'ená'am na' louaq laqáỹa. 14Qana'chi so' fariseopi ỹinoxonéegue da' detaxaỹapíỹi ga' lasoxoc da' qoỹalaat so' Jesús.

Da' n'aqtaguec so' Jesús joca'li

15So' Jesús joca'li ỹaỹáten dójo', qana'chi cá'ai jidi'me huét'a. Qana'chi ỹátaqta jalcote jeso'me siỹaxadipi 'me ỹic'átet'ague jeso'me. Qana'chi jeso'me nataden ỹima jen' leuaxaicpi. 16Qana'chi ỹanem da' l'aqtac, qaidi sa 'te da' qoỹ'axat da' jái'chosomaxa jeso'me. 17Naq'áita dójo', qaidi ỹipaquíchiỹi joca'li jeda'me l'aqtaxanaxac so' l'aqtáxanaxanec ñi' Dios 'me lenaxat Isaías jocalia'cho' 'enaaco':

18Jega'me na'chiga ga' mai'chi ỹamaxasec, jega'me mai'chi ỹiquiỹac,

qataxa ỹátaqta ỹauotaxat jega'me, ỹátaqta ñitóotapeec.

Jega'me d'onataxanóoue qasen ñi' ỹipaqal,

da' qaidi ỹ'axátem jen'me ỹodapecachi siỹaxadipi jeda'me séetapeec da' ỹí'et.

19Jega'me sa 'te da' c'onaxanaxaic, qataxa sa 'te da' ỹ'alqata't,

qataxa sa 'te da' qodemachítapega ga' l'aqtac da' huéta'nỹi ga' naq'aic.

20Qataxa sa 'te da' 'chi ỹinoxonỹi jaga' coqta 'me namaq,

qataxa sa 'te da' ỹalamat jega'me necoỹadáxanaxat 'me 'chi dechitapeelégue,

cha ỹivíd'a da' ỹim da' lapaxañi ga' l'onataxanaxac 'me ỹátaqta ỹiỹamqáchiiñi.

21Qana'chi ỹima jen'me ỹodapecachi siỹaxadipi ỹátaqta 'uo da' lepé'e jeso'me.

So' Jesús qoỹíitapega 'uo ga' lé'ec nataqtáqaic

(Marcos 3.19-30; Lucas 11.14-23; 12.10)

22Huá'a, qana'chi qoỹauée'uo so' Jesús so' siỹaxaua 'me qanam qataxa qaỹaua naua' l'aqtaqa. Jeso'me 'uo so' lé'ec nataqtáqaic. Qana'chi so' Jesús ỹiméegue qa'en jeso'me, qana'chi jeso'me siỹaxaua nauáachiiñi, qataxa huo'oi naua' l'aqtaqa. 23Qana'chi ỹima so' siỹaxadipi ỹátaqta ỹ'aalát'ec, qana'chi 'enaaco':

—¿Séetapega na'chida jeda'me lec'óxot so' net'a David dójo'?

24Qaláxasa jeso'me fariseopi joca'li demachíchiỹi dójo', qana'chi 'enaaco':

—Dójo' siỹaxaua 'me ỹ'odétapegueegue jen' né'ec nataqtáqaicpi, qaláxasa d'otáxatapega da' l'añaxac so' paiỹac Beelzebú 'me lasoxola' jen' né'ecpi.

25Qaláxasa so' Jesús ỹaỹáteetac da' leenataxac jeso'me fariseopi, qana'chi 'enapego', 'enaaco':

—Ga' net'alpi da' 'uootaxa niỹotapecachi, qana'chi mai'chi deloiỹa't, qana'chi jega'me taỹá'a da' noláiñi. Qataxa ga' noic, 'uootaxa ga' naqáỹa', da' 'uootaxa niỹotapecachi, qana'chi jegaa'me sa na'chi 'eeta't. 26Qana'chi naq'áita nataq'en so' paiỹac Satanás, da' 'uootaxa sega'me mai'chi n'odétapeela't, qana'chi jeso'me 'ená'am da' mai'chi nep'aguéetapeela't. ¿Hua'ague toqo' da' na'chi 'eeta't da' l'añaxac? 27'Ami 'aviñíitapecogamaxa jaỹim s'otáxatapega da' l'añaxac so' paiỹac Beelzebú, da' s'odáiỹi jen' né'ecpi nataqtáqaicpi. Qaláxasa da' na'chi naq'áita dójo', qana'chi ¿jái'chogamaxa qoỹanem ga' l'añaxac jen' 'ami quétapee'to, da' qaidi ỹ'odéegue jen' né'ecpi? Tadeno' jen'me naqáina na' ỹichoxot da' 'adesómaxaquii. 28Qaláxasa jaỹim chiỹoqóchiỹi da' l'añaxac so' ne'Espíritu ñi' Dios da' s'odáiỹi jen' né'ecpi nataqtáqaic. Jeda'me náỹi da' ma'le 'ami nivitalo da' l'onataxanaxac ñi' Dios da' ỹilo'ogue ỹima jen' 'aléua.

