San Juan 6

Jesús kintlakualtia mákuili mil tlakah

(Mt. 14:13-21; Mr. 6:30-44; Lc. 9:10-17)

1Satepa, Jesús oyá ik nepa lado de lago de Galilea non noiwa itoka Tiberias. 2Iwa miakeh tlakah oyayah iwan Jesús, porke okinmitayah n milagros non Ye okinchiwaya keman okimpajtiaya n kokoxkeh. 3Otlanki Jesús otlejkok itech se tepetl iwa ompa omotlali iwan itlamachtijkawah. 4Ijkuakó yowalajsia n paskua, inmilwiu n judíojteh. 5Ijkuak Jesús oontláchixki iwa okitak miakeh tlakah omoololojtokah, okili n Felipe:

—¿Kani tikkoatiweh paj para tikintlakualtiskeh ninteh tlakah?

6Ijkó okili n Felipe san para kitas tlan kijtos, porke Jesús yokimatia tlan kichiwaskia. 7Ijkuakó Felipe okinankili:

—¡Ome siento denariojtomi paj, amo kajxilis tikinmajmakaskeh ajachitsi!

8Andrés ikni n Simón Pedro, akin noiwa imomachti okilito n Jesús:

9—Nika kajki se telpotsintli, non kimpixtok mákuili pameh de sebada iwa ome michimeh, pero ¿kan matechajxili?

10Ijkuakó Jesús okijto:

—Xikinmilikah nochteh mamotlajtlalikah.

Itech non lojar okatka xiujyo, iwa omotlajtlalijkeh kemi mákuili mil tlakah. 11Ijkuakó Jesús okinmónanki n pameh iwa omotlasojkama inawak Dios, otlanki okinmák itlamachtijkawah, iwa yejwah opé kinxejxeliliah nochteh non ompa oewatokah. Noiwa ijkó okichi iwan michimeh, iwa nochteh omotlamajsewijkeh iwa kuali oijixwikeh. 12Ijkuak yoijixwikeh, Jesús okinmili itlamachtijkawah:

—Xikoololokah nochi tlan omoka amo san maawilti.

13Okoololojkeh tlan ayakmó okikuajkeh ika mákuili paj de sebada, iwa okintemitijkeh májtlaktli iwa ome chikimeh. 14Ijkuak n tlakah okitakeh n milagro non Jesús okichi, okijtojkeh:

—De milajka, Ye ni n profeta non saman walaskia itech nin tlaltíkpaktli.

15Pero Jesús okinmitak yejwah omochijchikajtokah kiwikaskeh para mayeto Inrey. Yika, oksepa oyá iwa otlejkok ikpak tepetl san Ye iselti.

Jesús nejnemi ixko atl

(Mt. 14:22-27; Mr. 6:45-52)

16Ijkuak opé tleyua, itlamachtijkawah otemokeh okichiatoh itempa n lago de Galilea. 17Otlejkokeh itech se barka iwa opé kikojchalwiah n lago para ajsitiweh kan altepetl de Capernaúm. Ijkuakó yotleyuak, Jesús ayamó okwalinmajsia. 18Ijkuakó se ejekatl chikaktik opé kitlatlamotla n atl. 19Iwa yoyayah kemi se mákuili noso chikwase kilómetro itech atl. Okitakeh n Jesús nejnentiwits ixko atl iwa yokualinmasia. Ijkuakó yejwah omomojtijkeh, 20pero Ye okinmili:

—Amo ximomojtikah, Ne ni Jesús.

21Ijkuakó yejwah opakeh iwa okitlejkoltijkeh itech barka. Iwa san nima n barka oajsito itech tlali kan oyayah.

N tlakah kitemoah n Jesús

22Owalmostlatik, nochteh n tlakah non omokajkeh ik nepa lado de n lago, okitakeh okatka san se barka, iwa itlamachtijkawah n Jesús oyajkeh inselti, iwa Jesús amo oya inwah. 23Satepa, oksikimeh barkas non owalaya de Tiberias okalakikoh kan ik okikuajkeh n paj, iwa Jesús omotlasojkamah inawak Dios. 24Yika, ijkuak n tlakah okitakeh Jesús iwa itlamachtijkawah ayakmó ompa okatkah, otletlejkokeh itech nonteh barkas iwa oyajkeh Capernaúm okitemoto n Jesús.

