Luke 23
23
1စီးရာပ်သော် တရားလွှတ်တော်ဝါ စုဝေးလောကားကာ ဂျူးခေါင်းဆောင်အားလုံးနာပ်ကော် ကိုယ်တော်ယေရှုလည် တုန်းဟန်ဆုံး အုပ်ချုပ်သောကားကာဟီမ် ပိလတ်ပါအာ ကော်ဝမ်ကဲ့အယ် 2“အင်းကာဟီမ်ငေါ ရောမဘုရင်ကြီးလည် အခွန်အဆက်သလောတီမ်နောက် ဟီမ်နောက်ဟီမ် ဂျူးလူမျိုးလာပ်ကာ့ဘုရင် ထာကာကာ့ မေရှိယ ငေါကဲ့အယ် ပက်သော်ညာပ်ကယ်အယ် ပြည်သူလာပ်ကော ရောမအစိုးရလည် ပုန်ကန်နောကွန်းနယ် အောမ်ကဲ့အယ် လင်းငါးလည် အလေဆူ ယူပ်မူမာ့” ငေါကဲ့အယ် ပိလတ်ကာမန်းနား ကိုယ်တော်လည် စွပ်စွဲလောကဲ့အယ် သပေါက်ချီးမာ့။ 3တုန်းဟန်ဆုံး အုပ်ချုပ်သောကားကာဟီမ် ပိလတ်ကော ကိုယ်တော်ယေရှုလည် “နာန်ငေါ ဂျူးလူမျိုးလာပ်ကာ့ ဘုရင်ဟီပ်နာန်” ငေါကဲ့အယ် စီမ်ညူစန်းနော ကိုယ်တော်ကော “နာန်ငေါကားတိုင်း ဟီပ်မာ့” ငေါကဲ့အယ် ပြန်နောကဲ့မိန့်နောမာ့။ 4တုန်းဟန်ဆုံး အုပ်ချုပ်သောကားကာဟီမ် ပိလတ်ကော အင်းမာနေရားမာ့ ဂျူးပုရောဟိတ်အကြီးအကဲဖူမ်နောက် တီတ်ဆာလာပ်ကာ့ဘက်လာ မန်းကဲ့အယ် “အင်းကာဟီမ်ပါအာ မဟာအပြစ်ချာန်း ငါယူပ်မူဝိုး” ငေါကဲ့အယ် ငေါရီး 5ကိုယ်တော်လည် စွပ်စွဲလောကားဟီမ်နာပ်ကော “အင်းကာဟီမ်ငေါ ဂါလိလဲပြည်ပါအာအယ် စားလောကဲ့အယ် အင်းကာ့ ဂျေရုဆလင်မြို့ထုတ်ကွန်း ယုဒပြည် တစ်ခုလုံးပါအာမာ့ ပြည်သူလာပ်သယ် သွန်သင်နောကဲ့အယ် လှုံ့ဆော်လော်ညာပ်မာ့” ငေါကဲ့အယ် အခိုင်မာသပေါက်ချီးမာ့။ 6အင်းမာညယ်ငေါကားလည် တုန်းဟန်ဆုံး အုပ်ချုပ်သောကားကာဟီမ် ပိလတ်သပ်မူဝမ်စန်းနော “အင်းကာဟီမ်ငေါ ဂါလိလဲပြည်သား ဟီမ်နေး” ငေါကဲ့အယ် စီမ်ညူကဲ့အယ် 7ဟေရုဒ်အုပ်ချုပ်သောကား ဂါလိလဲပြည်ပါအာမာ့ ငေါကားလည် မီမ်းဟော်ဝမ်စန်းနော အင်းမာအချိန်ငါ ဂျေရုဆလင်မြို့ဝါး ထုတ်ကဲ့လင်းငါးကာ အုပ်ချုပ်သောကားဟီမ် ဟေရုဒ်ပါအာ ကိုယ်တော်လည် သာပ်လာမ်မာ့။ 