اِنجیل مَتّی 13

کَشاوَرزی مثل

1هَ روز، عیسی کَ کا بَرشه بِرون و شَه دریاچه کناری کا نِشتَه. 2وِرَه جَماعتی عیسی دور جَمع آبینَه جوری که عیسی لوتکا دَنِشتَه، و مردم گِرد ساحلی کا مَند بینَه. 3دومله عیسی مَثَّلون نَه وِرَه چییونی اَوون را واتِشه. اَ واتِشه: «ایی روز ایلَه کَشاوَرز دونَه پِشَنده را شَه بِرون. 4وختی دونَه پِشونی، بعضی گِله دونَه اِن راه کا ویبینَه و پرنده اِن اومینَه اَوون هَردِشونَه. 5بعضی گِله دونَه اِن سِنگی یَه زمینی کا ویبینَه که وِر خاکِش نِبَه؛ بَس دونَه اِن اَلبَحَل پِرَسینَه چوم خاک کم عُمق بَه. 6امّا وختی آفتاو پِرمَه، پِرَسَه دونَه اِن گِرد سیستینَه و چوم بِنَه شون نِبَه، خِشک آبینَه. 7بعضی گِله دونَه اِن بِرّون دیلَه کا ویبینَه. بِرِّن نی اَوون نَه پِرَسینَه و تومون خَفه کَردِشونَه. 8ولی بقیه ی دونَه اِن چاکَ خاکی کا ویبینَه و بار وَردِشونَه: بعضی صد برابر، بعضی شصت و بعضی سی برابر بار وَردِشونَه. 9هَر کسی دَرَسَه گوش هِستِشه دَرَسِه.»

10اَ موقع عیسی شاگِردِن اومینَه چَیی وَر، دَفَرسِشونَه: «چیرا مَردمی را مَثَّلون نَه گَف ژَنی؟» 11عیسی جَواو دوشَه: «آسِمونی پاُتشایی سِرّون دَرک کَردِه شِمَه آدوعَه بییَه، امّا اَوون آدوعَه بَه نییَه. 12چوم بِه کسی که هِستِشه، وِرتَر آدوعَه بَبی تا فَت و فَراوون بِدارِه، امّا کسی که نیشَه، حتی اَ چیی که هِستِشه نی اَییکا ویگِته بَبی. 13اِمی واسی از اَوون نَه مَثَّلون نَه گَف ژَنِم، چوم:

«اَوِن دَیِسِن امّا نِوینِن؛

گوش بَداین، امّا نِه دَرَسِن و نِه فَهمِن.

14حقیقتن اِشعَیای پیغمبری پیشگویی چَوون درباره اِتِفاق دَلَکِه که بَواتی:

«”شِمَه گوشی نَه دَرَسَه، امّا هَرگز نِفَهمَه؛

شِمَه چِمون نَه دَیِسَه، امّا هَرگز درک نِکَرَه.

15چوم اِم قومی دیل سِنگ آبَه،

و چَوون گوشِن سنگین آبَیینَه،

و اِشتَن چِمون دَوَستَشونَه،

تا نبادا اِشتَن چِمون نَه بِوینِن،

و اِشتَن گوشون نَه دَرسِن

و اِشتَن دیلون نَه بِفهمِن

و آگَردِن و اَز اَوون شفا بِدَم.“

16«امّا خَسَه بِبو شِمَه چِمون چوم که بَویندین و شِمَه گوشون چوم که دَرَسِن. 17حقیقتن شِمَه نَه بَواتیم، وِرَه پیغمبرِن و صالِح آدَمِن ناجَشون اِستبَه اَ چیی که شِمَه بَویندیرون، بِوینن امّا نِویندِشونَه، و اَ چیی که شِمَه دَرَسَه، دَرَسِن امّا نِدَرَسِشونَه.

18«بَس شِمَه کَشاورزی مَثَّلی معنی دَرَسَه: 19وختی که کسی خِدا پاُتشایی کلامی دَرَسِه امّا اَیی درک نِکَرِه، اَ شَریر بومَی و دونَه ای که چَیی دیلی دیله کا کاشته بییَه، دِزدِه. اِم هَ دونَه ای یَه که راه کا ویبَه. 20دونَه ای که سِنگی یَه زمینی کا ویبَه، کسی یَه كه خِدا کلامی دَرَسِه و اَیی اَلبَحَل شادی نَه قبول بَکَردی، 21امّا چوم اِشتَن کا بِنَه نیشَه، فقط روکَتِه دَوام بواَردی. وختی اَ کلامی واسی سختی بَویندی و یا اذیت آزار بَبی، اَلبَحَل ایمانی کا آگَردِه. 22دونَه ایی که بِرّون دیلَه کا ویبَه، کسی یَه كه خِدا کلامی دَرَسِه، امّا دنیا نِگرانی اِن و مال دنیا وسوسه، خِدا کلامی خَفه بَکَردی و بی ثمَر بَکَردی. 23امّا دونَه ای که چاکَ خاکی کا ویبَه، کسی یَه كه اَ کلامی دَرَسِه و اَیی فَهمِه. حقیقتن اَ باروَر بَبی، صد، شَصت و سی برابر بار بواَردی.»

