یوحنا 9

کور مادرزادی شفا

1وختی که عیسی راه نَه کارا بَشی، ایلَه مادرزادَه کوری ویندِشه. 2چَیی شاگِردِن اَیی کا دَفَرسِشونَه: «اُستاد، گناه کی کایَه که اِم مِرد کور دنیا اومَه؟ اِشتَن کاش یا چَیی دَده نَنه کا؟» 3عیسی جَواو دوشَه: «نِه اِشتَن کاش، و نِه چَیی دَده نَنه کا؛ بَلکَم اِنتَه بَه تا خِدا کارِن اَیی کا آشکار آبون. 4تا روزَه، بَسی چِمِن ویسا آکَردَه کارون اَنجام بِدییَم؛ شَو کارا بومَی، که اَیی کا کسی نیمَشا کار بِکَرِه. 5تا وختی که دنیا کاایمَه، دنیا نوریمَه.» 6اِم چییون واتِشه و زَمینی کا چاف ویکَردِشه، تِوِل وَج آکَردِشه و اَیی اَ مِردی چِمون کا دَسوشَه 7و اَیی نَه واتِشه: «بِش و سْیلوآمی حوضی کا اِشتِه چِمون بوشور. سیلوآمی معنی ’ویسا آکَردَه‘ یَه.» بَس اَ کور شَه و شوشتِشه، چَیی چِمِن سو دَلَکینه و آگَردَه.

8خَمسوعَه اِن و کسونی که پیشتری اَ مِردی گَدایی کَردِه موقع ویندَه شون بَه، بَواتین: «مَگم اِم مِرد هَ مِردی نییَه که نِشی و گَدایی بَکَردی؟» 9بَعضی واتِشونَه: «هَ اِستَه.» بَعضی دییَر واتِشونَه: «نِه بَلکَم ایی نفر چَیی شبیَه.» امّا اَ اِشتَن هِی بَواتی: «اَز هَ مِرد اِستیمَه.» 10بَس، اَیی کا دَفَرسِشونَه: «چِنتَه اِشتِه چِمِن آبینَه؟» 11جَواو دوشَه: «ایلَه مِردی که چَیی نوم عیسی بَه، تِوِل وَج آکَردِشه و چِمِن چِمون دَسوشه و واتِشه ”بِش سْیلوآمی حوضی کا اِشتِه چِمون بوشور.“ بَس شیمَه، شوشتِمَه و چِمِن، چِمِن سو دَلکینَه.» 12اَوِن اَ مِردی کا دَفَرسِشونَه: «اَ شخص کییاره؟» جَواو دوشَه: «نیمَزنِم.»

13بَس اَ مِردی که پیشتری کور بَه، وَردِشونَه فریسیون فِرقه عُلما وَر. 14اَ روزی که عیسی تِوِل وَج آکَردِشه و چَیی چِمون آکَردِشه، یهودییون مقدّس شنبه بَه. 15بَس فریسی اِن هَنی اَیی کا دَفَرسِشونَه که چِنتَه تِه بینا بَییش. اَ مِرد جَواو دوشَه: «اَ چِمِن چِمون تِوِل دَسوشه و شوشتِمَه و حِسَه بَویندیم.» 16بَس بَعضی فریسی اِن واتِشونَه: «اَ مِرد خِدا طرفی کا نییَه، چوم یهودییون مقدّس شنبه قانونی عَمل نِکَره.» امّا بعضی واتِشونَه: «چِنتَه ایلَه گناه کار بَشای اِنتَه رَه علامت و معجزه اونی بِکَرِه؟» و چَوون دیلَه کا اختلاف دَلَکَه. 17بَس هَنی اَ کورَه مِردی کا دَفَرسِشونَه: «تِه چَیی درباره چِه بَواتیش؟ چوم اَ اِشتِه چِمون آکَردَشَه.» جَواو دوشَه: «اَ ایلَه پیغمبرَه.»

