اِنجیلِ یوحنا 12

مریم عیسی رِه عَطرپاشی کانه

1شش روز پِیش اَز پِسَخ عید عیسی بِیت‌عَنْیایِ دِهات دِلِه هَموجِه که ایلعازَر زندگی کانِبا بوما، هَمونکه عیسی اونه مُردِگانِ جی زندهِ هَکُردهِ با. 2اوجِه اونه وَسین شام هَدَن. مارتا پَذیرایی کانِبا و ایلعازَر هم ایتا از اوشانی با که عیسی یِه هَمرَه سُفرِه سَر نیشته با. 3همون موقِه، مریم ایتا شیشِه گِران قِیمَتِ عَطر سُمبُلِ خالصِ جی که نیم لیترِ قَدَر با رِه بِیته و عیسی یه لنگِ اونه هَمرَه عَطرپاشی هَکُردِه و خودشه گیسِ هَمرَه خُشک هَکُردِه. سِرِه عَطرِ بو یه جی پُر هبا. 4وَلی یَهودایِ اَسخَریوطی، ایتا از عیسی یِه شاگِردان که بَعدها اونه دُشمَنِ دَس تَسلیم هَکُردِه، باَگوته: 5«چرا این عَطرِ که اونه قیمَت سیصَد روز کارگَری دَسمُز قَدَر بونه رِه نَروتی تا اونه پولِ فَقیرِان هَدین؟» 6اون اینِه وَسین اینه نَگوتِه که فَقیرانِ فِکر دَبا، بلکه چون دُز با اینه باَگوته، عیسی و شاگِردانِ خَرج و بَرجِ پول کیسِه اونه دَس دَبا و یَهودا اون پولِ جی دُزِّنِه با. 7پَس عیسی باَگوته: «اونه کار نِدارید! چون این عَطرِ می دَفنِ روزِ وَسین بِداشتِه با. 8چون فَقیران رِه هَمَش شیمی هَمرَه دارین، وَلی مَرِه هَمَش نِدارین.»

9جَماعت زیادی یَهودیِان جی وَختی بِشنَوِسَّن عیسی اوجِه دَرِه، بومَن تا نه فَقط عیسی، بلکه ایلعازَر رِه که زندهِ هَکُردهِ با رِه هَم بِینَن. 10پَس، مَعبدِ گَتِه کاهِنان نَقشِه بَکِشییَن که ایلعازَر رِه هَم بَکوشَن، 11چون باعِث هَبا با خیلی اَز یَهودیِان بوشون و عیسی رِه ایمان بیارِن.

عیسی شاهِ مِثان اورشلیمِ دِلِه شونِه

12فَردَئی، ایتا گَتِه ازدحام که عیدِ وَسین بوما بان، وَختی بِشنَوِسَّن عیسی به اورشَلیم هَنه، 13نَخلِ شاخِه شانهِ خودِشانِه دَسِّ میَن بِیتَن و اونه پیشواز بَشَن. اوشان فریاد هَمرَه گونِه بان:

«نجات هَدِه!

موبارکِ اونیکه

خداوند اِسمِ هَمرَه هَنهِ،

موبارکِ اسرائیلِ پادشاه!»

14ایما عیسی ایتا خَر کُرِّه پیدا هَکوردِه و اونه سَر سَوار هَبا؛ هَمونجور که مُقَدَّسِ نِوشتِه های دِلِه بَنویشته هَبا:

15«نَتِرس، اِی صَهیونِ کوهِ کیجا!

بِیِش تی پادِشاه هَنه،

تی پادشاه خَر کُرِّه سَر سَوارِه و دَرِه هَنه.»

16اونه شاگِردان اَوَّل این چیزانِ نِفَهمِسَّن، وَلی وَختی عیسی بعد از بَمِردَن باز هَم زندهِ هَبا، خودِشانِ یاد بیاردِن که ایشان هَمِه مُقَدَّسِ نِوشتِه های دِلِه اون بارِه بَنوِیشتِه هَبا با، وَ هَمونجور هَم هَبا.

