Lucas 4
4
Napiinaguec so' Jesús
(Mateo 4.1-11; Marcos 1.12-13)
1So' Jesús ỹátaqta saqáchiỹi so' Espíritu Santo joca'li chiỹaqánỹi so' ñáchi Jordán, qana'chi so' Espíritu ỹauec jeso'me da' ỹauéga so' totelégue 'aléua. 2Huá'a di'me, qana'chi huét'a cuarenta noloqo'te, qana'chi janac so'me paiỹac 'me qadó'o da' sétaaque ỹapiỹen. Ỹátaqta qaỹa ga' ỹalic jeso'me saua' noloqo'te. Qana'chi joca'li ỹim, qana'chi nom'aguet da' loqouáxa. 3Qana'chi jeso' paiỹac 'me qadó'o 'enapego' jeso'me, 'eet'oi:
—Qomle ỹátaqta 'eesa da' 'am lec'óxot ñi' Dios, qana'chi 'auenapéga jen'me qa' da' taỹá'a jaga' pan.
4Qana'chi so' Jesús 'enaaco':
—Di' l'aqtac ñi' Dios 'me nedétañi 'eet'oi: “Sa na'chagáta jaga' pan da' ỹ'añaqtet ga' siỹaxaua, nataq'en ỹima na' l'aqtacpi ñi' Dios.”
5Ỹim, qana'chi so' qadó'o ỹitaxa ỹavíisee'mec jeso'me jeso' qasoxonaxa, qana'chi sa ỹiỹáloxoden da' ỹaloxóna 'ena'uaque naua' 'ale'u. 6Qana'chi jeso' paiỹac 'me qadó'o 'enaaco':
—Jaỹim 'am sanem qomle ỹima dójo' n'añaxac qataxa da' li'ỹoxodic 'ena'uaque naua' 'ale'u, qá'a jaỹim sañoxot da' sanem ga' gamachaqaiga. 7Qomle 'am jaỹim 'ausocoto naua' 'adiliictel da' jaỹim 'antamenot, qana'chi 'adalémaxaset qomle ỹima jen'me.
8Qaláxasa jeso' Jesús 'enapego':
—'Am Satanás, jaỹim 'ocá'ai qomle, qá'a di' nedétañi l'aqtac ñi' Dios 'eet'oi: “'Avi'ỹoxoden ñi'me 'adesaliaxanec 'an'étoqo't, na'chiñíta jiñi'me 'au'onataxaalégue.”
9Joca'li ỹim, qana'chi jeso'me qadó'o ỹitaxa ỹauec jeso'me, ỹauéga so' noic let'ádaic Jerusalén, qana'chi ỹavíisee'mec jeso' p'áseguem jeso' tamnaxaqui let'ádaic. Qana'chi 'enapego', 'eet'oi:
—Qomle ỹátaqta 'eesa da' 'am lec'óxot ñi' Dios, qana'chi 'auachiỹoqchiisee'mec jen'me qomle da' 'aunótaiỹi, 10qá'a di' nedétañi l'aqtac ñi' Dios 'eet'oi:
Ñi' Dios qomle namaq ga' lamaxasec piỹem lé'ec, da' 'am netelá'a,
11qaidi 'am ỹachitalóo'te naua' loua' jen'me,
qaidi sa 'te da' 'auatoxoiỹet ga' qa'.
12Qana'chi so' Jesús 'enaaco':
—Nataq'en di' nedétañi l'aqtac ñi' Dios 'eet'oi: “Sa 'te da' 'chi 'av'iỹíitac ñi'me 'adesaliaxanec 'an'étoqo't.”
13Qana'chi so' paiỹac 'me qadó'o joca'li sa ỹauana ga' laqáỹa lasoxoc da'me ỹ'iỹíitac so' Jesús, qana'chi cada'acolec da' ỹaxañi naua' noloqo'te da' cá'ai jeso'me.
