2 Pedro 2
2
Jen'me dapaxaguenataxáatapeec da' sa lasoxoc
(Judas 4-13)
1Qaláxasa nataq'en jeso'me lec'óqo'tepi so' Israel joca'li 'uo so' 'enapeela't da' l'aqtáxanaxanecpi ñi' Dios, qaláxasa sa 'eesa. Qana'chi naq'áita nataq'en naỹi da' 'oñíita 'uo jen' dapaxaguenataxáatapeec da' sa lasoxoc. Jen'me n'otaxáateuo jen' lapaxaguenataxanaxacpi 'me n'áxat da' nip'iỹáxac, ỹivíd'a da' noqolgué'te' so' qadesaliaxanec 'me nec'alaxatéegue jen'me. Qana'chi jena'me mai'chi quétapee'uo da' sa huaỹáloq da' ne'uaxánaguec. 2Ỹátaqta jalcote qomle na' 'equegue da' sa nó'in lasoxoc jen'me. Ỹasouaxat jen'me, qana'chi ỹátaqta sa nó'in da' n'aqtaguec da' ladic da' n'aqtac 'me ỹátaqta 'eesa. 3Ỹasouaxat da' loqopi'chi da' neseeténataguec, qana'chi jen'me 'ami ỹidolóo'te naua' napaxaguenataxanaxaco 'me sa 'eesoda, qaidi naqatéegue jañi' 'anaicauai. Qaláxasa jen'me sa 'te taa'le ỹaxan da' ne'uaxánaguec, qá'a sóxote sa lequese'egue da' qoỹaqátaxaataỹi jeda'me.
4Qá'a ñi' Dios sa 'te ỹichoxodenalégue joca'li jeso'me lamaxa'spi piỹem lé'ecpi 'me 'uo da' loic. Na'chidáta da' ỹamaxá'ña ga' ne'uaxánqa' qa'en, qataxa ỹicoñida'aguet na' n'álaxa da' qaidi ỹiuatáqtena'aguet ga' nolo' qomle nimit ỹimata'a'téna. 5Nataq'en sa 'te ỹichoxodenalégue ñi' Dios jeso'me huá'au siỹaxadipi. Na'chidáta da' ỹidolégue so' huétep jeso'me siỹaxadipi 'me 'itaxalóxoicpi. Na'chisóta so' Noé nec'alaxatéegue qataxa saua' laqáỹa' siete, qá'a jeso'me ỹ'axátetac da' n'óiỹaxac 'me ỹoqovíta. 6Ñi' Dios nataq'en ỹoláxachiilo saua' noiqa Sodoma qataxa so' Gomorra, ỹátaqta datóchidiñi, cha ỹivíd'a da' ỹisamaq jen' jálo, qá'a sétaaque da' laloqtenaxanaxat jen'me siỹaxadipi 'me 'itaxalóxoicpi 'me taỹá'a da' ỹitaxa nalégue jen' 'aléua. 7Qaláxasa nec'alaxatéegue joca'li so' Lot, qá'a jeso'me ỹátaqta 'ónaxaic da' lasoxoc, qataxa ỹasouaxat da' ỹátaqta jalcote da' lichic joca'li ỹic'atéetac da' sa nó'in lasoxoc so' siỹaxadipi 'me 'itaxalóxoicpi. 8Ỹátaqta ỹiméda naua' noloqo'te jeso'me siỹaxaua 'ónaxaic da' lasoxoc 'me nétaaue so' laỹi ỹátaqta 'uo da' noinaxac jañi' liquidiaqte ỹasouaxat da' ỹic'atéetac qataxa da' demachítapega ỹima jen'me sa nó'in 'me ỹ'étetac jeso'me siỹaxadipi. 9Naqaida da' 'éeta naale ñi' qadasoxola' Dios nec'alaxatee'guesop da' n'iinaguec jega'me ỹátaqta nañanot jiñi'me, qataxa taỹá'a qa'en da' ne'uaxánaguec ga' 'itaxalóxoicpi qomle ỹivíta da' nimit ỹimata'a'téna.
10Qaláxasa ñi' Dios ỹa'uo qomle da' ne'uaxánaguec jen' siỹaxadipi, lamá'a jen'me mai'chi quétapegue' jen' 'éetapeecpi 'me sa nó'in, qataxa sa 'te ỹaconguet da' lamaxasóxonaxac ñi' qadasoxola' Dios. Jen'me ỹátaqta sa ỹalaq, qataxa sa liỹapíỹi lauel. Sa 'te d'oiỹa da' ỹisouen jen'me damaxasóxotacpi sa di'ỹoq. 11Qamaale jen' namaxasec piỹem lé'ecpi 'me ỹágueegue da' l'añaxac qataxa da' damaxasóxonaac, qaa'le sa 'te da' 'uootaxa sa ỹadenalégue da' ỹi'uaxanque naua' l'aqtaqa jen'me damaxasóxonacpi da' 'uootaxa ỹauáachiỹi qa'en ñi' qadasoxola' Dios.