8အုပ်ချုပ်သောကားကာဟီမ် ဟေရုဒ်ကော ကိုယ်တော်ယေရှုကာ အကြောင်းနယ် သပ်မူပေကယ် ဟော့ပ်တောကာပ်ကာ မာပ်ပန်းသယ်မာ့ ကိုယ်တော်လည် ယူပ်မူဝမ်စန်းနော တအားတုန်းရယ် ဝမ်းသာလော်ကယ်လင်းမာ့။ ဟီမ်ငေါ ကိုယ်တော်ယေရှုအောမ်ငါးကာ့ အန်းနောမီးကားကြအာကြအာလည် ယူပ်မူတီမ် မျှော်လင့်နောကဲ့အယ် လင်းမာ့။ 9အင်းသယ် အုပ်ချုပ်သောကားဟီမ် ဟေရုဒ်ကော ကိုယ်တော်လည် မေးခွန်းဖူမ် နည်းကြီစ်ရယ် စီမ်ညူရီး ကိုယ်တော်ကော မဟာဟာမ်း ဖြေလော်ဟာမ်ငို။ 10စီးရာပ်သော် ဂျူးပုရောဟိတ်အကြီးအကဲဖူမ်နောက် ကျမ်းထောကား ဆရာဖူမ်ငေါ ကိုယ်တော်လည် အားကြီစ်ရယ် စွပ်စွဲလောဟီးမာ့။ 11တုန်းဟန်ဆုံး အုပ်ချုပ်သောကားဟီမ် ဟေရုဒ်နောက်ဟီမ်ငါ စစ်သားဖူမ်ငေါ် ကိုယ်တော်လည် လှောင်နောဟီး နီးကာပ်ချီကယ်အယ် ကိုယ်တော်လည် တန်ဖိုး ငါတင်းငါး ဟန်ဆူန်နယ် ဖူမ်စီမ်းကဲ့အယ် တုန်းဟန်ဆုံး အုပ်ချုပ်သောကားကာဟီမ် ပိလတ်ပါအာ ဆာပ်ထာမ်းမာ့။ 12အုပ်ချုပ်သောကားဟီမ် ဟေရုဒ်နောက် တုန်းဟန်ဆုံး အုပ်ချုပ်သောကားကာဟီမ် ပိလတ်ကော အရင်နာ ရန်ဘက်ဖူမ်ထာဟီရီ အင်းမာမာန်းရာပ်အာ မိတ်ဆွေဖူမ် ထာဟာမ်ဟီရာမ်မာ့။ 13တုန်းဟန်ဆုံး အုပ်ချုပ်သောကားကာဟီမ် ပိလတ်ကော ဂျူးပုရောဟိတ်အကြီးအကဲဖူမ်၊ ဂျူးလူမျိုးခေါင်းဆောင်ဖူမ်နောက် တီတ်ဆာ ပရိသတ်ဖူမ်နယ် စုလောစီမ်းကဲ့အယ် 14“အင်းကာဟီမ်ငေါ ပြည်သူလာပ် ရောမအစိုးရလည် ပုန်ကန်နောကွန်းနယ် လှုံ့ဆော်လော်ကယ်အယ် လင်းမာ့ ငေါကဲ့အယ် နီမ်ငေါ ငါပါအာ ကော်ဟီးရီမာ့။ အင်းညယ်ငေါဝမ်ရီ နီမ်အားလုံးငါမန်းနားဟာ ငါဟီမ်နယ် စစ်ဆေးလာမ်ရီ နီမ်ဟီမ်နယ် စွပ်စွဲလောကယ်ညယ် အပြစ်ဖူမ် ကျူးလွန်နော်ပေကာလည် ယူပ်မူဝိုး။ 15ဟေရုဒ်ရီး ဟီမ်နယ် အပြစ်သမ်ကဲ့လူဟာဝိုးသယ်မာ့ ဟီမ်နယ် မဟာအပြစ်ဒဏ်ဟာမ်အအီရယ် ငါပါအာ ပြန်နောကဲ့ ဆာပ်ထေမာ့။ အင်းကာဟီမ်ငေါ သေဒဏ်အီသင့်နောကား