Lawana Nani 94
94
LAWANA 94 (93)
Dawan ba tasba aiska Lâ wihtka sa
1¡Mariks Dawan, man ba Gâd pana mamunra sma ba!
2Man ba tasba aiska lâ wihtka sma,
¡pura luan dauki nani ba mapara bus
bara ai mana ba yas!
3¿Ahkia kat, Dawan,
ahkia kat watawi dadaukra nani lilia bri kabia?
4Baha saura dadaukra nani ba sut,
kiama karnira nani bara prautkira nani,
ai kulkanka tara papulra nani sa.
5Dawan, man
witin nani man uplikam ba kriki sauhki tikisa;
¡uplikam nani ba mâyara batakisa!
6Piarka nani bara tringsar nani ra ikisa;
rau nani ra sin ikisa.
7Bara witin nani wisa,
Dawan baha ba kaikras;
Jekob Gâdka baha tânka sin briras sa.
8¡Tânka bris, upla lal karna bara taniskira nani!
¿Ahkia kat man nani diara tânka brima?
9¿Kiama nani paskan ba sip apia sma ki diara nani walaia?
¿Bara namkra nani paskan ba diara kaikaia sip apia sma ki?
10¿Nisan nani ra wapnika mangki yaba mita,
klala yabaia sip apia sa ki?
¿Bara upla ra sins lâka smalki yaba,
diara tânka sip bribia apia ki?
11¡Dawan ba diara sut kaikisa,
upla ba diara tanis man luki tauki ba!#2 Ko 3.20.
12Man Dawan,
baha uplika lilia sa,
man bui wapnika mangki
bara smalkanka nani yabisma ba.
13Baku yua saura balbia piua ra
ai âuyapah kabia,
bara watawikira nani ba kainara lika
unta salhkan kum ridi dauki swin sa.
14Dawan ba ai uplika nani ra
lulki swibia apia,
bara sin ai uplika nani ra
yakan lulki swin kabia apia.
15Kasakka lâka ba,
kli kasakka ra tawi balbia
bara upla bani baha kulkanka lâka ba nina blîkbia.
16¿Ya bui tâi baikaia kan,
baha watawikira, bara saura dadaukra nani mihta wina?
17Dawan hilp ai munras kan kata kaka,
yang na pat prui sâp takaia kapri.
18Aima kum naku wîri: “Mini lalalwan” ba ra,
man lamtwanka lâka balan,
Dawan, yang ra hilp ai munaia.
19Yang trabilki nani tilara
lukanki ra ai muni kan, man maisa nihkra
aikram bara lilia lâka sin.
20Man sip wihta saura nani wal uplikam takras,
witin nani saura daukisa lâ ba mapara;
21upla dakni kum taki pâtkas
bara kulkanka bri nani mapara buisa,
bara ban pruaia kat lakisa.
22Sakuna Dawan ba yang yukuwaiki sa;
yang Gâdki, witin lika yang wailpaya, witin tâi baikisa.
23Dawan mita watawikira nani ba,
ai watawanka ba tâwan sauhki tikan kabia.
¡Âu, wan Dawan bui sauhki tikan kabia!
Currently Selected:
Lawana Nani 94: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
