یوحنا 7

عیسی بَشی عَید خِیمه‌

1چَیی پَش، عیسی ایی مدت جلیلی ولایتی کا گَردی، چوم نِپیستِشه یهودیه ولایتی کا بِبو، چیرا که یهودییِن پیستِشون بَه اَیی بِکِشِن. 2یهودییون عید خِیمه، نِزدیک آبَه. 3بَس عیسی بِرا اِن اَیی نَه واتِشونَه: «اییا تَرک بِکَه و بِش یهودیه تا اِشتِه شاگِردِن نی کارونی که تِه بَکَردیش بِوینن، 4چوم هَر کسی که پیستِشَه آزونِستَه بِبو، خَلوتکی کار نِکَرِه. تِه که اِم کارون بَکَردیش، اِشتَن دنیا نِشون بِدَه.» 5چوم حتی چَیی برااِن نی اَیی ایمان وَردَشون نِبَه. 6پس عیسی اَوون نَه واتِشه: «چِمِن وخت حَلا آرَستَه نی، امّا شِمَه را هَر موقع مناسِبه. 7دنیا مردم نیمَشان شِمَه کا بیزار بِبون امّا بَه مِن کا بیزاری نَه، چوم اَز شهادتی بَدایم که چَوون کارِن بَدی نَه. 8شِمَه اِشتَن عیدی را بِشَه، از [حَلا] اِم عیدی را نیمام، چوم چِمِن وخت حَلا آرَستَه نی.» 9عیسی اِمی واتِشه و جلیلی کا مَندَه.

10امّا بعد اَز اِم که چَیی برااِن اَ عیدی را شینَه اورشلیم، اِشتَن نی شَه، امّا نِه آشکار بَلکَم خَلوتکی. 11بَس یهودییِن، عیدی را چَیی دومله گردین، دَفَرسین: «اَ مِرد کییاره؟» 12و چَیی درباره مردمی دیلَه کا بَرکَ هَمهمه بَه. بعضی بَواتین: «چاکَ مِردی یَه.» امّا بعضی بَواتین: «نِه! بَلکَم مردمی گمراه بَکَردی.» 13امّا چوم یهودیون کا تَرسین، هیچکس چَیی درباره آشکارا گَف نِژنی.

14عیدی هفته نِصب دَوییَرده بَه که عیسی اومَه یهودیون معبدی سِرا دیلَه و دَمنده تعلیم دوعِه. 15یهودییِن تعجب کَردِشونَه، دَفَرسین: «اِم مِرد که تعلیم گِتَه نیشَه، چِنتَه بَشای اِنتَه رَه دانِشی بِداره؟» 16بَس عیسی چَوون جَواوی کا واتِشه: «چِمِن تعلیمِن اِشتَن کا نینَه، بَلکَم اَیی کایَه که مِن ویسا آکَردَشَه. 17اَگم کسی پیستِشَه خِدا اِراده اَنجام بِدَه، بَزنی که اِم تعلیم خِدا کایَه یا اَز اِشتَن کا بَواتیم. 18اَ کسی که اِشتَن کا بَواتی، اِشتَن شکوه و جلالی دومله یَه، امّا اَ کسی که پیستِشَه اِشتَن ویسا آکَردَه جلال بِده، راستَه واجَه و اَیی کا هیچ ناراستی نییَه. 19مَگم موسی، شریعتی شِمَه آدوعَه نیشه؟ امّا حَلا نی هیچ گِله شِمَه کا اَیی عَمل نِکَرَه. چییرا پیسترونَه مِن بِکِشه؟» 20جماعت جَواو دوشونَه: «تِه تور و دیوونه اییش! کی پیستِشَه تِه بِکِشه؟» 21عیسی اَوون جَواو دوشَه: «اَز ایلَه معجزه کَردِمَه و شِمَه گِرد اَیی کا تعجب کَردِرونَه. 22موسی خَتنه حکمی شِمَه آدوشَه- البته اِم نِه موسی کا بَلکَم قومی اَجدادی کا بَه- و اِمی واسی شِمَه، یهودییون مقدّس شنبه روزی کا زوعَه اون خَتنه بَکَردیرون. 23بَس اَگم شنبه روزی کا ایلَه زوعَه نی خَتنه بَبی تا موسی قانون چاکِنده مَبو، چییرا بَه مِن کا عَصبانی ایرونَه که ایلَه اِنسانی شنبه روزی کا سلامتی کامل بَخشِستِمه؟ 24ظاهِری نَه داوری مَکَرَه، بَلکَم بِه‌ حقّ داوری بِکَرَه.»

