2 Korint 3

Wal lâ raya daukan smalkanka ba

1Naha yang nani aisisna ba ra, ¿man nani lukisma, yang nani mayunra briaia baman aisisna? ¿Upla wala yang nani tâinka pain aisi ba sât wauhkataya, man nani ra mamrikaia sna ki, apia kaka, man nani wina pain aisi ba sât wauhkataya briaia sna ki, sim upla wala nani dauki ba baku? 2Yang apia wisna, kan man nani sika wauhkataya kau painkira yang nani brisna ba; man nani sika wauhkataya kum ulban wan kupia ra ba, bara sip sa upla sut mita kakaira kaia bara aisi sin kaikaia. 3Man nani sika Kraist pali mita ulban wauhkataya kumi sma ba, bara yang nani bâk blikan ba. Man nani sika wauhkataya kumi ink laya ni ulbras ba, sakuna Gâd rayakira Spiritka ba ni;#Imp St 24.12. naha lika wauhkataya kumi walpa ra ulban ba sâtka lika apia, kuna upla nani kupia ra ulban ba.#Jir 31.33; Isi 11.19; 36.26.

4Yang nani naha aisisna, kan Kraist hilpka ra Gâd ra kasak luki banhwisna. 5Yang nani karniki ni diara daukaia sip sna ba mita lika apia sika; sakuna, Gâd ba mita sika yang nani diara sut daukaia sip sna ba. 6Kan Gâd mita sika sip wan daukan lâ raya#Jir 31.31. bâk ai dukia daukaia, bara baha lika wauhkataya ra dîa ulban ba bîla wali daukaia tânka lika apia, sakuna rayaka kumi Spirit Holikira mita pain bribia ba. Lâ ulbanka ba pruaia pâtka mihta ra wan mangkisa, sakuna Spirit ba lika raya kaia wankisa.

7Bamna Moses lâka na lika walpa tanhta ra ulbi mangkan kan, bara Moses ai mawan ba ingni pali kan balan ba ra, Israel luhpia nani mita sip witin mawan kaikras kan, ai mawan ba ingni kan bamna.#Imp St 34.29. Sakuna baha ingnika ba tawa tawa tiwi kan. Kuna baha lâka mita upla pruaia pâtka mihta ra mangki ba lika, pranakira pali balan kaka, 8¡Spirit Holikira smalkanka ba nahki prais kau pranakira kaia kan! 9Baha tânka ba lika, pruaia pâtka ra wan dingki kan lâka ba pranakira pali kan kaka, ¡Gâd mita kasakkira wan kulki smalkanka ba kau pranakira kulkan kaia sa apia! 10Kan patitara piua ra pranakira kan lâka ba bahki takan sa, Gâd mita kasakkira wan kulki smalkanka kau pranakira ba wal prakan ba ra. 11Baku bamna, diara kum piua prahni kaia kan, kuna pranakira kan kaka, ban kaia dukia ba lika kau pranakira sa.

12Yang nani kainira diara briaia lukisna ba mita sika, kupi aiska ni aisisna ba. 13Bamna yang nani lika Moses daukan ba baku daukras, witin ai mawan ingnika ban kaia apia kan ba mita daswi kan, kwala ni praki kan,#Imp St 34.33. Israel luhpia nani mita kaikbiara sîa. 14Sakuna witin nani sip tânka briras kata. Bara naiwa kat baha tânka sip briras sa, lâ almuk wauhkataya aisi kaiki banhwi ba ra, baha sim mawan prakaia kwalka ba sakras ban bâra sa bamna; baha kwalka ba sip sa sakaia Kraist mita baman. 15Bamna naiwa kat, witin nani ba Moses lâka wauhkataya aisi kaikuya ba ra, kwala kum mita witin nani diara tânka briaia ba pura bikisa. 16Sakuna upla kum Dawan ra tawi ba, kwalka ba witin wina âpu takuya. 17Bara Dawan lika Spirit sika; bamna anira Dawan Spiritka bâra sa kaka, bahara lika pri lâka bâra sa. 18Baha mita yawan sut, wan mawan kwala ni praki briras ba mita, Dawan prana ba param marikisa sim lukinglas ra kaiki ba baku;#Ro 8.29; Gal 4.19; Pil 3.10. bara baku yawan pali na sin kau Kraist wal baku takisa, kan piua bani witin prana ba kau yawan brisa. Naku sika Dawan dauki ba, witinka lika Spirit ba.

Currently Selected:

2 Korint 3: MSKTU

Highlight

Copy