یوحنا 10

اَز چاکَه شوونَه ایمَه

1«حقیقتن، شِمَه نَه بَواتیم، اَ کسی که بَری نَه ما گوسَندون طوله دیلَه، بَلکَم حَصاری نَه پِشو کَفا که ایلَه دییَر رایی نَه با دیلَه، دِزد و راهزنَه. 2امّا اَ کسی که بَری با دیلَه، گوسَندون شوونَه یَه. 3بَره پا، بَری اَیی را آکَرِه و گوسَندِن چَیی سَسی دَرَسِن؛ اَ اِشتَن گوسَندون نومی نَه دَخونه، و اَوون بِرون بَبَردی. 4وختی اِشتَن گوسَندون گِردی بِرون بِبَرِه، چَوون نارناره بَشی و گوسَندِن چَیی دومله بَشین، چوم چَیی سَسی آزونِن. 5گوسندِن غریبه دومله نِشون، بَلکَم اَیی کا دَوَزِن، چوم غریبه اون سَسی آنِزونِن.»

6عیسی اِم مَثَلی اَوون را واتِشه، امّا اَوِن نِزونیشونَه اَوون نَه چِه بَواتی.

7بَس عیسی هَنی اَوون نَه واتِشه: «حقیقتن، شِمَه نَه بَواتیم، اَز گوسَندون را، ”بَر“ اِستیمَه؛ 8کسونی که چِمِن پیش اومَینه، گِرد دِزد و راهزنی نَه، امّا گوسَندِن چَوون گفی گوش نِدوشونَه. 9اَز ”بَر“ اِستیمَه؛ هر کسی که چِمِن راه نَه با دیلَه نجات پیدا بَکَردی، و بومَی دیلَه و بَشی بِرون و واشَه جاری تِلفَه. 10دِزد، فقط بومَی که بِدزدِه و بِکِشِه و نابود بِکَرِه؛ اَز اومَیمَه تا اَوِن زندگی بِدارِن و اَیی فَت و فراوون بِدارِن.

11«اَز چاکَه شوونَه ایمَه. چاکَه شوونَه اِشتَن جانی گوسَندون راه کا بَنای. 12مُزدور چوم شوونَه نییَه و گوسَندِن چَیی شِن نینَه، هَر وخت بَویندی وَرگ بومَی، گوسَندون وِل آکَرِه، دَوَزِه و وَرگ حمله بَکَردی و اَوون وِلا آکَرِه. 13مُزدور دَوَزِه، چوم که مُزدورَه و گوسَندون فیکری کا نییَه. 14اَز چاکَه شوونَه ایمَه. اَز چِمِن گوسَندون آزونِم و چِمِن گوسَندِن مِن آزونِن، 15هَتَه که دَده مِن آزونِه و اَز دَده آزونِم. اَز چِمِن جانی گوسَندون راه کا بَنایم. 16اَز دییَر گوسَندونی هِستِمَه که اِم طَوله شِن نینَه. اَوون نی بَسی بواَرِم و اَوِن نی چِمِن سَسی گوش بَداین. اَ موقع ایلَه رَمَه بَبین ایلَه شوونَه نَه. 17دَده، مِنَه اِمی واسی خِشَه که اَز چِمِن جانی آدَم تا اَیی هَنی پَس ویگِرِم. 18هیچکس اَیی مِن کا نِویگِرِه، بَلکَم اَز چِمِن مِیلی نَه اَیی آدَم. اِختیار هِستِمَه اَیی آدَم و اِختیار هِستِمَه اَیی پَس ویگِرِم. اِم حُکمی چِمِن دَده کا ویگِتمَه.»

