Apastil Nani Sturka 27
27
Pal Rom ra blikan ba
1Italia ra wan blikaia wilin taki banhwan ba ra, Pal bara silak uplika wala nani sut ba kiaptin Julio mihta ra mangkan. Suldiarka nani nina ba mâki kan Rom ra king tara ba daknika. 2Yang nani aimakri duri tara ba lika Adramitio wina mahka taki impakaia kan, Asia wâpka nani un ra tawanka nani bâk. Aristarco sin yang nani aikuki kan, witin ba lika Macedonia tawanka kumi nina Tesalonaika wi ba wina kan. 3Yu wala, yang nani Sidón ra bal banhri, bahara Julio mita Pal ra yamni yaban taukan, witin swin wan ai uplika nani kaikaia, dîa kra luha sa kaka uplika nani ba mita yabia. 4Sidón wina taki, Chipre ba munhta mapara lui banhri, pâsa ba yang nani maipa kat kan bamna. 5Cilicia bara Panfilia wal kabuka lui Licia tawanka kum ra bal banhri, nina ba Mira.
6Bahara suldiar nani kiaptinka ba duri tara kum wal prawan Alejandría wina mahka Italia ra waia kan. Bamna baha duri tara ra wan mangkan mahka impakaia. 7Yu ailal yang nani ban tawa impaki katna, trabil tara manis sin wan alkan, sakuna ban Cnido tawanka ra bal banhri. Pâsa ba sin wan mapa kat wan alki kan bamna, Creta kî dakura bâk kir tawi, Salmona lamak laki lui banhwatna. 8Yang nani auhya un lamak impaki katna, trabil manis pali bri, ban plis kumi nina Wâp Pain nani wi ba kat bal banhri. Baha pliska ba lika Lasea tawanka wina ban pali wihka apia kata.
9Bahara yang nani piua wihka pali tikri, ba kat sin kabuk impakaia piua ba saura takan kan, lî auhan piua ba pat baila kan bamna. Baha mita Pal bui baha nani ra kupia krauki, 10naku win:
—Upliki nani, yang kaikisna naha impakanka ra trabil manis wal prawbia. Naha duri tara na bara bilara diara nani na sut tiwbia, yawan pali wan rayaka sin tikaia sip sa.
11Sakuna suldiar nani kiaptin ba mita Pal bîla kulkras, duri tara dawanka bara duri tara kiaptinka dîa aisin ba bîla ni alkan. 12Baha wâp ba lika plis pain apia kan lî auhaia piua ba luaia, bamna sut ban lukan kau pain kabia baha wina takaia, trai kaikaia sip kabia sapa Fenice alkaia, bahara lî auhi piua ba luaia. Baha lika Creta harbarka kumi kan, bara ai mawan ba yahbra muna tani bara waupasa tani ra kata.
Pâsa karna krawan ba kabu ra
13Waupasa tani wina pâsa tawa krawi kan ba ra, luki kan sip kabia ban impakaia. Bamna witin nani mahka taki Creta kabuka un lamak impakan. 14Sakuna tisku baku kan, pâsa saura yahbra wina balan, prari kum baku karna pali duri tara ra prukan, 15bara mahka duri tara ba raski kan. Pâsa ba mapara kau waia sip apia kan bamna, yang nani ban swi banhri duri tara ba awi wan bri waia. 16Kî dakura kumi nina Cauda wi ba ninak yang nani luri, baha tani ra lika pâsa ba uya karna krawras kan. Bamna yang nani trabil manis brih sip katna duri lupia aubi banhwi katna ba swaki sakaia. 17Purara suni, duri tara ba tâ baikaia dukiara rup ni mununhtak laki pain wilkan. Bara ban kra Sirte buhnika ra ulbiara sîa, kwala tara ba alahbi ban swin pâsa wal awi kan. 18Yu wala kat kau pâsa ba karna krawi kan, bara duri tara bilara diara nani ba saki kabu ra lulkan. 19Yu yumhpa kat duri tara bilara diara nani bâra kan ba, yang nani mita mihti pali ni saki kabu ra lulki banhri. 20Yu ailal ban sip wan yu lapta bara slilma nani sin sip kaiki banhras katna. Bara pâsa uya karna wan pruki kan ba mita, yang nani sut swakwamna apia luki banhri.