29Qá'a sa 'te da' qoỹinoxonóoue ga' l'emec ga' siỹaxaua 'uañaxaic da' qodeuootáxanec na' loxosetpi, da' 'uootaxa sonaliaxa da' qoỹicoñaxada't jega'me. Na'chidáta da' sóxote qoỹicoñaxada't, qana'chi ỹímta ỹañoxot da' qodeuootáxanec na' loxosetpi.

30Ga' jaỹim ỹiỹotét'a, qana'chiga ga' jaỹim nep'aguéetapega. Qataxa ga' sa 'te da' ỹatóonaxaua, qana'chiga ga' ỹilagaxatétapiỹi jega'me s'étetac.

31Tadeeto' jaỹim 'ami senapegalo na' siỹaxadipi ỹima qoỹañoxot da' qoỹapalaxat jen' loicpi qataxa jen' sa nó'in l'aqtacpi 'me nasaqápeegue, qaláxasa naua' nasaqádapegueegue naua' l'aqtaqa 'me nep'aguee'to so' Espíritu Santo, na'chinaua naua' ỹ'e't da' qaỹa ga' nichoxodénataguec. 32Qataxa gamachaqaiga siỹaxaua, da' 'uootaxa ỹisouen jen' siỹaxaua lec'óxot, qaláxasa jega'me ỹañoxot da' qoỹichoxoden. Qaláxasa ga' nasaxáiỹi ga' l'aqtac da' 'uootaxa 'en nep'agué'ne' so' Espíritu Santo, qana'chi jega'me qaỹa ga' nichoxodénataguec, da' 'uootaxa maliaxa huetalégue jen' 'aléua, qataxa jega'me maliaxa nátauo.

Jaga' 'epaq mai'chi qoỹaateton jaga' jala

(Lucas 6.43-45)

33Jaga' 'epaq da' 'uootaxa 'ónaxai, qana'chi ỹátaqta 'ónaxaic da' jaláỹaxac. Qataxa jaga' 'epaq da' 'uootaxa sa nó'in, qana'chi nataq'en sa nó'in jan' jala. Qana'chi jaga' 'epaq mai'chi qoỹaateton da' jaláỹaxac. 34¡'Ami nanaic lec'oqtepi! ¿Taalia'chi toqo' da' 'ónaxaic ga' 'ad'aqtaquii, da' 'ami 'itaxalóxoiqa? Qá'a jen'me qandégaxat nasaqápegueegue jen' ỹátaqta saqáchiỹi jañi' qadiquidiaqte. 35Jega'me 'ónaxaic siỹaxaua da' detaqa, qaa'le 'ónaxaiqa naua' l'aqtaqa, qá'a jeda'me 'ónaxaic huétaỹi jañi' liquidiaqte. Qataxa jega'me 'itaxalóxoic siỹaxaua da' detaqa, qaa'le sa n'oi'n naua' l'aqtaqa, qá'a jeda'me sa nó'in huétaỹi jañi' liquidiaqte. 36Jaỹim 'ami senapegalo jega'me nolo' qomle qonimit ỹima jen' siỹaxadipi, qana'chi ỹima qomle na' siỹaxadipi mai'chi ỹichoxot jen' l'aqtacpi 'me qaỹa ga' náỹi 'me nasaqápegueegue joca'li. 37Qá'a qomle 'am qonimit, qana'chi qochiỹoxotaiỹilo naua' 'ad'aqtaqa da' qoỹa'uo ga' 'adasouaxaset, 'uootaxa qaỹa.

Jen' 'itaxalóxoicpi siỹaxadipi ỹiỹáxataaque da' qoỹí'et ga' n'anec 'me sa qoỹauanápiỹi

(Marcos 8.12; Lucas 11.29-32)

38Qana'chi so' fariseopi qataxa so' dapaxaguenataxáatapeec na' naqátaxacpi 'enapego' so' Jesús, 'enaaco':

—'Am 'me paxaguenataxanaxaic, sétaaque da' 'am sauanáqchiỹi da' 'aué'et jega'me n'anec 'me sa qoỹauanápiỹi.

