Lawana Nani 102
102
LAWANA 102 (101)
Sari brabrira kum pura sunra
Sari bri pura sunra kum, sip witin maisa nihkra briras bara Dawan ra ai pâtka ba aisisa.
1Dawan, yang puri sunra ba wals,
bara winanki ba yarka man kat wabia.
2Mamwan yang ra yukukpara
yang pât brisna ba piua ra,
¡man bui yang ra ai wals yang bui man ra winisna ba ra!
3Rayaki ba kiasma baku lui auya
dusi nani ba sin pauta masku klauhi ba baku sa,
4kupi ba insauhkan sa, twi irban srawan ba baku;
¡plun sin pin ai daukras sa!
5Yang maimna lulkan man baha mita
dusi nani ba wîni ra alkan sa.
6Yang na iskri kum, upla iwras tasbaya ra baku sni,
iskri kum tawan sauhki tikan tawanka ra bâra ba baku sna.
7Yang sip yapras,
tnawira kum yakan utla bahna ra uli ba baku sni.
8Waihli nani ba takaskras swiri paskisa
bara yang nini brih upla ra saura wiaia aisisa.
9Plun piaia katna ba yamhpus pisna;
diaiki ba naikra laya ni abalkan sa,
10man lawankam bara kupiam baiwanka ba mita,
purara ai bukatma;
baha ningkara ai batakaia mata.
11Yui nani ba dista kum baku lui wata;#Job 8.9; 14.2; Law 39.5-6; 109.23.
twi baku lâwi luan sa.
12Sakuna man, Dawan,
ban kaia ra king aimakisma,
¡man ninam ba ban kaia ra luki bri kabia!
13Man bus bara Saion ra umpira kaiks,
piua ba aimakan sa;
saurka swi tikaia yua ba pat aimakan sa.
14Nampakan nani ai walpaya nani ra latwan kaikisa;
¡sauhki tikan ba dukiara sarka brisa!
15Nisan nani bara tasba kingka nani sut,
Dawan nina ba prana dauki kulkbia.
16Saion ba kli raya paskbia, bara
witin ai prana ra latan bal takbia.
17Hilpkas nani pura sunra ba walma,
bara man, witin makabanka ba walras kapara.
18Ulbi swin kaia sa naha na kiamka nani naika balbia ba dukiara,
aisubi takuya nani sut ba
Dawan ra mayuni kabia ba wisi.
19Dawan ai watla holikira kasbrika
purara ba wina tasba ra kaikan,
20silak uplika nani inanka ba maisa nihkaia
bara prura pâtka ra lakan nani ba pri sakaia;
21Saion ra Jerusalem bâra ba,
Dawan sturka aisi bara nina mayuni kabia,
22nisan nani sut ba
asla taki ai nina mayunaia balbia ba ra.
23Yabal lila kat witin bui karniki ba sakan,
witin bui rayaki ba klutka daukan.
24Yang mai wisni: “Yang Dawanki,
rayaki bakriki man ai brih wapara.”
¡Mankam nani ba ban sa, lui waras!
25Patitara wina wan tasba playka nani bapi swiram,
man pali bui kasbrika pura ba paskram.
26Baha nani sut ba yu kum âpu takbia,
sakuna man lika bâra ban kama.
Baha nani sut ba kwala aisawi lui baku lubia;
¡man bui lakma, bara lakan kabia,
prâk kum daiki wala dimi ba baku!
27Sakuna man lika ban sma;
rayakam ba danh takras, tnata âpu kabia.#Hib 1.10-12.
28Nampakan nani kiamka ba ban kan suni kama,
witin nani kiamka sin, man mamwanra ban bapan kabia.
Currently Selected:
Lawana Nani 102: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
