မးသဲ 9
9
အစူးသံခၣ်သံဒဳကပ့းရနီၣ်အူးတပွဲၤ
(မၢ် ၂:၁-၁၂, လူၤ ၅:၁၇-၂၆)
1ယ့ၣ်ရှူးခဲထာ်နံၢ်ချံတဘဲာ်အပူၤ, စဝှါဓူၢ်ပဲာ်လဲာ်ကၱာ် စက့ၤ ကဲၤဒဳစအူးနဳၤ. 2ကၱာ်ဒီစာ်ပီၢ်, ပၠၤလ့ၤအံာ်စအီၣ်အစူးသံခၣ်သံ, အကီၢ်လၤအီၣ်လ့ၤမံခဳးတပွဲၤ. ယ့ၣ်ရှူးစာ်ထၱးစဲာ်တစီာ်အတဲၤဘူၣ်ဒဳၣ်, စဒီၣ် ကဲၤအစူးသံ ခၣ်သံ တပွဲၤ, “အဖဳးခဳ, ပဲၢ်ဆိးပီၢ်နသး, နတဲၤခီၣ်ဝဲၤ တစီာ်လှိတပွဲး.”
3ကၱာ်ဒီစာ်ပီၢ်, အဝှ့းစဲာ် တစီာ်အကျဲ, တစီာ်စီာ်ဒီၣ်ကဲၤဒဳအသးအဳးပူၤ ကယဳၤ, “ပၠၤတပွဲၤယဳၤ, စဒီၣ်ကဲဒီၣ်အိးကဲၤ ကဘၱာ်စဲာ်.”
4ယ့ၣ်ရှူးသၱာ်ဟဲစတဲၤကမဳၤတစီာ်ဒဳၣ်, စဒီၣ်, “သံကမဳၤမၤ တဲၤအတအဲးနီးသံသးအဳး ပူၤနဲၢ်. 5တဲၤယၱၢ်ဘဲာ်ထဲၢ်, ‘နတဲၤခီၣ် ဝဲၤ တစီာ်လှိတပွဲး,’ အၡဳဒဳၣ်ချဳဧါ, မၱတမၱာ်နီး, ‘ဝဲၢ်ထဳးကၱာ်ဟဲးပီၢ်,’ မၱာ်အၡဳဒဳၣ်ချဳဧါ. 6ပရၤဆါဒဳၣ်, စာ်ဘိထဲၢ်သံကသၱာ်ဟဲပီၢ် ပၠၤအဖဳး တပွဲၤအစိသလဲအီၣ်အဘါပျဲးပၠၤအတဲၤခီၣ်ဝဲၤ ဒဳလၢ်ခဳးအခဳးယဳၤနဳၤ,” ဘ့နဳၤ စဒီၣ်အစူးသံခၣ်သံ တပွဲၤ, “ဝဲၢ်ထဳး, ဖၱးနလ့ၤမံကၱာ်က့ၤပီၢ်နရှံၣ်. ”
7ကၱာ်ဒီ စဝဲၢ်ထဳးကၱာ် က့ၤတပွဲးကဲၤ စရှံၣ်. 8ပၠၤအပဳၤအဟီးကဲာ်ထၱးတဲၤအယဳၤ ဒဳၣ်, ၡံးဆါကဲၤ, ကၱာ်ထါအံာ်ကဲၤ ကဘၱာ် စဲာ်အတီၤအသ့း, ထဲၢ်အအံာ်လၤပၠၤ တဲၤစိသလဲ အဓဳၤပွ့ကနဳၤတပွဲၤနဳၤ.
စီၤမးသဲအတဲၤဘဲာ်ယဳၤ
(မၢ် ၂:၁၃-၁၇, လူၤ ၅:၂၇-၃၂)
9ယ့ၣ်ရှူးဟဲးထာ်ဝှါဘ့နဳၤဒဳၣ်, စစာ်ဝဲၢ် ထၱးပၠၤတပွဲၤဆးနါ အီၣ်တဲၤမှူအတဓၢ်ခဳး, စမံၤ မၱာ်စီၤမးသဲ, ကၱာ်ဒီစဒီၣ်လၢ်ဝၤ, “လ့ၤကိာ် ယလ့ၤ,” ကၱာ်ဒီစဝဲၢ်ထဳးလိၤကိာ်တပွဲးလၢ်ဝၤအလ့ၤ.
