اِنجیل مَتّی 6

صَدَقه آدوعِه

1«ویرا بِبییَه، شِمَه چاکَ کارون مردمی چِمی پیشی کا اَنجام مَدییَه، اِمی واسی که شِمَه بِوینِن و شِمَه کا تعریف تمجید بِکَرِن، چوم اَ موقع شِمَه آسِمونی یَه دَده وَری کا، پاداشی نیرونَه.

2«بَس وختی که ایلَه فقیری کمک بَکَردیش، جار مَژَن، دِ دیمون شیوار که عبادتگاه اون و کوچه بازارون دیلَه کا اِم کاری بَکَردین تا مردم اَوون کا تعریف تمجید بِکَرِن. حقیقتن شِمَه نَه بَواتیم، اِمِن اِشتَن پاداشی ویگِتَشونَه! 3اَمّا وختی تِه ایلَه فقیری کمک بَکَردیش، مَرزِن اِشتِه چَپ دَس اَ کاری کا کِه اِشتِه راستَ دَس اَنجام بَدای خَوَر دار بِبو. 4تا اَ کمکی که بَکَردیش خَلوَتَکی بِبو و اَ موقع اِشتِه آسِمونی یَه دَده که نِینَه چییون بَویندی، اِشتِه پاداشی آدَه.

دعا

5«وختی دعا بَکَردیش، دِ دیمون شیوار مَبش. چوم که اَوِن خِشی نَه عبادتگاه اون و کوچه اون سَری کا بومونِن و دعا بِکَرن تا مردم اَوون بِوینِن و اَوون کا تعریف تمجید بَکَرِن. حقیقتن شِمَه نَه بَواتیم، اَوِن اِشتَن پاداشی ویگِتَشونَه. 6امّا تِه، وختی که دعا بَکَردیش بِش اِشتِه اتاقی دیلَه، بَری دَوس و اِشتِه آسِمونی یَه دَده وَری کا دعا بِکَه که چِمون کا نِینَه. اَ موقع اِشتِه آسِمونی یَه دَده که نِینَه چیون بَویندی، اِشتِه پاداشی آدَه.

7«وختی دعا بَکَردیرون بُت پرستون شیوار هِی پوچَ وِردون مَواجَه؛ چوم اَوِن خیال بَکَردین وِرَه گف ژَنِده نَه، چَوون دعا مستجاب بَبی. 8چَوون شیوار مَبییَه، چوم شِمَه آسِمونی یَه دَده پیش اَز اِم که اَییکا بِپییَه، شِمَه اِحتیاجاتی بَزنی.

9«بَس شِمَه اِنتَه دعا بِکَرَه:

«اِی چَمَه آسِمونی یَه دَده،

اِشتِه نوم مقدّس بِبو.

10اِشتِه پاُتشایی با.

اِشتِه اِراده، هَتَه كه آسِمونی کا اَنجام بَبی،

زمینی کا نی اَنجام بِبو.

11چَمَه روزونَه نونی اُوری بَمون آدَه.

12و چَمَه قَرضون بِبَخش،

هَتَه که اَمَه نی کسونی که بَمون قَرضداری نَه بَبَخشِستیمون.

13اَمَه اِمتحانون کا مَدَرَن،

بَلَکم اَمَه اَ شریری کا نجات بِدَه،

[چوم پاُتشایی و قدرت و جلال تا اَبَد اِشتِه شِنَه. آمین.]

14چوم که اَگم شِمَه مردمی خطااون بِبَخشَه، شِمَه آسِمونی یَه دَده نی شِمَه بَبَخشِستی. 15امّا اَگم شِمَه مردمی خَطااون مَبَخشَه، شِمَه آسِمونی یَه دَده نی شِمَه خطا اون نِبَخشِه.

روزه

16«وختی روزه گِرَه دِ دیمون شیوار، چیرات مَکَرَه. چوم اَوِن اِشتَن قیافه تغییر بَداین تا مردمی نیشون بِدَن که روزه اینَه. حقیقتن شِمَه نَه بَواتیم، اَوِن اِشتَن پاداشی ویگِتَشونَه. 17امّا تِه وختی روزه گِری، اِشتِه سَری روعَن بِژَن و اِشتِه دیمی بوشور 18تا اِشتِه روزه گِتِه فقط اِشتِه آسِمونی یَه دَده ایی که چِمی نَه نییَب ویندِه، بِوینِه، نِه مردم. و اِشتِه آسِمونی یَه دَده که نِینَ چیون بَویندی، اِشتِه پاداشی آدَه.

