မးသဲ 8
8
ပၠၤအကလးကၠံးတပွဲၤ
(မၢ် ၁:၄၀-၄၅, လူၤ ၅:၁၂-၁၆)
1ဘ့ယ့ၣ်ရှူးက့ၤလၤခီးလီကါနဳၤ, ပၠၤအပဳၤအဟီးလိၤ ကိာ် ကဲၤစလ့ၤ. 2ကၱာ်ဒီ စာ်ပီၢ်, ပၠၤအကလးကၠံးတပွဲၤ လ့ၤကၱာ်ဓဳၢ်နှဳ လါစလှီမီၢ်, “ဘၱာ်စဲာ်, နသးကအီၣ်မၤဒဳၣ်, နမဲၤဝၱၤထာ်က့ၤဇၤတပွဲး ယဲၤ,” စဒီၣ်ဒဳၣ်.
3ယ့ၣ်ရှူး ဝ့ၤထာ်အစူးခီး, စတီးဘဲာ် လၢ်ဝၤအလီၤကၱာ်စဒီၣ်, “ယသးအီၣ်ဟဳ. ဝၱၤထာ်က့ၤပီၢ်.” ကၱာ်ဒီ တပျာ်ခါလီၤ စဝၱၤထာ်က့ၤ ကဲၤ. 4မဲၤဝှါယ့ၣ်ရှူးဒီၣ်စဲာ်, “မှါအံာ်ပီၢ်, ဒီဆးမဲးပၠၤတပွဲမဲး, ပရၤ ဆါ လ့ၤဒဲလၱၢ်နန့ၤပၠၤလှူၣ်တဲၤအဓဳၤ, ကၱာ်အံာ်ပီၢ် တဲၤလှူၣ်ထဲၢ်စီၤမိၤၡ့မှဲး လၤကဲၤ, စာ်ဘိထဲၢ် အကမၱာ်ပီၢ်နဝၱၤထာ်က့ၤအသဲသၱးဒဳစဲာ်တစီာ် အနံၤ ခံနဳၤ.”
ကျံဗဳၤဓဳၤအဇိၤဖဳးတပွဲၤ
(လူၤ ၇:၁-၁၀)
5ဘ့ယ့ၣ်ရှူးလ့ၤဝှါကပ့းရနီၣ် အူးပူၤနဳၤ, ရိမ့ၤအကျံဗဳၤဓဳၤ တပွဲၤလ့ၤထၱးစဲာ်, စတၤခီၣ်ဝဲၤ လၢ်ဝၤကၱာ်စဒီၣ်, 6“ဘၱာ်စဲာ်, ယဇိၤဖဳးတပွဲၤကီၢ်လၤအီၣ်ၡံၣ်ပူၤ, စစူးသံခၣ်သံကၱာ် အအ့းအဝဲၢ်ဆိးစဲာ်.”
7ကၱာ်ဒီ ယ့ၣ်ရှူးဒီၣ်စဲာ်, “ယကလ့ၤမဲၤမှးက့ၤစဲာ်.”
8မၱာ်ကျံဗဳၤဒီၣ်က့ၤစဲာ်, “ဘၱာ်စဲာ်, ယတတးမဲၤနကလ့ၤနံၢ် ယၡံၣ်ခဳးလဲၢ်နီး, ပရၤဆါ, ဒီၣ်ထာ်ပီၢ်နလ့ၢ်တမှိလီၤကၱာ်ယဇိၤဖဳး ကမှး က့ၤတပွဲး. 9မၤနဲၢ်, ယမၱာ်ပၠၤအအီၣ် တဲၤစိသလဲအကါလဲၢ်တပွဲၤပွဲၤ. ကၱာ်ကျံဖဳး အအီၣ်ယကါလဲၢ်အီၣ်, ကၱာ် ‘လ့ၤဒဳနဳၤ’ ယဒီၣ်တပွဲၤ ဒဳၣ်, စလ့ၤတပွဲး. အလဝ့ၤတပွဲၤ ‘လ့ၤဘ့ယဳၤ,’ ဒဳၣ်, စလ့ၤတပွဲး. ကၱာ်ယဒီၣ်ယဇိၤယပွဲၤ, ‘မဲၤတဲၤကယဳၤ’ ဒဳၣ်, စမဲၤတပွဲး.”
