Hechos 9

Da' 'éeta ca'li huelnat qoỹin so' Saulo

(Hechos 22.6-16; 26.12-18)

1So' Saulo maliaxa quet'ot da' ỹasáuaxat da' ỹalaat na' ỹ'amaqten so' qadesaliaxanec. Chan'eesa so'me ỹic'áte'uo so' let'a na' netaxaỹáxanaxanecpi da' qodosápegue' ñi' Dios. 2Qana'chi ỹiỹaxanot so'me net'a, qaidi ỹanem jaga'me lemalate ga' l'aqtac, qaidi ỹic'áta so' Saulo jega' lemáxaqui na' judiopi 'me ná'ña di' noic Damasco, sétaaque da' naviỹe't na'me quétapegue' da' n'aqtac, nauéga di' Jerusalén da' qaidi qoỹicoñi', ga'me natenalégue l'imdipi, 'uootaxa ỹauodipi. 3Qaláxasa joca'li quétapegue' jeso'me so' naq'aic, sóxote ỹauaqá'uo so' noic Damasco, qana'chi nepeláxachichiiñi da' huáaue so' n'edáxa chiỹoqo'ot di' piỹem. 4Chan'eesa so' Saulo 'uáqaiỹi. Huá'a, qana'chi demachíỹa so' n'aqtac, 'enaac:

—'Am Saulo, ¿Tá'nooqo'chi jaỹim 'aucáatac?

5Qaama'le so' Saulo dachimaqtaxan, 'enaaco':

—'Am ỹasoxola', ¿jái'chi 'am?

Qana'chi jeso'me naviliỹáxac ỹitaxa 'enaaco':

—Jái'chi táxa, na'chaỹim Jesús, naqaỹim 'me jaỹim 'aucáatac. Mai'chi 'am da' 'an'quemaqtetapeela't, 'auená'am ga'me nauégaxanaxala' huaca da' mai'chi ỹacháqtapeeguet jaga' nesógaxanaqte.

6Chan'eesa so' Saulo ỹátaqta ỹivíloxolaqtet da' loqolánaxa, qana'chi 'enaaco':

—'Am ỹasoxola', ¿jái'chogamaxa sétaaque da' sé'et?

Qana'chi so' qadasoxola' 'enapego' so'me, 'enaac:

—'Oñíseguem qomle, qana'chi 'auó'o di' noic. Huá'a qomle qaama'le 'am qoỹ'axátem ga'me 'aué'et.

7Qaa'le jesaa'me liquiáxa'u so' Saulo ỹátaqta d'oi', qá'a saa'me demachítrapega so'me n'aqtac, qaláxasa qaỹa 'te ga' ỹilód'a. 8Joca'li ỹim, qana'chi ñíseguem so' Saulo. Qaláxasa ca'li te'me ỹilápii'nỹi so'me, qana'chi sa nauáañi. Chan'eesa qolasáq'a na' louaq, qana'chi qoỹauécta'uo di' Damasco. 9Huá'a di'me, qana'chi huét'a tres noloqo'te, da' sa nauáañi, qataxa sa dequé'e, qataxa sa niỹom.

10Qaa'le di' Damasco na'chi néta'ña so' siỹaxaua 'amaqténataxanaxaic, lenaxat Ananías. So'me 'uo ca'li so' lauanáxanaxac naloxóna so'me so' qadasoxola'. Qana'chi 'enaaco':

—¡'Am Ananías!

Qana'chi so'me ỹ'ato', 'enaac:

—Já'a, na'chaỹim, 'am ỹasoxola'.

11Qaama'le so' qadasoxola' 'enapego' so'me, 'enaac:

—'Oñíseguem qomle, qana'chi 'oquegue so' naq'aic lenaxat ỹachimaqáteegue. Qomle 'avíta ñi' l'emec ñi' Judas, qana'chi 'auachimaqtaxanáaque ga' siỹaxaua 'me chiỹaqá'ña di' Tarso, lenaxat Saulo. Ga'me netaméetac, 12qana'chi 'uo so' leuoqtaxanaxac: ỹilá'a ga' siỹaxaua, lenaxat Ananías, da' chimaxatá'uo ga' huét'a, qana'chi huaselelégue na' laqaic, da' qaidi ỹitaxa nauáachiiñi.

13Qana'chi ca'li demachii'ỹi dójo' so' Ananías, qana'chi 'enaaco':

—'Am ỹasoxola', ỹátaqta jalcote na' jaỹim d'aqtaxáatapeguem jega'me siỹaxaua qataxa ỹima jen'me sa nó'in 'me ỹ'étec na'me néta'ña di' Jerusalén 'me 'am quétapegue'. 14Ga'me naỹi naiquína, nachítac da' l'aqtac na' lasoxola'pi na' netaxaỹáxanaxanecpi, da' qaidi ỹauec da' ỹicoñi' ỹima na'me ỹiỹáxanaxatac da' 'adenaxat.

