Matiu 1
1
Jisas Kraist damika nani ba
(Lk 3.23-38)
1Naha sika Jisas Kraist damika sturka ulban ba, witin ba Debit bara Ebraham kiamka ba.
2Ebraham ba Aisak aisika kan, Aisak ba Jekob aisika, Jekob ba Juda ai muihni nani sut aisika. 3Juda lika Tamar wina Fares bara Zérah sakan. Bara Fares Hesrón aisika, Hesrón lika Ram aisika. 4Ram ba Aminadab aisika, Aminadab ba Nahasón aisika, Nahasón lika Salmón aisika. 5Booz aisika ba Salmón, bara yaptika lika Rahab. Obed aisika ba Booz, bara yaptika lika Rut. Obed ba Jesé aisika. 6Jesé lika king Debit aisika, king Debit lika Salaman aisika kata, Urías maya wal brih baikan ba.#1 Kr 2.1-15; Rt 4.18-22.
7Salaman ba Roboam aisika, Roboam ba Abías aisika, Abías lika Asá aisika. 8Asá ba Josafat aisika, Josafat ba Joram aisika, Joram lika Ozías aisika. 9Ozías ba Jotam aisika, Jotam ba Ahaz aisika, Ahaz lika Ezequías aisika. 10Ezequías ba Manasés aisika, Manasés ba Amón aisika, Amón lika Josías aisika. 11Josías ba Jeconías aisika kata, ai muihni nani aikuki, Israel luhpia nani Babilon ra alki alba lâka ra bri wan piua ra.#2 Ki 24.14-15; 2 Kr 36.10; Jir 27.20.
12Babilon ra kan piua ningkara Jeconías ba Salatiel aisika kata, Salatiel lika Zorobabel aisika. 13Zorobabel ba Abihud aisika, Abihud ba Eliaquim aisika, Eliaquim lika Asor aisika. 14Asor ba Sadoc aisika, Sadoc ba Aquim aisika, Aquim lika Eliud aisika. 15Eliud ba Eleazar aisika, Eleazar ba Matán aisika, Matán lika Jekob aisika. 16Jekob sika Meri maya Josep ba aisika. Meri sika Jisas yaptika, witinka nina Misaya mâki ba.
17Baku bamna, Ebraham wina Debit kat kiamka 14 luan, bara Debit wina Israel luhpia nani Babilon ra bri wan ba kat kiamka 14 luata, bara baha piua wina Misaya ba aisubi takan kat sim baku kiamka 14 luan.
Jisas Kraist aisubanka ba
(Lk 2.1-7)
18Jisas Kraist aisubanka tânka ba naku sa: ai yaptika Meri ba Josep wal marit takaia lâ daukan kan;#Lk 1.27. bara kau wal briras kan piua, Meri ba Spirit Holikira karnika mita kwihra tiwan. 19Ai maya Josep ba waitna kasakkira kan ba mita witin Meri nina sauhkaia want apia kan; bamna witin lukan yukuwan ra sâp swiaia. 20Naha luki kan ba ra, Dawan insalka kum yaprisauhkan ra latan taki, naku win: “Josep, Debit kiamka sma ba, man Meri ba mayam briaia si bripara, ai luhpia bribia ba lika Spirit Holikira karnika wina sa bamna. 21Witin luhpa waitna kum bribia, bara ai nina ba Jisas mâkma.#Jisas nina tânka ba, Dawan ba swaki sakisa.,#Lk 1.31. Baku ai nina mâkbia, kan witin bui ai uplika nani ai saurka nani wina swaki sâkbia bamna.”
22Naha sut na takan, Dawan mita ai prapitka bâk aisin ba aiska daukaia dukiara:
23“Tiara aihwa ba kwihra tiwbia,
bamna ai luhpia waitna kum sâkbia,
ai nina ba Imaniuel mâkbia”#Ais 7.14.
(baha tânka lika: “Gâd yawan wal sa”).
24Josep yapi ai kupia krawan ba ra, Dawan insalka win ba kat daukan, bara Meri ba ai maya brin. 25Sakuna witin nani lika wal ai maya baku briras kan, Meri ai luhpia sakan ba kat. Bara ai nina ba Jisas mâkan.#Lk 2.21.
Currently Selected:
Matiu 1: MSKTU
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2010 Bible Society in Nicaragua