Mateo 10
10
So' Jesús liquiỹáqa saua' doce lamaxa's
(Marcos 3.13-19; Lucas 6.12-16)
1Qana'chi so' Jesús ỹiỹáxanalo saua' doce lapaxaguenataqa, qana'chi ỹanema da' n'añaxac, da' qaidi ỹañoxo't da' ỹ'odédaiỹi na' né'ecpi, qataxa da' natade'n ỹima jen' ỹodapecachi neleuaxa qataxa jen' nauaq.
2Náajo' naua' lenaqa'te saua' doce lamaxa's, 'eet'oi: Simón da' lenaxat laqáỹa Pedro, qataxa so' laqáỹa Andrés; Jacobo qataxa so' laqáỹa Juan, jesaa'me lec'óqo'te so' Zebedeo; 3qataxa so' Felipe, Bartolomé, Tomás qataxa so' Mateo jeso'me ỹaconapeeguet joca'li jana' neseeténaqte ga' net'a Roma lé'ec; Jacobo jeso'me lec'óxot so' Alfeo; qataxa Lebeo da' laqáỹa lenaxat Tadeo; 4Simón 'me huétaaue na' judiopi 'me sétaaque da' ỹ'odáiỹi jen' Roma lé'ecpi; qataxa so' Judas Iscariote 'me ỹaneuó'o jocalia'cho' so' nep'aguénoqo'tpi so' Jesús.
So' Jesús ỹama' saua' lapaxaguenataqa da' d'aqtaxa'n
(Marcos 6.7-13; Lucas 9.1-6)
5So' Jesús ỹama' saua' doce lapaxaguenataqa, ỹanema da' l'aqtac, 'enaaco':
—Sa 'te qomle da' 'auc'achiỹalo naua' 'ale'u 'me netalóo'te jen' sa judiopi. Qataxa sa 'te qomle da' 'auc'áchii'uo na' noicpi 'me náaue di' Samaria. 6Na'chidáta qomle da' 'auc'áchiỹa jen'me lec'oqtepi so' Israel 'me 'ená'am jaga' n'aanaxate 'me ỹisómtac. 7Qana'chi 'au'axáchiim qomle da' ma'le sa qaỹáaque da' l'onataxanaxac ñi' Dios 'me net'ague da' piỹem da' ỹilo'ogue ỹima jen' 'aléua. 8Qataxa 'anatadíñii qomle na' leuaxaicpi, qataxa 'anec'alaxachiiséguem jen' sóxote ỹileu, qataxa ỹiméegue 'aviñii jen' dola ló'ocpi, qataxa 'au'odíỹaiỹi na' né'ecpi nataqtáqaicpi. Dójo' n'añaxac, jeda'me 'chi 'ami qoỹanema, chan'eesa sa 'te qomle da' 'ausiichíñii da' 'au'onataxañíiỹa.
9Qataxa sa 'te qomle da' 'auachíỹi jaga' 'anaicauai 'me chiỹaqaỹi jan' 'oro, 'uootaxa plata, 'uootaxa jan' cobre, 10qataxa ga' lai't ga' 'oqoi na' naq'aic. Qataxa 'oonolec ga' 'auachíỹi 'ansomaxaquii, qataxa gaua' 'adapela'chídii' qataxa gaua' 'adaselchídii'. Qá'a ga' 'onataxanaxaic ỹátaqta tasá'aguet da' ỹaconguet ga' jaloq.
11'Ami da' 'uootaxa 'uo ga' 'avídii'uo noic, 'uootaxa noicolec, qana'chi 'aunataxañiỹáaque ga' siỹaxaua 'me ỹátaqta nepé'et. Na'chiga 'oví'ỹa ga' l'acháqa', cha ỹivíd'a da' ỹitaxa 'oquíỹi. 12Da' 'aunoxoñiiuó'o jega'me 'emec, qana'chi 'ap'iỹénataxañii, 'oñiit'oi: “'Uo qomle da' 'adelagaxadíquii.” 13Jega'me lalémaxaset jega'me n'acháqa', da' 'uootaxa ỹaconguet, qana'chi 'an'ónaxachiỹa'aguet dójo' 'adip'iỹéntaxanaxaquii 'me náỹi da' nelagaxadic. Qaláxasa da' sa 'te da' ỹaconguet, qana'chi 'an'iỹílaxachiila't jeda'me 'adip'iỹéntaxanaxaquii. 14Da' 'uootaxa sa 'te da' 'ami ỹacongueta, 'uootaxa sa 'te da' 'ami naquiáxanalo, qana'chi 'oquí'ỹai jega'me n'acháqa', 'uootaxa jega'me noic. Ỹim, qana'chi 'anchiỹoqoỹíñi jen' 'enáaỹaxa 'me huetaỹilo naua' 'adapia'chídii'. 15Ỹátaqta 'eesa dójo' 'ami senapegalo da' qomle ỹivíta jega' nolo' 'me huáaue da' qan'étoqo't nimit ỹima jen' 'aléua, qana'chi ga' ne'uaxánaguec jega'me noic ỹátaqta napacalégue qomle da' ne'uaxánaguec jeso'me siỹaxadipi 'me néta'ña joca'lio' di' noic Sodoma qataxa di' Gomorra.
Da' necanáguec jen'me 'equegue so' Jesús
16¡'Anaquiáxañiichiỹi dójo' senaac! Jaỹim 'ami sama', qaláxasa 'oñí'ỹam qomle jan' n'aanaxate da' quíchiinỹi ga' síiỹacpi 'me di'quiỹaac. Qaláxasa ỹátaqta sa 'anqaláachi qomle, 'oñí'ỹam na' nanaic, qaa'le sa 'auacoñiỹa'aguet ga' 'adó'oi, 'oñíit'em na' doqoto'. 17Ma'chaxa qomle, qá'a na' siỹaxadipi qomle 'ami ỹauee'ualo na' net'alpi 'me ỹí'et jen' nasoxocpi, qaidi 'ami qoỹi'uaxáat'ape da' 'ovíỹaaue jana' lemáxaqui jen' judiopi. 18Qataxa ỹivíd'a qomle da' 'ami qoỹauee'ualo jen'me ỹilot'ailo naua' 'ale'u, qataxa na' let'alpi, ỹasouaxat da' jaỹim 'oquiỹiỹi. Huá'a, qana'chi 'auañoxochii da' jaỹim 'au'axáchii da' 'au'aqtaxañiim na' net'alpi qataxa na' sa judiopi. 19Qaláxasa da' ỹivíta da' 'ami qoỹaneua'alo nójo' net'alpi, qaláxasa sa 'te qomle da' 'ami ỹaquicoqte't ga' 'éeta ga' 'adetaxaỹaxaquii, 'uootaxa ga' 'ad'aqtaquii. Qá'a da' ỹivíta ga' lalóqo' da' 'autaqai, qaa'le ñi' Dios 'ami ỹanema ga' 'ad'aqtaquii. 20Qá'a sa 'te da' na'chi'ami da' 'autaqai, qá'a jeso'me ne'Espíritu ñi' 'adet'ai Dios, naqaiso jeso'me 'ami ỹosáxanaxa'n.
21Na' siỹaxadipi ỹ'étec qomle ga' laqaỹasa da' qoỹalaat, qataxa ga' siỹaxaua ỹ'étec qomle ga' lec'óxodesa da' qoỹalaat. Qataxa ga' nesoqolec mai'chi nep'agué'ne' ga' let'a, qana'chi damaxasoxolégue da' qoỹalaat. 22Qataxa ỹima qomle jen'me huetalégue jen' 'aléua ỹátaqta 'ami niquiỹa'alo, ỹasouaxat jaỹim 'oquiỹiỹi. Qaláxasa ga' qaỹa ga' ỹoqo'cha, cha ỹivíde'ta ga' loiquiaqa' da' l'óiỹaxac, qana'chiga ga' qonec'alaxatéegue. 23Da' 'uootaxa 'ami qoỹicana'pe da' 'uootaxa 'ovíit'a ga' noic, qaa'le 'anélotaxañiỹa ga' laqáỹa. Qá'a jaỹim 'ami senapegalo jen'me siỹaxaua lec'óxot ma'le nóvi' qomle maliaxa da' 'aumachii da' 'aucolñíiỹi ỹima jen'me noiqapi 'me l'acháqa' na' lec'oqtepi so' Israel.
24Sa 'te da' 'uo ga' 'chi napaxaguenatac da' 'uootaxa napacalégue ga' napaxaguenoqo't, qataxa ga' 'chi namaxasec sa 'te da' napacalégue ga' n'aco'. 25Chan'eesa ga' 'chi napaxaguenatac ỹañoxot qomle da' máchiiñi qa'en da' ỹivíta da' 'ená'am ga' napaxaguenoqo't, qataxa ga' 'chi namaxasec da' ỹivíta da' 'ená'am ga' n'aco'. Qá'a ga' nasoxola' ga' n'acháqa' da' 'uootaxa qoỹinapéga lasoxola' na' paiỹagodipi, qana'chi ¿hua'ago' ga' qoỹíit'ec da' qodetaxaỹá'a jega'me lec'oqtepi?
Ga' ỹátaqta p'asáiỹi da' noqolánaxa
(Lucas 12.2-9)
26Chan'eesa 'ená'te qomle da' 'au'óitapega na' siỹaxadipi. Qá'a qaỹa 'te taa'le sa di'ỹoq ga' lasoxoc da' 'uootaxa sa qonóma, qataxa qaỹa 'te 'uo ga' qoỹoxotétapiiñi da' 'uootaxa sa qoỹauana. 27Da' jaỹim 'ami senapegalo da' huáaue ga' l'álaxa, qaa'le 'au'axáchii qomle 'ovíitaaue ga' ỹ'oqóchiiñi; qataxa ga' 'chi 'ami ñisóxot'oto da' 'ami s'axatema, qaláxasa ỹátaqta 'an'alqaiséguem da' 'anasaqáỹiiỹi da' hualégue na' lóvi' ga' 'emec. 28Sa 'te qomle da' 'au'óiỹa ga' siỹaxaua 'me ỹañoxot da' ỹalaat da' qadó'oquiaxac, qaa'le sa ỹañoxot da' ỹalaat jeso'me qadepaqal. Na'chidato' qomle da' 'au'óiỹa ñi' Dios 'me ỹañoxot da' noláxachiñi da' qadó'oquiaxac qataxa jeso'me qadepaqal, da' ỹasaxá'ña ga' ne'uaxánaqa' na' 'itaxalóxoicpi.