18ولی یهودییِن حَلا باوَر نِدارین که اَ کور بَه و بینا بَه، تا اِم که اَ مِردی دَده نَنه که بینا بییَه بَه دَخوندِشونَه 19و اَوون کا دَفَرسِشونَه: «اِم شِمَه زوعَه یَه، هَ کسی که بَواتیرون کور دنیا اومَه؟ بَس حِسَه چِنتَه بَویندی؟» 20اَ مِردی دَده نَنه جَواو دوشونَه: « اَمَه بَزنیمون که اِم چَمَه زوعَه یَه، و بَزنیمون که کور دنیا اومَه. 21امّا اِمی که حِسَه چِنتَه بَویندی، یا کی چَیی چِمون آکَردَشَه، اَمَه نیمَزنَم. اِشتَن کاش دَفَرسه. اَ یالَه و اِشتَن درباره اِشتَن گَف ژَنِه.» 22اَ مِردی دَده نَنه اِمی واسی اِم چییون واتِشونَه که یهودیون کا تَرسین. چوم یهودییِن پیشتری واتَشون بَه هَر کسی اِقرار بِکَرِه عیسی هَ مسیح موعودَه، اَیی عِبادتگاه کا بَرکَرِن. 23اِمی واسی بَه که چَیی دَده نَنه واتِشونَه، «اَ یالَه؛ اِشتَن کاش دَفَرسه.»

24بَس هَنی اَ مِردی که پیشتری کور بَه، دَخوندِشونَه، اَیی نَه واتِشونَه: «شکوه و جلالی آدَه بِه خِدا! اَمَه بَزنیمون که اَ مِرد گناه کارَه.» 25اَ جَواو دوشَه: «چَیی گناه کار بییِه نیمَزنِم. فقط ایی چی بَزنیم، و اِم که کور بیمَه، و حِسَه بَویندیم.» 26فَریسی اِن اَیی نَه واتِشونَه: «تِنَه چِه کَردَشه؟ چِنتَه اِشتِه چِمون آکَردَشه؟» 27جَواو دوشَه: «اَز که شِمَه نَه واتِمَه، امّا شِمَه گوش نِدییَه؛ چییرا پیستِرونَه هَنی دَرَسه؟ مَگم شِمَه نی پیستِرونَه چَیی شاگرد بِبییَه؟» 28اَوِن اَ مِردی فَش دوشونَه، واتِشونَه: «تِه اِشتَن چَیی شاگِردیش! اَمَه موسی پِیغمبری شاگِردیمونَه. 29اَمَه بَزنیمون خِدا موسی نَه گَف ژَندَشه. امّا اِم آدَم، نیمَزنَم کیا نَه بومَی.» 30اَ مِرد چَوون جَواوی کا واتِشه: «اِم دِ خَیلی عَجیبه! با اِم که چِمِن چِمون آکَردَشَه، شِمَه نیمَزنَه کییا کا بومَی. 31اَمَه بَزنیمون که خِدا گناه کارون دعا گوش نیمَدای، امّا اَگم کسی خِداپرست بِبو و چَیی پیستَه اَنجام بِدَه، خِدا چَیی دعا گوش بَدای. 32دنیا صِفته نَه تا حِسَه هرگِز دَرَسه بَه نییَه که کسی مادرزادَه کوری چِمون آکَردَش بِبو. 33اَگم اِم مِرد خِدا طرفی کا مَبی، نیمَشای کاری بِکَری.» 34اَوِن اَ مِردی جَواوی کا واتِشونَه: «تِه سَر تا پا گناه کا دنیا اومَییشه. حِسَه، بَمون دَرس بَدایش؟» بَس اَیی اوآکا بَرکَردِشونَه.

35وختی عیسی دَرَسِشَه که اَ مِردی بَرکَردَشونَه، اَیی تِلفتِشه و اَیی کا دَفَرسِشه: «اِنسانی زوعَه ایمان هِستِرَه؟» 36اَ مِرد جَواو دوشَه: «آقا، اَ کییَه که اَز اَیی ایمان بواَرِم.» 37عیسی اَیی نَه واتِشه: «تِه اَیی ویندَرَه! هَ کسی که حِسَه کارا تِنَه گَف ژنِه.» 38اَ مِرد واتِشه: «آقا، ایمان هِستِمَه.» و عیسی پیشی کا زِنگ ژَندِشَه و اَیی پرستش کَردِشَه.

39عیسی واتِشه: « اَز داوری کَردِه را اومَیمه بِه اِم دنیا، تا کسونی که نِوینِن، بِوینِن و کسونی که بَویندین کور بِبون.» 40بعضی فریسی عُلما که اَیی نَه بینَه، و اِم چییون دَرَسِشونَه، دَفَرسِشونَه: «اَمَه نی کوریمونَه؟» 41عیسی اَوون نَه واتِشه: «اَگم کور بِبیرون تَقصیری نِداریرون؛ امّا حِسَه که بَواتیرون، ”اَمَه بَویندیمون“ تَقصیرکار باقی بَمَندیرون.

Currently Selected:

یوحنا 9: ITB

Highlight

Copy