10ဘ့ယ့ၣ်ရှူးဆးနါအီၣ်, အၣ်အီဒဳရှံၣ် တဝၤအပူၤအခၠၱးနဳၤ, စာ်ပီၢ်, အတၤတဲၤမှူတစီာ် ကၱာ်တဲၤခီၣ်ဝဲၤဖဳးအီၣ်အဲဗွဲလ့ၤဆးနါကိာ်ကဲၤ ယ့ၣ်ရှူးကၱာ်စပျဲၢ်စဘီၣ်တစီာ်အကါ. 11ကၱာ်ဒီ ဖၤရံၤၡဲဖဳးတစီာ် စာ်ထၱးအယဳၤဒဳၣ်, စဒီၣ် လၢ်ဝၤအပျဲၢ်အဘီၣ်တစီာ်, “သံဆရၣ်အၣ်အီ ပျဳာ်မၤအတၤတဲၤမှူ ကၱာ်တဲၤခီၣ်ဝဲၤဖဳးတစီာ် နဲၢ်.”
12ယ့ၣ်ရှူးသၱာ်ဟဲဘဲာ်တဲၤယၱၢ် ဘဲာ်အယဳၤဒဳၣ်, စဒီၣ်, “ပၠၤ အမိၢ်အမှးတစီာ်အနံၤခံ တဝှံးဆရၣ်တလဳၤပၤနီး. အလဳၤပၤမၱာ် ပၠၤအရွှံး အဆဲတစီာ်နဳၤတခီ. 13မဲၤကနဳၤဒဳၣ်လ့ၤမဲၤ လှိပီၢ်တဲၤယၱၢ်ဘဲာ်ယဳၤ အထာ်ပဳၤထာ်ဘါ. ‘ယသးနံၤတဲၤခီၣ်ဝဲၤမှီးဘဲာ်, တဘဲာ်တဲၤလှူၣ် ထာ် အံာ်နီး.’ မၤနဲၢ်ကဒီၣ်ဓဳၤဒဳၣ်, ယတလၤယဳၤ က့ၤပၠၤအတၱၢ်အမှးတစီာ်နီး. မၱာ်တဲၤခီၣ်ဝဲၤဖဳး တစီာ်တခီ.”
တဲၤဒူၣ်တဲၤအၣ်တဲၤအီ
(မၢ် ၂:၁၈-၂၂, လူၤ ၅:၃၃-၃၉)
14ဘ့နဳၤစီၤယိၤဟၣ်အခၱအပွဲၤတစီာ် လ့ၤထၱးစဲာ်ကၱာ်စဒီၣ်, “မဲၤစာ်တဲၢ်, ဝၤကၱာ် ဖၤရံၤၡဲဖဳးတစီာ်ဒူၣ်တဲၤအၣ်တဲၤအီတဒဳးလီၤ တဒဳး လီၤ, မၱာ်နပွဲၤအပျဲၢ်အဘီၣ်တစီာ်တဒူၣ်မၤနီး နဲၢ်.”
15ကၱာ်ဒီယ့ၣ်ရှူးဒီၣ်စဲာ်တစီာ်, “အမံၤခဳအဖၱးစူး တပွဲၤအခီ အသီၣ်အီၣ်ကိာ်ဝ့ၤ စကါအသူသရ့ စအဳးသဳးအဳးသးဇၤပီၢ်ဧါ. ပရၤဆါ, အနံၤအသဲကဓဳၤကီ, ထဲၢ်တဲၤတစီာ် ကဖၱးသံဝံၢ်ကီစဲာ်အမံၤခဳ အဖၱးစူး တပွဲၤနဳၤ, ကၱာ်ဒီဘ့နဳၤစကဒူၣ်ကီတဲၤအၣ်တဲၤအီ.
16“ကၱာ်ဒီပၠၤတပီၤဒဲးအံာ် တကၱယၢ်ကီ လၢ်အသဲ ၡံာ်ဒဳယၢ် အလီၤတဗွဲနီး. မၤနဲၢ်ကဒီၣ် ဓဳၤဒဳၣ်, အဖ့းထဲးလဲးတကၱယၢ်ၡံာ်ဒဳအလီၤ, ကၱာ် ဒီအထဲးလဲးခီထာ်ဒဳၣ်ချဳလီၤ. 17ပၠၤတဘဲနံၢ် သဳာ်ပၡံးထံအသဲ အကဳတဲၤဖ့းအလံၤအပူၤနီးနီး. ပၠၤကမဲၤမၤဓဳၤဒဳၣ်, တဲၤဖ့းပဳၤဖး, ကၱာ် သဳာ်ပၡံးထံ လၤလှီး, ကၱာ်အကဳတဲၤဖ့းကဲလဳၢ်တပွဲး. မၱာ်ပၠၤဘဲနံၢ် သဳာ်ပၡံးထံ အသဲ သဳကဳာ်သဲအပူၤ, ကၱာ်ဒီ, ကၠံၢ်ဓဲလဳၢ်အီၣ်အဳဓဳၤကီ.”
