یوحنا 6

پینج هزار نفری غذا دوعه

1چِندی پَش، عیسی شَه جلیلی دریاچَه اَ طرفی را که هَ تیبِریه دریاچَه یَه. 2وِرَه جماعتی چَیی دومله رایی بینَه، چوم علامت و معجزه اونی که مریضون شفا دوعِه نَه ظاهر بَکَردی، ویندَه شون بَه. 3بَس عیسی پِشَه ایلَه کویی سَر و اِشتَن شاگِردون نَه اوآ کا نِشته. 4یهودییون پِسخَ عید نِزدیک بَه. 5وختی عیسی دَیشتَه و ویندِشه که وِرَه جماعتی چَیی طَرفی را بومَین، فیلیپُسی نَه واتِشه: «کییاکا نون بِخِرَم تا اِم مردم بَرِن؟» 6اَ اِمی واتِشه تا فیلیپُسی اِمتحان بِکَرِه، چوم اَ اِشتَن چاک بَزنی که چِه بَکَردی. 7فیلیپُس جَواو دوشَه: «ایلَه کاریگری شیش مانگی مُزدی قدر نی نون بِخِرَم، چَوون را وَس نییَه، حتی اَگم هَر ایی نفر فقط ایی پَله بَرِن.» 8ایلَه اَ شاگِردون کا که چَیی نوم آندریاس بَه، و شمعون پطرسی بِرا بَه، واتِشه: 9«ایلَه زوعَه اییا کا مَنده که پینج گِله ژَه نون و دِ گِله مایی هِستِشه، امّا اِم کییا اِم جماعتی را وَس بومَی؟» 10عیسی واتِشه: «مَردمی بِنِشونَه.» اوآ کا سبزه وِر بَه. بَس اَوِن نِشتینَه و مِردکون تعداد نِزدیک پینج هَزار نفر بَه. 11اَ موقع عیسی نونون پِگِتشه، و شُکر کَرده پَش، اَ کَسونی دیلَه کا که نِشتَه بینَه تَقسیم کَردِشه، و هِنتَه نی ماییون، هَدَه که پیستِشونَه. 12وختی هَردِشونَه و سیر آبینَه، عیسی اِشتَن شاگِردون نَه واتِشه: «نون پَله اون باقی مَنده جمع آکَرَه تا چیی هَدَر مَشو.» 13بَس اَوِن باقی مَنده اون جمع آکَردِشونَه و اَ پینج گِله ژَه نونون باقی مَنده پَله اون کا که جَماعت هَردَه شون بَه، دونزَه گِله سَبد پُور آبَه.

14وختی مردم اِم علامت و معجزه که عیسی اَیی اَنجام دوعَش بَه ویندِشونَه، واتِشونَه: «واقعا که اَ هَ پیغمبری یَه که بَسی با اِم دنیا.» 15عیسی چوم زونِستِشه که مردم پیستِشونَه که بان و اَیی بِگِرِن و زوری نَه اَیی پاُتشا بِکَرِن، اوآ تَرک کَردِشه و هَنی تَنخا شَه کو.

عیسی راه شییِه آوی سَری کا

16مَغریب دَم، چَیی شاگِردن اومینَه دریاچه طرف 17و لوتکا دَنِشتینَه، و رایی بینَه دریاچه اَ طرف، کَفَرناحومی شهری را. هَوا تاریک آبَه بَه، امّا عیسی حَلا اومَه نِبَه چَوون وَر. 18اِم موقع، دَریا کِلاکین آبَه چون تِنده وایی کارا وَزی. 19وختی حدود ایی فرسخ پارو ژَندِشونَه، عیسی ویندِشونَه که دریا سَری کا مِجِه و لوتکا را نِزدیک آبو. بَس اَوِن وحشت کَردِشونَه. 20امّا عیسی اَوون نَه واتِشه: «اَزیمَه؛ مَترسَه.» 21اَ موقع پیستِشونَه اَیی لوتکا کا دَنِشونین، که لوتکا هَ لحظه آرَستَه اَ جِگایی که کارا بَشین.

اَز نون زندگی بخش اِستیمَه

22صَبایی نَه روز، اَ جَماعتی که دریاچه اَ طرفی کا مَند بینَه، ویندِشونَه که فقط ایلَه لوتکا اوآکا بَه، و بَزنین که عیسی اِشتَن شاگِردون نَه اَیی دَنشته نِبَه، بَلکَم شاگِردِن تَنخا شَه بینَه. 23دییَر لوتکااونی تیبِریه دریاچه کا اومینَه و اَ مَلَیی نِزدیکی آرَستینَه که اَوآکا خِداوندی شُکرکَرده پَش، نونی ویگتِشونَه و هَردِشونَه. 24بَس وختی جماعت زونِستِشونَه که نِه عیسی اوآ کا یَه و نِه چَیی شاگِردن، اَ لوتکااون دَنِشتینَه و شینَه کَفَرناحوم تا عیسی دومله بِگردن.