So' Jesús huét'a di' Galilea joca'li ỹímta d'onataxan
(Mateo 4.12-17; Marcos 1.14-15)
14Qana'chi so' Jesús ỹátaqta saqáchiỹi da' l'añaxac so' Espíritu Santo joca'li v'iỹílaxague da' Galilea. Qana'chi jec da' qonséetapiỹi jeso'me ỹiméda naua' lail jidi'me 'aléua. 15Qana'chi dapaxaguenataxáatapooue ỹima jen'me lemáxaqui na' judiopi. Qana'chi ỹima na' siỹaxadipi ỹátaqta ỹi'ỹoxodéetac jeso'me.
Jeso' Jesús huét'a di' Nazaret
(Mateo 13.53-58; Marcos 6.1-6)
16Qana'chi so' Jesús ỹic'áta di' Nazaret 'me noicolec 'me mai'chi liaqa'. Qana'chi joca'li ỹivíta so' nolo' mataxaqui, qana'chi ỹinoxonóoue jeso' lemáxaqui na' judiopi, qá'a chi'ena loic jeso'me. Ỹim, qana'chi nichaachiñi da' ỹitaxaỹaxan di' l'aqtac ñi' Dios. 17Qana'chi qoỹanem jaso'me lidíise so' l'aqtáxanaxanec ñi'me Dios, lenaxat Isaías. Qana'chi joca'li ỹ'ouáchiỹi, qana'chi ỹilalco' jeso'me huéta'ña so' nidíisec, 'eet'oi:
18So' lepaqal ñi' qadesaliaxanec Dios jaỹim ta'nỹet,
qá'a jaỹim qoỹanaỹi da'me s'axátem da' 'ónaxaic lipí'ic jen'me choxodaq;
qataxa jaỹim qoỹamaxalégue da' ñataden na' 'uo da' laquicoxo,
qataxa tetoqo' s'axátem da' qoỹisóiỹi na' necointáisecpi,
qataxa da' sanem da' nauáachiiñi qasen na' qaỹaua naua' l'ai'te,
qataxa tetoqo' sesóiỹi jen'me sa qoỹiỹamaxatac,
19qataxa tetoqo' s'axátreegue naua' noloqo'te 'me huetoovlo ñi' qadesaliaxanec ỹan da' lichoxodénataxanaxac.
20Ỹim, qana'chi so' Jesús ỹamana't jaso'me nede, qana'chi ỹanem so'me ỹilolégue jeso' lemáxaqui na' judiopi. Ỹim, qana'chi ñíiñi da' detaqa, qana'chi ỹima jeso'me huétaaue jeso'me nemáxaqui ỹátaqta qoỹilóchiỹi jeso'me. 21Qana'chi jeso'me detaqa, 'eet'oi:
—Naỹi ma'le ỹivíta di' lalóqo' da' ỹipaquíchiỹi ỹima na' ỹ'axat jan'me nidíise 'me 'anaquiáxañiitapega.
22Qana'chi ỹima qoỹi'ỹoxodéetac jeso' Jesús qataxa ỹátaqta qoỹ'aalátapeec ỹasouaxat naua' l'aqtaqa ỹátaqchiiñi 'ónaxaiqolqa. Qana'chi nenatétapega't jeso'me, 'eet'oi:
—Dójo', ¿séetapega sa na'chido' da' lec'óxot so' José?
23Qana'chi so' Jesús 'enaaco':
—'Ami di'ỹoqóta qomle da' jaỹim 'auedoilégue da' jalchi'ena náxa 'eet'oi: “'Am tadénataxanaxaic, mai'chi 'anatadeela't.” Qataxa di'ỹoqóta qomle da' 'oñiit'oi: “Na'me ñaquiáxanaqtapeelégue da' 'aué'etpi joca'li huá'ña di'me noic Capernaum, nataq'en 'aué'et naỹi da' huá'ña na' 'adalémaxaset 'an'aléua.”
24Qana'chi ỹitaxa 'ecot da' l'aqtac, 'eet'oi:
—'Ami senapegalo da' ỹátaqta 'eesa da' qaỹa ga' l'aqtáxanaxanec ñi'me Dios da' leuótet'a da' qoỹ'amaqten ga' mai'chi lalémaxaset n'aléua. 25'Eesa da' ỹátaqta jalcote jan'me p'ai jen'me lec'óqo'tepi so' Israel jeso' nolo' joca'li 'uo so' l'aqtáxanaxanec ñi'me Dios, lenaxat Elías, joca'li qaỹa 'te huétep saua' tres 'uóidi qataxa saua' seis 'auóxoiqa. Nataq'en ỹátaqta jalcote da' noqouáxa ỹima jeso'me 'aléua. 26Qaláxasa jeso' Elías qaga jaga' 'oonole p'ai jaso'me netalégue so' n'aléua na' Israel lec'oqtepi da' qoỹamaxa. Na'chasóta jaso'me néta'ña di' Sarepta, di'me sa qaỹáaque di' noic, lenaxat Sidón. 27Nataq'en di'me l'acháqa' na' Israel lec'oqtepi ỹátaqta jalcote na' ỹilhuaac, nichi'ỹa na' ló'oc, jeso' nolo' joca'li 'uo so' l'aqtáxanaxanec ñi'me Dios, lenaxat Eliseo. Qaláxasa qaỹa da' 'uootaxa 'uo ga' 'oonolec da' qonataden jeso'me, na'chisóta so' Naamán, jeso'me l'acháqa' di' 'aléua lenaxat Siria.
28Qana'chi joca'li qonaquiáxachiỹi dójo' qoỹ'axátetac, qana'chi ỹima jeso'me huétaaue jeso'me nemáxaqui ỹátaqta jalcote da' náỹi lauel. 29Ỹim, qataxa nichaachiñi jeso'me, qana'chi qoỹ'odái'ỹa so' lai di' noic so' Jesús, qoỹamaqátai'ỹa jeso'me loiquiaqa' so' soqoỹoqóchisee'mec 'aléua 'me netalégue na' 'emecpi, da' sétaaque da' huá'ña qana'chi qoỹamaxáiỹi jeso'me. 30Qaláxasa so' Jesús n'iỹilqot, qana'chi táchiinỹi so' laiñi so' siỹaxadipi. Ỹim, qana'chi jec.
Jeso' siỹaxaua 'me 'uo so' lé'ec nataqtáqaic
(Marcos 1.21-28)
31Ỹim, qana'chi so' Jesús ỹic'áta di' noic Capernaum 'me huá'ña di' 'aléua Galilea. Joca'li huá'ña di'me, qana'chi ỹapaxaguéetac so' siỹaxadipi jeso' nolo' 'me mataxaqui. 32Qana'chi ỹátaqta qoỹ'aalátapeec da' 'éeta da' lapaxaguenataxanaxac jeso'me, qá'a da' detaqa, qaa'le ỹátaqta huo'oi naua' naỹilo naua' l'aqtaqa.
33Qana'chi jeso' lemáxaqui so' judiopi huétauo so' siỹaxaua 'me 'uo jeso' lé'ec nataqtáqaic. Qana'chi jeso'me talaxan, 'eet'oi:
34—Qo'mi 'amachit'alo. ¿Tóoqo'chi qo'mi sa 'aualémaxa't, 'am Jesús, Nazaret lé'ec? ¿Séetapega qo'mi 'auanagalo da' qo'mi 'anoláxachidiñi? Jaỹim 'am saateton, qataxa saỹáten da' na'chi'am lalémaxaset ñi'me Dios.
35Qana'chi so' Jesús nelaxa so'me né'ec nataqtáqaic, 'enaaco':
—¡'Ad'emáqta, ja'ñi, 'ocá'ai jen'me siỹaxaua!