15Qaláxasa so' qadasoxola' 'enapego' so'me, 'enaac:

—'Aue, 'auc'áta, qá'a jaỹim selotelégue ñi'me siỹaxaua, da' qaidi ỹitaxaỹáxanaxanec, ỹ'axátem jaỹim ỹima na' ỹodapecachi siỹaxadipi, qataxa na' let'alpi jen'me, qataxa nataq'en na'me lec'óqo'tepi so' Israel. 16Jaỹim saloxóna ñi'me qomle da' ỹátaqta jalcote da' ne'queténaxac ỹasouaxat jaỹim.

17Qaama'le so' Ananías jec da' ỹic'áta ga' 'emec 'me nétaaue so' Saulo. Mané'e ca'li ỹivída'uo ga' néta'ña, qana'chi huaselelégue so'me, qana'chi 'enapego', 'enaac:

—'Am ỹaqáỹa Saulo, ñi' qadasoxola' Jesús 'me 'am naloxóna ca'li 'auanaquétapegue' na' naq'aic, ñi'me jaỹim namaxa 'am, da' qaidi ỹitaxa 'anauáachiiñi, qataxa da' 'am saqáchiỹi so' Espíritu Santo.

18Huá'a, qana'chi so' Saulo 'uo jeso' chiỹoqotoovlo naua' l'ai'te, 'ená'am jan' láso, qana'chi ỹitaxa nauáachiiñi. Qana'chi jeso'me ñíseguem, qana'chi qonachiláxan, qaidi d'amaqtenataxan. 19Ca'li ỹim, qana'chi so'me dequé'e, qataxa 'uo da' l'añaxac. Qana'chi huo'oi saua' noloqo'te da' huétaaue so' 'amaqténataxanaxaicpi 'me néta'ña di' Damasco.

So' Saulo ỹ'axátetac da' n'aqtac huét'a di' Damasco

20Joca'li ỹim dójo', qana'chi so' Saulo d'aqtaxáatapegooue jen' lemáxaquipi na' judiopi, ỹ'axátetac so' Jesús da' na'chiso so' lec'óxot ñi' Dios. 21Qana'chi ỹima jen'me naquiáxatapega so'me ỹátaqta 'uo da' l'aalaxac. Qana'chi 'enaaco':

—¿Qo'li sa na'chido' da' siỹaxaua 'me ỹicáatac jen' néta'ña di' Jerusalén jen'me netaméetapega so' Jesús? qataxa ¿sa naqaido' da'me nec'atequéna da' sétaaque da' ỹauec da' ỹicoñi' na' 'amaqténataxanaxaicpi, qana'chi ỹaneuó'o jen'me lasepi na' netaxaỹáxanaxanecpi?

22Qaláxasa so' Saulo nichíỹaxateegue da' l'añaxac da' daloxonataxana so' Jesús da' na'chiso so' net'a 'me nec'alaxaqui, cha ỹivíde'ta da' ỹátaqta sa ỹaỹáten ga'me 'éeta qa'en na' judiopi 'me néta'ña di' Damasco.

So' Saulo nelotaxanem na' judiopi

23Ca'li sóxote qaỹóxode' saua' noloqo'te, qana'chi so' judiopi dosápiỹi da' sétaaque da' ỹalaat so' Saulo. 24Qaláxasa so'me dip'iquilégue da'me. Qaa'le huo'oi saua' noloqo'te qataxa pi'ỹáxadi na' judiopi nauáataaque so'me, qouetau'ta naua' so'mi di'me noic let'ádaic, da' sétaaque da' qoỹalaat. 25Qaláxasa na' 'amaqténataxanaxaicpi joca'li pí'ỹaq, qana'chi ỹanánỹi jeso'me jaso' n'oxona lat'édai, qana'chi nasesíchii'nỹi qoỹin na' lai so' lequepaxanaxat so' noic let'ádaic. Huá'a, qana'chi so'me qoỹaxan.

So' Saulo huét'a di' Jerusalén

26Joca'li ỹivída'uo so' Saulo di' Jerusalén, qana'chi sétaaque da' ỹalegóoue na' 'amaqténataxanaxaicpi. Qaláxasa ỹima so'me d'oit'aguet so'me, qá'a sa qoỹauápega so'me da' sóxote da' d'amaqtenataxan. 27Qaláxasa so' Bernabé liquiáxaua so'me, qana'chi ỹauee'ualo saua' Jesús lamaxa's. Qana'chi ỹátaqta d'aqtaxáatapeema da' 'éeta so' Saulo ca'li nauá'ne' so' qadasoxola' Jesús ca'li hua'nỹi so' naq'aic, qataxa da'me 'éeta ca'li dosétapegue' so'me, qataxa da' 'éeta da' ỹátaqta sa d'oỹalégue da' ỹ'axátetac da' lenaxat so' Jesús ca'li huét'a di' Damasco. 28Chan'eesa so' Saulo huá'a di' Jerusalén, qana'chi náictapee'to saua' Jesús lamaxa's. 29Qana'chi so'me ỹátaqta qaỹa 'te d'oỹáaque da' ỹ'axátetac so' qadasoxola', dosétapegue' qataxa noqolguétetapegue' jen'me judiopi 'me ỹaỹáte'n naua' l'aqtaqa na' griegopi. Qaláxasa jen'me sétaaque joca'li da' ỹalaat so'me. 30Joca'li dip'iquilégue so'me 'amaqténataxanaxaicpi, qana'chi qoỹauéga so' Saulo di' Cesarea 'me nadíỹaxasom. Huá'a jidi'me, qana'chi qoỹamaxa'ta di' Tarso.