25وختی اَیی دریاچه اَ طرفی کا تِلفتِشونَه، اَیی نَه واتِشونَه: «اُستاد، کَیینی اومَیش اییا؟» 26عیسی جَواو دوشَه: «حقیقتن، شِمَه نَه بَواتیم، چِمِن دومله گَردَه، نِه علامت و معجزه اونی واسی که ویندَرونَه، بَلکَم اَ نونی واسی که هَردِرونَه و سیر آبیرونَه. 27خوراکی واسی که اَز بِین بَشی کار مَکَرَه، بَلکَم خوراکی واسی کار بِکَرَه که تا اَبَدی یَه زندگی بَمَندی، خوراکی که اِنسانی زوعَه شِمَه بَدای. چوم خِدا، هَ آسِمونی یَه دَده اَیی مهر تایید ژَندَشه.» 28اَ موقع اَیی کا دَفَرسِشونَه: «چِه بَسی بِکَرَم که خِدا کارون اَنجام دوعَه مون بِبو؟» 29عیسی جَواو دوشَه: «خِدا کار اِمَه که اَ کسی که ویسا آکَردَشَه ایمان بواَرَه.» 30اَوِن عیسی نَه واتِشونَه: «بَس چِه علامت و معجزه ای بَمون را بَکَردیش تا بِوینَم و تِه باوَر بِکَرَم؟ چِه معجزه ای بَکَردیش؟ 31چَمَه اَجداد ویاوونی کا، مَنّا، اَ نونی که آسِمونی نَه بَوارستی، هَردِشونَه، هَتَه که مقدّس نیویشته اون کا نیویشتَه بییَه: ”موسی آسِمونی نَه اَوون نون آدوشَه تا بَرِن.“ 32عیسی جَواو دوشَه: «حقیقتن، شِمَه نَه بَواتیم، موسی نِبَه که اَ نونی آسِمونی کا شِمَه آدوشَه، بَلکَم چِمِن دَده یَه که حقیقی یَه نونی آسِمونی کا آدَه شِمَه. 33چوم خِدا نون، اَ کسی یَه که آسِمونی کا نازل بییَه، و بِه دنیا زندگی بَبخشِستی.» 34بَس اَوِن واتِشونَه: «آقا، اِم نونی همیشه بَمون آدَه.» 35عیسی اَوون نَه واتِشه: «نونی که زندگی بَبَخشِستی اَزیمَه. هر کسی بومَی چِمِن وَر، هرگز وِیشیرِش نییَب، و هر کسی بَه مِن ایمان بواَرِه هَرگز تِشیرِش نییَب. 36ولی هَتَه که شِمَه نَه واتِمه، هَر چن مِن ویندَرونَه، امّا حَلا نی ایمان نِورَه. 37گِرد کسونی که دَده بَه مِن بِبَخشه، بومَین چِمن وَر؛ و اَ کسی که بومَی چِمِن وَر، اَیی هَرگز بَنِرکَرِم. 38چوم اَز آسِمونی نَه اومَیمه جیر، نِه اِمی واسی که چِمِن پیستَه اَنجام بِدم، بَلکَم اومَیمه تا چِمِن ویسا آکَردَه پیستَه اَنجام بِدم. 39و چِمِن ویسا آکَردَه پیستَه اِمَه که، اَ کسونی کا که اَ بَه مِن بَخشِستَشه، هیچ گِله اَز دَس مَدم، بَلکَم اَوون داوری یَه روزی کا زِندَه آکَرِم. 40چوم چِمِن دَده پیستَه اِمَه که هرکسی که زوعَه دَیِسه و اَیی ایمان بواَرِه، اَبَدی یَه زندگی بِدارِه، و اَز داوری یَه روزی کا اَیی زِنده آکَرِم.»

41اَ موقع یهودییِن دَمندینَه چَیی واسی غُرغُر کَرده، چییرا که واتَش بَه: «اَزیمَه اَ نونی که آسِمونی نَه اومَیمه.» 42اَوِن واتِشونَه: «مَگم اِم مِرد، عیسی، یوسفی زوعَه نییَه که اَمَه چَیی دَده نَنه آزونَم؟ بَس چِنتَه حِسَه بَواتی، ”آسِمونی کا اومَیمه“؟» 43عیسی جَواو دوشَه: «یَندی نَه غُرغُر مَکَرَه. 44هیچکس نیمَشا با چِمِن وَر مَگم اِم که دَده ایی که مِن ویسا آکَردَشَه اَیی بواَرِه چِمِن طرف، و اَز داوری یَه روزی کا اَیی زِنده آکَرِم. 45پیغمبرون نیویشته اون کا اومَه که ”اَوِن گِرد خِدا کا تعلیم بَگتین.“ هَر کسی که خِدا کا دَرَسِه و اَیی کا تعلیم بِگِرِه، بومَی چِمِن وَر. 46هیچکس دَده ویندَه نیشَه، مَگم اَ کسی که خِدا کا اِستَه؛ اَ، دَده ویندَه شَه. 47حقیقتن، شِمَه نَه بَواتیم، هر کسی ایمان هِستِشه، اَبَدی یَه زندگی هِستِشه. 48نونی که زندگی بَبخشِستی اَزیمَه. 49شِمَه اَجداد، مَنّا ویاوونی کا هَردِشونَه، با اِم حال مَردی نَه. 50امّا نونی که آسِمونی نَه بومَی اِنتَه یَه که هَر کسی که اَیی کا بَردی، نِمِرِه. 51نونی که زندگی بَبخشِستی اَزیمَه که آسِمونی کا اومَیمَه. هَر کسی اِم نونی کا بَردی، تا اَبَد زِنده بَمندی. نونی که اَز آدَم تا دنیا مردم زندگی بِدارِن، چِمِن بَدنَه.»

