မးသဲ 18
18
အဓဳၤကဓူၤမၱာ်ပီၢ်ပွဲၤ
(မၢ် ၉:၃၃-၃၇, လူၤ ၉:၄၆-၄၈)
1ဘ့နဳၤအခၠၱးအပျဲၢ်အဘီၣ်တစီာ်လ့ၤထၱးယ့ၣ်ရှူးကၱာ် စဒီၣ် လၢ်ဝၤကယဳၤ, “ဒဳမီၢ်ခဳးအထံအက့ၤနဳၤ, နကမဳၤ အဓဳၤကဓူမၱာ်ပီၢ်ပွဲၤ.”
2ကၱာ်ဒီယ့ၣ်ရှူးယဳၤလ့ၤအပံၤစဖဳးတပွဲၤစအီၣ်, ကၱာ်စနှးအီၣ် လၢ်ဝၤဒဳစဲာ်တစီာ်အကျါမဲဗူနဳၤ, 3ကၱာ်စဒီၣ်, “ယဒီၣ်သံအတၱၢ်အမှး, သံကတဘါချဲး သံသးနီး, သံကတဖၱထာ်ဇၤအစာ်ဘိ အပံၤစဖဳးတစီာ် နဳၤနီးဒဳၣ်, သံတလ့ၤနံၢ်ဘဲာ်ပံပံးမီၢ်ခဳးအထံအက့ၤ အပူၤနီး. 4မဲၤကနဳၤဒဳၣ်, ပၠၤတပွဲၤကပဲၢ်ဘိးလၤ အန့ၤအစာ်ဘိအပံၤစဖဳးအယဳၤ တပွဲၤနဳၤဒဳၣ်, စကမၱာ် အဓဳၤကဓူဒဳမီၢ်ခဳးအထံအက့ၤအပူၤနဳၤ. 5ကၱာ် ဒီ ပၠၤထဲၢ်အယဳၤအကဲာ်အပံၤစဖဳးအစာ်ဘိအယဳၤ ဒဳယမံၤအပူၤနဳၤတပွဲၤ ယဳၤကဲာ်တပွဲးယဲၤ.
တဲၤဆဲးကိနံၤတဲၤဒဲလၱၢ်ကျဲးအတအဲးနီးအလ့ၤ
(မၢ် ၉:၄၂-၄၈, လူၤ ၁၇:၁-၂)
6“ပရၤဆါ ပၠၤထဲၢ်အဒဲလၱၢ်အပံၤစဖဳးအဘူၣ် ယဲၤတစီာ်အကျဲတပွဲၤပွဲၤ, ထဲၢ်တဲၤအတအဲးနီးတပွဲၤ နဳၤ, အကအဲးဒဳၣ်ချဳမၱာ် တဲၤကကၢ်ဝဲၢ်စကီၢ်လီၤ ရှံးဆဳးလဳၤကၱာ် ကထၱးလၤတ့ၢ်နံၢ်စဲာ်ဒဳ ပဲာ်လဲာ်ထံ အလၤယီၢ်အပူၤနဳၤ. 7တဲၤဒဲလၱၢ်ကျဲးအတအဲးနီး အခဳးအစဲ, လၢ်ခဳး ဘဲာ်ဝှိးကၱကဲာ်. မၤနဲၢ်ကဒီၣ်ဓဳၤဒဳၣ်, တဲၤဒဲလၱၢ်ကျဲးအတအဲၤနီး ကအီၣ် ကိအသရီ, ပရၤဆါ ပၠၤထဲၢ်စခဳးစစဲတဲၤဒဲလၱၢ်ကျဲးအတအဲးနီး အီၣ်ထာ် တပွဲၤနဳၤကဘဲာ်ဝှိးကၱကဲာ်ကီ.
