Libait Lâka 8
8
Eran luhpia nani aikuki prîs warkka ra mangkan ba
(Imp St 29.1-37)
1Dawan ba Moses ra aisi, naku win:
2“Eran bara luhpia waitna nani ba bris, bara baku sin prîs prâka nani ba bris, laiki sunu dauki batanka ba, saura daukan mana sakripais daukaia bîpka wainhka luhpia ba, sîp wainhka nani wâl ba bara pân sirpi ra îs mangkras britka nani ba bris, 3bara tawan uplika nani sut sin paiws balaia, Dawan wal aisaia tintka watla durka lamara.”
4Dawan win ba baku, Moses daukan, bara tawan uplika nani ba sut paiwan balan, Dawan wal aisaia tintka watla durka ra. 5Bara Moses bui tawan uplika nani ra win: “Naha bîla nani na sika, Dawan aisin wark daukaia ba.”
6Bamna Moses win Eran luhpia waitna nani ba ai lamara balbia. Witin nani balan bara Moses bui witin nani sikbi klin sakan. 7Baha ningkara prîs prâka ba Eran ra yan diman, bara prâka pîska wala ba maisa ra wilkan, pura prakaika sin prakan, baha pura ‘‘efod’’ ba sin dingkan, bara maisa wilkaika ba ni maisa wilkan. 8Bara baha purara gul ni lama prakaika daukan ba sin, lama prakan, bara lama prakaika ba purara Urim bara Tumim ba sin mangkan. 9Baha wina kli lal purara kiaputka ba sin bapan, baha kiaputka ba purara, mawan tani ra gul ni prana daukan ba ni prakan, Dawan ai yamnika yabi prîs tara lâka ra mangkan ba tukinka, Dawan win ba baku daukan.#Imp St 28.4-43; 39.1-31.
10Baha ningkara, Dawan yamnika yaia batanka laya ba Moses brin, bara tint watla aiska ba, diara nani bilara ba sut purara sin batana laya ba laiki, yamnika ba yan, bara baha nani ba Dawan dukia daukan. 11Baha batanka laya ba ni sin altar ba purara aima 7 srikban, bara dikwa nani, diara wala nani bâra ba sut purara sin laikan. Lî laiki banhki diara sikbaika watlika tara bîla ba, utla playka ba sin batana laya ba ni laiki klin sakan.
12Baha ningkara Eran lal ra sin batana yamnikira ba laikan, bara baku prîs tara ba mangkan. 13Bara baku sin witin Eran luhpia waitna nani ba winan ai lamara balan; baha nani prâka ba sin yan diman, maisa wilkaika ni maisa wilkan, kiaputka sin lal ra bapan, Dawan adarka win ba kat daukan.
14Baha ningkara upla blikan wan, bîp wainhka lupia ba bri balan, saura daukan ba mana sakripaiska daukaia. Bara Eran ai luhpia nani aikuki, bîpka ba lal ra ai mihta nani kahban. 15Bara Moses bal bîpka wainhka lupia ba skiru ni sabi ikan, bara tâlia ba ai mihta sirpika nani ra buski bara altar ra aringka nani ba ra yuki, altar ba tâski âpu sunu daukan. Bara tâlia ba altar lamara laikan, bara baku altar ba sin, Dawan yamnika yaban bahara wan saurka swin tikan sakripaiska ba dauki bara yamnika briaia.#Imp St 40.9-11.
16Baha daukan ningkara, biara bîla batanka nani ba sut saki brin, âuya purara alki batanka nani ba sin, bara kiskama wâl ba sin batanka kira brih, baha sut ba altar ba purara suni angkan. 17Kuna bîpka taya ba, wîna ba, tâskika nani ba sut lika, asla dauki watla lata tani ra bri si pauta muki angkan, Dawan adarka daukaia win ba baku daukan.