အပြစ်မဟာဟာမ်း အပိုငေါကားကော ထင်ရှားလောမာ့။ 16အင်းသယ် ဟီမ်နယ် ကြိမ်ဒဏ်အီကဲ့အယ် သာပ်လာမ်နာ့ပ်” ငေါကဲ့အယ် ငေါမာ့။ 17တုန်းဟန်ဆုံး အုပ်ချုပ်သောကားကာဟီမ် ပိလတ် အင်းကာညယ်ငေါကားကော ပသခါပွဲတော်ပါအာ တုန်းဟန်ဆုံး အုပ်ချုပ်သောကားကာ ပိလတ်ကာ့ ဓလေ့ထုံးစံအတိုင်း ဂျူးလူမျိုးရာဇဝတ်သားဟော်ဝါလည် သာပ်ထာမ်းထော်ကယ် ထာမာ့။ 18အင်းညယ်ငေါဝမ်ရီ တီတ်ဆာအားလုံးငေါ “ဟီမ်နယ် ကတ်ရှီးကဲ့အယ် ဗာရဗ္ဗလည် သာပ်လာမ်နိတ်” ငေါကဲ့အယ် တစ်ပြိုင်တည်း ရမ်းကဲ့ စိမ်ဟီးမာ့။ 19ရာလည် ဗာရဗ္ဗကော ဂျေရုဆလင်မြို့နား ထာရီကား ပုန်ကန်နောကားနောက် တီတ်ဆာဟော်ဝါလည် ကတ်ရှီးရာမ်ကယ်မာ့ ထောင်နား ပြစ်ဒဏ်ခံနောထော် ကယ်အယ် လင်းငါး။ 20တုန်းဟန်ဆုံး အုပ်ချုပ်သောကားကာဟီမ် ပိလတ်ကော ကိုယ်တော်ယေရှုလည် သာပ်ထာမ်းကာပ်ကယ်မာ့ ဟီမ်နာပ်သယ် နောက်သယ်ကာပ်ဝါ စီမ်ညူဟာမ်းမာ့။ 21အင်းညယ်ငေါဝမ်ရီ ဟီမ်နာပ်ကော “ဟီမ်နယ် လက်ဝါးကပ်တိုင်စုတ်အား သာမ်aနိတ်။ ဟီမ်နယ် လက်ဝါးကပ်တိုင်စုတ်အား သာမ်နိတ်” ငေါကဲ့အယ်ဟာ ဆက်သောကဲ့အယ် စိမ်ဟီးမာ့။ 22အင်းမာချိန်နယ် ပိလတ်ကော “ဟီမ်ငေါ မညယ်ကာ ရာဇဝတ်မှုဖူမ်နယ် ကျူးလွန်နီကာသယ်။ ဟီမ်နယ် သေဒဏ်အီသင့်နောကား ရာဇဝတ်မှုလည် ငါယူမူပ်ဝိုး။ အင်းသယ် ဟီမ်နယ် ကြိမ်ဒဏ်အီကဲ့အယ် သာပ်လာမ်နာပ်” ငေါကဲ့အယ် တတိယအကြိမ် ထပ်သောကဲ့အယ် ငေါမာ့။ 23အင်းညယ်ငေါဝမ်ရီ တီတ်ဆာပရိသတ်ဖူမ်bငေါ် ကိုယ်တော်ယေရှုလည် လက်ဝါးကပ်တိုင်ပါအာ သာမ်တီမ်ဟာ ရမ်းကဲ့အယ် စိမ်ဟီးကယ်မာ့ တော့ပ်ဆုံးငါးကော ဟီမ်နာပ်ကာ့ ကလူပ်ကား အသံဖူမ်ငေါ အနိုင်လူဝမ်မာ့။ 24အင်းသယ် တုန်းဟန်ဆုံး အုပ်ချုပ်သောကားကာဟီမ် ပိလတ်ရီး ဟီမ်နာပ် စိမ်ငါးအတိုင်း အောမ်ကဲ့အယ်အီတီမ် ဆုံးဖြတ်သာမ်ကယ်အယ် 25ဟီမ်ငေါ တီတ်ဆာပရိသတ်သာပ် သာပ်ကာပ်ကားကာ့ ပုန်ကန်နောကားနောက် တီတ်ဆာကက်ရှီးကဲ့အယ် ထောင်လက်ကဲ့အယ် လင်းငါးကာ့ ရာဇဝတ်သား ဗာရဗ္ဗလည် သာပ်ထာမ်းစီးရာပ်သော် ကိုယ်တော်ယေရှုလည် အင်းမာဟီမ်နာပ်ကာ့ သဘောဆန္ဒအတိုင်း အောမ်စီမ်းကာပ်ကယ် ဟီမ်ငါ စစ်သားလာပ်ပါအာ အပ်သာမ်မာ့။ 26စစ်သားလာပ်ကော် ကိုယ်တော်လည် ကော်ကဲ့လာမ်ငါးအချိန်နယ် ကုရေနေမြို့သား ရှိမုန်ကော်ကားဟီမ်ငေါ လက်ပါးအယ် လီဟာမ်းငါးလည် ယူပ်မူဝမ်စန်းနော ဟီမ်နယ် လင်ကဲ့အယ် ကိုယ်တော်ကာနောက်အားအယ် လက်ဝါးကပ်တိုင်နယ် ဖေးကဲ့လီရာပ်စီမ်းမာ့။ 27တီတ်ဆာကန်ဖူန်လုံနောက်တူတူ ကိုယ်တော်နန်း ရင်နယ် ထုလောကဲ့အယ် ဟပ်ကဲ့လင်းဟီးကား ယာပ်ရှီဖူမ်ရီး ကိုယ်တော်ကာ နောက်အား လာပ်ချီးထော်မာ့။ 28အင်းမာချိန်နယ် ကိုယ်တော်ယေရှုကော အင်းမာဟီမ်နာပ်ကာဘက်လာ မန်းကဲ့ယူစီးကဲ့အယ် “ဂျေရုဆလင်မြို့ပါအာမာ့ ယာပ်ရှီဖူမ်၊ ငါနန်း ဟပ်ချီထို။ နီမ်နောက် နီမ်ငါ ရှိတ်ဆာဖူမ်နန်းဟာ ဟပ်ချီးလိတ်။ 29‘အယ်ဟာအလူဟာကား ယာပ်ရှီ၊ ပူစ်အကာမ်မာန်ငါးကာ့ ယာပ်ရှီနောက် စေါက်ရှီ အီနောပ်တီမ် အယ်ဟာအပေါ်ကာ ယာပ်ရှီလာပ်ကော ကံကလန်မာ့’ ငေါကဲ့အယ် တီတ်ဆာလာပ် ငေါဟိကာမာန်းရာပ်ဖူမ် ထုတ်အီကိုက်ပန်း။ 30အင်းမာ ကာလလည် ဟီမ်နာပ်ကော ကျမ်းစာပါအာ ရေးလောပေးကယ်ညယ် တောင်ဖူမ်နယ် ‘အလေကာစုတ်အား ပြိုလောလက် လီရိတ်’ ငေါကဲ့အယ်ဟာမ် ထာဂါက်ထာ၊ တောင်ကုန်းဖူမ်နယ် ‘အလေလည် အောပ်လီရိတ်’ ငေါကဲ့အယ်ဟာမ်း ထာဂါက်ထာ ငေါဟိကာ။ 31ဆိုင်မီစ်မီလင်းငါး ဖောမ်းတွန်ဖူမ်ညယ် အပြစ်ကင်းနောကားကာ ငါပါအာဟာမ် ဆိုးဝါးလောကားဖူမ် ထာရီရမ်းနော ကောကဲ့လင်းငါး ဖောမ်းတွန်ဖူမ်ညယ် ဒုစရိုက်အပြစ်သားဖူမ်ထာကာကာ့ နီမ်ပါအာ မနေတုန် ဆိုးဝါးလောပ်ကာသယ်” ငေါကဲ့အယ် မိန့်နောမာ့။ 32အခြားရာဇဝတ်သား ကယ်ဟောရီး ကိုယ်တော်နောက်တူတူ သေဒဏ်အီကား