17اون جَماعتی که ایلعازَر دُخوانِسَّن موقِه مَقبَرِه یه جی و اونه زندهِ هَکُردَن مَرگِ جی عیسی یِه هَمرَه دَبان، اینجوری این اتِّفاقِ شَهادَت دَنِه بان. 18اینِه خاطِری ایتا گَتِه جَماعت اونه پیشواز بَشَن، چون بِشنَوِسّه بان این نِشانه و مُعجِزِه رِه هَکُردِه. 19پس عُلَمایِ فِرقِه فَریسی هَمدیگَرِ باگوتَن: «دینین دِ اَمیِ دَس کاری بر نییَنِه؛ بِیشین تمام دُنیا اونه دُمّال بَشَن.»

یونانیان خَنِن عیسی رِه بَوینَن

20اوشانه دِلِه که عیدِ عِبادَتِ وَسین به اورشلیم بوما بان، بَعضیان یونانی بان. 21اوشان فیلیپُسِ وَرجه، که اَهل بِیت‌صِیْدا جَلیل مَنطَقِه جی با، بومَن و اونه باگوتَن: «آقا، خَنیم عیسی رِه بَینیم.» 22فیلیپُس بَشَه آندریاسِ باَگوته و اوشان هَر دُتا بَشَن عیسی رِه باگوتَن. 23عیسی اوشانه باَگوته: «انسانِ ریکایِ بَمِردَن و زندهِ هَبُوسَّنِ موقِه بَرِسییَه. 24راس راسی شِمِره گونَم، اَگه گَندُم توُم گِلِ جیر نَشو و نَمیرِه، تَنها ماندِنِه؛ وَلی اَگه بَمیرِه خِیلی بار هارنه. 25کسی که خودشه جان دوس بِدارِه، اونِه اَز دَس دَنِه. وَلی کسی که این دُنیایِ دِلِه خودشه جانِ جی بِگذَرِه، اونِ تا اَبَدی زندگی حِفظ کانه. 26اگه کسی بِخواد مَرِه خِدمَت هَکونه، بایسّی می دُمّال بیه؛ و جایی که مَن دَرِم، می خادِم هَم اوجِه دَرِه. کسی که مَرِه خِدمَت هَکونه، پیَر اونه عِزَّت دَنه.

عیسی خودشه بَمِردَنِ جی گَب زَنه

27«اَلآن می جان پَریشانِ. چی باگوُم؟ یعنی باگوم، ”پیَر! اونچه یه جی که خَنِه می سَر بیه مَرِه نِجات هَدِه“؟ وَلی مَن این کارِ خاطِری این دُنیایِ دِلِه بومَم. 28پیَر، تیِ اِسمِ جَلال هَدِه!» ایما ایتا صِدا آسِمانِ جی بوما که: «جَلال هَدَم و باز هَم جَلال دَنَم.» 29پس جَماعتی که اوجِه ایسَبان و اینه بِشنَوِسَن، باگوتَن: «آسِمانِ گورتَک با.» بَقیِه باگوتَن: «ایتا فِرِشتِه اونه هَمرَه گَب بَزَه.» 30عیسی باَگوته: «این صِدا شیمی وَسین با، نه می وَسین. 31اَسِه این دُنیایِ داوَری یه موقِئِه؛ وَ این دُنیایِ رَئیس شیطان دِرگا تُووادِه بونه. 32وَختی مَن صَلیب بَکِشیهِ هَبوُم و زَمینِ جی بُلَند هَبوُم، تمام مَردُم رِه می سَمت کَشِنَم.» 33عیسی اینه باَگوته تا نِشان هَدِه قَرارِ چِطور بَمیرِه. 34پس جَماعت اونه باگوتَن: «طِبقِ اونچه توراتِ جی بِشنَوِسّیم، مَسیحِ موعود تا اَبد زندهِ ماندِنِه، پَس چطوریه که گوُنی انسانِ ریکا بایِسّی مَصلوب هَبو؟ این انسانِ ریکا کیِه؟» 35عیسی اوشانه باَگوته: «نور یه میثقلی دیگه شیمی هَمرَه دَرِه. پَس تا وَختی که هنوز نور رِه دارید راه بیشین، نَکُنِه ظُلَمات شِیمی دُورِه هَگیره. اونیکه ظُلَمات دِلِه راه شونِه، نِدانه کوجِه شونِه. 36تا وَختی که نور رِه دارید نورِ ایمان بیارین تا نورِ وَچِه هان هَبین.»