سَمّی یَه واشون مَثَّل

24عیسی ایلَه دییَر مَثَّلی نی اَوون را وَردِشه، واتِشه: «آسِمونی پاُتشایی، ایلَه مِردی شیوارَه که اِشتَن مزرعه کا چاکَه دونَه پِشَندَشَه. 25امّا وختی گِرد چَیی نوکَرِن خِت بینَه، چَیی دِشمِن اومَه و گندِمون میانَه کا، واش کاشتِشه و شَه. 26وختی گندِمِن پِرَسینَه و خوشه وَردِشونَه، واش نی ظاهر آبَه. 27نوکَرِن شینَه اِشتَن اَربابی وَر واتِشونَه: ”اَرباب، مَگم تِه چاکَ دونَه اِشتِه مزرعه کا کاشته نیرَه؟ بَس اِم واشِن کیانَه اومَینَه؟“ 28اَرباب جَواو دوشَه: ”اِم دِشمِنی کارَه.“ نوکَرِن اَیی کا دَفَرسِشونَه:”پیستِره اَمَه بِشَم واشون ویجین بِکَرَم؟“ 29اَرباب واتِشه: ”نِه! اَگم واشون ویجین بِکَرَه مُمکِنَه گندِمون نی اَوون نَه، بِنَه نَه بَروَرَه. 30بِدارَه هَر دِ گِله تا دِرو موقع یَندی نَه پِرَسِن. دِرو موقع، دِروگرون نَه بَواتیم که اوّل واشون جَمع آکَرِن و دَسته بِکَرِن تا بِسونِن ولی گندِمون چِمِن تیل اَنباری کا جَمع آکَرِن.“‌»

خَردَل دونَه مَثَّل و خَمیره مایَه مَثَّل

31عیسی اَوون را ایلَه دییَر مَثَّلی واتِشه: «آسِمونی پاُتشایی خَردَل دونَه ایی شیوارَه كه ایی نفر اَیی ویگِتِشه و اِشتَن مزرعه کا کاشتِشه. 32خَردَل دونَه گِرد دونَه اون کا روکتَرَه، امّا وختی پِرَسِه باغی گِرد گیاه اون کا یالتَر بَبی و ایلَه داری بَبی، جوری که پرنده اِن بومَین و چَیی لاخه اون میانَه کا خومَه وَج آکَرِن.»

33دومله عیسی ایلَه دییَر مَثَّلی اَوون را واتِشه. اَ واتِشه: «آسِمونی پاُتشایی خَمیره مایَه ای شیوارَه كه ایلَه ژِنی اَیی پِگِرِه و سِه کیسه آردی نَه قاطی بَکَردی تا خَمیر گِرد آرَستِه.»

34عیسی گِرد اِم گفون مردمی را مَثَّلون نَه واتِشه و بیدون مَثَّل هیچ چی اَوون نَه نِواتِشه. 35اِنتَه بَه تا اَ چیی که پیغمبری واسطه نَه واتَه بییَه بَه، اِتِفاق دَلکِه که:

«از مَثَّلون نَه گَف بَژَیم،

و هَر چیی که دنیا، اوّلِ صِفته کا نِین مَنده، بَواتیم.»

