Hechos 8
8
So' Saulo ỹa'uo da' ne'queténaxac so' 'amaqténataxanaxaicpi
1Joca'li so' Saulo ỹátaqta ỹiỹamaxadéeta da' nalaataguec so' Esteban.
Qana'chiso so' nolo' da' qodecanáxanỹi na' ỹ'amaqten so' Jesús di' Jerusalén, qana'chi 'uo na' taỹa di' 'aléua Judea qataxa di' Samaria. Na'chisáate' saua' Jesús lamaxa's n'óodañi. 2'Uo so' siỹaxadipi 'me quetalégue ñi' Dios 'me ỹisiiñi joca'li so' Esteban, qataxa noỹiitapeelégue so'me. 3Qaa'le so' Saulo ỹátaqta ỹipitaqten da' ỹicanaac so' 'amaqténataxanaxaicpi, ỹinóxotet'ape naua' 'emáqa. Ga'me ỹilalégue lé'em 'uootaxa ỹauo, qana'chi ỹauécaaỹi, qana'chi ỹanáaue jan' cointáxanaxaqui.
Qoỹ'axátetac da' 'ónaxaic qadipí'ic di' Samaria
4Qaláxasa jen'me lagaxaicpi 'me chiỹaqá'a di' Jerusalén, jen'me ỹ'axátetac da' n'aqtac 'me nec'alaxaqui, ga'me ỹivid'ague. 5Qaa'le 'uo so' 'oonolec so'me lagaxaicpi, lenaxat Felipe, 'me ỹic'áta josii'cho' di' noic di' 'aléua Samaria. Huá'a, qana'chi ỹ'axátetac so' net'a 'me qadec'alaxaqui. 6Qana'chi so' siỹaxadipi ỹimetapeelégue so'me. Ỹima jen'me ỹátaqta qoỹoqochiim da' l'aqtaxanaxac so' Felipe, qataxa nataq'en qoỹic'atéetac na' n'anecpi sa qoỹauanápiỹi 'me ỹ'étetac. 7Qá'a jalcote na' siỹaxadipi na' 'uo na' lé'ec nataqtáqaic 'me ỹiméegue qa'en, qaa'le na' né'ecpi 'me ỹinoxonéegue jen'me ỹ'alqátaỹi. Qataxa jalcote na' ỹiméegue qoỹin jen'me l'íoxoicpi qataxa na' sa nalóiñi siỹaxadipi. 8Naqaida 'me ỹ'éte'uo da' ỹátaqta ỹima 'uo da' lamaic so'me noic.
9Qaláxasa 'uo so' siỹaxaua lenaxat Simón. Jeso'me ca'li d'onataxáatapega da' napinaxac da' ỹoqovíitac na' siỹaxadipi 'me néta'ña di'me noic di' 'aléua Samaria. So'me nequetala't noqo' 'enapeela't p'asáiỹi. 10Qana'chi ỹima so' siỹaxadipi ỹátaqta qonaquiáxana so'me, ỹivíd'a na' n'ása qataxa jen' sóxote naláuo. Qataxa jen'me 'enaaco':
—Dójo' siỹaxaua naqaida da' let'ádaic lañoqtaxanaxac ñi' Dios.
11Qana'chi ỹátaqta qoỹoqo'cha, qá'a da'me napinaxac ỹátaqta sa lequese'egue da' ỹip'itáxanaqtétac so'me siỹaxadipi. 12Qaláxasa ca'li qoỹ'amaqten da'me 'ónaxaic qadipí'ic 'me ỹ'axátetapeguem so'me so' Felipe ca'li ỹ'axátetac da' ñi' Dios ỹimata'a'téna, qataxa ỹ'axátetac da' lenaxat so' Jesucristo, qana'chi ỹima na' l'idimpi qataxa na' ỹauodipi na' d'amaqtenataxan, qana'chi qonachiláxan. 13Qana'chi nataq'en ỹalquéteuo so' Simón da' d'amaqtenataxan, qana'chi qonachiláxan. Huá'a, qana'chi quétapegue' so' Felipe, ỹátaqta 'uo da' l'aalaxac da' ỹic'atéetac na'me let'ádaicpi 'me sa qoỹauanápega qataxa jen'me n'anecpi 'me ỹ'étetac so'me.
