Oseas 5
5
1“Prîs nani, naha wals;
Israel luhpia nani, naha wals;
king watla uplika nani, man nani sin naha wals:
Man nani mampara lâ aisi daukaisa,
man nani upla mina alkaika, Mispá ra mangkram,
Tabor ilka purara ilis kahbram,
2Sitim ilka bîla ra sin liwanhta pakni pali salhkram.
Baha tâwan klala maikaisna.
3Efraín ba yang kakaira sna;
Israel ba kau kakairiki pali sa,
Efraín urkira takan;
Israel lika tâski takan.”
4Witin nani lika ai daukanka saura nani ba mita,
kli Gâd ra balaia luki ba alki takaskisa.
Ur takaia brinka ba mita taibi brisa;
Dawan ba sip kakaira takras.
5Israel uba tara takan, sakuna ai daukanka ba kli, witin ai mapara aisisa;
Efraín ai watawika lâka daukan ba ra, kli ai mina prukisa,
¡bara Juda sin witin aikuki bahara ai mina prukbia!
6Witin nani ai sîpka bara ai bîpka mairin aikuki
Dawan pliki wabia, sakuna wal prawbia apia,
Dawan ba witin nani wina tnaya ra tawan bamna.
7Witin nani lika Dawan mapara saura pali daukan,
witin nani waitna wala luhpia nani baiki brisa.
Witin nani saura pali daukan ba tâka mita,
kati kumi bilka ra, ai tasbaya ba sut sauhkan kabia.
Israel bara Juda wal klala bribia
8¡War aiklabaia puhbaika aringka ba, Guibeá ra puhbi banhs,
bara Ramá ra trumpit ba puhs!
¡Bet-avén ra#Kaiks 4.15 ra. bin tara dauks!
¡Benjamín ra bin tanis pali dauks!
9Yang bui Israel kiamka tilara maisa pakisna
baha diara nani bal takaia ba, kasak pali baku takbia:
klala yamna yua ra, Efraín ba âpu daukan kabia.
10Dawan aisisa:
“Juda wihtka nani ba sin baha uplika nani ba baku sa,
tasba piarkika ba wina kainara kitbisa.#Kli S 19.14; 27.17; S L 22.28.
¡Sakuna yang kupi baiwanka lisamrika ra dingkaisna!
11Efraín ba taiban lâka ni taibi brisa,
ai raitka bri lâka ba sut krikan,
witin nani mita ai raitka ba, gâd kuninkira nani atkan bamna.
12Bamna yang Efraín mapara itikmuk baku takamna,
Juda uplika nani mapara sin, yang yula saura baku takamna.
13“Efraín ai dara walbia, siknis nani ba pat alkan kabia,
bara Juda sin ai wîna klahwanka nani ba kaikbia ba ra,
Efraín, Asiria kingka tara ra wabia witin hilp makabaia,#2 Ki 15.19; 16.7.
sakuna king ba sip witin nani ai sikniska
ai wîna sukwanka nani ba rakbia apia.
14Layan kum daiwan ra alki ba baku,
yang Efraín bara Juda ra alkamna;
yang bui witin nani ba alki, yuya man dauki si swih mahka wamna;
witin nani ba raski brih wamna,
bara upla wala âpu kabia, yang wina dakbi sakaia.
15“Yang waitla ra kli wamna,
witin nani saura daukan ba ai dara walbia
bara bal ai plikbia ba kat.
¡Ai pâtka nani wahwi ba tilara, witin nani ai pliki kabia!”
Currently Selected:
Oseas 5: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