Jesús Ye n paj non kitemaka yolílistli

25Ijkuak okajsitoh n Jesús ik nepa lado de n lago, okitlajtlanijkeh:

—Tlamachti, ¿kemania otikalakiko nika?

26Jesús okinmili:

—De milajka, de milajka nomechilia, nomejwah nonnechtemoah amo por ononkajsikamatkeh tlan kijtosneki n milagro non onikchi, yej porke onomechtlakualti asta kan ononmijixwikeh. 27Amo xitekitikah por n tlákuali non kimati tlami, yej xitekitikah por n tlákuali non ayik tlami iwa kitemaka yolílistli. Non tlákuali Ne nomechmakas porke sanwel Ne Dios onechpéjpenki para nin tekitl.

28Ijkuakó yejwah okitlajtlanijkeh:

—¿Tlan tekitl moneki matikchiwakah para tiktekitiliskeh Dios?

29Jesús okinnankili:

—Ye ni tlan Dios okichi, iwa manechneltokakah Ne Akin Ye okualtítlanki.

30Yejwah okilijkeh:

—¿Tlan milagro techititis para matiktakah iwa timitsneltokaskeh? ¿Tlan weletis tikchiwas? 31Towejkatatawah okikuajkeh n paj non itoka maná kan tlaltejtéyinki, ijkó kemi kijtoa itlajkuilol Dios: “Paj de ilwikak okinmák makikuakah.” Sal. 78:24; Éx. 16:4-15

32Jesús okinmili:

—De milajka, de milajka nomechilia: Moisés amo onomechmák n paj non owaltemok de ilwikak, yej Notajtsi Dios Akin nomechmaka n de milajka paj de ilwikak. 33Porke n paj non Dios kitemaka ye non waltemoa de ilwikak iwa kinmaka yolílistli n tlaltikpaktlakah.

34Ijkuakó okilijkeh:

—Tejwatsi, techmaka sanwel non paj.

35Jesús okinmili:

—Non paj ye Ne, akin niktemaka yolílistli. Akin wits nonawak mach ok ayik xitlatlas, iwa akin nechneltoka ayik amikis. 36Pero ijkó kemi yonomechili, maya yononnechitakeh amo nonnechneltokah. 37Nochi tlan Notajtsi nechmaka wits nonawak, iwa akimeh witseh nonawak, Ne nikinselis. 38Porke Ne amo oniwaltemok de ilwikak para nikchiwas tlan Ne nechpaktia, yej para nikchiwas tlan kipaktia Akin onechaltítlanki. 39Iwa Notajtsi Akin onechaltítlanki, amo kineki manikpolo nion se de nochteh akimeh onechinmák, yej kineki manikinyoliti itech nekateh iksemi tonatijmeh. 40Porke tlan Notajtsi Dios kineki Ye ni: nochteh akimeh kitaskeh Ikone Dios iwa kineltokah, maya mamikikah moyolitiskeh porke Ne nikinyolitis itech n iksemi tonati.

41Ijkuakó n judíojteh opé moichtakatlapowiah de Jesús porke okijto: “Ne nipaj non owaltemok de ilwikak.” 42Iwa okijtoayah:

—¿Amo ye nin Jesús, ipiltsi n José? Tejwah tikinmixmatih ipapá iwa imamá. ¿Kenijki kijtoa owaltemok de ilwikak?

43Jesús okinmili:

—Ayakmó ximokualankatlapowikah. 44Amaka weletis wits nonawak, tla amo kinotsa Notajtsi Akin onechaltítlanki, iwa Ne nikyolitis itech n iksemi tonati. 45Itech intlajkuilol n profetas ijkuilitok: “Dios kinmachtis nochteh.” Is. 54:13; Jr. 31:33-34 Yika, nochteh akimeh kikakih Notajtsi iwa kajsikamatih tlan kinmachtia, witseh nonawak.