آسِمونی یَه گنج

19« شِمَه گنجون زمینی کا جمع آمَکَرَه. جِگایی کِه پِت ژَنِه، ژَنگ ژَنِه و دِزدِن بومَین و اَیی دِزدِن. 20بَلكَم شِمَه گنجون آسِمونی کا جمع آکَرَه. جِگایی که نِه پِت ژَنِه، نِه ژَنگ ژَنِه و نِه دِزدِن بومَین و اَیی دِزدِن. 21چوم اِشتِه گنج هَر جِگا کا اِستَه، اِشتِه دیل نی اوآکا بَبی.

بَدنی چِرا

22«چِم، بَدنی چِرا یَه. بَس اَگم اِشتِه چِم سالیم بِبو، اِشتِه بَدَن گِرد نوری نَه پور بَبی. 23امّا اَگم تِه بَدچِم بِبی، گِرد اِشتِه بَدن تاریکی نَه پور بَبی. بَس اَگم اَ نوری كه بَه تِه کا اِستَه تاریکی بِبو، چِه یالَ تاریکی اِستَه!

24«هیچکس نیمَشا دِ گِله اَربابی خدمت بِکَرِه، چوم یا ایلَه کا متنفر بَبی و اَ ایلَه محبت بَکَردی یا ایلَه دیل دَوِندِه و اَ ایلَه خار و خفیف بَکَردی. شِمَه نیمَشایَه هم خِدا خدمت بِکَرَه و هم پولی خدمت بِکَرَه.

نِگران مَبییَه

25«بَس شِمَه نَه بَواتیم، شِمَه زندگی واسی نِگَران مَبییَه که چِه بَرَه یا چِه بِنجَه، و شِمَه بَدَنی را نِگَران مَبییَه که چِه دَکَرَه. مَگم زندگی غذا کا و بَدَن خَلا کا مهمتَر نییَه؟ 26پَرنده اون دَیِسه که اَوِن، نِه کارِن، نِه دِرو کَرِن و نِه اَنبارون کا ذَخیره بَکَردین، ولی شِمَه آسِمونی یَه دَده چَوون روزی آدَه. مَگم شِمَه اِرزِش اَوون کا وِرتَر نییَه؟ 27کَمیله شِمَه کا نِگَران بییِه نَه بَشای ایی ساعت اِشتَن عمری اِضافه آکَرِه؟

28«چیرا خَلا را نِگرانی رونَه؟ صحرا، میشینَه گُلون دَیِسه که چِنتَه پِرَسِن؛ اَوِن نِه زحمت بَکَشدین و نِه ریس وَجِن. 29ولی شِمَه نَه بَواتیم، که حتی سُلیمان پاُتشا نی اِشتَن هِندی شکوه و جلالی نَه چَوون ایلَه شیوار بَزَک نِبَه. 30بَس اَگم خِدا، صحرا واشی که اوری اِستَه و صبا دَرَفَنِن تَنوری کا، اِنتَه بَزَک بَکَردی، اِی کم ایمانِن، مَگم شِمَه اَوون کا چاکتَر بَزَک نِکَرِه؟

31«بَس تشویش مَبییَه و مَواجه چِه چی بَرَم یا چِه چی بِنجَم و یا چِه دَکَرَم. 32چوم مردمی که بُت پرستی نَه گِرد اِم چییون دومله گَردِن، امّا شِمَه آسِمونی یَه دَده بَزنی شِمَه گِرد اِم چییون اِحتیاج دارَه. 33بَلکَم اوّل شِمَه خِدا پاُتشایی و چَیی عدالتی دومله بِبییَه؛ اَ موقع گِرد اِم چیی اِن شِمَه آدوعَه بَبی. 34بَس صَبا را نگران مَبییَه؛ چوم صَبا اِشتَن نگرانی اون هِستِشَه. اوری مشکلات اوری را وَستَه.

Currently Selected:

اِنجیل مَتّی 6: ITB

Highlight

Copy