Lucas 5

So' 'uáanaxanaxat lé'ec niỹaqpi 'me sa qoỹauanápega

(Mateo 4.18-22; Marcos 1.16-20)

1'Uo so' nolo' so' Jesús huet'ot so' loxogue jaso' peróna lat'édai 'me huá'ña di' Genesaret. Qana'chi ỹátaqta jalcote so' janac siỹaxadipi, cha ỹivíd'a da' qoỹipataxa't jeso'me, qá'a jeso' siỹaxadipi sétaaque da' naquiáxana da' l'aqtac ñi' Dios. 2Qana'chi so' Jesús ỹila'alo saua' dos nilicota c'ochichiilo, netr'ot so' loxogue jeso' peróna, qá'a jeso'me ỹ'ácoxoicpi huenótee'guesopa jesaa'me. Qana'chi ỹiỹot'ape saua' le'uáanaxanqa'te. 3Qana'chi so' Jesús huenóchiinỹi jaso' 'oonole jesaa'me nilicotal, jaso'me lalémaxasete lilicota so' Simón, qana'chi ỹiỹaxanot jeso'me da' cadá'ac nichíỹaxataxasom. Ỹim, qana'chi so' Jesús nánỹi jaso' nilicota, qana'chi 'ecot da' ỹapaxaguen so' siỹaxadipi joca'li huá'ña jeso'me loxogue. 4Joca'li ỹim da' l'aqtaxanaxac, qana'chi 'enapego' so' Simón, 'eet'oi:

—'Auauegaxasó'ma di' laiñi jan' peróna jañi' 'adilicota. Ỹim, qana'chi 'au'uaxáñiiñi na' 'ade'uáanaxanaxachi.

5Qana'chi so' Simón 'enaaco':

—'Am 'me 'am paxaguenataxanaxaic, qo'mi ỹima so' pí'ỹaq da' si'ỹácoqtaac, qaláxasa qaỹa ga' qadoxonec. Qaláxasa 'am 'me qo'mi 'auama', qaláxasa naỹi jaỹim se'uaxáañi jen' ỹi'uáanaxanaxat.

6Qana'chi joca'li ma'le ỹi'uaxáañi so' le'uáanaxanaxat, qana'chi ỹátaqta jalcote so' loxone'j niỹaqpi. Qaama'te sétaaque qoỹicolaxat so' 'uáanaxanaxat. 7Qana'chi jeso'me ỹatequétapee'talo saua' liquiáxa'u 'me nétranỹi jaso' nilicota laqáỹa, qaidi jana'j da' lecochaxa'u jesaa'me. Qana'chi jesaa'me laqáỹa' jana'j, qana'chi ỹátaqta saqachiilo saua' dos nilicotal. Ỹamtaa'le da' damolídiñi. 8Qana'chi joca'li nóm'a dójo' so' Simón, qana'chi ỹisocoto naua' liliictel so' Jesús. Qana'chi 'enapego':

—Jaỹim 'auỹotelégue qomle, 'am ỹasoxola', qá'a jaỹim ỹátaqta jaỹim 'itaxalóxoic.

9Qá'a so' Simón ỹátaqta dó'i, nataq'en ỹima so'me liquiáxau'pi ỹasouaxat da' 'éeta so'me noxonec niỹaqpi. 10Nataq'en d'oi' saua' Jacobo qataxa so' Juan, jesaa'me lec'óqo'te jeso' Zebedeo 'me liquiáxa'u so' Simón. Qaláxasa so' Jesús 'enapego' so' Simón, 'enaaco':

—Sa 'te qomle da' 'au'óỹi, qá'a naỹi 'am sanaỹi da' 'am ỹ'ácoxoic da' 'anmitáaque na' siỹaxadipi.

11Qana'chi joca'li ma'le qoỹaueedeta saua' nilicotal, qana'chi ỹima da' qon'ónaxatañi, qo'equegue so' Jesús.

So' Jesús nataden so' dola ló'oc

(Mateo 8.1-4; Marcos 1.40-45)

12Joca'li huét'a jeso' 'oonolec so' noicpi so' Jesús, qana'chi janac so' siỹaxaua dola na' ló'oc. Qana'chi ỹisocoto naua' liliictel, ỹivídaxat'aguet na' latap jen' 'aléua. Qana'chi nachoxodenot jeso'me, 'enaac:

—'Am ỹasoxola', da' 'aviỹamaxadéeta, qana'chi 'ónaxaic da' 'aniỹóiñi da' ỹileuaxa.

13Qana'chi so' Jesús ỹipoteuó'o jeso'me, qana'chi 'enapego':

—Já'a, siỹamaxaden. Naỹi 'am n'óxota.

Joca'li nasaxáiỹi da' l'aqtac, qana'chi so' neleuaxa cá'ai na' ló'oc so'me leuaxaic. 14Qana'chi so' Jesús 'enapego' so'me da' sa 'te 'uo ga' ỹ'axátem dójo'. Qataxa 'enapéga, 'eet'oi:

—Na'chidáta da' 'am 'oc, 'analoxóne'uo ñi' letaxaỹáxanaxanec na' siỹaxadipi da' qodetaxaỹapégue' ñi' Dios. Ỹim, qana'chi 'auaneuo jaga' 'adachítaqtaxanaqte 'me damaxasoxolégue josii'chi so' Moisés, jaga'me náỹi da' ma'le 'am 'ademéegue, qaidi qoỹaỹáten ỹima da' ma'le 'am n'óxota ỹasouaxat so' 'adeleuaxa.

15Qaláxasa da' n'aqtaguec so' Jesús ỹátaqta nichíctaỹi, qana'chi ỹátaqta sa lec'óxotolec na' siỹaxadipi janac da' sétaaque da' naquiáxana qataxa sétaaque da' nataden jeso'me na'me leleuaxa. 16Qaláxasa so' Jesús tái'ỹa naale ga'me totelégue 'me qaỹa ga' siỹaxadipi. Huá'a, qana'chi netaméetac.

So' Jesús nataden so' víloxolaxaic

(Mateo 9.1-8; Marcos 2.1-12)

17'Uo so' nolo' so' Jesús dapaxaguenataxáatac, qana'chi 'uo na' huétauo, ñíchiiñi, jen'me ỹalcapíỹi so' fariseopi qataxa jen'me dapaxaguenataxáatapeec na' naqátaxacpi 'me janac, chiỹaqa'alo naua' 'ale'u di'me Galilea, qataxa di' Judea, qataxa Jerusalén. Qana'chi da' l'añaxac ñi'me Dios di'ỹoq da' huet'aguet jeso'me joca'li natadéetac na' leuaxaicpi. 18Huá'a, qana'chi nivídedeuo saua' siỹaxa'u ỹachitralégue so' letala' so' laqáỹa' 'me sa d'añiiỹi, qana'chi te'me qoỹip'áxaneuo so' 'emec da' sétaaque qoỹidó'uo so' Jesús. 19Qaláxasa sa qoỹauana ga' nadíiuo, qá'a ỹátaqta sa lec'óxotolec so' siỹaxadipi. Huá'a, qana'chi qouenódisee'mec so' lóvi' so' 'emec, qana'chi qonaqat so' lápo'. Ỹim, qana'chi qoỹasaxánỹi so' letala' jeso'me víloxolaxaic, táchiinỹi qoỹin so' siỹaxadipi ga'me huét'a so' Jesús. 20Qana'chi so' Jesús joca'li ỹilá'a da' lip'iỹáxa'j jesaa'me, qana'chi 'enapego' so' víloxolaxaic, 'enaaco':

—'Am ỹaqaỹolec, na' 'adoicpi naỹi ỹima qoỹapalaxat.

21Qana'chi so'me dapaxaguenataxanapeec na' naqátaxacpi qataxa so' ỹalcapíỹi so' fariseopi qana'chi 'uo da' leenataxac, 'enaac: “¿Jái'chi da'me dójo' siỹaxaua da' ỹi'uena't ñi'me Dios naa'me l'aqtaqa? Qá'a qaỹa 'te ga' ỹañoxot da' ỹapalaxat na' jaloicpi, na'chiñíta ñi'me Dios 'me ỹañoxot.”

22Qaláxasa so'me Jesús ỹaỹáteet'eguet da' leenataxac so' siỹaxadipi, qana'chi 'enaaco':

—¿Tá'nooqo'chi 'adeenataxaquii da'me dójo'? 23¿Jái'chogamaxa ỹátaqta sa qalaq da' qoỹinaac, séetapega da' qoỹiit'oi: “Na' 'adoicpi ỹima qoỹapalaxat”, 'uootaxa qoỹiit'oi: “'Oñíseguem, ỹim, qana'chi 'aueuoỹapiỹe't”? 24Qaláxasa ma'chaxa, naỹi 'ami naloxonalo jen'me siỹaxaua lec'óxot, da' jen'me ỹátaqta 'uo da' 'enec jen' 'aléua, da' ỹañoxot ỹapalaxat na' jaloicpi.

Huá'a, qana'chi 'enapego' so'me siỹaxaua 'me sa d'añiiỹi, 'enaaco':

—Naỹi 'am senapéga, 'oñíseguem, 'auenana't na' 'adetala'. Ỹim, qana'chi 'oc, 'auc'áta ga' 'ad'acháqa'.

25Qana'chi sa huaỹáloq da' ñíseguem so'me sa d'añiiỹi, ỹauáachiỹi ỹima so' siỹaxadipi. Ỹim, qana'chi ỹinana't so' letala' 'me huetalégue, qana'chi ỹic'áta ga' l'acháqa', ỹátaqta ỹi'ỹoxodéetac ñi' Dios. 26Qana'chi ỹima so' siỹaxadipi ỹátaqta ỹ'aalátapeec, nataq'en ỹi'ỹoxodéetac ñi' Dios, qataxa ỹátaqta 'uo da' loqolánaxa. Qana'chi 'enaaco':

—Jénjo' nolo' ỹátaqta qaỹa ga' 'ená'am da' li'ỹoxodic da' sauanáqchiỹi.

