San Juan 7

Ikniwah n Jesús mach okineltokayah

1Satepa ijkuak ijkó yotlamochi, Jesús onemia itech tlali de Galilea, mach okinekia nemis itech altepetl de Judea, porke ompa sikimeh judíojteh okinekiah kimiktiskeh. 2Pero kemi yowalajsia inmilwiu n judíojteh non itoka ilwitl de n akákalteh, 3ikniwah n Jesús okilijkeh:

—Amo ximokawa nika, xio kan tlali de Judea, ijkó motlamachtijkawah, kitaskeh tlan tikchiwa. 4Porke akin kineki makixmatikah, mach kichiwa itla san ichtaka. Yej moneki xikinchiwa milagros inmixpa nochteh n tlakah para ijkó nochteh makitakah tlan tikchiwa.

5Ikniwah n Jesús ijkó okiliayah, porke nion yejwah amo okineltokayah. 6Yika Jesús okinmili:

—Ayamó walajsi noora para nias ompa, pero nomejwah san tlan oras weletis nonyaskeh. 7N tlaltikpaktlakah mach weletis nomechkokoliskeh, pero Ne nechkokoliah, porke Ne nikinmilia yejwah kichiwah tlan amo kuali. 8Nomejwah xitlejkokah ilwitl. Ne amo nitlejkos porke ayamó walajsi noora.

9Ye ijkó okinmili iwa omoka Galilea.

Jesús yáwi ilwitl non itoka akákalteh

10Satepa, ikniwah n Jesús otlejkokeh ilwitl. Ye noiwa otlejkok pero san ichtaka. 11Itech ilwitl de Jerusalén, n tlayakankeh judíojteh okitemoayah n Jesús iwa omotlajtlaniayah:

—¿Kan ik nentinemi non tlakatl?

12Iwa miakeh omoichtakatlapowiayah de Ye. Sikimeh okijtoayah: “Jesús, ye kuali tlakatl.” Pero oksikimeh okijtoayah: “Amó, porke san kinkajkayawa n tlakah.”

13Pero amaka omixewiaya tlajtos de Ye inmiixpa n tlayakankeh judíojteh, porke okinmawiliayah.

14Ijkuak yoyaya tlajko ilwitl, Jesús otlejkok kan Weyi Tiopa iwa opé tlamachtia. 15N tlayakankeh judíojteh san omotlajtlachialtiayah iwa okijtoayah:

—¿Kenomi nin tlakatl satlawel kimati miak, iwa amo omixtlamachti?

16Jesús okinnankili:

—Notemachtilis amo Ne noaxka, yej de Akin onechaltítlanki. 17Akin kineki kichiwas tlan Dios kimonekiltia, kajsikamatis kox notemachtilis walewatok de Dios, noso nikijtoa san tlan Ne nikijtoa. 18Akin tlajtoa san tlan ye itlajtol, kichiwa san para makiyektenewakah n tlakah. Pero Ne nikneki nikweyijkachiwas Akin onechaltítlanki, yika nikijtoa tlan milák iwa ayik nitlakajkayawa.

19'Moisés onomechmák n tlanawátili, iwa nion se de nomejwah amo kichiwa tlan kijtoa non tlanawátili. ¿Tleka kiné nonkinekih nonnechmiktiskeh?

20N tlakah okinankilijkeh:

—Te tikpia se demonio; ¿akin kineki mitsmiktis?

21Jesús okinnankili:

—Se kuali tekitl onikchi itech sábado iwa nochteh nomejwah nonmotlajtlachaltiah. 22Moisés onomechnawati ximosirkunsidarokah, pero non tlanawátili amo walewatok de Moisés, yej de nomowejkatatawah, iwa nomejwah nonkisirkunsidaroah se konetl maya mayeto sábado ijkuak amo para nontekitiskeh. 23Ijkó kiné, nomejwah nonkitlakitah itlanawatil Moisés, iwa nonkisirkunsidaroah se konetl maski mayeto sábado, porke ijkuakó ochikometik de otlákatki, ¿tleka kiné nonkualanih nowa por onikpajti se tlakatl itech sábado? 24Amo san nima xiktlajtlakoltikah se tlakatl san por ijkó nonkimoliah, yej xiktlajtlakoltikah kemi moneki.

Jesús kinmilia de kan walewatok

25Ijkuakó sikimeh tlakah de Jerusalén okimoliayah:

—¿Amo nin tlakatl kitemojtinemih para kimiktiskeh? 26¡Xikitakah!, tlajtojtok teixpa iwa amitla kiliah ¿chamo totlayakanwah yokajsikamatkeh nin tlakatl Ye n Cristo? 27Pero tejwah kuali tikmatih kan walewatok nin tlakatl. Pero ijkuak wits n Cristo, amaka kimatis de kan wits.

