اِنجیل مَتّی 12

سوال مقدّس شنبه روزی درباره

1اَ روزون کا، عیسی یهودیون ایلَه مقدّس شنبه روزی کا گَندِمَه جاری نَه کارا دَوییَری. عیسی شاگِردِن چوم وِشیشون بَه دَمَندینَه گَندِمی خوشه اون سَری چینین و اَوون هَرین. 2وختی فریسی فِرقه عُلما اِمی ویندِشونَه عیسی نَه واتِشونَه: «دَیِس، اِشتِه شاگِردِن مقدّس شنبه روزی کا کاری بَکَردین که جایز نییَه.» 3عیسی جَواو دوشَه: «مَگم خَندَه رون نی وختی داوود پاُتشا و چَیی یارِن وِشی بینَه، چِه کَردِشونَه؟ 4چِنتَه داوود دَشَه خِدا کَ دیلَه و تقدیس بییَه نونی هَردِشه و اِشتَن یارون نی آدوشَه، هَر چَن اَ نونی هَردِه داوود و چَیی یارون را جایِز نِبَه، بَلکَم فقط مَعبدی کاهِنون را جایِز بَه که اَ نونی کا بَرین. 5یا مَگم توراتی کا خَندَه رون نییَه که مقدّس شنبه روزون کا، کاهِنِن، معبدی کا اِشتَن وظیفه اَنجام دوعِه واسی مقدّس شنبه روزی حُرمتی غَم نییَرِن، امّا با اِم حال تقصیر کار حساب نِبون؟ 6شِمَه نَه بَواتیم کسی اییاکا مَنده که مَعبدی کا یالتَرَه! 7اَگم شِمَه اِم کلامی مَعنی درک بِکَریرون که ”چِمِن دیلی پیستَه رَحمتَه، نِه قِربونی،“ دِ بی‌ تقصیره آدَمون محكوم نِکَریرون. 8چوم اِنسانی زوعَه، مقدّس شنبه روزی صاحِب اِختیارَه.»

چُلاقَ مِردی شَفا

9دومله عیسی اوآکا شَه و یَهودییون عِبادتگاه دیلَه دَشَه. 10عِبادتگاه دیلَه کا مِردی مَند بَه كه چَیی ایلَه دَس خِشک آبَه بَه. اوآکا مَند بَه کَسِن اِمی واسی که بِشان عیسی متهم کَردِه را بهونَه ای بِدارِن اَیی کا دَفَرسِشونَه: «مقدّس شنبه روزی کا شفا دوعِه جایِزَه؟» 11عیسی اَوون نَه واتِشه: «شِمَه کا کَمیله اَگم ایلَه گوسَندی بِدارِه و اَ گوسَند مقدّس شنبه روزی کا دَلَکِه چاه دیلَه، اَ گوسَندی نِگِرِه و چاه کا بِرون نِبَروَرِه؟ 12حِسَه، اِنسان چِندی گوسَندی کا با اِرزِشتَرَه! بَس چاکی کَردِه مقدّس شنبه روزی کا جایِزَه.» 13دومله عیسی اَ چُلاق مِردی نَه واتِشه: «اِشتِه دَسی دِراز آکَه.» اَ مِرد اِشتَن دَسی دِراز آکَردِشه و چَیی چُلاق دَس، اَ ایلَه دَسی شیوار سالم آبَه. 14امّا فریسی اِن بَرشینَه بِرون و یَندی نَه مشورت کَردِشونَه که چِنتَه عیسی نابود بِکَرِن.

خِدا اِنتخاب کَردَه خادم

15عیسی که چَوون نَخشه کا خَوَر داریستِه، اوآ کا شَه. وِر آدَمِن چَیی دومله شینَه و عیسی اَوون گِردی شفا دوشَه 16و اَوون قَدَغَن کَردِشه كه درباره چَیی هیچکسی نَه گف مَژَنِن. 17اِنتَه بَه تا اَ چیی که اِشعَیای پیغمبری واسطه نَه واتَه بییَه بَه اِتِفاق دَلَکِه که:

18«اِم چِمِن خادِمَه كه از اَئی اِنتخاب کَردَمَه؛

چِمِن عزیز که چِمِن جان اَئی کا راضی یَه.

