Luke 22
22
1အင်းမာနောက်သယ် ပသခါပွဲကော်ကား တဆေးအပါလော်ကာဟမူမ်ပွဲ အချိန်ထံမီမာ့။ 2ဂျူးပုရောဟိတ်အကြီးအကဲဖူမ်နောက် ကျမ်းထောကား ဆရာလာပ်ကော တီတ်ဆာလာပ်သယ် ကစာပ်ကယ်အယ် လင်းဟီးကယ်မာ့ ကိုယ်တော်ယေရှုလည် မညယ် အကြောင်းသမ်ကဲ့အယ် ဆီမ်ရှင်းရှင်းဟာ ကတ်ရှီးထော်ပ်ကားလည် နည်းလမ်း သမ်ကဲ့လင်းဟီးမာ့။ 3စီးရာပ်သော် သာဝကဆယ့်နှစ်ပါး ပါအာမာ့ ယုဒရှကာရုတ်ပါအာ မာရ်နတ်ကော ဆာမ်ကဲ့လင်းမာ့။ 4အင်းမာနောက်သယ် ယုဒကော ဂျူးပုရောဟိတ်အကြီးအကဲဖူမ်နောက် ဗိမာန်တော်ကာ့ အရာရှိဖူမ်ပါအာ လာမ်ကဲ့အယ် ကိုယ်တော်ယေရှုလည် ဟီမ်နာပ်ကာ့ထော်ဝါး မညယ်အပ်သောထော်ပ်ကား ငေါကားလည် ဟီမ်နာပ်နောက်တူတူ တိုင်ပင်နာမာ့။ 5အင်းမာဟီမ်နာပ်ရီး ပျော်လောဟီးတင်းကဲ့အယ် ယုဒနန် ဖူးအီတီမ် သဘောတူဟီးရာမ်မာ့။ 6ယုဒရီး သဘောတူလောကယ်မာ့ တီတ်ဆာအစုဝေး အပေါ်ကာချိန်နယ် ကိုယ်တော်ယေရှုလည် လင်တီမ် အခွင့်ကလန်နယ် ထက်ကဲ့အယ် လင်းဟီးမာ့။ 7စီးရာပ်သော် တဆေးအပါလော်ကာ ဟမူမ်ပွဲတော်မာန်းရာပ်ကော်ကားကာ ပသခါပွဲနန်း သိုးဆဟာလည် ပူဇော်လောထော်ပ်ကားမာန်းရာပ်ပါအာ ထုတ်အီမာ့။ 8အင်းသယ် ကိုယ်တော်ယေရှုကော ပေတရုနောက် ယောဟန်နယ် “ပသခါပွဲတော်လည် အလေတူတူ ရောက်မောက်ချီးမူကွန်နယ် ပြင်ဆင်နောဟီးရာလိတ်” ငေါကဲ့အယ် မိန့်နာန်မာ့။ 9ဟီမ်နာပ်ရီး “အရှင်၊ အလေဆူလာပ်သယ် တပါပြာန်နောစီမ်း ကာပ်သယ်” ငေါကဲ့အယ် လျှောက်ထာမ်းကယ်မာ့ 10ကိုယ်တော်ကော “နီမ် မြို့နားဆာမ်ပါတ်သော် ဝေးတိတ်ဆီ ဖေးကဲ့လီကားကာ့ တီတ်ဆာဟော်ဝါလည် ဟောပ်တောဟိကာ။ ဟီမ်ငါနောက်အား လာပ်ကဲ့အယ် ဟီမ်ဆာမ်ငါးကာ ကျဉ်းမား ဆာမ်ဟီးရာမ်နိတ်။ 11စီးရာပ်သော် ကျဉ်းရှိတ်သယ် 'အလေကာ ဆရာကော် ဟီမ်ငါတပည့်လာပ်နောက်တူတူ ပသခါပွဲ နာန်ကြည်စာလည် ရောက်ချီးမုကား အခန်း တပါငါသယ် ငေါကဲ့အယ် နာန်နယ် စီမ်ညူစီမ်းရီမာ့' ငေါကဲ့အယ် သပေါက်ချီးလိတ်။ 12အင်းမာချိန်နယ် ကျဉ်းရှိတ်ကော် နီမ်နယ် ပြင်ဆင်နောတီမ် အရာမ်သင့် ထာကယ်အယ် လင်းငါးကာ့ စုတ်ထပ်လားမာ့ အခန်းကြအာလည် ပြလောပ်ကာ။ အင်းမာအခန်းပါအာ ပသခါအရောက်တီမ်အူတီမ်ဖူမ်နယ် ပြာန်နောဟီးလိတ်” ငေါကဲ့အယ် မိန့်နောမာ့။ 13စီးရာပ်သော် ပေတရုနောက် ယောဟန်နာပ်ကော ပူဟီးရာမ်ကယ်အယ် ကိုယ်တော် မိန့်နောကားအတိုင်း ယူပ်မူဟီးကားသယ်မာ့ ပသခါရောက်တီမ်အူတီမ်ဖူမ်နယ် အင်းမာနေရား ပြင်ဆင်နောဟီးမာ့။ 14ပသခါနာန်ကြည်စာ ရောက်တီမ် အချိန်ထုတ်အီစန်းနော ကိုယ်တော်ကော တပည့်သာဝကလာပ်နောက်တူတူ စပွဲရား ထောင်းငါမ်မာ့။ 15စီးရာပ်သော် ကိုယ်တော်ကော ဟီမ်နာပ်သယ် “ငါကော ဒုက္ခဝေဒနာဖူမ် ခံနောထော်စီကယ်အယ် အရှီးကြီစ်သယ် အင်းကာ့ ပသခါပွဲတော်လည် နီမ်နောက်တူတူ ရောက်မောက်ကာပ်တင်မာ့။ 16နီမ်နယ် ငါငေါ့နာပ်။ ဘုရားရှင်ငါ သာသနာတော်ပါအာ ပသခါပွဲတော်ကာ့ အဓိပ္ပာယ်a အမှန်တကယ် အထာရီဟော်ပ်ကာ အချိန်ထိ ငါကော ရာကာပ်ဝါ ပသခါပွဲတော်လည် ရောက်ခပ်ကား ဟီပ်စော်မန်” ငေါကဲ့အယ် မိန့်နောမာ့။ 17စီးရာပ်သော် ကိုယ်တော်ကော စပျစ်ဝိုင်ခွက်သယ် လာကဲ့အယ် ဘုရားရှင်ငါ ကျေးဇူးတော်လည် ချီးမွမ်းနောစီးရာပ်သော် “အင်းကာစပျစ်ဝိုင်ခွက်သယ် လာကဲ့အယ် အချန်းချန်းခွဲလောကဲ့အယ် အူဟီးလိတ်။ 18နီမ်နယ် ငါငေါ့နာပ်။ ငါကော ဘုရားရှင်ငါ သာသနာတော် အထုတ်အီဟော်ပ်ကာ အချိန်ထိ စပျစ်ရှီစ်ရှီပါအာမာ့ စပျစ်ဝိုင်နယ် အူစောမ်းဟပ်ကာယို” ငေါကဲ့အယ် မိန့်နောစီးရာပ်သော် 19ပေါင်မုန့်နယ် လာကဲ့အယ် ဘုရားရှင်ငါ ကျေးဇူးတော်လည် ချီးမွမ်းနောစီးရာပ်သော် ပေါင်မုန့်နယ် လာဆိတ်ကဲ့အယ် တပည့်လာပ်ခနန်းအီစီးရာပ်သော် “အင်းကာ ပေါင်မုန့်ငေါ နီမ်နန်း အီကားကာ ငါကာ့ခန္ဓာကိုယ် ထာမာ့။ ငါလည် သတိလူကားအနေနယ်အယ် အင်းကာညယ် အောမ်ဟီးလိတ်” ငေါကဲ့အယ် မိန့်နောမာ့။ 20အင်းမာတိုင်းမန်း ရောက်စီးရာပ်သော် ကိုယ်တော်ကော ခွက်သယ် အောမ်းပေးကဲ့အယ် “အင်းကာ့ စပျစ်ဝိုင်ငေါ ဘုရားရှင်နောက် သဘောတူညီမှု အသစ်ထာကွန်နယ် နီမ်ငါအပေါ်ဝါ လောက်စာပ်ကားကာ့ ငါကာ ရှေလည် ကိုယ်စားပြုလောမာ့။ 21အင်းညယ်ငေါဝမ်ရီ ငါလည် သစ္စာဖောက်သော့ကာဟီမ်ငေါ အင်းကာစပွဲရားဟာ ငါနောက်တူတူ ရောက်ကဲ့အယ် လင်းမာ့။ 22တီတ်ဆာကာ့ဆာကော ဘုရားရှင်ငါ အကြံအစည်တိုင်းဟာ ရှီးထော်ပ်ကားငေါရီး တီတ်ဆာကာ့ ဆာလည် သစ္စာဖောက်သောကား တီတ်ဆာကော ဒုက္ခရောက်သော့ကာ” ငေါကဲ့အယ် မိန့်နောမာ့။ 23အင်းမာလည် သာပ်မူဝါမ်စန်းနော သာဝကလာပ်ကော် အလေပါအာမာ့ ဟင်ငေါ အင်းမာညယ်အောမ်တီမ် ကြံစည်လောကဲ့အယ် လင်းငါးသယ် ငေါကဲ့အယ် အချန်းချန်း စီမ်ညူဟီးမာ့။ 24စီးရာပ်သော် သာဝကဖူမ်ငေါ် ဟီမ်နာပ်ပါအာ ဟင်ကြီးမြတ် ထာမ်ဆုံးပုဂ္ဂိုလ်ထာမာ ငေါကဲ့အယ် အချန်းချန်း ညာမ်းနောကဲ့ လင်းဟီးကယ်မာ့ 25ကိုယ်တော်ကော “အခြားတိုင်းပြည်ရာကာ့ ရှင်ဘုရင်ဖူမ်ငေါ ဟီမ်နာပ်ကာ ပြည်သူလာပ်သယ် အာဏာရှင်ညယ် အုပ်ချုပ်သောဟီးဟာမာငေါရီး ဟီမ်နာပ်နောက်ဟီမ်နာပ် သမီပ်ကာ အကျိုးလည်ဆောင်နောကားဟီမ် ငေါကဲ့အယ် တီတ်ဆာလာပ်သယ် မသပ်ချီးစီမ်းကာပ်မာ့။ 26အင်းညယ်ငေါဝမ်ရီ နီမ်ငေါ အင်းမာဟီမ်နာပ်ညယ် ထာသင်နို။ နီမ်ပါအာမာ့ ကြီးမြတ်သောဟန်ဆုံးဟီမ်ငေါ အရေးအပါလော်ဟန်ဆုံး တီတ်ဆာညယ် နှိမ့်ချလောကဲ့အယ် လင်းသင့်နောကယ်ညယ် ခေါင်းဆောင်ညီ အစေခံညယ် နှိမ့်ချလောကဲ့အယ် လင်းထော်ပ်ကား။ 27စပွဲရား ရောက်တီမ် ထောင်းကဲ့ လင်းငါးဟီမ်နောက် ရောက်တီမ်ဖူမ်နယ် ဧည့်ခံနောကားဟီမ်ပါအာ တမာ့ဟီမ်ငေါ ပိုလောကဲ့အယ် ကြီးမြတ်သောကားသယ်။ စပွဲရား ထောင်းကဲ့ လင်းငါးဟီမ်ငေါ ပိုလောကဲ့ ကြီးမြတ်သောကားဟီမ် ဟီပ်ယိုလေး။ အင်းညယ်ငေါဝမ်ရီ ငါကော နီမ်ငါကြာပ်ကြားပါအာ ရောက်တီမ်ဖူမ် ဧည့်ခံနောကားဟီမ်ညယ် ထာမာ့။ 28နီမ်ငေါ ငါဆင်းရဲဒုက္ခဖူမ် ခံနီထော်ကား ချိန်နယ် ငါနောက်တူတူ ငါကဲ့အယ် လင်းဟီးရီကာဟီမ်နာပ် ထာမာ့။ 29အဝါဘုရားရှင်ငေါ် ငါနန်း အုပ်စိုးပိုင်ခွင့် အီကယ်ညယ် ငါရီး နီမ်ဟနန်း အုပ်စိုးပိုင်ခွင့် အိနာ့။ 30အင်းသယ် နီမ်ငေါ ငါကာ နိုင်ငံတော်ပါအာမာ့ စပွဲရား ထောင်းကဲ့အယ် ရောက်ချီး၊ အူဟီးမူကာ အခွင့်နောက် ပလ္လင်စုတ်အား ထောင်းကဲ့အယ် အစ္စရေးမျိုးနွယ်စု