46'Amaka yokitak Notajtsi, sanwel Ne Akin niwalewatok de Dios, Ne yonikitak. 47De milajka, de milajka nomechilia: Akin Ne nechneltoka kipia yolílistli non ayik tlami. 48Ne ni paj non kitemaka yolílistli. 49Nomowejkatatawah kan tlaltejtéyinki okikuajkeh n paj non itoka maná, iwa maya okikuajkeh non paj omikeh. 50Pero Ye nin paj non waltemoa de ilwikak, akin kikuas non paj, ayik mikis. 51Ne nonewia non paj yolitok non owaltemok de ilwikak. Tla aka kikua non paj, nochipa yolitos. Nokuerpo ye non paj non niktemaka para mayolitokah nochipa n tlaltikpaktlakah.

52Ijkuakó n judíojteh opé motlatlajtolkopah iwa okimoliayah:

—¿Kenomi weletis techmakas matikkuakah ikuerpo?

53Jesús okinmili:

—De milajka, de milajka nomechilia: Tla nomejwah amo nonkikuaskeh nokuerpo, Ne non onimochi ni tlakatl, iwa tla amo nonkoniskeh noesso, amo kipiah yolílistli. 54Akin kikua nokuerpo iwa koni noesso kipias yolílistli non ayik tlamis, iwa Ne nikyolitis itech iksemi tonati. 55Porke nokuerpo de milajka tlákuali, iwa noesso de milajka tlaonílistli. 56Akin kikua nokuerpo iwa koni noesso, moseitilijtok nowa iwa Ne íwa. 57Notajtsi Akin onechaltítlanki, yolitok, iwa Ne niyolitok por Ye, ijkó noiwa akin kimomajsewis nokueqrpo, yolitos por Ne. 58Ne Ni paj non owaltemok de ilwikak, pero nin paj amo kemi n maná non okikuajkeh nomotatawah iwa satepa omijmikeh. Akin kikuas nin paj, nochipa yolitos.

59Jesús ijkí okitemachti kan se sinagoga#6:59 sinagoga: se kali kan omoololoayah n judíojteh nochi sábado. kan altepetl de Capernaúm.

Miakeh kikawah n Jesús

60Ijkuak ijkó okikakeh itlamachtijkawah n Jesús, miakeh okijtojkeh:

—Nin tlamachtílistli kema chikawak, ¿akin weletis kajsikamatis?

61Jesús okimatia itlamachtijkawah omoichtakatlapowiayah ika tlan okijto, iwa okinmili:

—¿Ye ni nomechkuejsoa? 62¿Tlan nonkimoliah tla nonnechitaskiah Ne Non onimochi ni tlakatl nitlejkos ilwikak kan achto onikatka? 63N espíritu kimaka yolílistli se kuerpo. N kuerpo mach itla ipati tla amo kipia espíritu. N tlájtolteh non Ne yonomechili wits de n espíritu iwa kimaka yolílistli. 64Pero miálmasteh nomejwah akimeh amo nontlaneltokah.

Jesús ijkó okijto porke desde achto yokimatia akimeh amo kineltokaskiah iwa akin kitemaktiskia. 65Iwa okijto:

—Yika, yonomechili amaka weletis wits nonawak, tla Notajtsi amo kitekawilia.

66Ika noni, miakeh itlamachtijkawah n Jesús okikakajtejkeh iwa ayakmó onemiah íwa.

Jesús techilia kenomi tiyolitoskeh nochipa

67Ijkuakó Jesús okintlajtlani n májtlakteh iwa ome itlamachtijkawah:

—¿Nomejwah noiwa nonkinekih non nechkakajtewaskeh?

68Simón Pedro okinankili:

—Noteko, ¿Akin ok se íwa tiaskeh? Sanwel Tejwatsi tikpia non tlájtoli non kitemaka yolílistli non ayik tlami. 69Tejwah tikneltokah iwa tikmatih Tejwatsi n Yolchipawak de Dios.

70Ijkuakó Jesús okinnankili:

—Ne onomechpéjpenki nomejwah n májtlakteh iwan ome. Pero seme de nomejwah ye n diablo.

71Ijkuak ijkó okijto, Jesús otlajtoaya de Judas Iscariote ipiltsi n Simón, porke ye kitemaktiskia maya okatka seme de n májtlakteh iwa ome itlamachtijkawah.

Currently Selected:

San Juan 6: npl

Highlight

Copy