اَز چِمِن روح اَیی کا بَنایم

و اَ عدالتی، دییَر قومون را اِعلام بَکَردی.

19اَ نِه دعوا بَکَردی و نِه خَرا خِلِع؛

و نِه کسی چَیی سَسی کوچه‌ اون کا دَرَسِه.

20تَرک پِگِتَه لَلَه نِچاکِنِه،

و نیمَه سوجَه فیتله دَنِکِشه،

تا عدالتی پیروز آکَرِه.

21و چَیی نوم گِرد قومون را اُمید بَبی.»

کُفر بِه روح القدس

22دومله، ایلَه دیو گِتَه مِردی وَردِشونَه عیسی وَر كه هَم كور بَه و هَم لال بَه و عیسی اَئی شفا دوشَه، جوری که شاستِشه هَم گف بِژَنه و هَم بِوینِه. 23مردم گِرد تعجب کَردِشونَه و بَواتین: «یعنی مُمکنَه اِم مِرد هَ مسیح موعود بِبو که بَسی داوود پاُتشا نسلی کا با؟» 24امّا وختی فریسی فِرقه عُلما اِمی دَرَسِشونَه، واتِشونَه: «اِم مِرد فقط بِعِلزِبولی کمکی نَه، که دیوون رَئیسَه، دیوون بَرکَرِه!» 25عیسی كه چَوون فیکری بَزنی اَوون نَه واتِشه: «هَر مَملیکتی كه اَیی کا دِ دَسته ای دَلَکِه از بِین بَشی، و هَر شهر یا کَ ایی کا که دِ دَسته ای دَلَکِه پا بَرجا نِمونِه. 26اَگم شیطان، شیطانی بَرکَرِه، کارا اِشتَن ضِد دِ دَسته ایی دَرَفَنِه؛ بَس چَیی سلطنت چِنتَه پا بَرجا بَمَندی؟ 27و اَگم اَز بِعِلزِبولی کمکی نَه دیوون بَرکَرِم، شِمَه شاگِردِن چیکی کمکی نَه اَوون بَرکَرِن؟ بَس شِمَه هَ شاگِردِن شِمَه داوَری بَکَردین. 28امّا اَگم اَز خِدا روح کمکی نَه دیوون بَرکَرِم، بَس خِدا پاُتشایی شِمَه آرَستَه. 29چِنتَه کسی بَشای ایلَه نیرومندَه مِردی کَ دیلَه دَشو و چَیی اَموالی غارت بِکَرِه، مَگم اِمکه اوّل اَ مِردی دَس و پا دَوِندِه. دومله حقیقتن بَشای چَیی کَ غارت بِکَرِه. 30هَر کسی مِنَه نییَه، چِمِن ضِدَه و هَر کسی مِنَه جمع آمَکَرِه، وِلا آکَرِه. 31بَس شِمَه نَه بَواتیم، هَر جور گناهی که بِکَرَه و كُفری كه بوآجَه بَخشِستَه بَبی، امّا خِدا روح نَه کُفر بوآجَه بَخشِستَه نییَب. 32هَر کسی اِنسانی زوعَه ضِد گَفی بِژنِه، بَخشِستَه بَبی، امّا هَر کسی‌ که روح القدسی ضِد گَف بِژنِه، بَخشِستَه نییَب، نِه اِم دنیاکا و نِه اَ دنیاکا.

