2 Pedro 1
1
So' Pedro ỹamaxa jaso' lidíise so' 'amaqténataxanaxaicpi
1Jaỹim Simón Pedro, jaỹim lelatac qataxa jaỹim lamaxasec so' Jesucristo. Jaỹim sedelégue jan' ỹide da' 'ami samaxalo, 'ami 'me 'auacoñiiỹet da' n'amaqténataxanaxac qaỹa ga' 'ená'am 'me 'ená'am da' qo'mi huet'oto, qá'a so' Jesucristo 'me qantamnaxala' qataxa qadec'alaxaqui ỹañoxot da' ỹí'et ga' ỹiỹamqáchiiñi. 2Sétaaque da' 'auacoñiiỹet jeda'me qaỹa 'te hue nichoxodénataxanaxac qataxa da' n'emáxac 'me chiỹaqaỹi da' 'adaatetonaxanaxaquii ñi' Dios qataxa so' qadesaliaxanec Jesús.
Da' lasoxoc jen' quétapegue' so' Cristo
3Ñi' Dios mai'chi chiỹaqaỹi 'en da' l'añaxac da' qo'mi ỹanema ỹima jen' ỹiuéetaaque da' qad'óiỹaxac qataxa da' 'ónaxaic qadasoxoc da' qolaxague jiñi'me joca'li qo'mi ỹaatetonaxanaxanque so' Cristo 'me qo'mi ỹiỹaxanalo, ỹachiỹoxotaỹi da' l'amaqchic qataxa jeda'me l'onataxanaxac 'me qaỹa 'te ga' 'ená'am da' li'ỹoxodic. 4Chiỹaqaỹi da'me tadeeto' qo'mi ỹanema ñi' Dios da' ỹaloxóotac jocalia'cho' 'me ỹátaqta let'ádaic qataxa qaỹa ga' ỹóvi' da' laso'víỹaxac, da' qaidi chiỹoqóchiỹi dójo' ỹaloxóotapega da' 'ami 'auañoxochii da' 'aneuáñiỹa'uo da' lasoxoc ñi' Dios qataxa 'auañoxochii da' 'auasoỹíi'ỹem jen' desepaxanaqtaxan 'me chiỹaqaỹi jen' sa nó'in neenataxacpi 'me huetalégue jen' 'aléua. 5Chan'eesa 'ena't qomle da' nedot'a't da' 'adip'iỹáxaquii. Nataq'en 'anpogoxóiñiỹapegue' da' 'uo ga' 'ónaxaic 'adasoxoquii, qataxa ga' 'adaatetonaxanaxaquii, 6qataxa da' mai'chi netelela't ga' siỹaxaua, qataxa 'auauóỹaaque da' 'aneuálaxainaxaquii, qataxa da' 'oquiit'egue ñi' Dios, 7qataxa da' qoỹauotec ga' naqáỹa, qataxa da' 'adesóxodiquii.
8Qá'a da' 'ami huet'oto ỹima nójo' nasoxocpi, qataxa da' qonchíỹaxatetaseguem, qana'chi da' 'ad'óiỹaxaquii 'uo da' náỹi qataxa sa 'chi nalatéta da' 'adaatetonaxanaxaquii so' qadesaliaxanec Jesucristo. 9Qaláxasa jega'me sa huet'ot ỹima jen'me, qana'chi jega'me 'ená'am ga' sa nauáañi, 'uootaxa ga' sa qaỹa'ague da' lec'atenaxanaxac. Qá'a petelaxaguet da' sóxote da' qoỹiỹo jeso'me 'uáiñi loicpi. 10Chan'eesa 'ami ỹaqáỹa', qá'a ma'le ỹim da' 'ami ỹiỹaxanalo ñi' Dios qataxa 'ami liquiỹáqa, ỹátaqta 'anpogoxóiñiỹapegue' qomle dójo' da' ỹátaqta 'ami ñaxataavlo. Qá'a da' na'chi 'oñíit'ec da'me dójo', qana'chi sa 'te qomle da' 'ovíỹai'ndi. 11Qaidi 'ami qoỹanema da' qaỹa 'te ga' 'ami nauaneeta da' 'aunoxoñiuó'o jega'me qaỹa 'te loiquiaqa' l'onataxanaxac da' ỹilo'ogue ỹimata'a'téna jeso'me qadesaliaxanec qataxa qadec'alaxaqui Jesucristo.