14Qana'chi saua' Jesús lamaxa's 'me nétra'ña di' Jerusalén ca'li p'iquidelégue na' néta'ña di' Samaria da' ỹ'amaqten da' l'aqtac ñi' Dios, qana'chi qoỹamaxata di'me so' Pedro qataxa so' Juan. 15Mané'e ca'li ỹivididi't, qana'chi netameetrapeelégue so' 'amaqténataxanaxaicpi 'me néta'ña di' Samaria, da' qaidi so'me siỹaxadipi ỹaconeguet so' Espíritu Santo. 16Qá'a maliaxa qaỹa 'te ga' 'oonolec da' sóxote da' ta'nỹet so' Espíritu Santo, nedot'a't da' qonachiláxan, qonachiláxanỹi da' lenaxat so' qadesaliaxanec Jesús. 17Chan'eesa so' Pedro qataxa so' Juan, saa'me huaselelégue jeso'me. Huá'a, qana'chi jeso'me ta'nỹet so' Espíritu Santo.
18Qana'chi so' Simón ỹauáachiỹi da' so' Espíritu Santo ta'nỹet so' siỹaxadipi ca'li huaseldelégue jeso'me saua' Jesús lamaxa's. Qana'chi jeso'me ỹaloxóotac jaso' laicaua. 19'Enaaco':
—Jaỹim 'auañiim nataq'en qomle da'me 'adañoqtaxanaxaquii, qaidi da' 'uo gamachaqaiga saselelégue, qana'chi ta'nỹet ga'me so' Espíritu Santo.
20Chan'eesa so' Pedro 'enapego' so'me, 'enaac:
—'Am qataxa jana' 'anaicaua 'ocápegue' qomle da'me 'auqat, qá'a 'am 'anp'itáxatapega da' ga'me ỹan lañoqtaxanaxac ñi' Dios qoỹañoxot da' qoneuodéna. 21Da'me dójo' n'onataxanaxac 'am sa 'te taỹot, qá'a jana' 'adiquidiaqte sa ỹataqtelégue da' 'equegue ñi' Dios. 22Na'chidáta da' 'auaxañi da' 'ad'itaxalóxo, qataxa 'anachoxodenot ñi' Dios, ỹ'oxoguet qomle da' 'am ỹichoxoden, qana'chi ỹapalaxat da' sa nó'in leenataxac jañi' 'adiquidiaqte. 23Qá'a jaỹim selá'a da' ỹátaqta 'am saqáchiỹi jen' sa nó'in 'me 'am quiỹaxanaqtáqaic qa'en, qataxa da' 'ad'itaxalóxo 'am ỹicoñideta't.
24Chan'eesa 'enaaco' so' Simón:
—Jaỹim 'antamñiilégue qomle, 'aviỹaxañiỹot ñi' Dios, qaidi qaỹa 'te ga' jaỹim talégue ỹima jen'me 'au'axáchiitac.
25Ca'li ỹima't da' l'aqtaxanaxa'j da' ỹ'axátetrac da' Dios l'aqtac saua' Jesús lamaxa's, qana'chi jalcote jen'me quídiỹi noicpiolec 'me ná'a di' Samaria da' ỹ'axátetrac da' 'ónaxaic qadipí'ic. Ỹim, qana'chi v'iỹílaxata di' Jerusalén.
So' Felipe qataxa so' siỹaxaua 'me l'acháqa' di' Etiopía
26Ca'li ỹim dójo', qana'chi so' piỹem lé'ec lamaxasec ñi' qadasoxola', jeso'me 'enapego' so' Felipe, 'enaac:
—'Oñíseguem qomle, qana'chi 'aiỹi da' co'lia, 'oquegue so' nadic 'me chiỹaqsée'mec di' Jerusalén, taỹá'a di' Gaza.
Naqaiso so' nadic 'me talégue di' totelégue 'aléua. 27Qana'chi so' Felipe ñíseguem, qana'chi jec, qana'chi huadet'eguet joca'li so' siỹaxaua 'me chiỹaqa'ague da' Etiopía. So'me quemáloq qataxa net'a, jeso'me naqaiso so' ỹilo'ogue jan' naicaua jaso' nat'e lenaxat Candace, jaso'me lat'e jen'me néta'ña di' Etiopía. Jeso'me taiỹi joca'li da' Jerusalén da' netamenot ñi' Dios. 28So'me v'iỹílaxague da' l'acháqa', nétanỹi jaso' náauena. Qaa'le ỹitaxaỹaxanaxáatac joca'li jaso' lede so' l'aqtáxanaxanec ñi' Dios, lenaxat Isaías. 29Chan'eesa so' Espíritu Santo 'enapego' so' Felipe, 'enaaco':
—Sa 'auỹotáaque qomle jaso'me náauena.