سَمَّی یَه واشون مَثَّلی تَفسیر

36دومله عیسی مردمی وَری نَه شَه و دَشَه کَ دیلَه. اَ موقع عیسی شاگِردِن اومینَه چَیی وَر واتِشونَه: «مزرعه واشون مَثَّلی معنی اَمَه را بوآج.» 37عیسی چَوون جواوی کا واتِشه: «اَ کسی‌ که مزرعه کا چاکَه دونَه بَکاشتی، اِنسانی زوعَه یَه. 38مزرعه، اِم دنیا یَه؛ و چاکَ دونَه نی خِدا پاُتشایی خِردَنن اِستینَه. واشِن، اَ شَریری خِردَنِن اِستینَه؛ 39دِشمِنی كه واشون بَکاشتی، اِبلیسَه. دِرو فصل، آخِر زمانَه؛ و دِروگرِن ملائیکه اِن اینَه. 40هَتَه که واشون جمع آکَرِن و آتشی کا سونِن، آخِر زمانی کا نی هَتَه بَبی. 41اِنسانی زوعَه، اِشتَن ملائیکه اون ویسا آکَرِه و اَوِن هَر کسی كه گناه باعیث بَبی و گِرد کسونی که خِدا قانونون چاکِنِن، خِدا پاُتشایی کا جِدا آکَرِن. 42و اَوون آتشی کوره کا دَرَفَنِن، جِگایی که داد بَکَردین و دندون دندونی سَری کا فِشار بَداین. 43اَ زمان صالحَ آدَمِن اِشتَن دَده پاُتشایی کا، آفتاوی شیوار شَفق ژَنِن. هَر کسی دَرَسَه گوش هِستِشه دَرَسِه.

نِین گنج و با اِرزِش مِرواریون مَثَّل

44«آسِمونی پاُتشایی ایلَه نیینَه گنجی شیوارَه كه زمینی دیلَه کایَه و ایی نفر اَیی تِلَفه. دومله هَنی اَیی نِین آکَرِه و خوشحالی نَه بَشی، گِرده اِشتَن اَموالی خِرَشه و اَ زمینی خِرِه.

45«هِنتَه نی آسِمونی پاُتشایی ایلَه تاجِری شیوارَه كه اَصل و گِرونَه مِرواریون دومله بَگردِستی. 46بَس وختی‌ با اِرزش مِرواری تِلَفه، بَشی و گِردِه اِشتَن اَموالی خِرَشه و اَیی خِرِه.

مایَه گِری ماشکی مَثَّل

47«هِنتَه نی آسِمونی پاُتشایی ایلَه ماشکی شیوارَه كه ایلَه مایَه گِر اَیی دریا کا دَرَفَنَه و جور بَه جور مایی گِرِه. 48وختی‌ ماشک مایی نَه پور آبَه، مایَه گِرِن ماشکی دَرونجِن ساحلی را. دومله بَنِشتین چاکَ ماییون زَنبیلی کا دَکَرِن، ولی بَدون فِر آدَن. 49آخِر زمانی کا نی هِنتَه بَبی. ملائیکه اِن بومَین و شَرورَه آدَمون، صالحَ آدَمون کا جِدا آکَرِن 50و شَرورَه آدَمون آتشی کوره کا دَرَفَنِن، جِگایی که داد بَکَردین و دندون دندونی سَری کا فشار بَداین.»

51عیسی اَوون کا دَفَرسِشه: «گِرد اِم گفون درک کَردِرونَه؟» شاگِردِن جَواو دوشونَه: «ها!» 52عیسی اَوون نَه واتِشه: «بَس، هَر کمیله توراتی معلمون کا که آسِمونی پاُتشایی درباره تعلیم گِتَش بِبو، ایلَه کَ صاحیبی شیوارَه که اِشتَن خزانَه کا تازه چیی و کَنَه چیی بِرون بَروَره.»

ناصره شهری مردم ایمان نِوَرِن

53وختی عیسی اِم مَثَّلون تمون آکَردِشه، اوآنَه شَه 54و شَه اِشتَن شهر و چَوون عِبادتگاه کا مردمی تعلیم بَدای. جوری که مردم گِرد مات مَند بینَه و دَفَرسِشونَه: «اِم مِرد اِم حكمتی کییانَه وَردَشه؟ اِم معجزه اون چِنته اَنجام بَدای؟ 55مَگم اَ، اَ نجّاری زوعَه نییَه؟ مَگم چَیی نَنه نوم مریم نییَه؟ مَگم یعقوب، یوسف، شَمعون و یهودا چَیی بِرا اِن نینَه؟ 56مَگم گِردِ چَیی خالا اِن چَمَه دیلَه کا زِندگی نِکَرن؟ بَس اِم مِرد گِرد اِم چییون کییانَه بِه دَس وَردَشه؟» 57بَس اَوِن عیسی گَفون کا ناراحت آبینَه. امّا عیسی اَوون نَه واتِشه: «ایلَه پیغمبر گِرد جِگا کا حُرمت هِستِشه، جُز اِشتَن شهر و اِشتَن کَ کا.» 58عیسی چَوون بی ایمانی واسی اوآکا وِر معجزه نِکَردِشه.

Currently Selected:

اِنجیل مَتّی 13: ITB

Highlight

Copy