8“ကၱာ်ဒီနစူးခီးမၱာ်ဝၱၤ, နခၣ်ခီးမၱာ်ဝၱၤ, ကဒဲ လၱၢ်ကျဲးအတအဲးနီးဒဳၣ်, ဒးထဲဓူၢ်ကဲကၱာ်ဝှ့ဖျီးမံစဲာ်. နစူးဓူၢ်ခၣ်ဓူၢ်နီၣ်သီ, နလ့ၤနံၢ်ဘဲာ် တဲၤအီၣ်အပူၤဒဳၣ်, နနံၤခံအဲးဒဳၣ်လံကၱာ်ဒီ နစူးနခၣ်အီၣ်ဝှါကၠံၢ်ခီလဳၢ် လဳၢ်, နဘဲာ်ထၱးလၤဓ့ၢ်နံၢ်ဒဳ မှၱးအလၤထူလၤပျဳၤအကျဲနဳၤ. 9ကၱာ်ဒီ နကၢ်ဓူကဒဲလၱၢ်နဲၤ ကျဲးအတအဲးနီးဒဳၣ်, စၱးဝၱဖျီးလၤတ့ၢ်ကၱာ်ဝှ့ဖျီးမံစဲာ်. နလ့ၤနံၢ်ဘဲာ်တဲၤအီၣ် အပူၤကၱာ်နကၢ်ဓူတဖျဳးလီၤမၱာ်နနံၤခံအဲးဒဳၣ်လံကၱာ်ဒီ နကၢ်ဓူအီၣ်ဝှါကၠံၢ်ဖျဳးလဳၢ်လဳၢ်, နဘဲာ် ထၱးလၤဓ့ၢ်နံၢ်ဒဳ လရာ်အမှၱးကျဲနဳၤ.
သဳအလှဲမဲၢ်အကလဲၤ
(လူၤ ၁၅:၃-၇)
10“ဆီးအံာ်ပီၢ်သံန့ၤစာ်ဘိထဲၢ်သံကတထဲးကဲ အပံၤစဖဳးအယဳၤတစီာ်အကျဲတပွဲၤပွဲၤနီးနဳၤ, မၤနဲၢ်, ယဒီဆးသံ, ဒဳမီၢ်ခဳးနဳၤစတဲၤ နှဲဖဳး တစီာ်စာ်ဝဲၢ်ထၱး သဲာ်ယိယပာ်အအီၣ်မီၢ်ခဳးတပွဲၤအမူၢ်ကါ.
11“မၤနဲၢ်ကဒီၣ်ဓဳၤဒဳၣ်, ပၠၤအဖဳးလၤမၱာ်စာ်ဘိ ထဲၢ်စကမဲၤလှိ ထာ်က့ၤတဲၤထဲၢ်အလှဲမဲၢ်ကဲၤနဳၤ.
12“သံကမဳၤစာ်တဲၢ်. ပၠၤတပွဲၤအသဳကအီၣ် တကယဲၤ, ကၱာ် ဒီသဳတစီာ်အကျဲတဒဳကဟဲးဖြီးမၤဒဳၣ်, စတလဲၢ်လၤကဲဝှါလွံၢ်သိး တၡံ လွံၢ်သိးတဒဳ ဒဳခီးလီခဳး နဳၤနီး, ကၱာ်စတလ့ၤဝၢ်လှဲးက့ၤအဟဲးဖြီးတဒဳနဳၤ နီးဧါ. 13ကၱာ်ဒီစကစာ်ထၱးက့ၤမၤစအဲဒဳၣ်, ယဒီဆးသံ အတၱၢ်အမှး, အနဳၤတဒဳအစဲစကသးကနၢ်အံာ်ဒဳၣ်လံ ကီအတဟဲးဖြီးနီးလွံၢ်သိး တၡံလွံၢ်သိးတဒဳအခဳးနဳၤ. 14ကနဳၤအခီဖး, သံပာ်အအီၣ်ဒဳမီၢ်ခဳး တပွဲၤနဳၤ တသးအဲးနံၤအပံၤစဖဳးအယဳၤတစီာ်ကကဲကလှဲမဲၢ် တဗွဲနီးနဳၤ.