ခံနောတီမ် စစ်သားလာပ် ကော်ကားခံနောထော်မာ့။ 33ဟလာမ်းဟလော့ပ် ကော်ကားကာ့ တောင်ကုန်းစုတ်အား ထုတ်ပါတ်သော် ကိုယ်တော်ယေရှုလည် လက်ဝါးကပ်တိုင်စုတ်အား သာမ်ကဲ့အယ် မင်နားနောက် သမ်းပေးဟီးရာမ်မာ့။ ကိုယ်တော်ယေရှုကာ့ ဘယ်ဘက်နောက် ညာဘက်လာရီ ရာဇဝတ်သား ကယ်ဟောလည် လက်ဝါးကပ်တိုင်စုတ်အား သာမ်ကဲ့အယ် မင်နားနောက် သမ်းဟီးရာမ်မာ့။ 34အင်းမာချိန်နယ် ကိုယ်တော်ကော c“အဝါဘုရားရှင်၊ ဟီမ်နာပ်ကော ဟီမ်နာပ်အောမ်ငါးကာလည် မီမ်းဟော်ဟီယိုသယ်မာ့ ဟီမ်နာပ်သယ် ခွင့်လွှတ်သောကဲ့ အီစာမ်းဆွမ်” ငေါကဲ့အယ် ဆုစိမ်ငါမ်မာ့။ ရဲမတ်သာပ်ကော် ကိုယ်တော်ကာ ဆာမ်ဆူန်ဖူမ်နယ် မဲနောပ်ကယ်အယ် ခွဲလောကဲ့ လာဟီးမာ့။ 35တီတ်ဆာလာပ်ကော စာပ်ကဲ့အယ် ယူညာပ်ကာ့ချိန်နယ် ဂျူးလူမျိုးခေါင်းဆောင်နာပ်ကော ကိုယ်တော်ယေရှုလည် လှောင်နောကဲ့အယ် “ဟီမ်ငေါ သမီပ်သယ် ကယ်တင်နီမာ့။ တကယ်လို့ ဟီမ်ငေါ ဘုရားရှင် ရွေးချယ်လော်ကာ မေရှိယမှန်နောဝမ်းနော ဟီမ်နောက်ဟီမ် ကယ်လောစာမ်နိတ်” ငေါကဲ့အယ် ငေါဟီးမာ့။ 36စစ်သားဖူမ်ရီ ကိုယ်တော်လည် လှောင်ပြောင်နောစာပ်ရယ် ကိုယ်တော်ပါအာ လာမ်ကဲ့အယ် စပျစ်ဝိုင်ဟီးdလည် အီအူကဲ့အယ် 37“နာန်ငေါ ဂျူးလူမျိုးလာပ်ကာ့ ဘုရင်မှန်နောဝမ်းနော ကိုယ်ကာနောက်ကိုယ် ကယ်တင်နောလိတ်” ငေါကဲ့အယ် ငေါဟီးမာ့။ 38ကိုယ်တော်ကာ ဟလာမ်းဟူပ်စုတ်အားမာ့ လက်ဝါးကပ်တိုင်စုတ်အား အင်းကာဟီမ်ငေါ ဂျူးလာပ်ကာ ဘုရင်ထာမာ့” ငေါကဲ့အယ် ရေးလောပေးကား ဆိုင်းဘုတ်သယ် ချိတ်သောပေးမာ့။ 39လက်ဝါးကပ်တိုင်စုတ်အား သာမ်ငါး ခံနောထော်ကာကာ့ ရာဇဝတ်သားကယ်ဟောပါအာမာ့ ဟော်ဝါကော ကိုယ်တော်လည် “နာန်ငေါ မေရှိယငေါက်သော် နာန်နောက်နာန် ကယ်တင်နောကဲ့အယ် အလေလည်ပါ ကယ်တင်နောလိတ်” ငေါကဲ့အယ် လှောင်ပြောင်နောကဲ့အယ် သပေါက်မာ့။ 40အင်းညယ်ငေါဝမ်ရီ အခြားရာဇဝတ်သားဟော်ဝါကော