28Jesús otlamachtijtoka itech Weyi Tiopa, iwa ijkuak okikak tlan okijtoayah, okijto chikawak:

—¡Nomejwah nonkijtoah nonnechixmatih iwa nonkimatih de kan niwalewatok! Pero amo oniwala san por Ne oniknek, yej onechaltítlanki Akin nomejwah amo nonkixmatih. Ye yekmilajka. 29Ne nikixmati porke inawak oniwala, iwa Ye onechaltítlanki.

30Ijkuakó n tlayakankeh judíojteh okinekiah kikitskiskeh n Jesús. Pero amaka omixewi okikitski, porke ayamó oajsia iora para kikitskiskeh. 31Pero miakeh okineltokakeh, iwa okijtoayah:

—Ijkuak wits n Cristo, ¿kox kinchiwas okachi wejweyi milagros ke nin tlakatl?

N fariseos kintitlanih insoldadojwah para makikitskikah n Jesús

32N fariseos okikakeh tlan okijtoayah n tlakah de Jesús, yika omotlatlalwijkeh iwa n tiopixkeh non tlayakantokeh, iwa okintitlankeh non otlamokuitlawiayah kan Weyi Tiopa makikitskitih n Jesús. 33Ijkuakó Jesús okijto:

—Ne niyetos nomowah sa kanaj kech tonati, tlamis oksepa nimokopas inawak Akin onechaltítlanki. 34Nomejwah nonnechtemoskeh, pero amo nonnechajsiskeh, porke mach nonweletiskeh nonyaskeh kan Ne nias.

35Ijkuakó n tlayakankeh judíojteh omotlajtlaniayah:

—¿Kan ik yas nin tlakatl, kan amo weletis tikajsiskeh? ¿Chamo kinmachtitih n israelitas non xitintokeh itech tlali de Grecia, noso innewiah n tlakah de Grecia kinmachtiti? 36¿Tlan kijtosneki: “Nonnechtemoskeh pero mach nonnechajsiskeh, porke amo weletis nonyaskeh kan Ne nio”?

N améyali non kichiwa matiyolitokah nochipa

37Itech iksemi tonati, de non weyi ilwitl, Jesús omóketski iwa ika chikawak tlájtoli okijto:

—Tla aka amiki, mawiki nonawak iwa maatli. 38Kemi kijtoa itlajkuilol Dios, akin nechneltokas, itech iyolo mextos atl non kitemaka yolílistli.

39Jesús otlajtojtoka de n Espíritu non kiseliskiah akimeh kineltokaskiah. Pero n Espíritu ayamó owaltemoaya porke Jesús ayamó okiseliaya weyílistli.

N tlaltikpaktlakah moxexeloah

40Ijkuakó sikimeh ijkuak okinkakeh ninteh tlájtolteh, okijtojkeh:

—De milajka, nin tlakatl Ye n profeta.

41Iwa oksikimeh okijtoayah:

—Ye ni n Cristo.

Pero oksikimeh okijtoayah:

—¿De Galilea weletis wits n Cristo? 42Itlajkuilol Dios kijtoa Cristo walewatos de n Rey David, de Belén kan ochantitoka n David.

43Ijkó, n tlakah omoxexelojkeh porke sikimeh amo okineltokayah n Jesús. 44Sikimeh okinekiah kikitskiskeh, pero amaka omixewi okikitski.

N wejweyi tlanawatijkeh mach kineltokah n Jesús

45N tlamokuitlawijkeh de n Weyi Tiopa, oyajkeh innawak n fariseos iwa innawak tiopixkeh non tlayakantokeh, iwa ninteh okintlajtlanijkeh:

—¿Tleka amo ononkualikakeh?

46N tlamokuitlawijkeh otlanankilijkeh:

—¡Nion se tlakatl ayik ijkó tlajtoa kemi nin tlakatl!

47Ijkuakó n fariseos okinmilijkeh:

—¿Noiwa nomejwah ononkimokawilijkeh manomechkajkayawa? 48¿Kox aka totlanawati noso aka fariseo okineltokak non tlakatl? 49Akimeh kineltokah non tlakatl, amo kixmati itlanawatil Moisés, yika Dios kintlaijyowíltis.

50Nicodemo tewa iwan fariseos, akin se yúali okitato n Jesús, okinmili:

51—Totlanawatilis amo techkawilia matiktlajtlakoltikah se tlakatl, tla amo achto tikkakih tlan ika kiteiliah.

52Ijkuakó okinankilijkeh:

—¿Te noiwa de Galilea? Xikmoyekmachti itlajkuilol Dios iwa tikitas itech Galilea ayik kistika nion se profeta.

53Iwa nochteh oyayajkeh inchajcha.

Currently Selected:

San Juan 7: npl

Highlight

Copy