တဲၤပြးက့ၤသဲပူၤသဲဝ့ၤတစီာ်
15“ဘဲာ်ခဲ နသဲပူၤဝ့ၤတပွဲၤကမဲၤကမဲာ်နဲၤဒဳၣ်, လ့ၤဟီပီၢ်စဲာ်, နဲၤကၱာ်စဲာ်လီၤ. စကဆီးခ့န့းနလ့ၢ်ဒဳၣ် နကမဲၤနံၤက့ၤကီနသဲပူၤဝ့ၤ. 16မၱာ်စကတဆီး ခ့န့းနလ့ၢ်နီးဒဳၣ်, ယဳၤပီၢ်နခီတပွဲၤကၠံၢ်ပွဲၤပ့ၤ, စာ်ဘိ ထဲၢ်သဲသၱးကၠံၢ်ပွဲၤသဳပွဲၤအလီၤမီၤပူၤတဲၤယၱၢ်ဘဲာ်ကမှ့း ကကျဳၤပီၢ်ကိအမှိနဳၤ. 17ကၱာ်ဒီ စကတဆီးခ့န့း လၢ်ဝၤအလ့ၢ်နီးဒဳၣ်, ဒီဆးပီၢ် တဲၤအီၣ်ပျဳာ်, ကၱာ်ဒီစကတဆီးခ့န့းတဲၤအီၣ်ပျဳာ်အလ့ၢ်နီးဒဳၣ်, စမၱာ်ဒီဧဲၤနနံၤခံ အစာ်ဘိပွဲၤသူကူာ်ဖဳးကၱာ်ပွဲၤတၤတဲၤမှူတပွဲၤနဳၤ.
တဲၤမဲၤဒၱာ်ဒါကၱာ်တဲၤအံာ်လှိအံာ်လၤ
18“ယဒီဆးဝ့ၤသံအလှီမီၢ်, တဲၤအရါ သံစဳကျဳၤ ဒဳလၢ်ခဳးနဳၤ, ကဘဲာ်စဳကျဳၤကီဒဳမီၢ်ခဳး, ကၱာ်ဒီတဲၤအရါ သံဘါပျဲးဒဳလၢ်ခဳးအခဳးနဳၤ ကဘဲာ်ဘါပျဲးကီဒီမီၢ်ခဳး နဳၤနဳၤ.
19“ယဒီဆးသံတပျာ်ပ့ၤ, ထဲၢ်သံကျဲကၠံၢ်ပွဲၤ သဳပွဲၤအသးကဒွါဝှါလၢ်ဝၤ, စကတၤတဲၤတမံၤမံၤဒဳ လၢ်ခဳးအခဳးယဳၤဒဳၣ်, ယပာ်အအီၣ် မီၢ်ခဳးတပွဲၤ ကအံာ် လၤတပွဲးစဲာ်. 20မၤနဲၢ်ကဒီၣ်ဓဳၤဒဳၣ်, ဘ့ပၠၤ ကၠံၢ်ပွဲၤ သဳပွဲၤအီၣ်ပျဳာ်လၢ်ဝၤ ယမံၤအပူၤအလ့ၤနဳၤ, ယအီၣ် တပွဲးစကျဲ ဘ့နဳၤ.”
ဇိၤဖဳးအတဘါပျဲးအခီနီးတပွဲၤ
21ဘ့နဳၤ စီၤပ့းတရူးလ့ၤထၱးစဲာ်ကၱာ်စဒီၣ်, “ဘၱာ်စဲာ်, ယသဲ ပူၤဝ့ၤကမဲၤကမဲာ်ယဲၤဒဳၣ်, ယကဘါ ပျဲးဘဲာ်စဲာ်ပွံၢ်ပျာ်. ထိအဘးထာ်သါ သိးတပျာ်ဧါ.”
22ယ့ၣ်ရှူးဒီၣ်က့ၤစဲာ်, “ထိဘးထာ်သါသိး တပျာ်ယတဒီၣ် နဲၤနီး, မၱာ်ထိအဘးထာ်သါသိးတပျာ် အပျာ်သါသိးတၡံတခီ. 23မဲၤကနဳၤဒဳၣ်, မီၢ်ခဳးအထံအက့ၤမဲၤအစာ်ဘိဆးဖြးအပဲၢ်ထာ်အသး အကဖၱး အဇိၤဖဳးအခဳးစရဲတပွဲၤနဳၤ. 24ကၱာ်ဒီဘ့စထိးစာ် ဒဲစာ်အကါ ထၱးနဳၤ, ပၠၤထဲၢ်အစွ့ဘဲာ်ဆးဖြးဝှိအတၤလၣ် တသီတပွဲၤဘဲာ်စွံး လ့ၤကဲၤ ဆးဖြးအလှီမီၢ်. 25မၱာ်စဲာ်နဳၤ, တဲၤပျ့းက့ၤအံာ်အစွ့တအီၣ်တမံနီး ဒဳၣ်, စဘၱာ်စဲာ်မှဲးလၤကဲၤပၠၤကဆဲစဲာ်, စမှဲကၱာ်စဖဳးတစီာ်, ကၱာ်စတဲၤလဳ စါစဲး ကၱာ်ဒီစပျ့းက့ၤအံာ်ပီၢ်စွ့ကနဳၤ. 26ပရၤဆါဇိၤဖဳးအနဳၤတပွဲၤ ကီၢ်လၤစလှီမီၢ်ကၱာ် စတၤခီၣ်ဝဲၤလၢ်ဝၤကယဳၤ, ‘ခီးသးဒီပီၢ်ယဲၤတကၱာ်, ကၱာ်ဒီယကပျ့းက့ၤလဳဒီဧဲၤနအဲ.’ 27ကၱာ်ဒီ ဇိၤဖဳး အဘၱာ်စဲာ်ခီၣ်ဝဲၤ စဲာ်ဒဳၣ်, စဘးလှိလဳတပွဲးလၢ်ဝၤအစွ့.
