Yuditi 10
10
Ta Yuditi loko a ya emixaxeni ya Holofani
1Loko Yuditi a hetile ku khongela eka Xikwembu xa Israele, 2a pfuka laha a a pavalarile kona loko a ri karhi a khongela, kutani a vitana nandza wa yena wa xisati, a rhelela endlwini leyi a a tshama eka yona hi masiku ya Savata ni ya minkhuvo yin'wana. 3A hluvula swiambalo leswo khwaxa ni leswa nkosi leswi a a swi ambarile, a hlamba, a tola mafurha layo nun'hwela, a kama misisi ya yena ni ku yi boha hi ngoti yo saseka, a ambala leswo saseka leswi a a swi ambala eminkhubyeni loko nuna wa yena Manase a ha hanya. 4A ambala tintanghu, a ambala ni masindza emilengeni ni le mavokweni, ni swingwavila etintihweni ni le tindleveni, ni swikhaviso swin'wana swa yena hinkwaswo; a tibombisa swinene, leswaku a ta koka mahlo ya vavanuna hinkwavo lava va n'wi vonaka. 5A nyika nandza wa yena wa xisati bodlhela ra vhinyo ni xikhudza xa mafurha, a tata nkwama hi tindzoho leti oxiweke ni ximbhundzwa xa mihandzu leyi omeke ni xinkwa xo nandziha, a phutsela ni swibye hinkwaswo swa yena, a swi nyika nandza wa yena leswaku a swi rhwala. 6Kutani va huma hi nyangwa ya Betuli, va kuma Uziya kona na Kabrisi na Karimi, vakulukumba va Betuli. 7Loko vakulukumba lava va vona Yuditi, va xiyaxiya hilaha xikandza xa yena ni swiambalo swa yena a swi hundzuke hakona, va tsakisiwa hi vumbhurhi bya yena, kutani va ku ka yena: 8“Xikwembu xa vatata wa hina a xi ku pfune ku hetisa makungu ya wena, leswaku Vaisraele va ta dzunisiwa ni muti wa Yerusalema wu ta tlakusiwa.”
Hiloko Yuditi a khongela Xikwembu, 9kutani a ku ka vona: “Lerisani leswaku va ndzi pfulela nyangwa ya muti, ndzi ta huma ku ya hetisa leswi ndzi nga swi vulavula na n'wina.” Kavaloko va lerisa majaha leswaku ma n'wi pfulela nyangwa. 10Loko ma n'wi pfulerile, Yuditi a humela emutini ni nandza wa yena wa xisati; vanhu va Betuli va n'wi languta a rhelela entshaveni a tsemakanya nkova, ku kondza va nga ha n'wi voni.
11Loko vavasati lava va ri karhi va famba enkoveni, va hlangana ni ntlawa wa masocha ya Vaasiriya lama rindzaka. 12Va khoma Yuditi, va ku ka yena: “Xana u wa tiko rihi? U huma kwihi? Naswona u ya kwihi?” Yena a hlamula a ku:
“Ndzi un'wana wa Vaheveru, kambe ndza va balekela, hikuva va le kusuhi ni ku nyiketiwa eka n'wina leswaku mi va herisa. 13Kutani ndzi ya eka Holofani, ndhunankulu ya mavuthu ya n'wina, ku n'wi tivisa mahungu lama tiyeke, naswona ndzi ta n'wi komba ndlela leyi ha yona a nga ta hlasela tiko ra swintshabyana, handle ka ku lahlekeriwa hi un'we wa vanhu va yena hi ku khomiwa kumbe ku dlawa.”
14Loko masocha ma twa ku vulavula ka Yuditi ni ku vona xikandza xa yena xo saseka ngopfu, ma tsakisiwa hi vumbhurhi bya yena, va ku ka yena: 15“U ponisile vutomi bya wena, hi ku hatlisa u rhelela u ta eka hosi ya hina. Famba entsongeni wa yena sweswi; van'wana va hina va ta ku heleketa eka yena. 16Loko u fika emahlweni ka yena, u nga tshuki u chava nchumu, kambe n'wi byele leswi u nga hi byela swona, kutani yena ú ta ku amukela hi vunene.” 17Va hlawula masocha ya 100 exikarhi ka vona leswaku ma n'wi heleketa swin'we ni nandza wa yena wa xisati, kutani ma va yisa entsongeni wa Holofani.
18A ku ri ni huwa leyikulu emixaxeni hinkwayo ya Vaasiriya, hikuva ku fika ka Yuditi ku tivisiwile entsongeni wun'wana ni wun'wana. Va ta va rhendzela Yuditi, loko a ha yimile handle ka ntsonga wa Holofani, va ha byela Holofani hi ta yena. 19Va hlamarisiwa hi vumbhurhi bya yena, naswona va hlamala Vaisraele hikwalaho ka yena, kutani va byelana va ku: “Xana i mani la nga sandzaka vanhu lava nga ni vavasati ku fana ni loyi? Hakunene a hi faneli ku tshika na un'we wa vavanuna va vona a hanya, hikuva loko ho va tshika, va ta kanganyisa misava hinkwayo!”
20Kavaloko vanghana va Holofani ni malandza ya yena hinkwawo va humela handle, va nghenisa Yuditi entsongeni wa yena. 21Holofani a a etlele emubedweni lowu funengetiweke hi xisirhelelo lexi lukiweke hi ntsembyani wa xivunguvungu ni nsuku, ni maribye ya nkoka ya “emeralda”, ni maribye man'wana ya nkoka swinene. 22Loko va n'wi byela hi ta Yuditi, a ta a ta yima emahlweni ka ntsonga wa yena, a ri karhi a voningeriwa hi timboni ta silivhere. 23Kuteloko Yuditi a fika emahlweni ka Holofani ni malandza ya yena, hinkwavo va hlamala vumbhurhi bya yena. Kutani Yuditi a nkhinsama, a losa Holofani, kambe mahlonga ya Holofani ya n'wi tlakusa.
Currently Selected:
Yuditi 10: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.