Apastil Nani Sturka 28
28
Pal Malta kîka dakura ra
1Pat swakwan kan, bara yang nani walri baha kî dakura nina Malta kata. 2Baha kî dakura ra iwi uplika nani mita yamni wan munan. Pauta tara mukan, lî auhi kan bara kauhla ba dukiara sin, bara yang nani sut ra ai paiwan pauta mukan ba lamara wih ailahki banhwamna. 3Bamna Pal mita pauta lâwan wiria wahbi pauta aswi ba ra mangki kan taim, piuta kum taki plapi kan pauta laptika ba mita munan, bara witin ai mihta ni alkan. 4Baha kî dakura uplika nani kaikan, Pal mihta ra piuta ba aipami kan, bara pana pana aisi kan: “Naha waitna na upla âikra kan baku sa, kan witin kabu wina swakwan, sakuna Gâd mita lâ wapni kat dauki ba mita sip swika kau raya taukbia apia.”
5Sakuna Pal mita piuta ba siauhbi pauta ra lulkan, bara diara kumi sin munras kan. 6Sut ba kaiki kan witin wîna ba puskbia sapa, apia kaka tisku kauhi prubia sapa. Sakuna witin nani piua wihka bîla kaikan ban diara takras kan, bamna ai lukanka ba witin nani laki naku lukan: Pal ba gâd kumi sa.
7Baha pliska lamara sika, kî dakura wihtka Publio ai tasbaya pîs bri kata. Witin ba mita ai watla ra yamni wan brin yu yumhpa pali. 8Publio aisika lika krikri ra prawi kan, rih bara biara wîna tala plapi sikniska bri kan bamna. Pal bui kaikaia wan, ai pura sunan, ai mihta nani kahban, bara rakan. 9Naha takan ba ra, baha kî dakura ra sikniskira wala nani ba sin balan, bara sut ra sin rakan. 10Prisant manis aiki banhwan, bara yang nani kli duri tara ra aimaki banhri ba ra, witin nani mita dîa dîa yang nani impakanki dukia want kapri ba sut aikan.
Malta wina Rom ra auya
11Kati yumhpa luan ningkara, Alejandría wina duri tara kumi baha kî dakura ra lî auhi piua luaia takaskan kata. Baha ra aimaki banhri; duri tara ba ai nina sainka ba bri kan ba: Cástor, Pólux. 12Yang nani wâp kumi nina ba Siracusa wi ba, bahara bal yu yumhpa takaski banhwatna. 13Auhya un lamak impaki ban Regio ra bali banhri. Yu wala pâsa ba waupasa tani krawi kan, bara yu wâl kat ra yang nani Pozzuoli ra balri. 14Bahara wan muihni tila nani wal prawri. Witin nani ai watla ra wan paiwan, bara wik kum aikuki takaskri. Baha ningkara, Rom mata yang nani impakri. 15Rom ra wan muihni nani pat yang nani sturki walan kan, bahamna witin nani ba yang nani maipa ra balan, Apio Forum pliska kum nina, Utla Yumhpa wi ba kat. Pal baha nani kaikan ba ra, Dawan ra tingki win bara ai kupia aimakan. 16Rom ra yang nani wari ba ra, suldiar kiaptinka mita win Pal lika plis kum ra tnaya ra yakan kabia, suldiar kum wal swin main kaiki kaia.
Pal Rom ra smalkisa
17Witin balan wina yu yumhpa luan ningkara, Rom ra Ju tâ uplika nani bâra ba sut pali Pal mita paiwan. Witin nani bal asla takan ba ra, Pal bila:
—Muihki nani, yang pali mita Ju lâka nani mapara, bara wan damika nani lâka nani ba mapara diara saura kumi sin daukras, ban sakuna Jerusalem ra ai alki silak ra ai mangkan Rom nani mihta ra. 18Baha nani mita tâinka pliki kaikan ba ra, trai munan mahka ai lanhkaia, kan yang ra witin nani pruaia pâtka kumi sin sakras kan bamna. 19Sakuna Ju nani maipara buan ba mita, yang ban makabri Rom kingka tara ba mita lâika ba daukbia,#Ap St 25.11. nisanki nani dahra kwahkaia diara briras sna sakuna. 20Baha dukiara sika man nani mai paiwri aikuki prawi, aisi kaikaia. Yawan Israel luhpia nani naika wan kainara diara briaia bîla kaiki ba dukiara sika, naiwa mihti priskan na.
21Bara witin nani bila:
—Yang nani lika man dukiamra Judia wina wauhkataya kumi sin briras. Wan muihni nani Judia wina nâra balan ba sin, man dukiamra diara saura kumi sin wan wiras kan. 22Sakuna yang nani lika man wina wirâ walaia want sna, man lukankam tânka ba dîa sapa, kan yang nani sin kaikisna plis ailal ra mampara aisisa, baha lâka raya man brisma ba dukiara.
23Bamna yu kumi mangki yan, bara baha yua ra upla ailal pali balan Pal takaski kan ba watla ra. Titan wina tutni kat baha nani ra aisin Gâd King aimaki Lâka ba dukiara. Bara Pal baku Jisas tânka aisi baha nani ba kupia lakaia muni kan, Moses lâka wina, bara prapit nani Ulbanka ba wina sin. 24Upla kum kum Pal aisi kan ba dukiara kasak lukan, sakuna wala nani lika kasak lukras kan. 25Witin nani ai tilara aikuki sip lukanka kumi sakras kan bamna, mahka taki aidruban. Bara Pal bila:
—Spirit Holikira ba prapit Aiseya bâk pain aisin wan damika nani ra. 26Witin ba bila:
‘Baha uplika nani ra wih wis:
Man nani walaia lika walma,
sakuna tânka lika brima apia;
kaikaia lika kaikma,
sakuna pain pali lika kaikma apia;
27kan naha uplika nani kupia na
karna pali takan,
walaia mapa ra sip pain walras,
ai nakra nani ba praki brisa
diara kaikbiara sîa,
ai kiama ni kra walbiara,
ai kupia tânka latan bribiara sîa,
bara witin nani ba yang ra balbia kaka
rakamnara sîa.’#Ais 6.9-10.
28Man nani kaiki bas, nahki naiwa wina naha swaki sakan lâka na Gâd mita prisant baku yabisa Ju apia nani ra, bara baha nani mita lika pain walbia. 29[Pal naha aisin ningkara, Ju nani bui uya yamni kaikras, sut mahka blahwi banhwan.]
30Pal mita utla kum mana aibapi, bahara mani wâl takaskan, bara ya ya sin witin ra kaikaia wan ba, witin mita baha nani ba pain brin. 31Pri pali Pal Gâd kingka lâka ba smalki kan, Dawan Jisas Kraist sturka sin. Bara upla kumi sin witin ra trabil munras kata.
Currently Selected:
Apastil Nani Sturka 28: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua