Mateo 11

Saua' lamaxa's so' Juan 'me chiláxanataxanaxaic

(Lucas 7.18-35)

1So' Jesús joca'li ỹimat da' ỹanema saua' doce lapaxaguenataqa da' laqátaxac, qana'chi cá'ai di' huét'a, qaidi dapaxaguenataxaalégue qataxa d'aqtaxaalóo'te naua' 'ale'u laqáỹa' jidi' qouét'a 'aléua.

2So' Juan 'me nétaaue jaso' necointáxanaxaqui, jeso'me ỹivíde'uo da' ỹaỹáten ỹima na' ỹí'etpi so' Cristo. Huá'ña, qana'chi huo'oi saua' ỹama' jeso'me quétapegue'pi jeso'me, da' qaidi ỹic'ádeta so' Jesús, 3da' qaidi ỹina't, 'enaaco':

—¿Séetapega na'chi'am 'me 'am net'a nec'alaxaqui 'me qoỹíitapega 'auanac joca'li, 'uootaxa 'chi seuataqátaaque ga' laqáỹa?

4Qana'chi so' Jesús 'enaaco':

—'Auquelóliita qomle, 'au'axáchiim qomle ga' Juan ỹima jen'me 'auauañíichiỹi qataxa na' 'anaquiáxañiichiỹi. 5'Au'axáchiim jega'me jen' qanam, qaa'le nelóiỹi, qataxa jen' ñ'ideuo naua' lichil, qaa'le ỹiuoỹapiỹe't, qataxa na' dola ló'oc, qaa'le ỹiméegue, qataxa na' sa demachíỹaac, qaa'le ỹañoxot da' demachíỹaac, qataxa na' sóxote ỹileu, qaa'le qonec'alaxadiséguem, qataxa jen' choxodaicpi, qaa'le qoỹ'axátem da' n'aqtac 'me nec'alaxaqui. 6Ỹátaqta máchiiñi qomle ga' sa jaỹim ỹoqolguet.

7Joca'li ma'le jéque' jesaa'me lamaxa's so' Juan, qana'chi so' Jesús 'ecot da' ỹ'axátetapeguem so' siỹaxadipi so' Juan, 'enaaco':

—¿Jái'chosomaxa 'ami 'auc'atenaxañíitapeguee'ga di' totelégue 'aléua? ¿Séetapega coqta da' dachólaxaatac qa'en na' laỹat jeso'me? 'Ai'. 8¿Jái'chiso jeso'me 'auc'atenaxañíitapeguee'ga? ¿Séetapega ỹátaqta 'ónaxaiqa naua' louo jeso'me? 'Ami 'auaỹáchiñii na' siỹaxadipi 'me ỹátaqta 'ónaxaiqa naua' louo, jen'me netaavlo naua' l'emáqa na' net'alpi. 9Qana'chi ¿jái'chosomaxa 'auc'atenaxañíitapeguee'ga? ¿Séetapega l'aqtáxanaxanec ñi' Dios jeso'me? Já'a, ỹátaqta 'eesa n'aqtáxanaxanec. Qataxa jeso'me ỹátaqta napacalégue ga' l'aqtáxanaxanec ñi' Dios. 10Qá'a so' Juan na'chiso jeso'me ỹ'axa't joca'lio' naua' nidii's l'aqtaqa ñi' Dios, 'me 'eet'oi:

Jaỹim samaq qomle ga' ỹ'aqtáxanaxanec da' s'áuaxangue da' 'at'ague,

qaidi ỹaqátaxata't ga' 'adadic.

11Ỹátaqta 'eesa dójo' 'ami senapegalo da' ỹima na' siỹaxadipi joca'lio' da' chiỹoqot'egue, cha ỹivíde'ta naỹi, da' qaỹa ga' ỹañoxot da' napacalégue da' l'amaqchic so' Juan 'me chiláxanataxanaxaic. Qaláxasa jen'me ỹágueegue da' qaỹa ga' l'amaqchic da' huétaaue jeda'me l'onataxanaxac ñi' Dios 'me net'ague da' piỹem, jen'me napacalégue jeso'me Juan.

12Chiỹoqót'a joca'li nóvi' so' Juan 'me chiláxanataxanaxaic, cha ỹivíd'a naỹi, da' ỹátaqta 'uo da' necouaxánataguec da' dójo' l'onataxanaxac ñi' Dios 'me net'ague da' piỹem. Qataxa jen' d'onataxáatapega da' ỹ'oqóchiỹi l'añaxac, jen'me sétaaque da' deuootáxanec jeda'me. 13Ỹima so' l'aqtáxanaxanecpi ñi' Dios qataxa na' laqátaxacpi so' Moisés, jena'me ỹ'axátetr'aguet joca'lio' dójo' n'onataxanaxac, cha ỹivíd'a da' nóvi' so' Juan. 14Qataxa da' 'ami sétaaque da' 'au'amaqchíñii dójo', na'chiso so' Juan 'me liquí'i so' Elías jeso'me l'aqtáxanaxanec ñi' Dios 'me qoỹíitapega joca'lio' da' n'iỹílaq jeso'me. 15Jega'me ỹaỹáten da' naquiáxanaxac, qana'chi n'óota da' ỹátaqta naquiáxachiiñi.

