Matayo 25

1 # Luk 12:35; Apu 19:7. “Kapakio kaŋun ituputoorio ajakanut naka akuj kapesuru atomon nukelemunete atalaikec koloto airiamun keteran. 2Akany kakes kebanaaka, akany da kepiriaka. 3Naarai nakeyaŋaariata nukebaŋaaka atalaikec, mam apotu koyaŋaasi akinyet da; 4Konye nukepiriaka koyaŋaasi akinyet kokubeikec nepepe katalaikec. 5Nakiyapia eteran, kiluranaros kere, kojotooros. 6Konye kidiŋebai kojau ecelet ebe, ‘Koany, eteran! Kolomutu kisiriamasi.’ 7Kosodete konyout apesur ŋun kere, kitemonokis atalaikec. 8Kotemasi nukebaŋaaka nukepiriaka ebe, ‘Koinakinai sio da amodiokinyetekus, naarai aduŋeosi akositalai.’ 9Konye koboŋokis nukepiriaka ebe, ‘Diat mam ilosikin sio kayes; koloto gwai mama ejaas ikagwelanarak kogwelut.’ 10Konye napelosete agwel, kobu eteran, kolomasi nuetemokino nepepe kaŋes toma opucit; kogolokinoi ekek. 11#Luk 13:25. Kokau kopotu apesur nuce da kobalas ebe, ‘Ejakait, ejakait, koŋaarai.’ 12#Mat 7:23. Konye Koboŋok, kotema atiar, ‘Abeit katemari yes atiar, mam kajeni yes.’ 13#Mat 24:42. Aso kokwenyete, naarai mam ijenete apaaran karaida esawa.

14 # Luk 19:11-27. “Naarai esubit bala etuŋanan loelosi apejo konyarau ikebulesin, kititiŋ kes ikeboro. #Mat 21:33. 15#Rom 12:6. Koinak ediopet atalatan akany, ka ece aarei, ka ece da adiopet, ŋolituŋanan kwape kejaar apedorike; kosodi kolot akwap ace. 16Atipet kolot ŋol lokedumuni atalatan akany, kogwelana, kitobon ameda naka atalatan ace akany. 17Kwape kwaŋin lokeinakinitai aarei, kitobon ameda naka atalatan ace aarei. 18Konye lokeinakinitai atalat adiopet, kolot kobok alup, kibwa apesan nuka ejakaitike. 19Kosodi ketuboros apaarasia nuipu, kobu ejakait loka ibulesin kaŋul, kimar kakes akepesan. 20Kobu lokeinakinitai atalatan akany, koyau atalatan ace akany, kotema atiar, ‘Ejakait, ibu kititiŋ eoŋ atalatan akany; koany, etoboŋu atalatan ace akany.’ 21#Mat 25:23; Mat 24:45-47; Luk 16:10. Kotema ejakaitike atiar, ‘Ejok, ebulesit ijo loejok lomunot da; ibu korau lomunot kaluikidioko, kadakakini jo ayait luipu; aso kolom ma toma aiyalama naka ejakaitikon.’ 22Kobu da ŋol lokeinakinitai atalatan aarei, kotema atiar, ‘Ejakait, ibu kititiŋ eoŋ atalatan aarei; koany, etoboŋu atalatan ace aarei.’ 23#Mat 25:21. Kotema ejakaitike atiar, ‘Ejok, ebulesit ijo loejok lomunot da; ibu korau lomunot kaluikidioko, kadakakini jo ayait luipu; aso kolom ma ijo da toma aiyalama naka ejakaitikon.’ 24Kobu da ŋol lokeinakinitai atalat adiopet, kotema atiar, ‘Ejakait, abu kajen ebe irai ijo etuŋanan loeninik, idwenyi kama nemam iyeikinit, itukonokini kanemam isiarakinit; 25aso kakurianar, kalot kebwa akonitalat kalup: koany, napekon na.’ 26Konye Koboŋok ejakaitike kotema atiar, ‘Ebulesit ijo loerono loeloŋwana! Ibu kojen ebe adwenyi kama nemam ayeikinit, atukonokini da kanemam esiarakinit; 27ti ibusakinit ijo ainakin akapesan mama ejaas ikeŋadak arupian, eoŋ da kabu tikadum nuaraas nukaŋ ka amedakec da. 28Aso kodemasi ŋes atalat, koinakis ŋol loeiaas atalatan atomon. 29#Mat 13:12; Mk 4:25; Luk 8:18. Naarai yenejai ibore einakinio, ido edumuni luipu noi; konye yenemamei ibore, ŋin da yenejaas kaŋes edemario. 30#Mat 8:12; 22:13; Luk 13:28. Kocakakisi ebulesit ŋol lomam ajokis amuton nakokiŋa: ejaun kanen aimony ka airiamanakin ikel.’

