2 Pedro 3
3
Ga' l'iỹílaxasoxoc so' qadesaliaxanec
1'Ami ñauotaxa'u ỹaqáỹa', 'ami samaxalo jan' ỹide laqáỹa. Nauójo' dos ỹidel 'me 'ami samaxalo, sétaaque da' sachiỹoxotaỹilo jen'me ỹaqátaxacpi da' 'ami ỹátaqta seenataxanaxa'n. 2'Ami 'aueenachiit'alo qomle naua' 'ami ỹ'axatema ca'li jeso'me ỹoqovíta l'aqtáxanaxanecpi ñi' Dios qataxa naua' lapaxaguenataxanaxaco so' qadesaliaxanec qataxa qadec'alaxaqui 'me 'ami ỹapaxaguenque saua' lamaxa's jeso'me.
3Qataxa 'ami ỹátaqta 'aueenachíit'a qomle dójo' 'eet'oi: Gaua' p'átreegue noloqo'te, qana'chi 'uo qomle ga' siỹaxadipi ỹátaqta ỹi'uena't da' 'ad'amaqténataxanaxaquii. Jega'me quétapee'to naua' n'onatagueco 'me sa n'oi'n. 4Qana'chi 'ami ỹina't qomle, 'eet'oi: “¿Hua'ago' ga' 'éeta ga' 'ami qoỹaloxonalo l'iỹílaxasoxoc so' Cristo? Qá'a cha ỹivíd'a joca'li da' ỹileu so' huá'au qadet'alpi, qaa'le na'chi 'eeta't sa 'te 'uo ga' noqochic ỹimaquéna, chiỹoqót'a ca'li ỹímta da' qoỹí'et jen' 'aléua.” 5Qá'a jen'me siỹaxadipi sa 'te taỹapíỹi lauel saua' 'uáudeegue 'uóidi da' na'chi 'eeta't da' 'uo jen' piỹem qataxa jen' 'aléua, chiỹoqóchiỹi da' l'aqtac ñi' Dios joca'li naỹiiséguem qa'en da' chiỹoxotaỹi qa'en jen' noxop. 6Qataxa chiỹaqaỹi qa'en jen' noxop joca'li nep'áxaseguem qa'en jen' 'aléua, qana'chi ỹima jen' huetalégue jen'me noláiñi qa'en. 7Qaláxasa na'chida qomle da' l'aqtac ñi' Dios da' chiỹaqaỹi da' jen' piỹem qataxa jen' 'aléua 'me maliaxa huo'oi naỹi, da' jenaa'me taỹa'alo qa'e'n ga' dóle'. Jega'me dóle' naqaiga ga' dec'atoxon qomle ỹivíta da' qonimit ỹima jen' 'aléua, qomle ỹivíta da' qoỹoláxachiỹi ỹima jen'me 'itaxalóxoicpi.
8Qataxa da' laqáỹa, 'ami ỹaqai'ỹolqa, 'eet'oi: Sa 'te qomle da' sa 'antovíñiiỹic ñi' qadasoxola' Dios di' 'oonolec nolo' qaa'le 'ená'am qa'en gaua' mil 'uóidi, qataxa gaua' mil 'uóidi, qaa'le 'ená'am qa'en ga' 'oonolec nolo'. 9Qataxa ñi' qadasoxola' sa 'te huaỹáloxoguet da' 'uootaxa sa ỹipaguelégue ga' ỹaloxóota, qá'a 'uo na' 'éetapega jiñi'me huaỹáloqot'aguet. Na'chidáta jiñi'me 'uo da' neuálaxainaxac da' qo'mi ỹiuatet'alo. Qá'a jiñi'me sa 'te da' ỹiỹamaxaden da' 'uo ga' daqat, na'chidáta da' ỹiuatét'a ỹima jen' siỹaxadipi da' ca'ai naua' n'onatagueco.
10Qaláxasa jega'me l'iỹílaxasoxoc so' qadesaliaxanec ỹivíta qomle da' sa taỹapíỹi nauel, 'ená'am ga' cacháxaic quétaỹi di' pí'ỹaq. Huá'a, qana'chi na' piỹem noláiñi, ỹátaqta qaỹa ga' 'ená'am ga' lesamaxa. Qana'chi jen'me huet'ot na' piỹem ỹavíỹaxat jega'me dóle', nataq'en jen' 'aléua, qataxa ỹima jen'me huetalégue.
11Naỹi da' saỹátenaq da' qonoláxachiñi ỹimaquéna, ¿tália'chi toqo' da' sa 'aviñii ỹoqovíta da' 'ad'óiỹaxaquii da' 'oquíitapegue' ñi' Dios? 12'Auachiỹa'aguet qomle jega' nolo' 'me livídaxaqui ñi' Dios da' nimit ỹima jen' 'aléua, qataxa ỹátaqta 'auadíñiit'aguet qomle ga' nolo' 'me huétaaue na' piỹem ỹavíỹaxat ga' dóle', qataxa ỹima jen'me huet'ot 'me noláiñi ỹasouaxat na' l'edáxa ga' dóle'. 13Qaláxasa qo'mi seuataqat'aguet ga' dálaxaic piỹem qataxa ga' dálaxaic 'aléua 'me ỹaloxóotac jocalia'chi ñi'me Dios, jega'me huá'ña da' ỹima qomle jen' siỹaxadipi n'óota da' lasoxoc qataxa sóxodaic.
14Chan'eesa 'ami ỹaqai'ỹolqa, naỹi da' ỹa 'auachiit'aguet ỹima dójo', 'ónaxaic qomle da' 'anpogoxóiñiỹapegue' da' 'aulaquíichiiñi qomle 'ami nivitalo ñi' Dios, qataxa 'ami ỹoqovíte', qataxa qaỹa ga' 'adóiquii. 15Qataxa 'antovíñiit'ac da' neuálaxainaxac ñi' qadasoxola' Dios da' qo'mi ỹiuatet'alo. Jeda'me náỹi da' qadec'alaxa. 'Ená'am nataq'en da' 'éet'ec jana' ledepi so' qanauotaxaua qadaqáỹa Pablo 'me 'ami ỹamaxalo joca'li jeso'me ỹidíñi da' laỹátenaxanaxac 'me ỹanem ñi' Dios. 16Ỹima jana' lidíisepi jeso'me 'ami ỹ'axátetapeema dójo', qaláxasa huo'oi naua' hua'ñalo da' ỹátaqta 'uo da' laqalai'j da' qoỹ'axateelo naua' ladíco. Chan'eesa jen' qaỹa 'te ga' ỹaỹátenaac qataxa sa 'te d'añi da' lip'iỹáxac, qana'chi ỹaqá'a qa'en ga' ỹanaỹi. Huá'a, qana'chi 'ená'am qa'en da' 'éet'ec jen'me laỹipi nedétañi l'aqtacpi ñi'me Dios da' ỹasáxaneegue, qana'chi mai'chi ỹi'quemáxam.
17Chan'eesa 'ami ỹaqai'ỹolqa, naỹi da' ma'le 'auaỹáchiñiitac dójo', 'ónaxaic da' ỹátaqta 'anchiliila't, da' qaidi sa 'te da' 'chi 'ami ỹauect'ape da' loqovínaxanaxac jen' siỹaxadipi 'itaxalóxoicpi, qana'chi 'ená'te da' 'oquí'ỹai da' 'ad'amaqténataxanaxaquii. 18Qaláxasa nichíctaseguem 'aviñii qomle da' 'adaatetonaxanaxaquii so' qadesaliaxanec qataxa qadec'alaxaqui Jesucristo, qataxa da' nichoxodénataxanaxac 'me chiỹoqo'ot jeso'me. Qana'chi 'eeta't qomle da' qaỹa 'te loiquiaqa' da' ni'ỹoxodénataguec jeso'me. Já'a, na'chi naq'áita dójo'.
Currently Selected:
2 Pedro 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
