Yuditi 11
11
1Kavaloko Holofani a ku ka yena: “Tiya nhlana, we manana, u nga chavi nchumu, hikuva a ndzi si tshama ndzi vavisa ni un'we loyi a tirhelaka Nebukadnetsara, mufumi wa misava hinkwayo. 2Hambi ku ri sweswi, loko vanhu va wena etikweni ra swintshabyana a va nga ndzi rhukananga, a ndzi nga ta lwa na vona ni siku na rin'we; kambe hinkwaswo leswi va lo tilavela. 3Ndzi byele sweswi, hikwalaho ka yini u va balekerile, u ta eka hina? 4U ta pona haleno, u nga chavi nchumu! A hi ku dlayanga madyambu ya namuntlha, ni le ka masiku lama taka a wu nga vi ekhombyeni ro dlawa. A ku na munhu laha loyi a nga ta ku vavisa. Kambe hinkwavo va ta ku endla hilaha va endlaka malandza ya n'wini wa mina hosi Nebukadnetsara.”
5Yuditi a hlamula Holofani a ku eka yena: “Yingisa marito ya mina nandza wa wena, we hosi yanga, ndzi pfumeleleni ndzi tihlamulela emahlweni ka wena; a ndzi nga ku byeli vunwa, we hosi yanga. 6Loko u amukela marito ya mina nandza wa wena, Xikwembu xi ta hetisisa ntirho wa wena, kutani a wu nga hluleki ku hetisa leswi u navelaka ku endla swona, we n'wini wanga. 7#Yer. 27:6; Dan. 2:38Ndzi hlambanya hi vutomi na matimba ya Nebukadnetsara, hosi ya misava hinkwayo, loyi a a ku rhumile ku lulamisa timhaka ta vanhu hinkwavo va yena, ndzi ri, hikwalaho ka wena, a hi vanhu ntsena lava va n'wi tirhelaka, kambe swihari, ni swifuwo, ni tinyanyana na swona swa n'wi yingisa. Nakambe, hikwalaho ka wena, Nebukadnetsara ni tiko ra yena va ta humelela.#Kumbe: va ta hluvuka 8Hi twile ta vutlhari ni vutshila bya wena, swi twarisiwile emisaveni hinkwayo leswaku hi wena ndhunankulu leyi tlulaka Vaasiriya hinkwavo hi ku tiva ni ku twisisa ni ku fambisa ta nyimpi. 9Ndzi twile leswi Akiyoro a swi vuleke enhlengeletanweni ya vafambisi va mavuthu ya wena, hikuva vanhu va Betuli va n'wi tsetselerile, kutani ú va byerile hinkwaswo leswi a ku hlamuseleke swona. 10Hosi ni n'wini wanga, u nga soli leswi Akiyoro a swi vuleke, kambe swi ehlekete, hikuva i ntiyiso, rixaka ra hina ri nge hluriwi, kumbe ku herisiwa, handle ka loko ro dyohela Xikwembu xa rona.
11“Kambe we hosi yanga, u nga ka u nga hluriwi, naswona u nge tsandzeki ku hetisa xikongomelo xa wena. Hikuva Vaisraele va lava ku dyohela ni ku hlundzukisa Xikwembu xa vona, kutani hi mhaka ya xidyoho xexo va ta fa. 12Swakudya swa vona swi herile, naswona va sele ni mati matsongo swinene. Hikokwalaho va ni makungu ya ku dlaya swifuwo swa vona ni ku dya hinkwaswo leswi Xikwembu xi leriseke leswaku va nga tshuki va swi dya. 13#Eks. 23:19; Levh. 27:30Va tiyimiserile ku dya ntshovelo wo sungula wa mavele ni vukhume bya vhinyo ni mafurha. Kasi swilo leswi hlawulekile i swa vaprista ntsena lava tirhelaka Xikwembu xa hina eYerusalema. Kambe eka vanhu van'wana swa yila hambi ku ri ku swi khoma hi mavoko. 14Va rhumerile van'wana va vona eYerusalema, ku kombela eka huvo-nkulu ya tiko mpfumelelo wa ku dya swilo leswi, hikuva ni le Yerusalema va sungurile ku endla sweswo. 15Siku leri va nga ta amukela mpfumelelo, kutani va dya swakudya swo yila leswi, va ta nyiketiwa wena leswaku va herisiwa. 16Hikokwalaho loko mina nandza wa wena ndzi twile leswi hinkwaswo, ndzi balekile eka vona. Xikwembu xi ndzi rhumerile ku ta hetisa na wena leswi nga ta hlamarisa vanhu hinkwavo lava nga ta twa swona. 17Mina nandza wa wena, ndzi mukhongeri, ndzi tirhela Xikwembu xa le henhla-henhla vusiku ninhlekanhi. Hikokwalaho we hosi yanga, ndzi ta tshama na wena, kutani vusiku byin'wana ni byin'wana ndzi ta ya enkoveni, ndzi ya khongela Xikwembu kona; Xikwembu xi ta ndzi hlavutela loko va ta va va dyohile. 18Loko ndzi kumile mhaka leyi, ndzi ta ta ku byela yona, kutani u ta huma emixaxeni ya wena ni mavuthu ya wena hinkwawo ku ya lwa na vona; ku ta va ku ri hava na un'we wa vona loyi a nga ta ku alela. 19Ndzi ta ku fambisa hi le tikweni ra Yudiya, ku kondza u fika eYerusalema, laha ndzi nga ta ku ambexa harhi ya vuhosi, kutani u ta hangalasa Vaisraele ku fana ni tinyimpfu leti nga riki na murisi, ku ri hava ni mbyana leyi yi ku bongelaka. Xikwembu xi ndzi hlavuterile hinkwaswo leswi khale, kutani xi ndzi rhumile eka wena leswaku ndzi ta ku vikela swona.”
20Marito lawa ya Yuditi ma tsakisa Holofani ni malandza ya yena hinkwawo, va hlamala vutlhari bya yena, kutani va ku: 21“Ku hava wansati wa vumbhurhi ni wo vulavula hi vutlhari wo fana na yena emisaveni hinkwayo!”
22Kavaloko Holofani a ku eka Yuditi: “Xikwembu xi endle swona loko xi hi rhumele wena, leswaku u ta hi nyika matimba, hi ta herisa hinkwavo lava sandzeke Nabukadnetsara, hosi yanga. 23A wu mbhurhi ntsena, kambe u komba ni vutlhari hi ku vulavula ka wena. Loko wo endla hilaha u vuleke hakona, Xikwembu xa wena xi ta va Xikwembu xa mina. U ta tshama endlwini ya hosi Nebukadnetsara, kutani u ta dzuneka emisaveni hinkwayo.”
Currently Selected:
Yuditi 11: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.