Oseas 8
8
Israel aidul ra ai purara sunan ba tâwan, pât ra lakan
1“Trumpitkam ba puhs,
aihwawakra aihwaki kaiki ba baku
Dawan uplika nani ba walbia.
Kan witin nani wal lâika daukri lâka ba krikan,
bara yang smalkanki nani ba mapara buan.
2Witin nani kau ban
karna yang ra aula bara aisisa:
‘¡Yang nani mai kakaira sna, man ba Israel Gâdka baku!’
3Sakuna Israel diara yamni ba lulki swin,
baha mita ai waihla nani ai nina blîkbia.
4“Witin nani ba yang ra walras,
ai kupia lâka kat ai kingka nani ba mangkan;
witin nani wihta nani sin mangkan,
sakuna yang ra ai wiras.
Witin nani gul, silbar nani sin
aidul nani paskaia brin,
ai paskanka nani ba wal, kli slingwi tiwaia.
5-6¡Sameria, baha bîpka lilka lupia ra, yang misbara kaikisna ba ra,
man puram sunisma!#1 Ki 12.28-32.
Bîpka ba mapara kupi baiwanka ba lapta pali takan sa.
¿Baha tâskika ba wina, Israel luhpia nani ba
ahkia kat klin takbia ki?
¡Baha Sameria bîpka lilka lupia ba, Gâd apia!
Baha lika diara papaskra kum mita paskan,
bara yu kum yuya man krikan kabia.
7Witin nani pâsa baman mangkan
bara pâsa saura karna krawi ba baman dâkbia;#S L 22.8; Gal 6.7.
plawar mangkan ba dusa wina plawar sin sâkbia
apia, ban kra witin nani baha sâkbia kaka sin,
witin wal kakaira apia nani baha pibia.
8¡Israel ba nisan wala mita aiska langkan!
Baha nani mita witin nani ra diara kum bahki kulkisa,
9Asiria ra hilpka briaia wan,
biriku wail kum kupia karna ba baku.
¡Efraín lika prisant nani yan,
ai latwankira nani atki briaia!
10Sakuna nisan nani tilara, prisant nani yaban kabia sin,
nanara yang auna munrika swih plapaia
bara piua kum witin nani ra yabamna,
king nani bara wihta nani âpu kaia ba.
11“Kan Efraín altar ailal pali paskisa,
baha nani lika saura daukaia dukiara baman paskisa.
12Yang lika witin dukiara smalkanki nani ailal ulbri,
ban sakuna baha nani ba, witin kaikras dukia baku kulkan.
13Witin nani sika sakripais nani ba lihkisa,
bara sakripais daukisa,
bara wîna nani sakripais dauki ba wina pîsa;
sakuna yang, Dawan,
witin nani wal âiyapah apia sna:
watawika lâka nani daukan ba luki ban kamna.
Witin nani ba klala yabamna
bara kli Idsip ra tawi waia daukamni.
14Israel utla tara nani mâkisa,
sakuna ai Papaskra ba ai âuya tikisa.
Juda tawan tara karnakira nani ailal paskisa,
sakuna baha nani yang pauta klauhan kumi ra angkamna,
watla tara nani ba sut ambia.”#Em 2.5.
Currently Selected:
Oseas 8: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua