Luka 16

1Kotema bobo Yesu ikekesisiak atiar, “Kojai etuŋanan ekabaran lokejai ekekeŋadan, kirupeai ŋol kamake ebe eweliwel iboroke. 2Konyarau kotema ŋes atiar, ‘Akiro nunyoika nu nueirarit kamakon? Kimar iboro luka akoniiŋad, naarai mam ipedori bobo araut ekeŋadan.’ 3Kotema ekeŋadan je kotauke atiar, ‘Kekonak ai, naarai kadema papaka aiŋad? Emamei eoŋ agogoŋ akor, kerumito da ileic ailipitoi. 4Ajeni nueswamai, tetere keereŋei kaiŋadakaŋ, kesukunyikis otogoikec.’ 5Konyarau lukapesenin luka ejakaitike ŋolidiopet, kotema losodit atiar, ‘Inyo bo kiburai ejakaitika jo?’ 6Kobala ebe, ‘Aitemisio akwatat nuka akinyet.’ Kolimok ebe, ‘Kolem akoniitutuket, kiboikin atipet, kiwadik akaisakany.’ 7Kosodi atemar ece atiar, ‘Inyo bo kiburao jo?’ Kobala ebe, ‘Aitemisio akwatat nuka akima.’ Kotema ŋes atiar, ‘Kolem akoniitutuket, kiwadik akaisakanykauni.’ 8#Pes 5:8; 1 Ses 5:5. Kitojok ejakaitike ekeŋadan lokeŋalan kanuka aswam nukapirianut; naarai idwe luka akwapin kanu kotoma aturikec ejaas kapirianut aitelekarit idwe luka aica. 9#Luk 14:14; Mat 6:20; 10:40; 19:21. Katemari yes atiar, Koneronosi ipapero kotoma abar naka amamus adolit, tetere naemamuunor, kisukunyikis yes toma aiboisio nuka ikar kere.

10 # Luk 19:17. “Yenimunot kakirot naedit noi, erai yenimunot kakirot naepol; ŋin da yeniŋalai kakirot naedit, erai yeniŋalai da kakirot naepol. 11Aso arai mam yes iraas lumunon kotoma abar naka aiŋal, iŋai bo kisiŋadikini yes abar nakabeit? 12Arai mam iraas lumunon kotoma kaŋul kalueraas luka ice, iŋai bo kiinakini yes lueraas lukus ikulepek? 13#Mat 6:24. Emamei ekejaanakinan loepedori aijaanakin ijaka iarei, naarai arai elai ediopet, komina loce, arai bo iketakin kediopet emeni loce. Mam ipedorete aijaanakin Edeke ka aijaanakin abar da.”

14 # Mat 23:14. Kiirasi Iparisayon lueminas apesan ŋun kere, kimuasi ŋes. 15#Luk 18:9-14; Mat 23:28; Sab 7:9; Awa 6:16,17. Kotema kes atiar, “Iraas yesi luitojokas araut ikadolitok kakonyen nuka ituŋa, konye ejeŋi Edeke ikusitauon; naarai yenitopolooritai kotuŋa erai yeniketal kakonyen nuka Edeke.

16 # Mat 11:12-13. “Kejaas ikisila ka inabin kiton Yokana; ameun kapak kaŋin elimonokinio akiro nukajokak nuka ajakanut naka Edeke, ebelakini da ŋinituŋanan kagogoŋ. 17#Mat 5:18. Konye epatana akuj ka akwap adaun itia aicunyakinet adiopet naka ikisila apalunio.

18 # Mat 5:32; 19:9; 1 Kor 7:10-11. “Ŋolituŋanan loereŋeari akeberu komany ace adotear, ŋol da loemanyi nakireŋeari okilenike adotear.

19“Kojai etuŋanan lokabaran, lokenapenenei egoe lomuge ka ebaputa loejok, kolakanar ŋinipaaran koboro luetaitaete. 20Kojai da lokican ekekiror Lasaro, loeperionokino oruteke, kojaas kajimii nuipu. 21#Mat 15:27. Kimiela ŋesi aimonianakin ararasia nukedoenenete komesa loka ekabaran; koponenenete iŋokwo da aime akejimii. 22Kosodi kanen kotwana lokican, kodakasi imalaikan atorob naka Aburaam. Kotwana ekabaran da, konukai. 23Kitonyou akekonye kotoma Okatwak, kanekejaar toma aikilianar naepol, koany Aburaam kama elwana ka Lasaro da katorobuke. 24Kiworo ebe, ‘Aburaam Papa, kitimoi, kijuk Lasaro kidomak kiŋaren kebokoritike akipi ketojonia akaŋajep; naarai arieba noi kotoma akim na.’ 25Kobala Aburaam ebe, ‘Okokuka, kiitu ebe ibu ijo kodum nukajokakakon kotoma aijarakon, ka Lasaro da kwaŋin kodum nukaronok; konye kwana italakario ŋes kane, ka jo da kisiriebio. 26Mere ŋun bon, konye kidiŋikosi kayes ejai asoogot naidul, tetere ŋulluekotosi anyoun kane mam epedorete atubun mamakus, emameete da luepedorete anyoun kaŋina ailamun mamakosi.’ 27Kotema atiar, ‘Aso papa, keŋaiŋait, kijuka ŋes togo loka papaka, 28naarai ejaas eoŋ iinacan ikany, tetere ikwenyari kes, kinyeis kesi da adolun aibois na nakaikilianar.’ 29#2 Tim 3:16. Konye kobala Aburaam ebe, ‘Ejaas kes kaMusa ka inabin, kiirasi ŋul.’ 30Kotema atiar, ‘Mam, Aburaam Papa; konye arai kelot etuŋanan loenyouni kokatwak, itoronikinos.’ 31#Yok 11:45-53. Kotema ŋes atiar, ‘Arai mam iirarete Musa ka inabin, mam ecamunete karaida kejaru ituŋanan kokatwak.’”

Currently Selected:

Luka 16: AOV1961

Highlight

Copy