2 Timoti 3

Tnata yua nani ra upla nani nahki kabia ba

1Baku sin man nani tânka bri kaia sma, tnata yua nani ra piua karna nani balbia. 2Upla nani ba klauna ai dukiara baman luki kabia, lalah ra latwan kaikbia, kakalra kabia bara sin diara lalihkra kabia, Gâd mapara aisi kabia, ai aisika bîla walras kabia, tingkikas kabia bara serts ra rispik âpu kabia. 3Ai uplika nani ra latwan bara umpira sin kaikbia apia, upla nina aisasara nani kabia, ai wîna brinka nani sip alki takaskras kabia, kupias nani bara diara pain nani waihla kabia. 4Upla nani ra kunin muni pât ra dingki kabia, ai kupia lukras diara dauki kabia, prautkira nani kabia; Gâd ra plikaia ba watlika ra, ai wîna brinka nani pliki kabia. 5Gâd ra lukaia lâka ba pain talia kulki nani kabia, sakuna ai daukanka ba ni lika apia, kristian lâka kasak karnika ba daukbia apia.

Bahmuna uplika wal man lika diara âpu bas. 6Kan naha nani upla wina upla nani bâra sa, witin nani lika upla watla ra dimi, mairin sinskas nani, saurka baman banhki bri nani ba ra kunin munisa. Naha mairka nani ba brinka karna sât sât mita taibi brisa, 7bara witin nani piu sut lan takaia trai munisa, sakuna kasak lâka tânka ba sip briras sa. 8Bara Janes, Jambrés wal, witinka nani sukia nani kan ba, Moses mapara buan ba baku,#Imp St 7.11. baha uplika nani sin kasak tânka mapara bûi banhwisa. Baha uplika nani sinska ba aihka saura takan sa, bara kasak lukan lâka mapa ra witin nani pain aihwa apia sa. 9Sakuna baha nani ban piu wihka lika dauki kabia apia, kan upla sut kaikbia witin nani ba sins âpu nani sa, sim baha uplika wâl Moses mapara buan nani ba baku.

Prakaia ra Pal bui Timoti ra smalkanka nani yabisa

10Sakuna man lika yang smalkanki nani ba pain nina blikram sa, nahki yang iwi kapri ba, yang dîa daukaia want kapri ba sin; man ba yang kasak lukanki lâka ba pain alki briram, wihka bîla kaikisna lâka ba, latwanki lâka ba, bara ban bapi bûi kaia lâka ba sin, 11nini bliki rau ai sauhkan ba bara pât wauhri ba sin. Man pain kaikisma diara nani yang ra takan ba Antíoco#Ap St 13.14-52. tawanka ra, Iconio ra#Ap St 14.1-7. bara Listra ra sin,#Ap St 14.8-20. bara rausauhkanka tara nani wauhri ba sin; sakuna Dawan baha sut wina dakbi ai sakan. 12Bamna kasak pali sa, ani uplika nani Kraist Jisas wal asla holikira iwaia want lukisa kaka, witin nani ba nina bliki rausauhkan kabia; 13sakuna upla saura nani bara upla ra kunin mamunra nani ba, ban kau saura taki kabia, bara upla ra kunin muni nani kabia, bara panaura sin upla nani mita kunin muni kabia.

14Sakuna man lika dîa lan takram ba bara baha kat kasak lukisma ba ra, ban bapi bûi bas. Man pain kaikisma baha ya mita mai smalkan ba, 15kan tuktan lupia piua wina man ba Ulbanka holikira nani kakaira sma, bara baha nani mita sins maikaia sip sa, bara Kraist Jisas ra kasak lukan lâka bri mita, baha nani sin swaki mai sakaia sip sa. 16Ulbanka aiska ba Gâd wingka puhbra mita sika, bara baha ba yamni sa upla ra smalkaia bara lawi daukaia, swakwanka nani ba wapni daukaia, bara kasakka lâka mapa ra upla ra smalkanka yabaia dukiara, 17Gâd uplika ba pain lan kabia bara ridi sin pain daukan kabia, wark yamni sâtka nani sut daukaia dukiara.

Currently Selected:

2 Timoti 3: MSKTU

Highlight

Copy