29Qá'a ỹañoxot da' qoneuodenalo gaua' doosolqa máỹo'olqa jaga' laseete' qoỹin jaga' 'oonole laicaua lai. Qaláxasa sa 'te da' 'uo ga' 'oonolec jen'me da' 'chi talégue jen' 'aléua qa'en ñi'me 'adet'ai. 30Qá'a ỹivíd'a na' laỹoxot ñi' 'oonolec da' 'oñíita ỹátaqta qonaloqtéeta. 31Chan'eesa sa 'te qomle da' 'au'óitac, qá'a 'ami ỹátaqta 'anapaquiỹalégue da' laso'víỹaxac ga'me jalcote máỹo'piolec.
Jen'me d'aqtaxanem jen'me siỹaxadipi da' 'equegue so' Cristo
(Lucas 12.8-9)
32Ỹima jeso'me ỹ'axátem na' siỹaxadipi da' jaỹim 'equegue, jaỹim nataq'en s'axátem qomle jen'me siỹaxadipi ñi' ỹit'a 'me net'ague da' piỹem. 33Qaláxasa ga'me sa 'te da' ỹ'axátem na' siỹaxadipi da' jaỹim 'equegue, jaỹim nataq'en sa 'te da' s'axátem qomle jega'me ñi' ỹit'a 'me net'ague da' piỹem.
So' Jesús 'en huesoỹi na' siỹaxadipi
(Lucas 12.51-53; 14.26-27)
34Sa 'te qomle da' 'aviñíitapega da' jaỹim ñidá'a jen' 'aléua da' nelagaxadic. Jaỹim sa 'te da' ñido't da' nelagaxadic, na'chidáta da' nelóiquiaxac. 35Jaỹim ñanac da' qaidi ga' siỹaxaua mai'chi nep'agué'ne' ga' let'a, qataxa jaga' ỹauo mai'chi nep'agué'ne' jaga' mai'chi lat'e, qataxa jaga' nate mai'chi nep'agué'ne' jaga' li'ỹodo. 36Chan'eesa ñi' 'oonolec mai'chi nep'agué'ne' ga' mai'chi laỹi.
37Ga' ỹágueegue da' ỹauotec ga' let'a 'uootaxa jaga' lat'e, da' sa 'ená'am qa'en jaỹim da' lauo'chi, qana'chi jega'me sa taiỹet da' ỹalémaxaset. Qataxa jega'me ỹágueegue da' ỹauotec ga' lec'óxot, 'uootaxa jaga' lec'oqte, da' sa 'ená'am qa'en jaỹim da' lauo'chi, qana'chi jega'me sa taiỹet da' ỹalémaxaset. 38Qataxa ga' jaỹim 'equegue da' 'uootaxa sa 'te da' leenataxac da' temaqaidi da' jaỹim ỹileetalégue, qana'chi jega'me sa taiỹet da' ỹalémaxaset. 39Ga' sétaaque da' mai'chi nec'alaxatéegue da' mai'chi l'óiỹaxac, qana'chi jega'me daqat. Qaláxasa ga' sega'me ỹaqataqtet da' l'óiỹaxac, ỹasouaxat da' jaỹim 'equegue, qana'chi jega'me qonec'alaxatéegue.
Ga' laso'vi da' qoỹiseeten ga' siỹaxaua
(Marcos 9.41)
40Ga' 'ami ỹacongueta, jega'me mai'chi jaỹim ỹaconguet. Qataxa ga' jaỹim ỹaconguet, jega'me ỹaconguet jiñi'me jaỹim namaq. 41Jega'me ỹaconguet jega'me l'aqtáxanaxanec ñi' Dios, ỹasouaxat da' lamaxasec ñi' Dios, qana'chi jega'me ỹaconguet ga' neseeténataguec 'me 'ená'am qoỹin jaga' laseete ga' n'aqtáxanaxanec. Qataxa jega'me ỹaconguet ga' 'ónaxaic siỹaxaua, ỹasouaxat da' 'ónaxaic jega'me, qana'chi jega'me qomle qoỹiseeten, qana'chi 'ená'am qoỹin jaga' laso'vi jega'me 'ónaxaic siỹaxaua. 42Qataxa gamachaqaiga siỹaxaua, da' 'uootaxa ỹanem ga' ỹátaqta dapiágaxachiỹi noxop ga' 'oonolec na' sa 'amaqtaqpiolec, ỹasouaxat da' jaỹim 'equegue jen'me, qana'chi jega'me ỹátaqta 'uo qomle da' neseeténataguec.
Currently Selected:
Mateo 10: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