25بَس، بعضی اورشلیمی اَهالی واتِشونَه: «مَگم اِم هَ کسی نییَه که پیستِشونَه اَیی بِکِشن؟ 26اَ اییاره و عَلَنی کارا گَف ژَنِه و اَوِن اَیی نَه هیچی نِواجِن! یعنی مُمکنه قومی پیله تَرِن واقعا زونستشون بِبو که اَ، هَ مسیح موعودَه؟ 27اَمَه بَزنیمون اِم مِرد کیاکا اومَه، امّا وختی مسیح موعود ظهور بِکَرِه، کسی نیمَزنی کییا نَه بومَی.» 28اِمی واسی عیسی وختی معبدی کا تعلیم بَدای، بِلندَه سَسی نَه واتِشه: «شِمَه مِن آزونَه و بَزنیرون کیاکا بومَیم. امّا اَز چِمِن طرفی کا اومَه نیمَه. اَ کسی که مِن ویسا آکَردَشَه، حقّه؛ و شِمَه اَیی آنِزونَه. 29اَز اَیی آزونِم، چوم اَز اَیی کا اِستیمَه و اَ مِن ویسا آکَردَشَه.» 30بَس اَوِن پیستِشونَه عیسی دستگیر بِکَرِن، امّا هیچکس اَییرا دَس دِراز آنِکَردِشه، چوم چَیی وخت حَلا آرَستَه نِبَه. 31با اِم حال، وِر کَسِن مردمی کا بَیی ایمان وردِشونَه. اَوِن بَواتین: «مَگم وختی مسیح موعود ظهور بِکَرِه، اِم مِردی کا وِرتَر علامت و معجزه بَکَردی؟»

32فریسی فِرقه عُلما گوش آرَستَه که عیسی درباره اِنتَه رَه گفونی مردمی دیلَه کا اِستَه. بَس سَران کاهِنِن و فَریسی اِن، معبدی نگهوونون ویسا آکَردِشونه تا عیسی دستگیر بِکَرِن. 33اَ موقع عیسی واتِشه: «روکَته وخت نی شِمَه نَه اِستیمَه، و دومله بَشیم چِمِن ویسا آکَردَه وَر. 34چِمِن دومله گَردَه، امّا مِن نِتلَفه؛ و اوآ که اَز اِستیمَه، شِمَه نیمَشایه بایَه.» 35بَس یهودییِن یَندی نَه بَواتین: «اِم مِرد پیستِشَه کییا بِشو که اَمَه اَیی نِتلَفَم؟ مَگم پیستِشَه بِشو یهودیونی وَر که یونانیون دیلَه کا وِلااینَه و یونانیون تعلیم بِدَه؟ 36چَیی منظور چَه با که واتِشه، ”چِمِن دومله گَردَه، امّا مِن نِتلَفه؛ و اوآ که اَز اِستیمَه، شِمَه نیمَشایه بایَه“؟»

37عیدی هفته آخِرین روزی کا که عیدی یال روز بَه، عیسی مَندَه و خِلِع کَردِشه و واتِشه: «هَر‌ کسی تِشیرَه، با چِمِن وَر و بِنجِه. 38هَر کسی مِن ایمان بواَره، هَتَه که مقدّس نیوشته بَواتی، چَیی دیلی دیلَه کا زندگی بَخشَه آوی دَغَنِن راه دَلَکِن.» 39اِم گفی روح القدسی درباره واتِشه، کسونی که بَیی ایمان بواَرِن، اَیی دریافت بَکَردین؛ چوم روح القدس حَلا عطا بَه نِبَه، اِمی واسی که عیسی حَلا جلال گِتَش نِبَه.

40بعضی مردم، اِم گَفون دَرَسِه نَه واتِشونَه: «واقعا که اِم مِرد هَ پیغمبر موعودَه که بَسی بای.» 41بعضی بَواتین: «مسیح موعودَه.» امّا ایلَه دییَر گروهی دَفَرسین: «مَگم مسیح موعود جَلیلی کا ظهور بَکَردی؟ 42مَگم مقدّس نیویشته واتَه نیشه که مسیح موعود داوود پاُتشا نَسلی کا بَبی و بِیت‌لِحِمی کا بومَی، هَ دِهی که داوود پاُتشا اَیی کا زِندگی بَکَردی؟» 43بَس عیسی درباره مردمی دیلَه کا اختلاف دَلَکَه. 44بعضی اِن پیستِشونَه اَیی دستگیر بِکَرِن، امّا هیچکس اَییرا دَس دِراز آنِکَردِشه.

45چَیی پَش معبدی نگهوونِن آگَردِستینَه سَران کاهنان و فریسیون وَر. اَوِن اَوون کا دَفَرسِشونَه: «چیرا عیسی نِوَردِرونَه؟» 46نگهوونِن جَواو دوشونَه: «تا حِسَه، کسی اِم مِردی شیوار گَف ژَنده نیشَه!» 47بَس فریسی اِن جَواو دوشونَه: «مَگم شِمَه نی گول هَردَرونَه؟ 48مَگم هیچ گِله قومی پیله ترون کا یا فریسییون کا کسی اِستَه که اَیی ایمان وَردَش بِبو؟ 49امّا اِم جماعت که چیی شَریعتی کا نیمَزنِن، مَلعونی نَه.»

50نیقودیموس، که پیشتر شَه بَه عیسی وَر و ایلَه اَ فریسیون کا بَه، واتِشه: 51«مَگم چَمَه شریعت کسی محکوم بَکَردی بیدون اِم که اوّل چَیی گَفی دَرَسِه و بِزونِه چِه کَردَشه؟» 52اَوِن جَواو دوشونَه: «مَگم تِه نی جلیلی ایش؟ تحقیق بِکَه و بِوین که هیچ پیغمبری جلیلی کا اومَه نییَه.» [ 53دومله هَر کسی شَه اِشتَن کَ را.

Currently Selected:

یوحنا 7: ITB

Highlight

Copy