21Yang nani yu ailal plun piras pali kapri bamna, Pal baha nani lilapas kat bûi, naku win:
—Upliki nani, man nani bui yang bîli wali banhram kata, yawan Creta wina takaia apia kan, bara naha pâtka na sin wan alkaia apia kan, bara wan dukia nani sin lulkaia apia. 22Sakuna nanara, man nani si bripara, kan man nani kumi sin pruma apia, duri tara ba lika tiwbia. 23Naha tihmia luan ra, Gâd ra yang bui witin ra mayuni dukia daukri ba mita insal kum yang ra blikan. 24Bara insal ba naku ai win: ‘Si bripara, Pal, kan man Rom kingka tara mawanra buaia kama, bara man tamka mita Dawan naha uplika nani aikuki duri ra sma na, sut swaki sâkbia prura wina.’ 25Baku bamna, upliki nani, si bripara. Gâd ra kupi aiska lukisna, bamna insal dîa ai win ba baku kat kabia. 26Sakuna yawan na, kî dakura kum ra wan lulki sunbia.
27Wik wâl impaki banhwi katna ba ningkara, tihmia kumi lika Adriático kabuka ra pâsa ba mita namhpa namhpa wan muni awi wan bri auya kan. Tihmia 12 aklak baku kat duri tara ra wark taki nani ai dara walan sauhka ra uluya kan. 28Kiwa ra diara wirha kum wilki lî tihuka kulki kaikan ba ra, 120 pît bri kan; tisku kan kli kulki kaikan taim 90 pît bri kan. 29Walpa ra prukbiara sîa, duri tara ba wina grapin walhwal kabu ra alahban, bara Gâd ra ai puri suni kan yu baiwaia ba bîla kaiki. 30Duri ra wark taki nani ba mita trai kaikan duri tara ba wina plapi swakwaia, bamna duri lupia bri kan ba alahbi ikan, ban grapin nani duri tara tâura ba alahbuya baku dauki kan. 31Sakuna Pal mita suldiar kiaptinka ra bara suldiar nani ra sin maisa paki, win:
—Naha nani duri tara na swi si plapbia kaka, man nani sut lika swak takma apia.
32Bamna suldiar nani mita duri lupia rupka ba klaki dakban liura dimwan.
33Lalma kahbi kan, Pal baha nani ra win diara wiria pan pih banhbia, bara naku sin win:
—Nanara pat wik wâl sa, man nani yapan kaikras, plun sin piras. 34Bamna mamkabisna man nani plun wiria pan pima. Naha pima aitani sa raya kaia ba mata, kan man nani wina kumi sin tâmwa mina kumi sin tiwbia apia.
35Pal baha aisin ningkara, ai mihta ra brit kum bri, Gâd ra tingki wisi, baha nani mawan kat kriki pin. 36Tisku, wala nani sut kupia aimakan, bara witin nani sin pih banhwan. 37Upla nani duri bilara kan ba asla sut 276 kan. 38Witin nani ai biara banhki plun pin ningkara, duri tara ba ingni daukaia dukiara plawar ba sut liura baman lulkan duri ba ingni kaia wisi.
Duri tara ba rungwisa
39Yu baiwan ba ra, wark taki nani kaikan baha tasbaya ba witin nani kakaira apia kan, sakuna kaikan slaup yukuwaika kumi auhya pain bri kan, bamna luki banhwan duri tara ba sip kabia sapa un ra bri si prakaia. 40Grapin kiwka ba sut klaki dakbi swin liura dimwan, bara duri tara wakaika kwaihka kiwka nani ba sin lanhkan. Bamna duri tara tâ tawi kwalka ba aubi sunan pâsa ra, duri tara ba mahka sauhka tani ra awan. 41Sakuna lî aubra sâl wal aihka aubi kan ba kat brih wan, bara duri tara ba buhni ra ulan, tâ tawi ba auhya ra klakwi diman sip sakaia apia praiska kat. Bara tnata tawi ba auhya ra kabu ripka nani karnika ba mita pîs pîs ra baman kriki kan.
42Bara suldiar nani mita silak uplika nani ba iki tikaia lukan, ban kra liura dimwi yawi swak takbiara sîa. 43Sakuna suldiar nani kiaptinka mita lika Pal ba swaki sakaia lukan, bamna baku daukaia adar yaras kan, sakuna win ya ya yawaia sip sa kaka, trai muni mahka dimwi yawbia sauhka ra ulaia, 44sakuna wala nani ba sin trai munbia tat pîs nani, apia kaka duri tara kriwan pîska nani alki wala nani nina blîkbia. Baku upla sut sauhka ra uli swak takan.
Currently Selected:
Apastil Nani Sturka 27: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