19اِم گَفون واسی، هَنی یَهودیون دیلَه کا اختلاف دَلَکَه. 20وِر کَسِن اَوون کا واتِشونَه: «اَ تور و دیوونه یَه؛ چیرا چَیی گفون گوش بَدایرون؟» 21امّا بعضی واتِشونَه: «اِم گفِن ایلَه دیو گِتَه آدَمی گَف نینَه. بَگم دیو بَشای کورَه چِمون آکَرِه؟»

اَز و دَده یَکی ایمونَه

22عید وقفی موقع اورشلیمی کا آرَستَه بَه. زوموستون بَه 23و عیسی معبدی سِرا کا، سلیمان پاُتشا اَیوونی کا کارا مِجی. 24بَس یهودییِن چَیی دُور جَمع آبینَه و واتِشونَه: «تا کَینی اَمَه شک و تردیدی کا غَم بَردیش؟ اَگم مسیح موعودیش، آشکارا بَمون نَه بوآج.» 25عیسی جَواو دوشَه: «شِمَه نَه واتِمَه، امّا شِمَه باوَر نِکَرَه. کارونی که اَز چِمِن دَده نومی کا بَکَردیم، چِمِن درباره شهادتی بَداین. 26امّا شِمَه ایمان نِورَه، چوم چِمِن گوسَندون کا نیرونَه. 27چِمِن گوسَندِن چمِن سَسی دَرَسِن؛ اَز اَوون آزونِم و اَوِن چِمِن دومله بومَین. 28اَز اَوون اَبَدی یَه زندگی بَبخشِستیم، و اَوِن هَرگز هلاک نِبون. هیچکس اَوون چِمِن دَسی کا نِویگِرِه. 29چِمِن دَده که اَوون مِن بَخشِستَشه گِردی کا یالتَرَه، و هیچکس نیمَشا اَوون دَده دَسی کا ویگرِه. 30اَز و دَده یَکی ایمونَه.»

31اَ موقع هَنی یهودییِن سِنگ پیگِتِشونَه تا اَیی سِنگسار بِکَرِن. 32عیسی اَوون نَه واتِشه: «دَده طرفی کا وِر چاکَه کارونی شِمَه نِشون دومَه. چَوون کمیله واسی پیستِرونَه مِن سِنگسار بِکَرَه؟» 33یهودییِن جَواو دوشونَه: «چاکَه کاری واسی تِه سِنگسار نِکَرَم، بَلکَم اِمی واسی که کُفر بَواتیش، چوم اِنسانیش و اِشتَن نَه خِدا بَواتیش.» 34عیسی جَواو دوشَه: «مَگم شِمَه توراتی کا نیویشته بییَه نییَه که ”اَز واتَمَه، شِمَه خِدا اون اِستیرونَه“؟ 35اَگم خِدا کسونی نَه که چَیی کلام اَوون آرَستَه، ”خِدا اون“ بَواتی و مقدّس نیویشته باطل نییَب 36چِنتَه بَشایرون کسی نَه که دَده اَیی وقف کَردَشه و ویسا آکَردَشَه بِه دنیا، بوآجَه ”کُفر بَواتیش،“ فقط اِمی واسی که واتِمَه خِدا زوعَه ایمَه؟ 37اَگَم چِمِن دَده کارون اَنجام نِدَم، بَس مِن باوَر مَکَرَه. 38امّا اَگم اَنجام بَدایم، حتی اَگم مِن باوَر نِکَرَه، اَ کارون باوَر بِکَرَه که شِمَه بِزونَه و بِفهمَه که دَده بَه مِن کایَه و اَز دَده کا.» 39اَ موقع هَنی یهودییِن پیستِشونَه عیسی دستگیر بِکَرِن، امّا عیسی چَوون دَسی کا دَوَشتَه.

40دومله هَنی عیسی شَه اُردن رِواری اَ طرف، اوآ که پیشتَری یحیی تعمید بَدای، و اوآ کا مَندَه. 41وِر کَسِن اومینَه چَیی وَر. اَوِن بَواتین: «یحیی هیچ علامت و معجِزه ایی نِکَردِشه، امّا هر چیی که اِم مِردی درباره واتِشه، راست بَه.» 42بَس وِر کَسِن اوآ کا بِه عیسی ایمان وَردِشونَه.

Currently Selected:

یوحنا 10: ITB

Highlight

Copy