မၢ်ဓဳၤအဖဳးမူၤကၱာ်အမံၤမှူးအသွံၣ်ဖျီးတပွဲၤ
(မၢ် ၅:၂၁-၄၃, လူၤ ၈:၄၀-၅၆)
18ဘ့စဒီၣ်အူဒီဆးဖါသးတဲၤအယဳၤတစီာ် နဳၤ, စာ်ပီၢ်, ပၠၤအခဳးအန့ၤတပွဲၤလ့ၤကီၢ်လၤ သဘဲထာ်စဲာ်, ကၱာ်စဒီၣ်, “ဘၱာ်စဲာ်, ယဖဳးမူၤ သံ ကါကလီ, ပရၤဆါလ့ၤတဒါထာ်ပီၢ်နစူးခီး စခဳးတကၱာ်, စကအီၣ်သမိက့ၤတပွဲး.”
19ယ့ၣ်ရှူးဝဲၢ်ထဳးလ့ၤကိာ်ကဲၤစကါ, စပွဲၤ အပျဲၢ်အဘီၣ်တစီာ်လ့ၤကိာ်ကိာ်.
20ကၱာ်ဒီ, စာ်ပီၢ်, အမံၤမှူးအသွံၣ်ဖျီး အတဲၤဆဲဘး ထဳၡံး ကၠံၢ်ဒ့ာ်တပွဲၤလ့ၤဘိးထၱး စချဳကၱာ်စတီးဝဲၢ်လၢ်ဝၤအၡံာ်ဒဳကါပဇွဲၤအလီၤ. 21မၤနဲၢ်ကဒီၣ်ဓဳၤဒဳၣ်, စဒီၣ်စသးအဳးပူၤ ကယဳၤ, “ယကပဳၢ်ဝဲၢ် ဘဲာ်စၡံာ်ဒဳကါဝံၢ်အလီၤ လီၤနှီနူၤ, ယကမှးက့ၤတပွဲး.”
22မၱာ်ယ့ၣ်ရှူးဒဳးတရၱၤအန့ၤ, စစာ်ထၱး လၢ်ဝၤဒဳၣ်စဒီၣ်, “အဖဳးမူၤ, အီၣ်မီၤသဳးမီၤသး ပီၢ်. နတဲၤဘူၣ်တဲၤနဲၢ်မဲၤမှးက့ၤထဳနဲၤ.” ကၱာ်ဒီ စမှးက့ၤတပွဲးတပျာ်ခါလီၤ.
23ကၱာ်ဒီ ဘ့ယ့ၣ်ရှူးဓဳၤလ့ၤအခဳးအန့ၤ တပွဲၤအရှံၣ်ပူၤနဳၤ, စကဲာ်ထၱးအအူးထွဲတစီာ် ကၱာ်ပၠၤအီၣ်အဲးအီးအီးပဳၤကလၢ်ဒဳး. 24စဒီၣ်, “ဟဲးတပီၤ, မၤနဲၢ်ကဒီၣ်ဓဳၤဒဳၣ်, အမံၤ မှူးဖဳတသံနီး, မၱာ်စဆီးမံ လီၤ.” ကၱာ်ဒီပၠၤယဲၢ်အံာ် ကဲၤစဲာ်. 25ကၱာ်ဒီဘ့ပၠၤအပဳၤအဟီး ဘဲာ် နှးဟဲးထာ်ဝှါနဳၤ, ယ့ၣ်ရှူးလ့ၤနံၢ်ရှံၣ်ပူၤ, ကၱာ်စဖၱး အမံၤမှူးဖဳးအစူးခီး, ကၱာ်ဒီအမံၤမှူးဖဳးဝဲၢ်ထဳးက့ၤ ကဲၤ. 26တဲၤအဝၱၤအကဲအယဳၤဝှ့ထာ် သဲာ် လၤကဲၤသဒဲထံသဒဲက့ၤ.
ပၠၤအကၢ်ဓူခံးကၠံၢ်ပွဲၤ
27ယ့ၣ်ရှူးဟဲးထာ်ဒဳနဳၤဒဳၣ်, ပၠၤအကၢ်ဓူ ခံးကၠံၢ်ပွဲၤလိၤကိာ်စလ့ၤ, စကဲာ်ဧဳၤကၱာ်စဒီၣ်, “အဳစီၤဒၤဝံးအဖဳးခဳ, ခီၣ်ဝဲၤပီၢ်ဝၤတကၱာ်.”
28ကၱာ်ဒီဘ့စဓဳၤနံၢ်ရှံၣ်ပူၤနဳၤ, အကၢ်ဓူခံး ကၠံၢ်ပွဲၤလ့ၤထၱးစဲာ် ကၱာ်ယ့ၣ်ရှူးဒီၣ်စဲာ်တစီာ်, “ယမဲၤကဲာ်ထာ်နံၤသံတဲၤအယဳၤနဳၤ, သံဘူၣ် ပီၢ်ဧါ.”
စဒီၣ်ရှံက့ၤလၢ်ဝၤ, “ဝၤဘူၣ်ဟဳ, ဘၱာ်စဲာ်.”
29ဘ့နဳၤစပဳၢ်ဝဲၢ်လၢ်ဝၤတစီာ်အကၢ်ဓူ လီၤကၱာ်စဒီၣ်, “အစာ် ဘိသံတဲၤဘူၣ်အီၣ်အဓ့, တဲၤကဖၱထာ်နံၤဒီဧဲၤသံ.” 30ကၱာ်ဒီစဲာ်တစီာ် အကၢ်ဓူလှၱထာ်က့ၤကဲၤ. ယ့ၣ်ရှူးမှဲးလၤတကြၱၢ် နၱၢ်စဲာ်တစီာ်ကယဳၤ, “ဆီးအံာ်ပီၢ်သံန့ၤ အစာ် ဘိပၠၤကတသၱာ်ဟဲကိာ်ပီၢ်တဗွဲနီးနဳၤ.”
31ပရၤဆါစဲာ်တစီာ်ဟဲးထာ်ဝှါဒဳၣ်, စဒီၣ် ဟဳထာ်သဲာ်လၤတပွဲးလၢ်ဝၤအဝၱၤအကဲသဒဲထံ သဒဲက့ၤ.
တဲၤနှဲးဖၱးဘဲာ်အပျၱၤကျဳၤတပွဲၤ
32ကၱာ်ဒီဘ့စဟဲးထာ်ဝှါတစီာ်နဳၤ, စာ်ပီၢ်, ပၠၤလ့ၤအံာ်စဲာ်အပျၱၤကျဳၤထဲၢ်တဲၤနှဲးအီၣ်ဝဲၢ်အလီၤ တပွဲၤ. 33ကၱာ်ဒီဘ့စနှးဟဲး ထာ် ဝှါတဲၤနှဲးနဳၤ, အပျၱၤကျဳၤတပွဲၤယၱၢ်ဘဲာ်ကဲၤ. ကၱာ်ဒီပၠၤအပဳၤ အဟီးထဲး တမိၢ်တမှါကၱာ်ဒီၣ်ကဲၤ, “ဒဳအံၣ်စရ့ လးဖဳးအကျဲနဳၤ, ပၠၤတစာ်ထၱးကဲၤ တဲၤအစာ် ဘိ ကယဳၤတပျါနီး.”
34ပရၤဆါဖၤရံၤၡဲဖဳးတစီာ်ဒီၣ်, “ဒဳတဲၤနှဲး အဆးဖြးအစိသလဲအပူၤစနှးဟဲးထာ်တဲၤနှဲး လီၤ.”
အပျဲၢ်အဘီၣ်တစီာ်အတဲၤဘဲာ်သဓဳ
35ယ့ၣ်ရှူးလ့ၤထၱးအူးကၱာ်ဒဳဖါလဳစါစဲး, စဒီၣ်အူဆးအူတဲၤ ဒဳ လၢ်ဝၤအဘူၣ်ဘျီၣ်တစီာ် အပူၤ, ကၱာ်စဒီထိးမီၢ်ခဳးထံက့ၤအတဲၤသးကနၢ်အံာ်အဝၱၤအကဲ, ကၱာ်စမဲၤလှဲမဲၢ်တဲၤတၱၢ်တဲၤ ဆဲအမဳအမဳၤကၱာ်မဲၤမှးက့ၤပၠၤအတမှးနီးအီၣ်အရါ နဳၤ. 36ကၱာ်ဒီစစာ်ထၱးပၠၤအပဳၤအဟီးတစီာ် ဒဳၣ်, စခီၣ်ဝဲၤကဲၤလၢ်ဝၤ, မၤနဲၢ်ကဒီၣ်ဓဳၤဒဳၣ်, စအီၣ်ပၤအီၣ်ဆဲ, အီၣ်ထံအီၣ်တၤကဲၤ အစာ်ဘိ သဳထဲၢ်ပၠၤ အစာ်အံာ် တအီၣ်တဗွဲနီးအခီဖးနဳၤ. 37ဘ့နဳၤစဒီၣ် စပျဲၢ်စဘီၣ်တစီာ်, “ဘူၣ် မှံ အီၣ်အဲးအီးအီးထဳပီၢ်ဒီ, မၱာ်အကဲာ်ဘူၣ်တအီၣ် နီး. 38မဲၤကနဳၤ ဒဳၣ်, တၤပီၢ်ဟူၣ်ကျဲအဘၱာ်စဲာ်, စာ်ဘိထဲၢ်စကနှးလ့ၤပၠၤအကဲာ်ဘူၣ်ဒဳ စဟူၣ်ကျဲပူၤနဳၤ.”
Currently Selected:
မးသဲ 9: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