12Qaláxasa jénjo' siỹaxadipi ỹátaqta 'ená'am ga' síiỹacpi 'me qaỹa 'te ỹaỹáten. 'Chi quétapegue' da' lec'atenaxanaxac, qataxa niỹíñi da' qaidi taỹá'a da' qoỹaconé'uo qataxa da' qoỹalaat. Jen'me ỹátaqta sa ỹiỹamaxataac da' detaxaỹá'a jega'me sa 'te ỹaỹáten. Qaláxasa jen'me 'ená'am qomle da' leleuaxa na' síiỹacpi, 13qataxa qoỹ'iỹílaxateguet qomle da' ni'quichínỹi ỹima jen'me ỹ'étec jen'me laỹi. Jen'me siỹaxadipi 'éetapecogamaxa ỹátaqta máchiiñi da' quétapegue' da' lamanaxanaxa 'me sa huaỹáloq. Na'me siỹaxadipi ỹátaqta ỹí'et da' n'alóxo, qataxa da' qoỹí'et ga' sa nó'in da' 'uootaxa 'ami huetaavlo da' 'av'íchiitac ga' 'adiqui'ỹáxaquii. Qana'chi na' siỹaxadipi ỹátaqta máchiiñi da' 'chi 'ami ỹoqoviit'ape.
14Jen' siỹaxadipi nataq'en qaga jaga' ỹauo da' sa noqopita da' 'chi ỹilót'a. Ỹátaqta sa nelii'nsop da' ỹ'étetac da' l'etaxalóxoc. Qataxa 'chi ỹamaxáỹi ga' siỹaxaua 'me qaỹa 'te l'añaxac, qataxa ỹátaqta sa 'te naqaláate' da' 'chi naqat jaga' naicaua ga' laqáỹa. Jen' siỹaxadipi huetalégue da' let'ádaic ne'uaxánaguec. 15Qataxa jen'me ỹisómtac, qá'a mai'chi cá'ai da' nadíquiaxac 'me ỹiỹamqáchiiñi ỹasouaxat da' 'equegue da' lasoxoc so' l'aqtáxanaxanec ñi' Dios, lenaxat Balaam, jeso'me lec'óxot so' Beor, jeso'me ỹí'et joca'li da' sa nó'in ỹasouaxat da' sétaaque da' nauec da' neseeténaguec. 16Qana'chi qonlaqátapega ỹasouaxat da' l'etaxalóxo, nelaqátapega jaso' qaỹaua 'te l'aqtaqa 'ásena joca'li detaxaỹilo naua' siỹaxaua l'aqtaqa. Qana'chi sa 'te da' ỹasenem da' quet'ot da' nichiỹoxosóxoc jeso'me.
17Jénjo' siỹaxadipi 'ená'am jaga' nópi'ỹaxaqui 'me qaỹa 'te ga' lé'ec noxop, qataxa 'ená'am ga' ló'oc 'me 'chi ỹachítac jen' laỹat. Na' siỹaxadipi taỹá'a da' qoỹicoñida'aguet jega'me qaỹa 'te 'ená'am n'álaxa 'me qaỹa 'te loiquiaqa'. 18Qá'a naua' l'aqtaqa qaa'le 'éetapegalo ỹátenaxanaxaiqa, qaláxasa qaỹa 'te ga' naỹilo. Qataxa ỹachiỹoxotaỹi jen' namanaxanaxa qataxa jen' sa nó'in 'éetapeec da' n'óiỹaxac da' ỹasáxaneegue jen'me ỹátaqta 'eesa da' sóxote cá'ai jen' huetaavlo naua' lesómaxaco. 19Jen'me siỹaxadipi 'éetapega da' ỹ'axátetac da' ladíquiaxac da' n'óiỹaxac 'me ỹátaqta huesóta, qaláxasa jen'me lelatacpi naua' n'onatagueco 'me desepaxanaqtaxa'n. Qá'a ga' siỹaxaua 'ená'am da' lelatac ga' loxonec jega'me. 20Qá'a ga'me ma'le ỹaateton so' qadesaliaxanec qataxa qadec'alaxaqui Jesucristo, qataxa ma'le sóxote da' dasoi'ỹima naua' sa n'oi'n n'onatagueco 'me huetralégue jen' 'aléua, da' 'uootaxa v'iỹílaxalégue da' necoñida'aguet qataxa ỹipaquet'egue da' loxonec jega'me jenaua' n'onatagueco, qana'chi jega'me ỹátaqta napacalégue jeso'me 'uáichiiñi sa nó'in lasoxoc joca'li. 21Qá'a jen'me siỹaxadipi 'ónaxaic toqo' da' sa 'te ỹaateton joca'li da' ladíquiaxac da' n'óiỹaxac 'me ỹoqovíta. Qá'a l'axaso' da' sóxote ỹaateton jeda'me, ỹim, qana'chi cá'ai jeda'me qoỹanem napaxaguenataxanaxac 'me ỹoqovíta. 22Qaláxasa táchiỹi jen' siỹaxadipi da' ỹ'axat jeso'me naloqtenaxanaxat 'me 'eet'oi: “Ga' pioq mai'chi ỹipaquét'a da' ỹalic ga' lolaxat, qataxa jaga' coochi 'me ỹímta qoỹiỹóta, qaa'le ỹipaquét'a da' ỹitaxa necouaỹi so' senal.”
Currently Selected:
2 Pedro 2: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
