Oseas 4
4
Dawan ba Israel mapara blahwi aisisa
1Israel luhpia nani, Dawan aisi na man nani wals.
Naha kuntrika ra iwi uplika nani mapara
witin mita unsaban bukan sa,#Miq 6.2.
kan uplika nani na ai tilara wapni lâka daukras sa.
Kasakka lâka âpu, Gâd tânka kaikaia tânka sin âpu sa.
2Sakuna kunin aisi swer taki aisaia lâka lika banhwan,
upla ikaia, implikaia, upla maya yapaia,
lâ nani ba krikaia lâka lika, pura luisa.
Upla iki ba takaskras ban sa.
3Baha daukanka nani ba mita,
tasba ra upla nani sari tara brisa;
tasba ra iwi nani ba sut karnika âpu takisa;
unta ra daiwan nani ba aikuki,
daiwan tnawa bri pali nani ba sin,
bara inska nani kabu ra ba sin aikuki pruisa.
Dawan bui prîs nani ba dahra sakisa
4Bamna Dawan naku aisisa:
“¡Upla kumi sin ai walka ra dahra kwahki unsaban bukbiara!
Prîs, unsabanki na, man mampara baman unsabisna.
5Man lika kakna pali kauhma,
prapit ba sin, man ninamra; witin lika tihmia ra kauhbia,
bara man ra aiska pali mai sauhkamna.
6Yang upliki nani sip lâ tânka kaikras,
baha mita baku sauhkan sa.
Bara prîs man, tânka briaia lâka ba lulki swiram bamna,
prîski kaia mai mangkri lâka ba wina, yang sin mai lulkisna.
Gâdkam lâka smalkanka nani âmya tikisma bamna,
yang sin man kiamkam nani ba âiya tikamna.
7“Prîs nani kau ailal takan ba ra,
saurka lâka sin kau ailal maipara daukan;
baha mita witin nani ra yamni kulkaia lâka ba, swira daukaia lâka ra lakamna.
8Upliki nani saura dauki ba lal mana wina, witin nani raya sa;
baha mita witin nani brin daukisa, upliki nani ba kau saura dauki kabia.
9Bahamna upliki nani ba, prîs nani ba sut kumi ra baku,
klala yabamna, witin nani ai daukanka saura ba mita.
10Baku witin nani Dawan warkka daukaia ba swin ba mita,
plun pibia, sakuna witin nani ai âuyapah kabia apia;
witin nani rug taki kabia, sakuna sip luhpa baikbia apia.
Israel ai maya lâka krikaia warkka daukan ba
11“Rug lâka bara wain ba,
lâ wapni daukaia lukanka ba tikisa.
12Upliki nani ba dus gâdka nani ra ai pura sunisa;
ai mihta ra dus nani bri ba dusa ni, ai gâdka wal aisaia lan takisa.
Ur takaia brinka ba mita taibi brisa,
mistik takan nani ba yabalka ra upliki nani ba wapisa:
tâski taki, Gâd lama wina taki wan.
13Il nani bahna ra, il sirpi nani purara
witin nani kîa yamni angki sakripais prisant nani yabisa,
usupum dusa nani, usupum sâtka dusa nani distika ra sin wih, baku daukisa.
Baha mita sika luhpiam mairin nani, rug mairin takan ba,
mulam yapti nani sin, ai maya lâka kriki ba.
14Sakuna luhpiam mairin nani rug takisa wisi, klala yabamna apia,
mulam yaptika nani, ai maya nakra praki banhwi ba sin apia,
kan man nani pali sin rug mairin nani ba wal auma bamna;
sakripaiskam daukaia,
baha mairka nani aikuki asla takisma;
witin nani ai pura sunaia lan taki baku
ai maya lâka krikaia warkka dauki ba.
¡Sins lâka briaia tânka briras uplika nani ba baku rungwisa!#Jir 2.23-27; 3.1-2; Os 2.5.
15“Israel, man rug lâka daukisma kaka,
Juda pan saura daukbiara.
Man nani Guilgal ra wapara,
Bet-avén ra#Hibru ra ulban ba Bet-avén baha tânka ba watawika lâka watla. Oseas baha aisi ba wal Betel ba bahki kulkisa, baha tânka ba Gâd watla. sin uli wapara.
¡Dawan nina ra, diara daukaia swer takpara, Dawan raya sa bamna!#Em 4.4; 5.5.
16Israel ba mapara babura takan, bîp tiara wail baku;
bara baku sma ba,
¿Dawan ba ban man nani ra sîp lupia nani ra baku
twi painkira pâwi tasbaya ra,
main mai kaiki kabia ki?
17-18Efraín#Efraín nina ba Oseas aisisa, baha nina ba sika, Israel king tasbaya yahbra tani ba nina. aidul lâka ra wih diman.
¡Witin nani sut bla takan nani daknika baku kauhan!
Witin nani kli kli rug lâka daukisa,
bara ai swira lâka ba kanra lihkisa, yamni kulkan ba lika apia.
19¡Pâsa kum bal ai tnawa nani ra suni brih wabia,
bara witin nani aidul lâka dauki ba ai swira lukbia!
Currently Selected:
Oseas 4: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