So' Jesús ỹiỹáxana so' Leví

(Mateo 9.9-13; Marcos 2.13-17)

27Joca'li ỹim dójo', qana'chi so' Jesús ỹinoxonéegue, qana'chi ỹilalégue jeso'me ỹaconapeeguet jan' neseeténaqte ga' net'a Roma lé'ec. Jeso'me lenaxat Leví. Qana'chi ñíiñi, néta'ña so' leseeténaxanqa' jen'me deseetenataxáatac. Qana'chi 'enapego', 'enaaco':

—Jaỹim 'oquegue.

28Qana'chi jeso'me ñíseguem, qaỹa ga' nepogoxói'ne', qana'chi 'equegue so' Jesús.

29Ỹim, qana'chi ỹí'et so' let'ádaic liqui'ỹáxac huá'ña so' l'acháqa' da' liqui'ỹáxaua so' Jesús. Qana'chi ỹátaqta jalcote na' huétauo jen'me ỹaconapeeguet jan' neseeténaqte ga' net'a, qataxa jalcote so'me laỹipi ñíchiiñi, dasotalégue jeso'me niqui'ỹáxala'. 30Qaláxasa jen'me fariseopi qataxa so' laỹi 'me dapaxaguenataxanapeec na' naqátaxacpi, qana'chi quetapeelóo'te saa'me lasoxoñii's so' Jesús. Qana'chi 'eetapegalo, 'enaaco':

—¿Tá'nooqo'chi 'ami 'adiqui'ỹáxauai jen'me 'itaxalóxoicpi qataxa jen'me ỹacootapeeguet jan' neseeténaqte ga' net'a Roma lé'ec?

31Qana'chi so' Jesús 'enaaco':

—Sa ỹiuen ga' nata' ló'o ga' siỹaxaua da' qaỹa 'te 'uo qataxa n'óxota, na'chigáta ga'me leuaxaic 'me ỹiuen. 32Jaỹim sa 'te da' ñanac da' siỹáxana ga' 'ónaxaicaloic siỹaxaua, na'chigáta ga' 'itaxalóxoic, tetoqo' ca'ai naua' jaloico.

Qoỹinat so' Jesús da' jái'chogamaxa 'éeta ga' lasoxoc ga' siỹaxaua noqouaqtela't

(Mateo 9.14-17; Marcos 2.18-22)

33Qana'chi so' siỹaxadipi ỹinatétac so' Jesús, 'enaaco':

—¿Tá'nooqo'chi ỹágueegue da' noqouaqtela't qataxa da' netamnaxac jen'me 'equegue so' Juan qataxa jen'me fariseopi, qaláxasa jen'me 'adapaxaguenatacpi nedot'a't da' de'quétac qataxa niỹómtac?

34Qana'chi so' Jesús 'enaaco':

—'Ami ¿séetapega 'auañoxochii da' noqouaqtela't 'aviñii jen'me huétauo ga' n'onáxac, da' 'uootaxa maliaxa ỹalquétaaue ga' siỹaxadipi ga'me sétaaque da' qo'uonguet? 35Qaláxasa qomle ỹivíta ga' lalóqo' da' qonaqapaxáne'uo ga'me huonaxaua, huá'a qomle, qana'chi 'eesása noqouaqtela't ga' siỹaxadipi.

36Nataq'en ỹa'uo da' daloqtenaxana, 'enaac:

—Qaỹa 'te ỹipeteguéegue ga' lai jega' napoto dálaxaic, ỹim, qana'chi dauláxana, naulec jaga' tóxoi napoto. Qá'a da' na'chi 'éet'ec dójo', qana'chi n'áxat jaga' dálaxai, qá'a jaga'me dalaxaale sa taiỹet jaga'me toise napoto. 37Qataxa nataq'en sa qoỹacháỹi jaga' síiỹailó'oc tóxoi ga' latáxa 'me sona'li da' ỹim. Qá'a da' na'chi qoỹíit'ec dójo', qana'chi jega'me latáxa 'me dálaxaic ỹicolaxata'ague jaga' síiỹailó'oc, qana'chi daqat so'me latáxa dálaxaic, qana'chi 'ená'am jaso' lai't síiỹailó'oc. 38Chan'eesa jega' dálaxaicolec latáxa, ga'me qoỹacháỹi jaga'me dalaxaale síiỹailó'oc, tetoqo' gaa'me na'chi 'eeta'salo da' sa daqa't. 39Qataxa nataq'en qaỹa ga' niỹómỹi ga' toisíỹac latáxa, ỹim, qataxa sétaaque ga' dálaxaic latáxa, qá'a ga'me 'enaac: “Na' toisec latáxa 'me nó'in.”

Currently Selected:

Lucas 5: PLGNT93

Highlight

Copy