Lawana Nani 103
103
LAWANA 103 (102)
Dawan ra mayuni yamni wimni
Debit ulban.
1Dawan ba yamni sa wimni, kupi aiska ni;
yamni sa wimni, wîni aiska wal ai nina holikira ba;
2Dawan ba yamni sa wimni, sulki aiska ba wal;
ai yamnika nani kumi sin, âiya tikamna apia.
3Witin bui yang watawanki nani sut ba, swih tikisa,
witin bui yang sikniski nani sut ba wina ai rakisa.
4Yang rayaki prura wina atki ai sakisa,
bara ai latwanka lâka bara swapni ba wal banhki ai daukisa.
5Witin âiyapah kaia yamnika aikisa,
bara sin wahma ai sakisa, yakal kum baku.
6Dawan lika lâ tânka kat bara kasak tânka ba wal,
lâ daukisa, baha nani rausauhki uplika nani ra.#Law 146.7.
7Witin ai yabalka nani bara ai daukanka nani marikan,
Moses ra bara Israel luhpia nani ra sin.
8Dawan ba upla ra tawa munisa,
bara kupia swapni sa,
wihka sin bîla kaikisa,
ai latwanka lâka bri ba mita.#Law 145.8; Je 5.11.
9Witin piua sut ra lawi wan daukras,
ai lawanka ba sin ban kaia ra bâra apia sa;
10wan watawanka nani, bara wan saurka
lâka nani mana, klala wankaia kan ba kat wankras sa;
11ai latwanka lâka ba tara pali sa
witin ra kulki nani ra,
tasba kasbrika pura yahpika tara ba baku sa.
12Lalma ba muna wina wihka ba baku,
yawan wan saurka nani ba sakan sa,
13aisa ai luhpia nani ra latwan kaiki ba baku,
Dawan baha nani ra latwan kaikisa,
witin ra kulki uplika nani ra.
14Witin nu sa, yawan nani na,
dîa ni wan paskan ba,
witin nu sa yawan nani na,
tasba yuya ni wan paskan ba.
15Upla rayaka ba, inta wahia baku sa;
unta ra tangni urhwi taki pâwi ba baku sa;
16pâsa saura krawi pruki sauhkan,
kli upla kaikras ba,
bara upla kli ai kupia kraukras sa.
17Sakuna Dawan kupia latwanka lâka ba,
ban kaia ra bâra sa,
baha nani witin ra pain kulki nani ba ra;
ai kasakka lâka ba tnata âpu sa
baha kiamka nani sut ra,#Ais 40.6-8.
18witin wal daukan lâka ba ban kulki bri kabia dukiara,
bara ai lâka bîla nani wali daukaia ba ai âuya tiwbia apia dukiara.
19Dawan ai iwaika ba
kasbrika pura ba kat mangkan,
witin ai kingka lâka ba
diara sut purara karnika brisa.
20¡Dawan ba yamni pali sa,
insal karnakira nani, mayuns!
Man nani ai adarka kat daukisma ba,
ai bîla wali daukisma nani ba.
21Dawan ba yamni pali sa,
war aiklaklabra daknika aiska ba, mayuns,
ai dukia daukisma bara ai kupia lâka kat sma nani ba.
22¡Dawan ba yamni pali sa,
witin ai paskanka nani sut ba mayuns,
witin ai kingka tasbaya nani sut ra!#Law 148.
¡Dawan ra yang kupia aiska kira mayunamni!
Currently Selected:
Lawana Nani 103: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