عیسی وَختی این گَبِان رِه بَزَه، اوجِه جی بَشَه و خودِش رِه اوشانه جی قایِم هَکُردِه.

37با اینکه عیسی خِیلی نِشانه و مُعجِزِه اوشانه چِشمِ وَرجه هَکُردهِ با، هَلَه اونِه ایمان نیاردَن. 38اینجوری هَبا که اِشعیایِ پِیغَمبَرِ گَب به اَنجام بَرِسییَه که باگوتِه:

«اِی خداوند، کی اَمیِ پِیغامِ باوَر هَکُردِه،

خُداوَندِ قُدرَت کیه وَسین آشکار هَبا؟»

39هَمونجور که اِشَعیای پِیغَمبَر یِجایِ دیگه باَگوته، اوشان نتَّنِسَّن ایمان بیارَن، چونکه:

40«خُدا اوشانه چِشمِ کور

و اوشانه دِلِ سَخت هَکُردِه،

تا خودِشانِه چِشمِ هَمرَه نَینِن

و خودِشانِه دِلِ هَمرَه نَفَهمِن،

وَ می سَمت وَنِگردَن تا من اوشانه شَفا هَدَم.»

41اِشَعیا اینِه وَسین ایشانِ باَگوته که عیسی یِه جَلالِ بَدییَه و اون بارِه گَب بَزَه.

42با این وجود حَتّی قومِ گَتِه شان جی خیلیان عیسی رِه ایمان بیاردِن، وَلی فَریسیِانِ تَرسِ جی خودِشانِ ایمانِ مُقُر نومَن تا نَکُنِه اوشان رِه عِبادَتگاهِ جی دِرگا هَکُنَن. 43چون مَردُمِ تَعریف و تَمجیدِ، خُدایِ تَعریف و تَمجیدِ جی بیشتَردوس داشتِن.

44اونوَخت عیسی بُلَندِ صِدایِ هَمرَه باَگوته: «هر‌ کی مَرِه ایمان بیارِه، نه مَرِه، بلکه اونیکه مَرِه روانه هَکوردِه رِه ایمان بیاردِه. 45هر کی مَرِه بَدییَه، اونیکه مَرِه روانه هَکوردِه رِه بَدییَه. 46مَن ایتا نورِ مِثان این دُنیایِ دِلِه بومَم تا هر کی مَرِه ایمان بیارِه، ظُلَمات دِلِه نُمانِه. 47اَگه کَسی می گَبِ بِشنوئهِ، وَلی اونِه بِجا نیارِه، مَن اونه داوَری نُکانَم؛ چون نومَم این دُنیایِ مردُم رِه داوَری هَکُنَم، بلکه بومَم تا اوشانه نِجات هَدَم. 48کَسیکه مَرِه رَد هَکونِه و می گَبِ قَبول نَکُنِه، ایتا دیگه داوَر دَرِه، همون گَبایی که بَزَم قیامَت روز اونه داوَری کانه. 49چون مَن می جی گَب نَزَم، بلکه پیَری که مَرِه روانه هَکوردِه خودش مَرِه دَستور هَدَه که چی باگوُم و چی یه جی گَب بَزَنَم. 50مَن دانَم که اونه دَستور اَبَدی زندگی هیسِه. پَس اونچه که مَن گونَم دُرُس همون چیزیه که پیَر باَگوته تا باگوم.»

Currently Selected:

اِنجیلِ یوحنا 12: GMB

Highlight

Copy