Qana'chi jeso'me né'ec nataqtáqaic chiỹaqséguem qa'en so' siỹaxaua, naláaue qa'en so' siỹaxadipi. Ỹim, qana'chi cá'ai so' siỹaxaua, sa 'te da' 'uo ga' 'éet'ec. 36Qana'chi ỹima so' siỹaxadipi ỹátaqta 'uo da' loqolánaxa, qana'chi detaqátapega't 'eet'oi:
—¿Nái'chi da'me dójo' n'aqtac? ¡Qá'a da'me dójo' siỹaxaua ỹátaqta 'uo da' 'enec, qataxa 'uo da' l'añaxac da' l'aqtac da' ỹamaxáiỹi jeso' né'ec nataqtáqaic, qana'chi jeso'me jec!
37Qana'chi qonséetapiỹi so' Jesús 'ena'uaque naua' lail jidi'me 'aléua.
Jeso' Jesús nataden jaso' li'ỹodo so' Simón Pedro
(Mateo 8.14-15; Marcos 1.29-31)
38Huá'a, qana'chi so' Jesús cá'ai jeso' nemáxaqui, qana'chi tauó'o so' l'acháqa' so' Simón. 'Uo jaso' li'ỹodo so' Simón, jaso'me ỹilhuaac, ỹátaqta jalcote na' lauaq. Qana'chi qonachoxodenot jeso'me da' nataden jaso'me. 39Qana'chi so' Jesús davitelégue jaso'me, qana'chi nelaxa so'me lauaq, qana'chi jeso'me lauaq jec. Qana'chi sa huaỹáloq da' ñíseguem jaso'me, qana'chi neuálaxaitac.
So' Jesús nataden jeso' sa lec'óxotolec leuaxaicpi
(Mateo 8.16-17; Marcos 1.32-34)
40Joca'li ma'le ỹinoxoñi jaso' c'atena, qana'chi ỹima so' siỹaxadipi jen'me 'uo na' leuaxaic huetañalo naua' l'acháqa'te, qá'a ỹodapecachi so' lapite'napi, qana'chi qondó'uo so' Jesús. Qana'chi so' Jesús huaselelégue ñi' 'oonolec jeso'me leuaxaicpi, qana'chi ỹiméegue qa'en. 41Qataxa jalcote so' leuaxaicpi jec so' lé'ec nataqtáqaic. Qana'chi ỹ'alqátaỹi jeso' né'ecpi, 'eet'oi:
—Na'chi'am 'me 'am lec'óxot ñi' Dios.
Qaláxasa jeso'me Jesús nelaxa so'me né'ecpi, qataxa sa ỹasenem da' detaqa, qá'a jeso'me né'ecpi ỹaỹáten da' na'chiso so' net'a 'me nec'alaxaqui.
So' Jesús d'aqtaxaalégue di' Galilea
(Marcos 1.35-39)
42Joca'li ma'le ỹamtaa'le ỹ'oxoñi, qana'chi so' Jesús tái'ỹa so' p'áiỹi so' noic Capernaum da' ỹic'átee'ga so'me totelégue 'aléua. Qaláxasa jeso' siỹaxadipi nimitétaaque, qana'chi qoỹivídee'ga ga' huét'a jeso'me. Qana'chi sétaaque da' sa jec qoỹin. 43Qaláxasa so' Jesús 'enaaco':
—'Ai', qá'a ỹiuen nataq'en da' s'axátem na' noiqa da' 'ónaxaic lipí'ic 'me ỹ'axat ñi'me Dios da' na'chiñi ñi' ỹimata'a'téna, qá'a na'chida da' 'uo da' jaỹim qonamaq.
44Qana'chi so' Jesús jec da' d'aqtaxanóoue ỹima jen' nemáxaqui di' Galilea.
Currently Selected:
Lucas 4: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
