Param Marikanka 12
12
Mairin bara dragun ba wal
1Bara kasbrika purara sain tara kum takan: mairin kumi wan yu lapta ba ni kwala baku dingkan kan, bara kati ba ai mina nani munhtara bri kan, ai lal purara sin kraun kum slilma 12 ni daukan. 2Naha mairka na kwihra kan, bara uya ini kan ai biara bûi kan bamna, bara aisubaia pat baila kan. 3Baha ningkara kasbrika purara sain wala kum takan: Baha ba dragun pauni kum kan, ai lal 7 bri kan,#Dn 7.7. aringka matawalsip bara ai lal bani purara sin kraun kum. 4Bara ai wâika ni, kasbrika purara slilma nani yumhpa bani wina kumi ba raski tasba ra lulkan.#Dn 8.10. Dragun ba mairin mahka aisubaia kan ba mawanra buan, ai luhpia aisubi takbia ba mahka piaia wisi. 5Bara mairin ba luhpa waitna kum baikan,#Ais 66.7. bara naha tuktika sika nisan nani sut purara king aimakbia ayan klalka nani kira.#Law 2.9. Ningkara, ai luhpia ba ai mihta dakban kan, bara Gâd mawanra bara ai king iwaika mawanra brih wan kata. 6Mairka ba lika upla iwras tasbaya ra plapan; bahara Gâd bui witin ai pliska kum ridi daukan kan, bara bahara sin yu 1,260 prais, witin ra plun dakaki kabia.
7Bara kasbrika purara war tara kum takan: Maikel#Dn 10.13,21; 12.1; Jud 9. ai insalka nani aikuki dragun ba mapara aiklaban. Dragunka ai insalka nani sut kira sin mapara bûi aiklaban; 8sakuna witin nani aiklabanka ba sip pura luras kan, bara dragun ai insalka nani wal kasbrika purara pliska âpu takan. 9Baku bamna, dragun tara ba latara lulkan kan. Witin sika piuta almuk ba,#Bla St 3.1. nina dibil bara Sitan mâki ba, witinka mita sika tasba aiska ra kunin aisi ba. Witin ai insalka nani kira tasba ra lulkan kata.#Lk 10.18.
10Bara kasbrika purara bîla baikra tara kum walri, naku aisin:
“Swaki sakan lâka ba pat balan.
Yawan wan Gâd karnika ba kingka lâka ba,
nanara Kraist karnika ba marikan sa.
Kan wan muihni nani dahra kwakwahkra ba saki lulkan sa,#Job 1.6-12; Sak 3.1.
witinka kakna bara tihmia
wan Gâdka mawanra baha nani dahra kwahki kata ba.
11Wan muihni nani witin pura luan sa
Sîp Luhpia ba ai tâlia laikan ba mita,
diara kasak kat witniska aisi ba mita sin;
kan witin nani ai rayaka ba tikaia sibrin âpu,
sakuna pruaia lika wilin nani kan.
12¡Bamna, kasbrika purara nani sma ba,
liliam taki bas,
man nani bahara iwisma ba!
Sakuna tasba ra bara kabu ra iwi nani ba mapara
lika alai pali kabia,
kan dibil ba man nani ra iwan sa,
ai kupia sin baikan sa,
kan witin kaikisa kau piua wiria baman brisa bamna.”
13Bara dragun, witin ba tasba ra lulkan kan kaiki, baha mairka luhpa waitna kum baikan ba, mahka nina bliki rausauhkan. 14Sakuna mairin bara yakal tnawa tara wâl yan kan, upla iwras tasbaya pliska ba ra pâli wabia wisi; mani yumhpa pura bakriki witin ra plun dakaki kaia kan ba pliska ra, piuta ba wina laihura bâra kaia.#Dn 7.25; 12.7. 15Piuta ba ai bîla wina mairin ba ninara lî sakan, awala kum dauki mairka ba alki brih waia, 16sakuna tasba mita mairin ba hilp munan; tasba ai bîla kwâkan, bara baha awalka dragun ai bîla wina sakan kan ba langkan. 17Baku bamna, dragun ba mairka mapara uya ai kupia baikan, bara mairka kiamka nani kau bâra nani kan ba mapara aiklabaia wan, baha nani Gâd lâka bîla nani alki ba, bara Jisas Kraist sturka yamni kat kasak nani ba. 18Bara dragun ba kabu auhika purara buan.
Currently Selected:
Param Marikanka 12: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