18Bara Moses win sîp wainhka ba kum bri balbia, baha ba aiska angkaia, bara Eran ai luhpia nani kira balbia bara ai mihta nani sîpka ba lal ra kahbia. 19Baha daukan ba ningkara, sîpka wainhka ba Moses brih skiru ni sabi ikan, bara tâlia ba altar purara tnaya nani kir laikan. 20Bara wîna ba tami, pîs sirpi nani daukan, lal ba wîna pîs sirpi nani ba batanka nani ba sut angkan; 21baha ningkara biara nani bara kuhma nani ba sikbi klin saki, baha nani sin sut angkan. Kîa pain Dawan brin dauki ba baku daukan, witin mita baku daukaia adar win ba kat dauki.
22Baha ningkara Moses kli win, sîp wainhka wala ba sin bri balbia, Eran ra Dawan yamnika yabi mihta ra mangkan ba prisantka ikaia. Eran ai luhpia nani sin kli balan, witin nani ai mihta sîpka ba lal ra kahban. 23Baha ningkara Moses bal daiwra ba skiru ni ikan, bara tâlia ba wirâ brih, Eran kiama aihkika ra, mihta aihkika ra, mihta wihtka ra, mina aihkika ra mina wihtka ra yukan. 24Baha ningkara, Eran luhpia waitna nani ra sin win ai lamara balan, bara kiama aihkika ra, mihta wihtka aihkika ra, mina wihtka aihkika ra tala ba ni yukan; baha ningkara tâlia ba bri si altar ba purara, tnaya kir ba sin tala laikan.
25Baha ningkara daiwra batanka ba, witin wâika ba, biara bilara batanka nani ba, âuya purara batanka alki nani ba, kiskama wâl ba, kuhma aihkika ba sin brin. 26Brit pânka ba wina, îs wal daukras britka, Dawan mawan ra kahban britka nani ba wina, turtiya îs âpu daukan ba, turtiya wala batana laya laiki akbi daukan ba, turtiya tanhta ba, baha nani sut ba daiwra batanka ba kuhma ba aikuki asla dauki Moses brin. 27Baha ba sut Eran mihta ra, luhpia waitna nani mihta ra sin yaban, witin nani baha brih Dawan ra prisantka yabaia lâka ba kat daukaia. Baha ningkara, 28Moses kli baha pata nani ba witin nani mihta ra ba wina brih, bara altar purara suni wîna aiska angki prisantka Dawan ra yaban, kîa pain Dawan kiawali ba lâka kat angkan.
29Baha wina lamkuka ba sin Moses brih, bara Dawan mawanra lilia dauki yaban. Dawan adarka win ba baku lamkuka ba Dawan dukia yaban, bamna baha baman Moses brih Dawan ra yabaia kan.
30Baha ningkara altar pura ba wina yamni munaia batanka laya ba, tâlia ba sin wirâ lupia brin, bara Eran purara, luhpia waitna nani lal purara sin srikban, prâka nani ra sin srikban.
31Baha sut daukan ba ningkara, Moses bui Eran ra bara luhpia nani ra sin win: “Wîna ba brih tint watla durka ra brih was, Dawan kaiki ba ra, bahara piaki bara aidrubanka ra brit nani bri balan ba wina, brit ba brih man nani pis, Dawan adarka nahki naha warkka na daukaia ai win baku: ‘Eran ai luhpia waitna nani aikuki naha pata ba pibia.’ 32Bamna pata ba kau tawbia ba, baha sut ba lika angkma, 33man nani ba Dawan mihta ra mai mangkan kulkanka lâka ba kat, wik kum naha Dawan wal aisaia Tintka watla dimaia durka bilara bâra kaia sma, Dawan kaiki ba lamara. 34Naiwa yang daukisna ba sika, Dawan wina adar aikan dîa daukaia ai win ba baku daukisna, man nani saura daukram saurka nani ba, ban swih tikaia mata. 35Baha mita man Tintka watla ra dimaia durka ra wik kum bâra takaski kaia sma, kakna bara tihmia sut. Dawan lâ daukan lâka ba kulki kama, baku daukma bara man nani pruma apia. Naha lâka bîla na, yang na witin wina briri man nani ra maikaia, bara maikisna.”
36Bamna Eran ai luhpia waitna nani aikuki, Dawan bui Moses ra dîa lâ nani daukaia win ba, baha lâka nani ba witin nani bîla wali daukan.
Currently Selected:
Libait Lâka 8: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
