PIANCILNA 12

Pasian in Abram a Sapna

1 Topa in Abram kiangah, “Na gam, na beh le na paʼ inn panin nang kong lah ding gamah pai in.#Sawl 7:2-3; Heb 11:8 2Minam lian in kong bawl dinga, thupha hong pia-in, na min liansak ding ka hih manin midangteʼ adingin thupha na hi ding hi. 3Nang thupha hong piate thupha ka pia dinga, nang hong samsiate ka samsia ding hi. Nangʼ thupha ngah bangin thupha a ngah nadingun leitung midang khempeuh in hong ngen ding uh hi,” a ci hi.#Gal 3:8

4Tua ciangin Topaʼ gen sa bangin Abram pai a, Lot in zong a zui hi. Haran panin a pai khiatin Abram kum sawm sagih le nga a pha hi. 5Abram in ama zi Sarai, a sanggampaʼ tapa Lot, amauʼ kaihkhop sa neihsa khempeuh le Haran a amauʼ neih sila khempeuh samin, Kanaan gamah a pai dingin amaute ding khia uh a, tua gam a tung uh hi. 6Abram in tua gam sung nawkin Shekhem mun, Moreh tawsaw phung dong a tung hi. Tua hunin tua lai ah Kanaan mite teeng lai hi. 7Tua ciangin Abramʼ tungah Topa kilang a, “Na suanlekhakte tungah hih leitang ka pia ding hi,” a ci hi. Tua ahih ciangin amah in ama tunga kilang Topa adingin biakna tau khat a bawl hi.#Sawl 7:5; Gal 3:16 8Tua ciangin Bethel panin nisuahna lam mualah amah kinkikin a puanbuk lam a, nitumna lamah Bethel, nisuahna lamah Ai om hi. Tua lai munah zong amah in Topa adingin biakna tau khat bawl a, Topaʼ tungah thu a ngen hi. 9Abram in a khualzin zom lai a, Negeb gam lam manawhin a pai lai hi.

Egypt ah Abram

10Kanaan gam sungah kialpi tung hi. Tua kialpi nasia ahih manin tawl khat sung a om dingin Egypt ah Abram a pai suk hi. 11Egypt gam a tum ding ciangin amah in a zi Saraiʼ kiangah, “Nang pen nupi melhoih khat na hihna ka thei hi. 12Egypt mite in nang hong muh ciangin amaute in, ‘Hih nu ama zi hi,’ ci ding uh hi. Tua ciangin amaute in kei hong that ding uh a, ahi zongin amaute in nang hong nungtasak ding uh hi. 13Nang pen ka sanggamnu ci lehang, nangma hangin kei adingin thu hong hoih zaw dinga, nangma hangin ka suakta thei kha ding hi,” a ci hi.#Pian 20:2; 26:7 14Egypt gam sungah Abram a tun ciangin Egypt mite in tua nupi a mel hoih sa mahmah uh hi. 15Faroʼ uliante in amah a muh uh ciangin Faroʼ kiangah amah phat uh hi. Faroʼ inn sungah tua nupi kila hi. 16Tua nuʼ hangin amah in Abram limbawl mahmah hi. Amah in tuu, bawngtal, latal, pasal nasem, numei nasem, la nu le kalaoh-te a pia hi.

17Ahih hangin Topa in Abramʼ zi Saraiʼ huhau-in Faro le a innkuanpihte gimna lianpi thuaksak hi. 18Tua ahih ciangin Faro in Abram samin, “Bang hangin hih bangin kei hong bawl na hi hiam? Amah na zi ahihna bang hangin kei kiangah hong gen lo na hi hiam? 19Ka zi dingin amah ka lak theih nadingin, ‘Amah ka sanggamnu hi,’ bang hangin hong ci na hi hiam? Tu-in hih lai ah na zi om hi. Amah la inla pai un,” a ci hi. 20Faro in amah tawh kisai-in a mite tungah thu a pia hi. Amaute in a zi le ama neih khempeuh tawh lampi ah a kha khia uh hi.

Currently Selected:

PIANCILNA 12: TBR17

Highlight

Copy