52بَس یهودیون دیلَه کا بحث دَلَکَه و بَواتین: «اِم مِرد چِنتَه بَشای اِشتَن بَدنی بَمون آدَه تا بَرَم؟» 53عیسی اَوون نَه واتِشه: «حقیقتن، شِمَه نَه بَواتیم، که تا اِنسانی زوعَه بَدنی مَرَه و چَیی خونی مِنجَه، اِشتَن کا زندگی نیرونَه. 54هَر کسی چِمِن بَدنی بَرِه و چِمِن خونی بِنجِه، اَبَدی یَه زندگی هِستِشه، و اَز داوری یَه روزی کا اَیی زِنده آکَرِم. 55چوم چِمِن بَدن حقیقی یَه نون و چِمِن خون حقیقی یَه آو اِستَه. 56کسی که چِمِن بَدنی بَردی و چِمِن خونی بِنتی، بَه مِن کا ساکن بَبی و از اَیی کا. 57هَتَه که دَده ای که زِندگی بَبَخشِستی مِن ویسا آکَردَشِه و از هَ دَده واسی زنِده‌ایمَه، اَ کسی که مِن کا بَردی نی چِمِن واسی زِنده بَبی. 58اِمَه اَ نونی که آسِمونی کا اومَه؛ نِه اَ نونی شیوار که شِمَه اَجداد هَردِشونَه، و با اِم حال مَردی نَه؛ بَلکَم هر کسی اِم نونی کا بَردی، تا اَبَد زِنده بَمَندی.» 59عیسی اِم گفون وختی واتِشه که کَفَرناحومی شهری، یهودیون ایلَه عبادتگاه دیله کا تعلیم بَدای.

پطرسی اعتراف

60عیسی وِرَه شاگِردون کا، وختی اِم گفون دَرسِشونَه، واتِشونَه: «اِم گف چَتینه، کی بَشای اَیی گوش بِدَه؟» 61امّا عیسی، بَزنی که چَیی شاگِردِن اِم گفی واسی غُرغُر بَکَردین، اَوون نَه واتِشه: «چِمِن گفِن شِمَه ناراحت بَکَردین؟ 62بَس اَگم بِوینَه اِنسانی زوعَه بَشی کفا جِگایی را که اوّل اِستبَه، چِه بَکَردیرون؟ 63خِدا روحَه که زِنده بَکَردی؛ جِسمی را هیچ فایده ایی نییَه. گَفونی که اَز شِمَه نَه بَواتیم، روح و زندگی اِستینَه. 64امّا بعضی شِمَه کا اِستینَه که ایمان نِورِن.» چوم عیسی صِفته نَه بَزنی چِه کَسونی ایمان نِورِن و اَ کسی که اَیی خیانت بَکَردی کییَه. 65و واتِشه: «اَز اِمی واسی شِمَه نَه واتِمَه که هیچکس نیمَشا با چِمِن وَر، مَگم اِم که، اِم، آسِمونی یَه دَده طرفی نَه اَیی آدوعَه بِبو.»

66اِم گفی پَش، وِر چَیی شاگِردن آگَردِستینَه، دِ اَیی همرایی نِکَردِشونَه. 67اَ موقع عیسی اَ دونزَه گِله شاگِردی نَه واتِشه: «شِمَه نی پیستِرونَه بِشَه؟» 68شَمعون پطرس جَواو دوشَه: «آقا، اَمَه چیکی وَر بِشَم؟ اَبَدی یَه زندگی گفِن اِشتِه وَری کااینَه. 69و اَمَه ایمان وَردَمونَه و بَزنیمون که تِه اَ قدّوس خِداییش. 70عیسی جَواو دوشَه: «مَگم شِمَه دونزَه نفری اَز اِنتخاب کَرده نیمَه؟ با اِم حال، ایی نفر شِمَه کا اِبلیسَه.» 71عیسی، شمعون اَسْخَریوطی زوعَه، یهودا درباره گف ژَنی، چوم اَ که ایلَه اَ دونزَه نفری کا بَه، چِندی پَش عیسی، دِشمِنی تسلیم کَردِشه.

Currently Selected:

یوحنا 6: ITB

Highlight

Copy