2 Korint 7

1Baku bamna, muihki laitwankira nani, naha sika pramiska nani yang nani brisna ba. Bamna wan wîna bara wan spiritka sut ba tâski âpu klin bri kap; bara Gâd sibrinka ra, yawan na aiska holikira takaia sa.

Korint uplika nani ai kupia lakan ba

2¡Man nani kupiam ra yang nani pliski kum dauks! Kan yang nani kau upla ra watawi daukras, kunin sin munras. 3Naha na yang aisaras man nani pâtkira mai sakaia dukiara, sakuna piua luan ra aisari baku, man nani ba yang kupi ra sma, aikuki asla iwi kaia bara aikuki sin pruaia wisi. 4Man nani dukiamra uya pali lukisna bara sin âiyapah sna. Pât nani yang nani wahwisna ba tilara, tâi baikisna bara sin lilia pali sna.

5Macedonia ra yang nani wari ba wina#2 Ko 2.13. piua kumi sin ris briras pali, sakuna plis bani wina trabil wan alkan; upla aikuki unsabri bara kupi ra sin sibrin nani lukri. 6Sakuna Gâd, witinka swapnikira nani ra karnakira saki ba karna wan sakan, Taitus balan ba ra; 7bara witin balan ba baman apia, kuna man nani mita kasak tâ baikram ba Taitus wan win, nahki man nani brin mai daukisa wan kaikaia, bara sin wan win man nani sarkam lâka, bara yang dukira man kupiam trabil brisma ba; bara baha mita uya pali lilia ai daukan.

8Wauhkataya ulbatna ba sarkam paskri, kuna baha dukiara nanara sari lika ai daukras. Baha dukiara pat sari ai daukan sa kaka, yang kaikri wauhkataya ba mita piua prahni kum sarkam paskan. 9Sakuna nanara yang lilia sna, bara baha ba sari kapram ba dukiara lika apia, kuna baha sarka ba mita tânkam nani ba lakram bamna. Man nani sarkam ba wal ban kapram Gâd pain lukan ba kat, bamna yang nani pali man nani mai sauhkaia dukia kumi sin daukras. 10Bahamna sarka lâka kum Gâd mita pain kaiki ba tânka kat sa kaka, baha lika kupia lakan ba tânka kum swaki sakan lâka wina aula ba; bara baha mita sari kaia apia sa. Sakuna sarka lâka kum naha tasba wina sa kaka, baha lika prura paskisa. 11Sarka lâka man nani wauhram ba lika, Gâd pain kaikan ba tânka kat sa; ¡bara nanara dîa baha wina takan ba kaiks! Diara briaia dukiara kupiam wilin sakan, bara dîa dauki banhram ba dukiara sin tânka aisaia; baha mita kupiam sauhki banhwan bara sibrin sin mai dingkan. Kuna ningkara man nani ai kaikan mai daukan, bara ridi pali kapram ya saura daukan ba klala yaia. Naha diara sut na tilara, man nani latan marikram pâtkira mai kulkaia tânka âpu sa. 12Baku bamna, baha wauhkataya ulbatna ba lika, saura daukan uplika ba dukiara baman, apia kaka klala brin uplika ba dukiara baman luki lika apia, sakuna man nani mita tânka brima, Gâd mawanra yang nani dukira kupiam nani trabilka nani brisma ba dukiara. 13Baha mita, yang nani maisa nihkra briri.

Bara maisa nihkra briri nani ba purkara, yang nani uya lilia takri, Taitus ai âuyapah pali kan ba dukiara; bamna man nani sut mita hilp munram witin ba ai kupia kumi kaia. 14Man nani dukiamra yang âiyapah sna ba Taitus ra wîri ba ra, sari lika ai daukras kan. Sakuna, diara nani man nani ra wi nani ba lika kasak sa, bara baku sin Taitus ra wi banhri dukia nani ba sut kasak kat takan, yang nani na man nani sut dukiamra âiyapah banhwisna. 15Bara Taitus mita man nani ra kau uya pali latwan lukisa, kan dîa dîa witin makabi kan ba daukram, bara witin ba man nani tilamra briram bawikira bara sibrinkira. 16¡Man nani ra kasak lukaia sip sna bamna, uya lilia pali sna!

Currently Selected:

2 Korint 7: MSKTU

Highlight

Copy