Libait Lâka 9

Eran prîs warkka ba mahka daukan

1Eran wik kum Dawan wal aisaia tintka watla durka lamara iwan. Baha ningkara, baha yua wala ba Moses witin ra, ai luhpia waitna nani ra, bara Israel tila tâ uplika almuk nani ba sin sut paiwan balan. 2Bara witin bui Eran ra win: “Bîp wainhka lupia kum bris, sîp wainhka kum bri bal, wîna ra watawan âpu pali ba, bîp ba upla saura daukan ba saurka mana sakripais daukaia dukiara, sîp ba lika angki Dawan ra prisantka yabia dukiara. 3Bara Israel luhpia nani ra wis, witin nani sin guts wainhka kum bri balbia saura daukan ba mana yabaia, bîp lupia sin kum, sîpka ba mani kum bri kaka, wîna ra watawan âpu kaia sa, baha wîna ba aiska angki Dawan ra prisantka yabaia. 4Bara bîp wainhka wala kum sîp sin kau kum bri bal. Dawan naiwa man nani ra param takaisa, bamna baha daiwra nani ba, witin kaiki bara iki, witin wal kli uplika takaia sakripaiska ba daukaia. Bara plun mâ akban batana laya ra akbi dauki prisantka sin man nani bri balma.”

5Moses lika witin nani ra dîa daukaia win ba baku, Israel luhpia nani dauki balan, tintka watla ra dimaia ba lamara, bara tawan wina sin upla sut balan, tint watla ba lamara Dawan mawanra kaiki bûi kan. 6Bara Moses mita witin nani ra kli win: “Dawan ai adarka ba man nani ra naku daukaia mai win sa. Bamna man nani baku dauks, bara Dawan ai prana ingnika tara ba man nani ra param mamrikbia.”

7Bara witin Eran ra tawi kaiki, win: “Nanara man altar lamara was, bara man saurkam mana sakripaiska ba pas sakripais dauks. Baha angki puram suns, bara man saurkam ba ban swih tikan kabia. Israel luhpia nani saurka swih tikaia dukiara sin puram suns, upla nani ai saurka daukan mana angkaia prisantka nani bri balan ba sin bri bal, bara baha nani saurka ba ban swih tiki, Gâd wal kli uplika takaia pura sunra ba puram suns. Dawan adarka win ba kat daukaia.”#Hib 5.1-3; 7.27.

8Eran altar lamara wan, bara ai bîpka wainhka lupia, ai saurka mana ikaia bri balan ba skiru ni sabi ikan. 9Bara ai luhpia waitna nani ba bal, tâlia ba watla kum ra laiki bri sal witin ra yaban, bara Eran ai mihta sirpika nani ba baha tâlia ra buski bara altar ra aringka nani ba ra yukan. Baha ningkara tâlia ba altarka ba lama kat laikan. 10Bara daiwra wîna ba wina batanka nani ba, kiskama nani ba, âuya purara batanka alki nani ba sut saki altar ba purara upla saurka mana sakripais angkan. Moses ra Dawan mita baku daukaia win ba baku daukan. 11Sakuna daiwra wîna bara taya ba lika, watla ba lata tani ra bri si angkan.

12Bara daiwan aiska angkaia daiwra ba Eran bal skiru ni sabi ikan, bara luhpia nani wih, tâlia ba witin ra bri si yaban. Bara witin baha brih altar pura tnaya ba kir tala ba ni laikan. 13Baha wîna aiska angkaia daiwra lal ba, wîna sirpika klakan nani ba sin witin nani bri si Eran ra yaban. Witin baha nani ba sin brih, altar purara angkan. 14Baha ningkara biara ba wîna sirpika nani ba, kuhma nani ba sin sikbi tâski âpu dauki, baha sin altar purara angkan, daiwan wîna aiska ba angkan baku.

15Israel luhpia nani ai prisantka bri balan ba sin, Eran brin. Guts luhpia ba brin, upla saura daukan ba mana sakripais dauki yaia. Baha ikan prisant baku dauki yaia, sakripais tâura pat daukata ba baku daukan. 16Baha daiwra ba sin witin aiska angkaia sakripais daukaia brin ba ra, nahki daukaia win lâka ba kat daukan. 17Baha ningkara dus mâ nani prisantka yan ba bri balan, baha wina ai mihta banhki brih angkan altar purara, bara titan bani angki sakripaiska ba sin angkan.

18Eran sin bîp wainhka bara sîp lupia wainhka ba sin ikan, baha Israel luhpia nani prisant yabi kan ba, kli wal uplika takaia sakripaiska ba.#Lib 3.1-11. Ai luhpia nani bui tala ba witin ra yan, bara witin brih altar purara tnaya kir sut laikan. 19Baku sin bîp wainhka batanka nani ba yan, sîp wâika ba sin, biara batanka, kiskamka nani âuya bara batanka bri nani ba sut, 20bara baku batanka, lama dusa ba sut asla brin, bara baku Eran baha altar ra suni angkan. 21Ban sakuna, lama dusa bara kuhma aihkika ba brih Dawan ra lilia daukan, Moses ra nahki lâ yan kata ba kat.

22Upla nani saura daukan sakripaiska ba, Eran daukan, baku sin aiska angkaia sakripaiska ba. Bara kli wal uplika takaia sakripaiska ba sut daukan ba ningkara, ai mihta nani purara bukan, Israel luhpia nani ra Dawan yamnika ba yan,#Kul K 6.22-26. bara mahka wan. 23Yamnika yan ba ningkara, Moses bara Eran wal, Dawan ra aisaia tintka watla ra diman, bara kli takan. Israel lupia nani ra Dawan Gâd ingnika tara upla nani purara ingwan: 24Dawan mawan wina pauta blikan tasba ra, altar purara daiwan angkaia bâra kata ba aman.

Baha kaikan ba ra, Israel luhpia nani sut ba ai lilia wini kira ai mawan tasba kat makupan.

Currently Selected:

Libait Lâka 9: MSKTU

Highlight

Copy