အင်းမာဟီမ်နယ် “နာန်ငေါ ဟီမ်နောက်တူလောကား အပြစ်ဒဏ်အီကား ခံနောထော်ကာဟာမ် ဘုရားရှင်နယ် ကစာပ်ခပ်အူမ်းနာန်။ 41အလေကော် အပြစ်အောမ်ပါတ်ကယ် အပြစ်ဒဏ်ခံနောထော်ကာနောက် ထိုက်တန်နော်မာ့။ အင်းညယ်ငေါဝမ်ရီ အင်းကာဟီမ်ငေါ မဟာအပြစ်ချာန်း အောမ်ပေယို” ငေါကဲ့အယ် စမ်းမာန်မာ့။ 42စီးရာပ်သော် ဟီမ်ငေါ ဆက်သောကဲ့အယ် ကိုယ်တော်လည် “ ကိုယ်တော်ယေရှု၊ နာန်ငေါ ဘုရင်တစ်ပါးအဖြစ် အုပ်စိုးလောတီမ် လီဟာမ်းငါးအချိန်နယ် ငါဆူလည် သတိလူလိတ်” ငေါကဲ့အယ် လျှောက်သောမာ့။ 43အင်းမာချိန်နယ် ကိုယ်တော်ကော “နီမ်နယ်ငါအမှန်ငေါ့နာပ်။ နာန်ငေါ ယေမာပ်ချာန် ငါနောက်တူတူ ပရဒိသုဘုံfငါ ငါ့ကား” ငေါကဲ့အယ် မိန့်နောမာ။ 44အင်းမာချိန်ငေါ် မွန်းတည်းလောကားချိန် ထာကယ်အယ်လင်းရီး အင်းမာချိန်အယ်စားလောကဲ့အယ် သုံးနာရီထိ ကာတစ်ပြင်လုံး ထာမ်းကဲ့လင်းမာ့။ 45စမီစ်ကာ အလင်းငေါ မီမ်ကဲ့အယ် ဗိမာန်တော်ဝါးကာ့ ကလာ့ကာတုန်းgငေါ ကယ်ခြမ်း ဆိတ်အာမ်မာ့။ 46အင်းမာအချိန်နယ် ကိုယ်တော်ကော ကလူပ်ကားအသံနောက် “အဝါဘုရားရှင်ငါထော်ဝါး ငါဆူကာ ဝိညာဉ်နယ် အပ်သောမာ့” ငေါကဲ့အယ် ငေါစီးကဲ့အယ် ရှီးပေးရာမ်မာ့။ 47အင်းကာအဖြစ်ဖူမ်အားလုံးနယ် ယူပ်မူကား တပ်မှူးကော ဘုရားရှင်နယ် ချီးမွမ်းနောကဲ့အယ် “အင်းကာဟီမ်ငေါ အမှန်တကယ်ဟာမ် ဖြောင့်မတ်မှန်ကန်နောကားဟီမ် ထာမာ့” ငေါကဲ့အယ် ငေါမာ့။ 48အင်းမာ အရာဖူမ်နယ် ယူတီမ် စုလောကဲ့လီဟီးကား တီတ်ဆာပရိသတ်တုန်းငေါ ကိုယ်တော်ကာ အဖြစ်သယ် ယူပ်မူဝမ်စန်းနော ဝမ်းနည်းလောတင်းကယ်မာ့ ရင်နယ် ထုလောကဲ့အယ် ဟီမ်နာပ်ကာ့ကျဉ်းမာ လာမ်ဟာမ်းဟီးမာ့။ 49ကိုယ်တော်ယေရှုကာ မိတ်ဆွေဖူမ်နောက် ဆွေမျိုးသားချင်းဖူမ်၊ ဂါလိလဲပြည်ပါအာအယ် လီရာပ်ချီးကား ယာပ်ရှီဖူမ်ငေါ စာကားကာ့ နေရာပါအာအယ် စာပ်ကဲ့ ထက်ကဲ့လင်းဟီးမာ့။ 