28“ပရၤဆါဇိၤဖဳးအနဳၤတပွဲၤဟဲးထာ်ဒဳၣ်, စထဲး ကျဲၢ်နံၤစခီ ဇိၤဖဳးထဲၢ်အစွ့ဘဲာ်စဲာ်ဝှိတကယဲၤတပွဲၤနဳၤ, ကၱာ်ဒီစပိာ်ကျဳၤလၢ်ဝၤ, စစၱစၱးကီၢ်လၢ်ဝၤကၱာ်စဒီၣ်, ‘ပျ့းက့ၤနစွ့.’ 29ကၱာ်ဒီစခီဇိၤဖဳးကီၢ် လၤစလှီမီၢ်, စတၤခီၣ်ဝဲၤလၢ်ဝၤကယဳၤ, ‘ခီးသးဒီပီၢ်ယဲၤတကၱာ်, ကၱာ်ဒီ ယကပျ့းက့ၤလဳဒီဧဲၤနအဲ.’ 30ပရၤဆါ စတအဲးနီး, စလ့ၤထၱးလၤ တ့ၢ်နံၢ်လၢ်ဝၤ တဲၤကၱတၱၢ် အပူၤထိစကပျ့းက့းနံၤဝှါစစွ့နဳၤ. 31မၱာ်စခီဇိၤဖဳး အလဝ့ၤတစီာ်ကဲာ်ထၱးတဲၤမဲၤအန့ၤကနဳၤဒဳၣ်, စသးတမီၤ ကဲၤတကၱနီး, ကၱာ်စလ့ၤဒီဆးလဳစဘၱာ်စဲာ် တဲၤဝၱၤ တဲၤကဲအဖၱထာ်ကဲၤတစီာ်နဳၤ. 32ဘ့နဳၤ စဘၱာ်စဲာ် ယဳၤစဲာ်ကၱာ်စဒီၣ်လၢ်ဝၤကယဳၤ, ‘ဇိၤဖဳး အကၱကဲး, နတၤခီၣ်ဝဲၤယဲၤဒဳၣ်, ယဘါပျဲးလဳသဲနစွ့နၱၢ်. 33မဲၤကနဳၤဒဳၣ်, အစာ်ဘိယခီၣ်ဝဲၤကဲၤနဲၤနဳၤ, နတခီၣ်ဝဲၤ ဘဲာ်နခီဇိၤဖဳးနီးဧါ.’ 34ကၱာ်ဒီ စဘၱာ်စဲာ် သဲးထဲး ဒဳၣ်, စအံာ်လၤလၢ်ဝၤဒဳအမဲၤဆဲးညဲပၠၤ တစီာ် အစူးခီး ပူၤနဳၤ, ထိစကပျ့းက့ၤလဳစစွ့နဳၤ.”
35“အစာ်ဘိကနဳၤ, သံကိအပွဲၤကတဘါ ပျဲး လဳသဳးလဳသး အသဲပူၤဝ့ၤနီးဒဳၣ်, အပာ် အအီၣ်မီၢ်ခဳး တပွဲၤကမဲၤကီသံကနဳၤလီၤလီး.”
Currently Selected:
မးသဲ 18: GBA
Highlight
Share
Copy
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.