31Chan'eesa ỹima jen'me 'amaqténataxanaxaicpi 'me néta'ña di' 'aléua Judea, qataxa di' Galilea, qataxa di' Samaria, ỹátaqta 'uo da' lamaic qataxa 'uo da' l'añaxac, qataxa ỹátaqta 'uo da' loqolánaxa so' qadasoxola'. So' Espíritu Santo ỹátaqta ỹ'añaqtet jen'me da' nichíctaiỹi qa'en di' tá'ña na' d'amaqtenataxan.

So' Eneas ỹiméegue qoỹin

32So' Pedro joca'li quétaỹi ỹima na' ỹ'amaqten so' Jesús, ỹivíd'a nataq'en so'me 'amaqténataxanaxaicpi 'me ná'ña di' Lida. 33Huá'a, qana'chi ỹilalégue so' siỹaxaua lenaxat Eneas. So'me ỹovi't naua' ocho 'uóidi da' ỹilhuaac, sa d'añiiỹi. Huetalégue so' letala'. 34Qana'chi so' Pedro 'enapego' so'me, 'enaac:

—'Am Eneas, 'am n'óota qa'en so' Jesucristo, 'oñíseguem qomle, qana'chi 'aunana't na' 'adetala'.

Qana'chi ñíseguem so' Eneas. 35Qana'chi ỹima qoỹauana'a't na'me néta'ña di' Lida qataxa di' 'aléua Sarón. Huá'a, qana'chi jen'me ỹiguem da' toisec l'amaqténataxanaxac, qana'chi 'equegue so' qadasoxola' Jesús.

Jaso' Dorcas nec'aliséguem qoỹin

36Jesaa'me noloqo'te 'uo jaso' 'amaqténataxanaxai néta'ña di' noic let'ádaic Jope. Jaso'me lenaxat Tabita jen' l'aqtac na' judío, jen' griego l'aqtac 'enapéga Dorcas (da'me nenaxat náaue da' víaxase). Jaso'me ỹauo ỹátaqta 'ónaxaicaloic, lecochiỹa jen'me 'uo da' leuénaxanaxa. 37Qaláxasa 'uo so' nolo', qana'chi jaso' Dorcas ỹilhuaac, qana'chi ỹileu. Joca'li qoỹimat da' qonachiláxatac, qaama'le qoỹidósee'mec ga' p'áseguem so' 'emec. 38Di'me Jope, qana'chi sa qaỹáaque di' Lida di'me huét'a so' Pedro. Qana'chi so'me 'amaqténataxanaxaicpi ca'li p'iỹíỹa so'me da'me huet'edi, qana'chi qoỹamaxalo saua' dos siỹaxa'u da' qoỹinapegalo, da' 'enapega't:

—'Anec'áta qomle na' Jope; 'ená'te 'aniỹáloxoden.

39Chan'eesa so' Pedro coovlo saa'me. Joca'li ỹivididi't, qana'chi so'me qoỹavíisee'mec so' 'emec 'me qoỹachíta'ña jaso' Dorcas. Qaa'le ỹima jan' p'aipi dasóta'uo, noỹíitaỹi. Qataxa qoỹaloxóotac jan' l'onata huoxoi qataxa na' somaxaqui 'me l'onatac jaso'me joca'li maliaxa qonchaatét'ai. 40Joca'li ỹim, qana'chi so' Pedro ỹima ỹip'áxaneegue so'me laỹi, qana'chi ỹisóidiñi naua' liliictel da' netamen. Joca'li ỹim, qana'chi ỹilotalégue jaso'me sóxote ỹileu, qana'chi 'enaaco':

—Tabita, 'oñíseguem.

Qana'chi ỹ'ouachiilo naua' l'ai'te jaso'me. Ca'li ỹilo'ot so' Pedro, qana'chi ñíseguem da' ñíiñi. 41Qana'chi so'me lasáq'a na' louaq jaso'me, qana'chi ỹañíseguem. Ỹim, qana'chi ỹiỹáxanee'ga so' 'amaqténataxanaxaicpi ỹalcapíỹi na' p'aipi, qana'chi ỹaloxon jaso'me da' ỹitaxa nec'aléegue. 42Joca'li ỹaỹáten da'me dójo' ỹima na'me néta'ña di' noic Jope, qana'chi ỹátaqta jalcote na' ỹ'amaqten so' qadasoxola'. 43Qana'chi so' Pedro ỹátaqta huo'oi saua' noloqo'te da' huét'a di' noic, néta'ña ga' l'acháqa' so' lenaxat Simón, síiỹac ló'oc ló'o.

Currently Selected:

Hechos 9: PLGNT93

Highlight

Copy