دار و چَیی میوۀ

33«اَگم چاکه میوه پیستِرونَه، شِمَه دار بَسی سالِم بِبو، آفَتی نَه دار بَدَه میوه بواَردی؛ چوم داری چَیی میوه کا آزونِن. 34اِی اَفعی کِتَه اِن، شِمَه كه شَرورَه آدَمونی اِستیرونَه، چِنتَه بَشایرون چاکَ گَف بِژَنَه؟ چوم زوون چیی کا گف ژَنِه که دیل اَیی کا لِبالِبَه. 35چاکَ اِنسان اِشتَن دیلی چاکَ خَزانَه کا، چاکی بِرون بواَردی و بَدَه اِنسان اِشتَن دیلی بَدَه خَزانَه کا، بَدی بِرون بواَردی. 36شِمَه نَه بَواتیم: داوَری یَه روزی کا مردم اِشتَن هَر مِفت گفی را كه ژَندَشونَه حساب پَس آدَن. 37چوم اِشتِه گَفون نَه تبرئه بَبیش و اِشتِه گَفون نَه نی محكوم بَبیش.»

یونسی نیشونَه

38اِم موقع عده ای توراتی معلِمِن و فریسییِن عیسی نَه واتِشونَه: «اِی اُستاد پیستِمونَه بَه تِه کا نیشونَه ای بِوینَم.» 39ولی عیسی جَواو دوشَه: «اِم شَرور و زِناکارَه نسل، نیشونَه ای پیستِشونَه. امّا نیشونَه ای اَوون آدوعَه نییَب، یونس پیغمبری نیشونَه غِیراز. 40چوم هَتَه كه یونس سه روز و سه شَو ایلَه یالَ مایی اِشکمی کا مَندَه، اِنسانی زوعَه نی سه روز سه شَو زمینی دیلی دیلَه کا بَمَندی. 41نینوا شهری مردم داوری یَه روزی کا اِم نَسلی مردمی نَه زِنده آبون و اَوون محكوم بَکَردین. چوم نینوا مردم یونس پیغمبری گفی واسی توبه کَردِشونَه، و حِسَه دَیِسه، اَ کَسی که اییا کا مَنده یونسی کا یالتَرَه. 42داوَری یَه روزی کا سَبا مَملیکتی ملکه اِم نَسلی مردمی نَه زِنده آبو و اَوون محکوم بَکَردی، چوم اَ دنیا اَ سَری کا اومَه تا سلیمان پاُتشا حِکمتی دَرَسِه، و حِسَه دَیِسه، کَسی که اییا کا مَندَه سلیمانی کا یالتَرَه.

43«وختی پلیدَه روح کسی کا بِرون بومَی، بَشی خِشک و بی آوَه جِگا اون را تا اِستراحت کَردِه را جِگایی بِتلَفه، امّا نِتلَفه. 44بَس اِشتَن نَه بَواتی: ”آگَردِم هَ کَ ایی دیلَه كه اَیی کا اومَیمه.“ و وختی آرَستِه اوآ، اَ کَ تِیی، آروفته و تَر تَمیز بَویندی. 45اَ موقع بَشی و هفت گِله روح اِشتَن کا شَریرتر بواَردی و اَوِن دَشون دیلَه اوآ کا جاگیر بَبین. اَ آدَمی آخِر عاقِبت چَیی اوّلی کا نی بَدتر بَبی. اِم شَرورَه نَسلی آخِر عاقِبت نی هَتَه بَبی.»

عیسی نَنَه و چَیی بِرا اِن

46عیسی حَلا مردمی نَه کارا گَف ژَنی، كه چَیی نَنه و بِرا اِن بِرونی کا مَند بینَه و پیستِشونَه اَیینَه گَف بِژَنِن. 47بَس ایی نَفر عیسی نَه واتِشه: «اِشتِه نَنه و بِرا اِن بِرونی کا مَندینَه و پیستِشونَه بَه تِنَه گَف بِژنن.» 48عیسی اَ کسی نَه که اِم گفی ژَندِشِه، واتِشه: «چِمِن نَنه کییَه؟ چِمِن بِرا اِن کی اینَه؟» 49و اِشتَن دَسی نَه اِشتَن شاگِردون نیشون دوشَه و واتِشه: «اِمِن چِمِن نَنه و چِمِن بِرا اینَه. 50چوم هَر کسی که چِمِن آسِمونی یَه دَده اِراده اَنجام بِده، چِمِن بِرا، چِمِن خالا و چِمِن نَنه یَه.»

Currently Selected:

اِنجیل مَتّی 12: ITB

Highlight

Copy