10ယ့ၣ်ရှူးသၱာ်ဟဲဘဲာ် တဲၤယၱၢ်ဘဲာ် အယဳၤဒဳၣ်, စထဲးတမိၢ် တမှါကဲၤ ကၱာ် စဒီၣ်ကဲၤ အလ့ၤကိာ်စလ့ၤ တစီာ်, “ယဒီဆးသံအတၱၢ် အမှး, ယတပးနံၤ တဲၤဘူၣ်အဓဳၤပွ့ကယဳၤ ဒဳအံၣ်စရ့လး ဖဳးတစီာ်အကျဲ နဳၤနီး. 11ကၱာ်ဒီ, ယဒီဆးသံထဲၢ်ဒဳလူၤမူၤထာ်နဳၤကၱာ်ဒဳလၤ မူၤလၤ နဳၤ, ပၠၤအီၣ်အဲးအီးအီးကလ့ၤကီကၱာ်ကဆးနါပျဳာ်ကီ စီၤအၤဘြၤဟၣ်, စီၤအံၤစဲး ကၱာ်စီၤယၤကိာ်ဒဳ မီၢ်ခဳးအထံအက့ၤအပူၤ အစူးဒဲးခဳးအခၣ်ထၱး နဳၤ, 12ပရၤဆါထံက့ၤအဖဳးအလံၤတစီာ် ကဘဲာ်နှးဟဲးထာ်ကီဒဳ အချဳတဲၤခံးကျဲနဳၤ. ဒဳနဳၤ, တဲၤယဳၤတဲၤဟးကၱာ် တဲၤအ့းတံၤသိအ့းတံၤသဲ ကအီၣ်ကီ.” 13မဲၤဝှါ ယ့ၣ်ရှူးဒီၣ်ကျံဗဳၤဓဳၤ, “က့ၤဒီဧဲၤ, ကၱာ်တဲၤ ကိမံၤကမၱာ်ဒီဧဲၤနနံၤခံ အစာ်ဘိနဘူၣ်ကဲၤနဳၤ.”
ကၱာ်ဒီအနဳၤတသရဲးလီၤ, ဇိၤဖဳးမှးက့ၤကဲၤ.
စီၤပ့းတရူးအမူၤပွ့ၢ်
(မၢ် ၁:၂၉-၃၄, လူၤ ၄:၃၈-၄၁)
14ဘ့ယ့ၣ်ရှူးဓဳၤလ့ၤစီၤပ့းတရူးအၡံၣ် ပူၤနဳၤ, စစာ်ထၱးလၢ် ဝၤအမူၤပွ့ၢ် ကီၢ်လၤအီၣ် အရွှံးထာ်စဲာ်. 15ကၱာ်ဒီ စတီးဝဲၢ်လၢ်ဝၤ အစူးခီးလီၤ, ကၱာ်အရွှံးစဲာ်လှဲမဲၢ်တနၢ်ကဲၤကၱာ် စဝဲၢ်ထဳးမဲၤအီမဲၤအၣ်နံၤ တပွဲးကဲၤလၢ်ဝၤတစီာ်.
တဲၤပီၤတဲၤပၤအလဝ့ၤတစီာ်
16ဘ့လူၤမူၤလၤနဳၤ, ပၠၤလ့ၤအံာ်စအီၣ် ပၠၤအနှဲးအီၣ် အီၣ်အဲ ဗွဲ, ဒဳၣ်စနှးဟဲးထာ်ဖျီးမံ တပွဲးတဲၤနှဲးတစီာ်ကၱာ်စတဲၤယၱၢ်ဘဲာ်တမှိ, ကၱာ်ဒီ အရွှံးတစီာ်နဳၤစမဲၤမှးက့ၤလဳတပွဲးလၢ်ဝၤ. 17အစာ်ဘိဝံယၡါယၤ ဒီၣ်တီၤလီၤကဲၤနဳၤ, အပ့ထာ် ဇီၤထာ်ကဲၤထဲၢ်စဒီၣ်, “စဖၱးကဲဝၤရွှံးဝၤဆဲ ကၱာ် စဘံာ်အံာ်ဇၢ်အံာ်ကဲၤဝၤတဲၤထဳးတဲၤပၤနဳၤ.”