31 # Mat 16:27; 19:28; Sek 14:5; Apu 20:11-13. “Naebunio Okoku loka etuŋanan kotoma aibusesuke, ka imalaikan da kere nepepe kaŋes, iboikini oicoloŋoke loka aibuses; 32#Rom 14:10. etukonokinos atekerin kere akonyeneke, etiakatiakai ŋesi kes kwape etiakatiakaa ekecokon amerekekin ka akinei: 33#Esk 34:17. ibwaikini amerekekin akanike nakoteten ka akinei da akanike nakokediany. 34Kosodi etemari ekabaka lukakanike nakoteten atiar, ‘Kopotu yesi lukisirereŋit Papaka, kirumata ajakanut nakitemonokinitoi ameun kaisub akwapin; 35#Isa 58:7. naarai kariebi eteŋei, ipotu koinakis aimuj, kaiakit akur, ipotu koinakis numatan; arai epejonon, ipotu kisukunyikis; 36amujalal, ipotu kitanapa; adeka, ipotu koanyanasi; ajai toma aidaris, kopotu mama ajai.’ 37#Mat 6:3. Kosodete eboŋokinete ikadolitok ebe, ‘Ejakait, kipou kaanyutu jo wori kiriebi eteŋei, kesimujata? Arai kijakit akur, ketamata? 38Kipou kaanyut jo wori irai epejonon, kesukunyikis? Arai imujalal, ketanapa? 39Kipou da kaanyutu jo wori ideka, arai toma aidaris, kapotu mama ijai?’ 40#Awa 19:17; Bur 2:11. Kanen eboŋokini ekabaka ebe, ‘Abeit katemari yes atiar, Kwape kiswamakiniata idiopet kalu iinacanaka ludidik, ipotu kiswamakis eoŋ.’ 41#Mat 7:23; Apu 20:10,15. Kosodi do etemari lukakanike nakokediany atiar, ‘Irwa yesi, lukilamakinitai, kolomasi akim naka ikar kere naitemokinitoi Satan ka ikemalaikan. 42Naarai kariebi eteŋei, mam ipotu koinakis aimuj; kajakit akur, mam ipotu koinakis numatan; 43arai epejonon, mam ipotu kisukunyikis; amujalal, mam ipotu kitanapa; adeka, ajai da toma aidaris, mam ipotu koanyanasi.’ 44Kosodete eboŋokinete kesi da ebe, ‘Ejakait, kipou kaanyutu jo wori iriebi eteŋei, arai kijakit akur, arai irai epejonon, arai imujalal, arai ideka, arai ijai toma aidaris, komam kijaanakinit jo?’ 45Kanen eboŋokini kes ebe, ‘Abeit katemari yes atiar, Kwape mam kiswamakiniata idiopet kaludidik kalu, mam ipotu kiswamakis eoŋ.’ 46#Dan 12:2; Yok 5:29. Elosete ŋul alomar toma aiticanio naka ikar kere, konye luedolito elosete toma aijar naka ikar kere.”

Currently Selected:

Matayo 25: AOV1961

Highlight

Copy