16¿Jái'chogamaxa saloqtenaxana jen' siỹaxadipi 'me huetaavlo naỹi nauójo' noloqo'te 'me souqataavlo? Séetapega 'ená'am na' ñoqolqapiolec 'me huét'a ga' neuálaxaiqa', qana'chi ỹiỹáxataaque ga' leuálaxaỹaxaua, 'eet'oi: 17“Saseedáqtapiilo naua' qadaseedel, qaa'le 'ami sa 'auasochii; qataxa s'onaqat'ape naua' lalaco na' huasouaxaicpi, qalqaiga sa 'anoiñíitac.” 18Qá'a janac so' Juan, qaa'le jeso'me sa 'te da' dequé'e, qataxa sa 'te da' niỹómtac, qana'chi 'ami 'aviñíitapega da' 'uo ga' lé'ec nataqtáqaic. 19Ỹim, qataxa janac na' siỹaxaua lec'óxot, jen'me de'quétac, qataxa niỹómtac, qana'chi 'ami 'aviñíitapega da' jen'me qui'ỹáxaic, ỹómaxaic qataxa nauotaxaua na' 'itaxalóxoicpi qataxa na' ỹaconapeeguet jan' neseeténaqte ga' net'a Roma lé'ec. Qaláxasa da' laỹátenec ñi' Dios di'ỹoq ga' náỹi.

Saua' noiqa 'me sa ỹala'

(Lucas 10.13-15)

20Qana'chi so' Jesús ỹátaqta ỹivídaxatetapega na' néta'ña na' noicpi 'me huá'ña da' ỹágueegue na' ỹí'et 'me sa qoỹauanápiỹi, qá'a jen' siỹaxadipi neta'ñalo, jenaa'me sa 'te da' ỹaxadéegue naua' loico. Qana'chi 'enaaco':

21—¡Ỹátaqta 'ami choxodaiqolqa, 'ami 'me 'oñíita'ña di' noic Corazín! ¡Nataq'en 'ami 'me 'oñíita'ña di' noic Betsaida! Qá'a na' néta'ña di' noic Tiro qataxa di' Sidón, da' 'uootaxa huá'ña toqo' na'me qoỹí'etpi 'me 'ami huaavlo, qana'chi sóxote ca'li jidi'me da' ca'ai naua' loico, qataxa da' naloxóota da' ỹaadíñi naua' louo na' huasouaxaic qataxa da' necodíỹi na' jálo. 22Chan'eesa 'ami senapegalo da' jega'me p'áteegue nolo' qomle qoỹa'uo ga' ne'uaxánaguec jen' 'aléua, qana'chi 'ami ỹátaqta p'asáiỹi ga' 'ane'uaxánaguiquii, sa 'ená'am na' néta'ña di' Tiro qataxa di' Sidón. 23Qataxa 'am noic Capernaum, ¿'am 'auéetapecogamaxa da' 'am qoỹividaxat'ot di' piỹem? Qaláxasa 'am qon'iỹílaxachiñi qomle, qana'chi ỹátaqta 'avída'ña jega'me laponqa' na' napa'lpi. Qá'a di' noic Sodoma da' 'uootaxa huá'ña toqo' na' sé'etpi 'me huáaue da' 'oñíita, qana'chi jeso' noic ỹañoxot taa'le da' ỹivídaavlo naua' noloqo'te 'me souqataavlo. 24Qaláxasa jaỹim 'ami senapegalo da' jega'me p'áteegue nolo' qomle qoỹa'uo ga' ne'uaxánaguec jen' 'aléua, qana'chi 'ami ỹátaqta p'asáiỹi ga' 'ane'uaxánaguiquii, sa 'ená'am jeso'me siỹaxadipi 'me néta'ña di' 'aléua Sodoma.

Jaỹim 'anec'áta, qaidi 'anmatéegue

(Lucas 10.21-22)

25Qana'chi jeso' nolo' so' Jesús 'enaaco':

—'Am ỹit'a 'me 'am lasoxola' na' net'ague da' piỹem qataxa jen' 'aléua, 'am si'ỹoxoden, qá'a 'am 'aualoxóna na' qaỹa 'te ỹaỹátenaac da' 'ad'onataxanaxac 'me 'auoxochi'nsop joca'lio' na' ỹátenaxanaxaicpi qataxa na' jáatetonaxanaxaicpi. 26Já'a, 'am ỹit'a, qá'a na'chida da'me mai'chi 'adeenataxac.

27Ñi' ỹit'a jaỹim ỹimato'ot ỹima da' l'onataxanaxac. Qaỹa ga' ỹañoxot da' ỹaateton jen' lec'óxot, na'chiñíta jiñi'me 'me ỹaateton. Qataxa qaỹa ga' ỹañoxot da' ỹaateton jiñi'me, na'chínata jen'me lec'óxot 'me ỹaateton, qataxa jega'me ỹaatetonaxanaxanec jiñi'me na' lec'óxot. 28'Auanaỹiquína jaỹim 'animíi'ỹa 'me 'adiliñíiñi, ỹasouaxat da' 'ad'onataxanaxaquii qataxa ỹasouaxat na' 'adi'ỹáquii, qana'chi jaỹim 'ami ñimataxadéegue. 29'Auacoñiiỹet qomle jen' ỹachoxónaxala' 'me 'ami sachalóo'te qataxa jaỹim 'anapaxaguiñíỹa, qá'a ỹátaqta jaỹim pogáxadaic qataxa jañi' ỹiquidiaqte sa n'amaqténaxai, qana'chi 'auañoxochii qomle da' 'auanachíiỹa ga' nemataxac da' 'anchaalataxaquii. 30Jen' ỹachoxónaxala' 'me 'ami sachalóo'te, jen'me ỹátaqta qaỹa ga' laqalaic da' qoỹáchi, qataxa jen'me 'adi'ỹáquii 'me 'ami sachalóo'te ỹátaqta sa desali da' qoỹáchi.

Currently Selected:

Mateo 11: PLGNT93

Highlight

Copy