တဲၤခးဆဲးညဲဒဳတဲၤလိၤကိာ်ယ့ၣ်ရှူးအလ့ၤ
(လူၤ ၉:၅၇-၆၂)
18ယ့ၣ်ရှူးစာ်ထၱးပၠၤအပဳၤအဟီးအီၣ်ခွဲ ဘးကဲၤစဲာ်ဒဳၣ်, စနှး ကဲၤစပျဲၢ်စဘီၣ်တစီာ် ကက့ၤဝဲၢ်ပဲာ်လဲာ်အလဝ့ၤတခီဝဳၢ်. 19ဘ့ နဳၤ, အသၱာ်တဲၤသိာ်တဲၤသီတပွဲၤလ့ၤထၱးစဲာ်, စဒီၣ်, “ဆရၣ်, နလ့ၤဒီၣ် လဲၢ်အရါနဳၤ, ယကလ့ၤကိာ်တပွဲးနကါ.”
20ပရၤဆါယ့ၣ်ရှူးဒီၣ်စဲာ်, “ထွံၣ်မံၤ တစီာ်အပူၤအီၣ်. ထဳၣ် ဖဳးတစီာ်အပံၤအီၣ်. ပရၤဆါပၠၤအဖဳးကပီၢ်လၤအံၤအကဳာ် အလ့ၤတအီၣ်နီး.”
21စပျဲၢ်စဘီၣ်အလဝ့ၤတပွဲၤဒီၣ်စဲာ်, “ဘၱာ်စဲာ်, အံာ်မီၢ်ကိာ်, ယက့ၤဘူလါအူဆူး ယပာ်တကၱာ်.”
22ပရၤဆါ ယ့ၣ်ရှူးဒီၣ်စဲာ်, “လ့ၤကိာ်ပီၢ် ယလ့ၤ. အသံတစီာ်ကဘူလါဓီဒီဧဲၤအလူၢ်.”
ကလံၤမဳၤဘံဒဳနှီးခဳး
(မၢ် ၄:၃၅-၄၁, လူၤ ၈:၂၂-၂၅)
23ယ့ၣ်ရှူးခဲထာ်နံၢ်ချံပူၤဒဳၣ်, စပျဲၢ် စဘီၣ်တစီာ်လ့ၤနံၢ်ကိာ် ကဲၤစကါ. 24ကၱာ်ဒီ စာ်ပီၢ်, ကလံၤမဳၤဘံအဆိးတပဳၢ်ထာ်ကဲၤ ပဲာ်လဲာ်ပူၤပွ့အစာ်ဘိထံပျၱၤထာ်နံၢ်ကဲၤချံအပူၤ နဳၤ. မၱာ်စဲာ်နဳၤ, စဆီးမံသဗ့ ကဲၤ. 25စပျဲၢ် စဘီၣ်တစီာ်လ့ၤဘိးထၱးစဲာ်, စထဳးဝဲၢ်လၢ်ဝၤ ကၱာ် ဒီၣ်, “ဘၱာ်စဲာ်, မဲၤလှိထာ်ပီၢ်ဝၤတကၱာ်, ဝၤကသံဘဲာ်ပ့ၤလီၤ.”
26ယ့ၣ်ရှူးဒီၣ်စဲာ်တစီာ်, “သံၡံးဆါမၤနဲၢ်, အဳပၠၤအတဲၤဘူၣ် ၡံးဖဳတစီာ်.” မဲၤဝှါစဆီထဳး, စဟီကဲၤကလံၤမဳၤဘံကၱာ်ပဲာ်လဲာ်ဒဳၣ်, ပွဲး, ကလံၤမဳၤဘံကၱာ်ပဲာ်လဲာ်အီၣ်ဇီၤကဲၤဒဳၣ်.
27မဲၤကနဳၤဒဳၣ်, ပၠၤတစီာ်ထဲးတမိၢ်တမှါ လဳၢ်ကဲၤကၱာ်စဒီၣ်, “အယဳၤတပွဲၤမၱာ်ပၠၤတၤနဲၢ်. ကလံၤမဳၤဘံကၱာ်ပဲာ်လဲာ်နှီနူၤမၢ်ဆီးခ့န့းကဲၤ စလ့ၢ်.”
တဲၤနှးဟဲးဖျီးမံတဲၤနှဲးဒဳကဒါရၤ
(မၢ် ၅:၁-၂၀, လူၤ ၈:၂၆-၃၉)
28ကၱာ်ဒီဘ့စဓဳၤလ့ၤပဲာ်လဲာ်ဝ့ၤအလဝ့ၤတခီဝဳၢ် ထဲၢ်ပၠၤကဒါရၤဖဳးအလၢ်ခဳးပူၤနဳၤ, ပၠၤအနှဲး အီၣ်ကၠံၢ်ပွဲၤဟဲးထာ်လူၢ်ခဳးအပူၤကၱာ် စလ့ၤၡံ လၢ်ဝၤအကျဲး. စခူစဟဲကဲၤကဲၤပွ့ အစာ်ဘိ ပၠၤတပွဲတဟဲး ကိာ် ဘူၣ်ကျဲးအနဳၤတဘီနဳၤနီး. 29ကၱာ်ဒီ, စာ်ပီၢ်, စဟးဖူးကၱာ်စဒီၣ်, “နဲၤကၱာ် ဝၤဘဲာ်ကၠၤလှဲးလၢ်ဝၤတၤနဲၢ်, အဳယ့ၣ်ရှူး, ကဘၱာ်စဲာ်အဖဳး. အမူၤနံၤမူၤသဲတချူဘဲာ်နီး, နလ့ၤမဲၤဆဲးညဲတၱၤတၱၢ်ကဲၤဝၤဧါ.”
30တအီၣ်ယၱၤကၱာ်စဲာ်တစီာ်နီး, ထီးအီၣ်အဲးအီးအီးတပဳၤ အၣ်အဆဲၣ်. 31ကၱာ်ဒီတဲၤနှဲးတစီာ်တၤခီၣ်ဝဲၤစဲာ်, အဒီၣ်, “နကနှးဟဲးထာ်ဝၤဘ့ယဳၤဒဳၣ်, နှးလ့ၤနံၢ်ပီၢ်ဝၤထီးအပဳၤအဟီးအကျဲတကၱာ်.”
32စဒီၣ်လၢ်ဝၤတစီာ်, “လ့ၤဒဳး.” စဟဲး ထာ်ကၱာ်ဒီလ့ၤနံၢ် ထီးအဟၱးကျဲ. ကၱာ်ဒီ, စာ်ပီၢ်, ထီးသဒဲဗဳၤ စွဲးလၤတ့ၢ်နံၢ်အန့ၤခီတါ ပျး လီၤ ဒဳပဲာ်လဲာ်ပူၤနဳၤ, ကၱာ်အလၤအဳးသံလဳတပွဲးကဲၤ ထံ.
33အစာ်အံာ်ထီးတစီာ်ဆဲးက့ၤကဲၤကၱာ်ဒီ စဓဳၤနံၢ်အူးပူၤဒဳၣ်, စဒီဆးလဳတဲၤဖၱထာ်ကဲၤတစီာ်နဳၤကၱာ်ပၠၤအနှဲးအီၣ်တပွဲၤနဳၤအဝၱၤအကဲ. 34ကၱာ်ဒီ, စာ်ပီၢ်, ပၠၤအအီၣ်အူးအပူၤကိအပွဲၤ ဟဲးထာ်ကၱာ်လ့ၤ ၡံယ့ၣ်ရှူး, ကၱာ်ဒီဘ့စစာ်ထၱး လၢ်ဝၤနဳၤ, စတၤမီၤကဲၤလၢ်ဝၤ စာ်ဘိထဲၢ် စကဟဲးထာ်ဖျီးမံပီၢ်လၢ်ဝၤအလၢ်ခဳးပူၤနဳၤ.
Currently Selected:
မးသဲ 8: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