39Qana'chi so' Jesús 'enaaco':

—Jen'me siỹaxadipi 'me 'itaxalóxoicpi qataxa cá'ai ñi' Dios, jen'me naỹi ỹiỹáxataaque da' qoỹí'et ga' n'anec 'me sa qoỹauanápiỹi. Qaláxasa sa qoỹanem qomle jega'me, qá'a na'chisóta jeso'me n'anec 'me huápiỹi jocalia'cho' so' l'aqtáxanaxanec ñi' Dios, lenaxat Jonás. 40Qá'a dójo' 'éeta so' Jonás joca'lio' ỹovi't saua' tres noloqo'te qataxa tres saua' pi'ỹáxadi da' huétaaue so' lauel jaso' lat'e jen' níỹaq, naqaida qomle da' 'éeta nataq'en jen' siỹaxaua lec'óxot da' ỹivi't gaua' tres noloqo'te qataxa tres pi'ỹáxadi da' huétaaue jen' 'aléua. 41Jeso'me siỹaxadipi 'me l'acháqa' joca'li di' noic t'ádaic Nínive, jeso'me qomle nichaachiñi jega'me nolo' qomle qonimit ỹima jen'me siỹaxadipi, qana'chi ỹa'uo ga' lasouaxaset jen'me siỹaxadipi. Qá'a jeso'me l'acháqa' di' Nínive ỹaxadéegue jocalia'cho' naua' loico, joca'li ỹ'axátem da' l'aqtac ñi' Dios jeso'me l'aqtáxanaxanec, lenaxat Jonás. Qaláxasa naỹi ma'le 'ami huetaavlo ga' ỹátaqta napacalégue jeso'me Jonás. 42Nataq'en jaso'me nat'e 'me l'acháqa' da' taỹíñi, jaso'me qomle nichaachiñi ga' nolo' qomle qonimit ỹima jen' siỹaxadipi, qana'chi ỹa'uo ga' lasouaxaset na' siỹaxadipi. Qá'a jaso'me chiỹoqóchii'ña joca'li jidi'me ỹátaqta sa qoỹoqót'a 'aléua da' naquiáxana da' laỹátenaxanaxac so' net'a Salomón. Qaláxasa naỹi ma'le 'ami huetaavlo ga' ỹátaqta napacalégue jeso'me Salomón.

Jeso' né'ec nataqtáqaic 'me v'iỹílaxa ga' l'emec

(Lucas 11.24-26)

43Ga' né'ec nataqtáqaic da' ỹivíta da' cá'ai ga' siỹaxaua, qana'chi jec, huetalégue ga' totelégue 'aléua, nimitétaaque ga' nemataqa'. Da' sa ỹauana, qana'chi 'uo da' leenataxac, 'enaaco': 44“Jaỹim n'óota da' s'iỹílaxa ñi' ỹ'imec 'me sachiỹoqtooue ca'li.” Da' ỹivíta da' v'iỹílaxa jeso'me siỹaxaua, qana'chi ỹilápegooue da' 'ená'am ga' 'emec 'me qaỹa ga' nétaaue, qoỹipolquíchiỹi qataxa qoỹiỹamaxatéta. 45Ỹim, qana'chi v'iỹílaqteegue da' ỹap'iina'alo saua' laqáỹa' siete 'me ỹátaqta napacalóo'te jeso'me. Huá'a, qana'chi 'ena'uaque jesaa'me tadóoue jeso'me siỹaxaua. Huá'a, qana'chi jeso' siỹaxaua ỹátaqta ỹágueegue da' jaloic, sa 'ená'am so' 'uáichiiñi. Naqaida qomle da' 'éeta nataq'en jen'me siỹaxadipi 'me 'itaxalóxoicpi.

Jaso' lat'e qataxa saua' laqáỹa' so' Jesús

(Marcos 3.31-35; Lucas 8.19-21)

46So' Jesús maliaxa detaqátapegooue jeso' siỹaxadipi, qana'chi joca'li nivídeuo jaso' lat'e qataxa saua' laqáỹa'. Jesaa'me p'átraiỹi da' sétaaque da' dosédapegue' jeso'me. 47Qana'chi 'uo so' 'oonolec d'aqtaxanem so' Jesús, 'eet'oi:

—Jada' 'adat'e qataxa daua' 'adaqáỹa' huo'oi, jedaa'me p'átraiỹi. Sétaaque da' 'am dosédapegue'.

48Qaláxasa jeso'me Jesús 'enapego' jeso'me nedótauo so' n'aqtac, 'enaaco':

—¿Jái'chaga'me ỹat'e? qataxa ¿jái'chogaamaxa ỹaqáỹa'?

49Qana'chi ỹiquétoovlo saua' lapaxaguenataqa, qana'chi 'enaaco':

—Jénjo' na' 'ená'am jaga' ỹat'e qataxa gaua' ỹaqáỹa'. 50Qá'a gamachaqaiga siỹaxaua, da' 'uootaxa ỹí'et ga' 'éetapeec ñi' ỹit'a 'me net'ague da' piỹem, qana'chiga jega'me ỹaqáỹa qataxa jaga'me ỹaqáỹa qataxa jaga' chidéna'.

Currently Selected:

Mateo 12: PLGNT93

Highlight

Copy