12Chan'eesa jaỹim sequet'ot da' 'ami seenataxanaxanque dójo', temaqaidi da' 'ami sóxote 'auaỹáchiñii jeda'me, qataxa 'ená'te 'oquí'ỹai dójo' 'eesa lasoxoc 'me 'ami huet'oto naỹi. 13Qá'a selá'a da' ỹiỹamqáchiiñi qasen jeda'me, ỹatemaliaxa da' ñic'alétaiỹi, qana'chi jaỹim sa saxanaac dójo' ỹaqátaxac. 14Qá'a so' qadesaliaxanec Jesucristo sóxote jaỹim ỹaỹátenaxanaxanec da' sa huaỹáloq da' secá'ai dójo' ỹ'oqóchiỹi ỹ'óiỹaxac. 15Chan'eesa ỹátaqta 'uo da' ỹoouoxo naỹi, qaidi qomle 'uootaxa ma'le jaỹim qaỹa, qaláxasa 'ami na'chi 'eeta't qomle da' sa 'te 'apetelaqaiỹet dójo'.
Jen'me ỹauáachiỹi joca'li da' li'ỹoxodic so' Cristo
16Dójo' qadapaxaguenataxanaxac 'me 'ami sanaxama da' s'axátaqtac da' l'añaxac qataxa ga' l'iỹílaxasoxoc so' qadesaliaxanec Jesucristo, jeda'me sa 'te sachiỹoxotaqaỹi ga' 'chi qoỹachiỹoxota'ndíja' n'aqtaxanaxac. Qá'a qo'mi ỹátaqta qademá'i ca'li da' sauanáqchiỹi da' li'ỹoxodic jeso'me. 17Qataxa sauanáqchiỹi ca'li ñi' qadet'a Dios ỹanem jeso'me da' ni'ỹoxodénataguec qataxa da' li'ỹoxodic. Qataxa so' l'aqtac 'me qaỹa 'te ga' 'ená'am da' li'ỹoxodic 'eet'oi: “Naqaida da' ỹalec 'me ỹátaqta ỹauotaxat, jeda'me ñitóotapeec.” 18Qo'mi ỹátaqta ñaquiáxanaqchiỹi jeso' n'aqtac 'me chimaqpecot di' piỹem, qá'a qo'mi souqat'asop so' qadesaliaxanec ca'li huá'ña so' qasoxonaxa 'me lalémaxaset ñi' Dios.
19Qaláxasa nataq'en 'uo da' laqáỹa ỹátaqta 'eesa, jeda'me naqaida da' l'aqtaxanaxac jeso'me l'aqtáxanaxanecpi ñi' Dios 'me qoỹidíñi. 'Ami n'óota qomle ỹátaqta 'auloit'eguet dójo' n'aqtaxanaxac, qana'chi jeda'me 'ená'am jaga' coỹadáxanaqte da' ỹicoỹadétaaue ga' n'álaxa, cha ỹivíde'ta da' ỹamtaa'le ỹ'oxoñi, qana'chi nenoxooséguem jaso' ní'chise huaqchiñi, qana'chi ỹicoỹadetalóo'te naua' 'adiquidiaqtéldii'. 20Qaláxasa 'uáiñi qomle da' 'aueenachíit'a dójo' 'eet'oi: Qaỹa 'te ga' 'oonolec jen'me l'aqtacpi ñi' Dios 'me nedétañi da' 'uootaxa 'uo ga' ỹañoxot da' nedotelégue da' ỹ'axategue ga' ladic. 21Qá'a ỹima jeso'me huá'au l'aqtáxanaxanecpi ñi'me qaỹa 'te ga' 'oonolec da' mai'chi nachiỹoxola't ga' l'aqtaxanaxac. Na'chidáta da' jeso'me ỹátaqta nañanot da' 'equegue ñi' Dios, qana'chi ỹ'axa't naua' l'aqtaqa jiñi'me, qá'a so' Espíritu Santo ỹ'aqtaxanaxan jeso'me.
Currently Selected:
2 Pedro 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