30Qana'chi so' Felipe ca'li sóxote sa qaỹáaque jaso' náauena, qana'chi demachítapega jeso'me net'a da' ỹitaxaỹaxanaxáatac jaso' lede so' Isaías. Qana'chi ỹinato' so'me siỹaxaua, 'enaaco':
—¿Qo'li 'amachíỹa ga' 'éeta di' 'autaxaỹaxanaxáatac?
31Qana'chi so'me siỹaxaua 'enaaco':
—¿Semachíỹa táxa ga' 'éeta táxa machané'e 'chi 'uo ga' jaỹim ỹapaxaguenec ga' 'éeta di'me?
Qana'chi so'me 'enapego' so' Felipe da' huenódiseguem da' noqotá'ai.
32Jeso'me n'aqtac 'me ỹitaxaỹaxanaxáatac 'eet'oi:
Ga'me 'ená'am qomle jaga' n'aanaxate da' qoỹauéguee'ga ga' nalaataqa';
qataxa 'ená'am ga' n'aanaxate lec'óxot da' qonpetec, da' sa ỹ'alaq.
Naq'áita qomle ga'me da' sa ỹicolaxachiỹi na' nedégaxat da' ỹ'alaq.
33Qana'chi da'me lachoxodec qoỹin ỹátaqta qaỹa 'te ga'me 'chi ỹic'oolégue;
qaláxasa ga'me lec'óqo'tepi ¿jái'chogamaxa qomle ga' ỹañoxot da' ỹ'axat?
Qá'a da' l'óiỹaxac qoỹacona, da' qaidi sa huetalégue jen' 'aléua.
34Chan'eesa so' net'a ỹinatétac so' Felipe, 'enaac:
—Jaỹim 'auchoxoden da' jaỹim 'au'axátem, ¿jái'chogamaxa p'aiỹi ga' l'aqtac dójo', qo'li na'chiso so'me l'aqtáxanaxanec ñi' Dios da' n'axátetapeela't, 'uootaxa siỹaxaua laqáỹa ga' n'aqtaguec dójo'?
35Chan'eesa so' Felipe qana'chi 'ecot da' losáxac, táchii'ña so'me n'aqtac 'me qoỹitaxaỹaxanaxáatac, qataxa ỹ'axátem so'me da' 'ónaxaic qadipí'ic 'me n'aqtaguec so' Jesús. 36Qana'chi ca'li ỹivídeta so' ná'ña jaso' noxop lai't, qana'chi so' net'a 'enaaco':
—Jañójo' jañi' noxop lai't, ¿jái'chogamaxa ỹaqaláset da' jaỹim qonachiláxan?
37Chan'eesa so' Felipe 'enapego' so'me, 'enaac:
—Qomle ỹátaqta ỹima jañi' 'adiquidiaqte da' 'au'amaqténataxan, qana'chi n'óota.
Qana'chi so'me siỹaxaua 'enaaco':
—Jaỹim s'amaqten so' Jesucristo da' na'chiso so' lec'óxot ñi' Dios.
38Qaama'le 'enapéga da' ỹi'ỹáxanguet jaso' lai't da' ỹañíiñi, qana'chi saa'me huenótreegue, qana'chi tadínỹi so' noxop. Qana'chi so' Felipe nachiláxan so'me net'a. 39Ca'li nenoxosee'mot so' noxop, qana'chi so' lepaqal ñi' qadasoxola' 'ecot so' Felipe. Chan'eesa so' net'a sa ỹitaxa nauá'ne' so'me, qaláxasa so'me v'iỹílaxa ga' l'acháqa', ỹátaqta mátac. 40Qana'chi so' Felipe huét'a joca'li di' Azoto. Huá'a, qana'chi quetaỹilo naua' noiqolqa, ỹ'axátetac da' 'ónaxaic qadipí'ic, cha ỹivíd'a di' noic Cesarea.
Currently Selected:
Hechos 8: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
