Luka 17

1Kotema ikekesisiak atiar, “Mam eswakete nuitiguikinete abunore; konye itukwi ituŋanan ŋin yeneyaŋauni ŋun! 2#Mat 18:6,7. Tiejok ituŋanan ŋin aenikin akukuse omurisiŋike, kocakakinai aŋolol itia aitiguikin idiopet kaludidik kalu. 3#Mat 18:15. Kocoito; arai kediak onacekon, kitoron ŋes; arai kitoronikin kisioni. 4#Mat 18:21,22. Arai kediak kamakon irwan akanykaarei kapaaran adiopet, koboŋu mamakon irwan akanykaarei, kobala ebe, ‘Etoronikin,’ kisioni ŋes.”

5 # Mk 9:24. Kotemasi ikiyakia Ejakait atiar, “Kiyatakinai aiyuunikosi!” 6#Mat 17:20; 21:21. Kotema Ejakait atiar, “Arai kijaas kaiyuun naetia ecokat loka ekaradali, tikilimokis esukamin lo ebe, ‘Koukor, kiraikin aŋolol.’ Tikiirimak yes.

7“Ido iŋai bo kayesi yenejai ekebulesit loekoriei arai loicokiei amerekekin yenelimokini ŋes atipet napeboŋunio kotoma amana ebe, ‘Kobia atipet kiboikin ainyam’. 8Arai bo elimokini ŋes ebe, ‘Kitemokinoi ikanyamat lukatiboŋ, koen aŋabet, kijaanak eoŋ, kiton neadaunia eoŋ ainyam ka aimat; kosodi konyet inyami ijo da ka aimat’? 9Imalai kereka ŋesi ebulesit naarai eswama nuecorakinitai? 10Kwape kwaŋin yes da, naidauniata aswam kere nukicorakinitai, kineras ebe, ‘Kirai isio ibulesin lumam ajokis; kiswama bon nukibusakinit aswam.’ ”

11 # Luk 9:51; 13:22. Kosodi kanen napelosi Yesu Yerusalem, kitor kidiŋ Samaria ka Galilaya. 12#Leb 13:45,46. Napelomari ore ediopet, kiriamunos kalukatapon itomon, lukebwoete kama elwana, 13kiworoto kobalas ebe, “Wu Yesu, Lokapolon, kitimoi sio.” 14#Leb 13:49; 14:1-32; Luk 5:14. Nakeanyunia kes kotema atiar, “Koloto, kitodiaros mama ejaas isasedotin.” Ido napelosete kiswagarai. 15Kosodi ediopet kakesi nakeanyunia ebe aŋaleu, koboŋu, kitopolo Edeke keporoto loepol. 16Kibirokin ebuburia akejen nuka Yesu, kimala ŋes. Kerai da ŋol Esamariat. 17Koboŋok Yesu kiner atiar, “Mam eswagara itomon kere? Ai bo do ejaas kwi ikanykaoŋon? 18Mam ca etakanunit edio da aboŋun aitopoloor Edeke dimarai emoit lo?” 19#Luk 7:50. Kotema ŋes atiar, “Konyou, kolot; kitajar jo akoniiyuun.”

20 # Yok 18:36; 3:3. Nakiŋisiata Iparisayon ebe ebuni bo wori ajakanut naka Edeke, Koboŋok kes kotema atiar, “Mam ebuni ajakanut naka Edeke iteio; 21#Mat 24:23; Yok 1:26; 12:35. kwabo mam ineras ebe, ‘Koany, ejai lailo!’ arai, ‘Ejai laije!’ Naarai koany, ejai ajakanut naka Edeke tomakus.”

22Kotema ikekesisiak atiar, “Epote rwaru apaarasia, nuimielatar aanyun adiopet kotoma apaarasia nuka Okoku loka etuŋanan, komam ianyunete. 23#Luk 21:8. Kilimokinete ebe, ‘Koany, ejai laije!’ ‘Koany, ejai lailo!’ Sirikiloto, kwabo sirikitupasi da. 24#Mat 24:26,27. Naarai kwape imiliaunia eimilia ameun kowai ediopet loka akuj, inwakit kiton owai ece loka akuj, kwape kwaŋin ejaunia Okoku loka etuŋanan kotoma apaaranike. 25#Luk 9:22. Konye ibusakinit ber ŋes aiticanio nuipu, kogir atur na. 26#Age 6:5-8; Mat 24:37-39. Kwape kejaatar kapaarasia nuka Noa, kwape kwaŋin ejauniata kotoma apaarasia nuka Okoku loka etuŋanan, 27#Age 7:6-24. Konyama, komata, komanya, ka amanyio da, kiton apaaran nakelomaria Noa toma ataker, kijesun akalele komudia kere. 28#Age 18:20. Kwape kwaŋin kwape kejaatar kapaarasia nuka Lot; konyama, komata, kogwela, kogwelasi, kiraata, koduko da; 29#Age 19:24,25. konye kapaaran nakelomunia Lot koSodom, kotep akim ka acukuman abunore kakuj, komudia kere. 30Ikote nen kapaaran naepukorere Okoku loka etuŋanan, 31#Mat 24:17-18; Mk 13:15-16; Age 19:26. Kapaaran kaŋin, yenejai kuju togo, kojaas ikeboro toma togo, sirikijesun alemun; kwape kwaŋin yenejai mana sirikeboŋu kau, 32#Age 19:26. Kiitut aberu naka Lot. 33#Mat 10:39; 16:25; Mk 8:35; Luk 9:24; Yok 12:25. Inituŋanan yenekoto aitajar akeijar, itooliori; ka ŋin da yenitooliori akeijar itajari. 34Katemari yes atiar, kakuare kaŋin ejaunos ituŋa iarei oitada ediopet; eyaŋaario ediopet, inyeinio loce. 35#Mat 24:40,41. Ejaunos aŋor aarei iricete nepepe; eyaŋaario adiopet, inyeinio nace. [36Ejaunos ituŋa iarei amana; eyaŋaario ediopet, inyeinio loce]” 37#Yob 39:30; Mat 24:28. Kotemasi ŋes atiar, “Laali bo, Ejakait?” Kotema kes atiar, “Neejai akuan, etukonokinos da atarukon nen.”

Currently Selected:

Luka 17: AOV1961

Highlight

Copy