50အင်းမာအချိန်ငါ ယောသပ်ငေါကားဟီမ် ငါမာ့။ ဟီမ်ငေါ တီတ်ဆာကလန်နောက် ဖြောင့်မတ်သောကားဟီမ်ရီး ထာကယ်အယ် ဂျူးလွှတ်တော်အဖွဲ့ရားမာ့ ဟော်ဝါရီး ထာမာ့။ 51ဟီမ်ငေါ ကိုယ်တော်ယေရှုဟနန် အခြားလွှတ်တော်အဖွဲ့ဝင်ဖူမ်ငါ ဆုံးဖြတ်ချက်ဖူမ်နောက် အောမ်မီကားဖူမ်နယ် သဘောတူလီယို။ အင်းမာပြာန်နယ် ဟီမ်ငေါ ယုဒပြည် အရိမဿဲမြို့သား ထာကယ်အယ် ဘုရားရှင်ငါ သာသနာတော် ထုတ်အီတီမ် မျှော်လောကဲ့အယ် လင်းငါးဟီမ်ရီး ထာမာ့။ 52ဟီမ်ငေါ ကိုယ်တော်ကာ အလောင်းနယ် သင်္ဂြိုလ်လော်တီမ် တုန်းဟန်ဆုံး အုပ်ချုပ်သောကားကာဟီမ် ပိလတ်ပါအာအယ် စိမ်ငါမ်စန်းနော ပိလတ်ကော ခွင့်ပြုလာမ်မာ့။ 53အင်းသယ် ဟီမ်ငေါ ကိုယ်တော်ကာ ခန္ဓာကိုယ်လည် လက်ဝါး ကပ်တိုင်ပါအာအယ် တောမ်နား ချလောလက်ကဲ့အယ် ကလန်ငါ ပိတ်စနောက် ပတ်သာမ်မာ့။ စီးရာပ်သော် သလောင်ဆီ တုန်းတူဝါလည် ထုလောပေးကား ဟင်နယ်ဟာမ်း အပေးဟော်ပ်ကာကာ့ ဆိုင်းကြဉ်းသာဂူညားပါအာ ကိုယ်တော်ကာ ခန္ဓာကိုယ်လည် ကလန်မယ် စာန်းပေးရာမ်မာ့။ 54အင်းမာ မာန်းရာပ်ကော် ပြင်ဆင်နောကား မာန်းရာပ်hထာကယ်အယ် အူန်းပူစ်မာန်းရာပ် စားလောတီမ် ထံမီကားအချိန်ရီ ထာမာ့။ 55ဂါလိလဲပြည်ပါအာအယ် ကိုယ်တော်ယေရှုနောက်တူတူ လီရာပ်ချီးကား ယာပ်ရှီဖူမ်ရီး ယောသပ်နောက်တူတူ ရာပ်ချီးကဲ့အယ် ဆိုင်းကြဉ်းသာဂူနောက် ကိုယ်တော်ကာ ခန္ဓာကိုယ်လည် မညယ် အက်တလေးပေးမာ့ ငေါကားလည် ယူပ်မူဟီးမာ့။ 56စီးရာပ်သော် ဟီမ်နာပ်ကော ကျဉ်းမာလာမ်ဟာမ်းကဲ့အယ် ကိုယ်တော်နန်း ပူဇော်လောတီမ် အနံ့တူမ်းငါးကာ ဆလောနောက် အမွှေးနံ့သာဝေးဖူမ်နယ် ပြင်ဆင်နောဟီးမာ့။ အင်းညယ်ငေါဝမ်ရီ ဟီမ်နာပ်ကော ပညတ်တော်အရ အူန်းပူစ်မာန်းရာပ်ပါအာ ဆောလောကဲ့အယ် လင်းဟီးမာ့။
Currently Selected:
Luke 23: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