တစ်ဆယ့်နှစ်စုလာပ်သယ် အုပ်စိုးလောထော်ပ်ကား” ငေါကဲ့အယ် မိန့်နောမာ့။ 31“ရှိမုန်၊ ရှိမုန်၊ သပ်တိတ်၊ လယ်သမားကော အန်နယ် အဆာပ် နောက် လာပ်ခေါက် ခွဲခြားလောကယ်ညယ် မာရ်နတ်ရီး နီမ် ဟော်ဝါစီလည် စမ်းသပ်သောတီမ် အခွင့်စိမ်ပီပ်။ 32ရှိမုန်၊ နာန်ငါ ယုံကြည်ခြင်းငေါ အရပ်တောကွန်းနယ် ငါ ဆုစိမ်မာ့။ နာန် နောင်တ လူကဲ့အယ် ငါပါအာ လီဟာမ်းငါးအချိန်နယ် နာန်ငါ အန်းချန်နရှီ ထာကာ အခြားတပည့်လာပ်သယ်ရီး ယုံကြည်မှု ခိုင်မြဲလောကွန်းနယ် ကူညီလောကဲ့အယ် အီလိတ်” ငေါကဲ့အယ် မိန့်နောမာ့။ 33အင်းမာချိန်နယ် ပေတရုကော ကိုယ်တော်လည် “အရှင်၊ ငါဆူကော ထောင်ငါးဟာမ်း ဆာမ်ထော်ပ်ကား အင်းညယ်အဟီပ်ရီ ရှီးထော်ပ်ကားဟာမ်းငေါရီး အရှင် နောက်တူတူအရာမ်သင့် ငါကဲ့လင်းမာ့” ငေါကဲ့အယ် လျှောက်တင်နာန် ကယ်မာ့ 34ကိုယ်တော်ကော “ပေတရု၊ နာန်နယ် ငါငေါနာပ်။ ယေနာန်ကြည် အူအကြေကြီစ် နာန်ငေါငါလည် မီမ်းဟို ငေါကဲ့အယ် ဆွန်းကြိမ်တိုင်တိုင် ညာမ်းနောပ်ကာ” ငေါကဲ့အယ် မိန့်နောမာ့။ 35စီးရာပ်သော် ကိုယ်တော်ကော တပည့်လာပ်အားလုံးနယ် “ငါကော နီမ်နယ် ဖူး၊ ရှီပ်ထောင်နောက် ဟတ်တီမ်းအပိုဖူမ်နယ်ဟာမ်း အလာစီမ်ရယ် သာပ်လီကားချိန်နယ် နီမ်ပါအာ မဟာမဟာ လိုလောကား ငါရီနေး” ငေါကဲ့အယ် စီမ်ညူစန်းနော
တပည့်လာပ်ကော “ပေါ်ရီယိုး” ငေါကဲ့အယ် လျှောက်သောဟီးမာ့။ 36အင်းမာချိန်နယ် ကိုယ်တော်ကော “ရာကော တီတ်ဆာလာပ်ကော နီမ်နယ် ကူညီလောဟိကာယို။ အင်းသယ်မာ့ ဖူးရှီပ်ထောင်ငါဝမ်းနော လာဟီးလိတ်။ ရှီပ်ထောင်နယ်ရီး လာဟီးလိတ်။ နီမ်ပါအာ တာမ်အပေါ်ရီ အဝတ် ကြအာလည် ငဟေကယ်အယ် တာမ်နယ် မီးဟီးလိတ်။ 37နီမ်နယ် ငါငေါ့နာပ်။ ငါပါအာ အမှန်တကယ် ထာရီပ်ထော်ပ်ကား ငေါကဲ့အယ် ကျမ်းစာပါအာ ရေးလောပေးကားကာ့ ‘ဟီမ်ငေါ ရာဇဝတ်သား ငေါကဲ့အယ် သတ်မှတ်သောကား ခံနောထော်ပ်ကား’ ငေါကား ကျမ်းပိုဒ်ကော အမာပ်စာပ်ရယ် အမှန်တကယ် ထာရီပ်ကိုက်ပန်း” ငေါကဲ့အယ် မိန့်နောမာ့။ 38အင်းမာချိန်နယ် တပည့်လာပ်ကော် “ကိုယ်တော်၊ ယူလိတ်။ အလေဆူလာပ်ပါအာ တာမ်ကယ်ခတ်ငါမာ့” ငေါကဲ့အယ် လျှောက်တင်နော်ဝမ်စန်နော် ကိုယ်တော်ကော “လုံလောက်သောဝါပ်” ငေါကဲ့အယ် မိန့်နောမာ့။ 39စီးရာပ်သော် ကိုယ်တော်ကော အောမ်နေကြအတိုင်း သံလွင်တောင်စုတ်အား ကြွလာမ်မာ့။တပည့်လာပ်ရီ ဟီမ်ငါနောက်အား လီရာပ်ချီးမာ့။ 40အင်းမာနေရား ထုတ်အာမ်စန်းနော ကိုယ်တော်ကော တပည့်လာပ်သယ် “ဖြားယောင်းသွေးဆောင်နောကား အခံနော်ထော်ကွန်နယ် ဘုရားရှင်ပါအာ ဆုစိမ်ဟီးလိတ်” ငေါကဲ့အယ် မိန့်နောမာ့။ 41စီးရာပ်သော် ကိုယ်တော်ကော ဟီမ်နာပ်ပါအာအယ် နည်းနည်းဟာ စာကားနေရား လာမ်ကဲ့အယ် ဒူးထောက် သောစီးရာပ်သော် 42“အို အဝါဘုရား၊ အဝါဘုရား၊ အမာပ်စာပ်ရယ် ငါဆူခံစားလောထော်ပ်ကား ဒုက္ခဆင်းရဲလည် အထာရီကွန်းနယ် အောမ်ကဲ့အယ် အီစာန်းဆွမ်။ အင်းညယ်ငေါဝမ်ရီ အဝါဘုရားရှင်ငါ အလိုတော်ဟာ ထာစီမ်ိနတ်ဆွမ်။ ငါဆူကာ အလိုတော်တိုင်း ထာစီမ်ငါဆွမ်” ငေါကဲ့အယ် ဆုစိမ်မာ့။ 43အင်းမာချိန်နယ် ရွှေမြို့တော်ပါအာအယ် ဟမန်းတစ်ပါး ဆာပ်လီကဲ့အယ် ကိုယ်တော်လည် အားအီရီမာ့။ 44ကိုယ်တော်ကော စိတ်ပင်ပန်းနောတင်းငါးလည် ခံစားလောကဲ့အယ် အားကြီစ်ရယ် ဆုစိမ်ကယ်မာ့ ကိုယ်တော်ပါအာအယ် ကစောလက်လီကာ တောပ်ဝေးဖူမ်ငေါ် ရှေစောမ်းငါးညယ် ကာစုတ်အား လက်လာမ်မာ့။ 45ကိုယ်တော်ကော အင်းမာညယ် ဆုစိမ်စီးရာပ်သော် ယုတ်ကဲ့အယ် တပည့်တော်လာပ်ပါအာ လီဟာမ်းငါးအချိန်နယ် တပည့်တော်လာပ်ကော ဝမ်းနည်းလောတင်းကဲ့အယ် နာပ်သော်ဟီကယ်မာ့ အက်လီးကဲ့လင်းငါးလည် ယူပ်မူဝမ်စန်းနော 46ကိုယ်တော်ကော တပည့်လာပ်သယ် “မဟာအောမ်ကယ် အက်လီးကဲ့ လင်းဟီးကားသယ်။ ယုတ်ကဲ့အယ် ဖြားယောင်းသွေးဆောင်နောကားညား အဆာမ်ငါပ်ရယ် လင်းကွန်းနယ် ဆုစိမ်ဟီးလိတ်” ငေါကဲ့အယ် ထပ်သောကဲ့ မိန့်နောမာ့။ 47ကိုယ်တော်ကော အင်းကာညယ် မိန့်နောကဲ့လင်းငါးချိန်နယ် ရုတ်တရာပ် တီတ်ဆာအုပ်တုန်း ထုတ်အီမာ့။ သာဝကဆယ့်နှစ်ယောက်ပါအာမာ့ ဟော်ဝါထာကာ ယုဒကော တီတ်ဆာအုပ်တုန်းနယ် ဦးဆောင်နော်ကယ်အယ် ကိုယ်တော်ပါအာ ကော်ရီကဲ့အယ် ဟီမ်ငေါ ကိုယ်တော်လည် မန်းတူန်တီမ် ကိုယ်တော်ပါအာ လီမာ့။ 48ကိုယ်တော်ယေရှုကော “ယုဒ၊ နာန်ငေါ တီတ်ဆာကာ့ဆာလည် မန်းတူမ်ကယ်အယ် သစ္စာဖောက်သောကားလေး” ငေါကဲ့အယ် စီမ်ညူမာ့။ 49ကိုယ်တော်ကာ့ အခြားတပည့်တော်ဖူမ်ငေါ အင်းမာလည် ယူပ်မူဝမ်စန်းနော “ကိုယ်တော်၊ အလေဆူလာပ်ကော ဟီမ်နာပ်သယ် တာမ်နောက် တိုက်သောထော်ပ်ကားနာန်” ငေါကဲ့အယ် လျှောက်သောမာ့။ 50စီးရာပ်သော် တပည့်တော်ဟော်ဝါကော သာမ်နယ် လာပူကဲ့အယ် တုန်းဟန်ဆုံး ပုရောဟိတ်ဟော်ဝါကာ အစေခံနယ် ဝမ်းနာန်စန်နော် ညာဖက်လာကာ့ ကနားလည် ထာဝမ်ကယ်မာ့ တူဝါမ်မာ့။ 51ကိုယ်တော်ယေရှုကော “အင်းကာဟာနောက် ရပ်သောစာပ်” ငေါကဲ့အယ် မိန့်နောစီးရာပ်သော် အင်းမာ ကနားတူစ်လားကာ့ အစေခံငါ ကနားလည် ထော်နောက် ထာကယ်အယ် အစကာညယ် ကလန်ဟာမ်စီမ်မာ့။
52စီးရာပ်သော် ကိုယ်တော်ယေရှုကော ဟီမ်နယ် လင်တီမ် လီဟီးကားကာ ဂျူးပုရောဟိတ်အကြီးအကဲဖူမ်၊ ဗိမာန်တော်ထက်ကားကာ့ အရာရှိဖူမ်နောက် ဂျူးလူမျိုး အသက်တုန်းငါးတီတ်ဆာလာပ်သယ် “နီမ်ငေါ ငါလည် လင်တီမ် ဟမ်းတုပ်ကာတုန်ဖူမ်၊ တာမ်ဖူမ် အောမ်းကဲ့အယ် မဟာအောမ်ကယ် လီဟီးကားနာန်။ ငါလည် ရာဇဝတ်သား မသပ်ကားလေး။ 53ငါကော မာန်းရာပ်တိုင်း ဗိမာန်တော်ဝါမ်းငါး ငါကဲ့လင်းငါးအချိန်နယ် နီမ်ငေါ မဟာအောမ်ကယ် ငါလည် အလင်ဟီကာသယ်။ အင်းညယ်ငေါဝမ်ရီ အင်းကာချိန်ငေါ် နီမ်ငါအချိန် ထာကယ်မာ့ မာရ်နတ်ကော ဟီမ်ငါ အကလန်ငါဖူမ်နယ် အောမ်တီမ် အချိန်ရီ ထာမာ့” ငေါကဲ့အယ် မိန့်နောမာ့။ 54စီးရာပ်သော် ဟီမ်နာပ်ကော ကိုယ်တော်လည် လင်ကဲ့အယ် တုန်းဟန်ဆုံး ပုရောဟိတ်ကာကျဉ်းမား ကော်ဝမ်စန်းနော ပေတရုကော နည်းနည်းဟာ စာပါအာအယ် လာပ်မာ့။ 55ဟီမ်နာပ် ထုတ်အာစီးရာနောက် တုန်းဟန်ဆုံး ပုရောဟိတ်ကာ့ ကျဉ်းခြံဝိုင်းအလယ်ရာ တီတ်ဆာကြအာကော ဝိုင်းနောကဲ့ ဝမ်ကော်ပ်ကဲ့အယ် လင်းဟီးကယ်မာ့ ပေတရုကော ဟီမ်နာပ်ကာ ကြာပ်ကြားထောင်းငါမ်မာ့။ 56စီးရာပ်သော် အစေခံယာပ်ရှီဟော်ဝါကော ပေတရုထောင်းကဲ့အယ် ဝမ်ကော်ပ်ကဲ့အယ်လင်းငါးလည် ယူပ်မူဝမ်စန်းနော ဟီမ်နယ် စေ့စေ့ ယူကဲ့အယ် “အင်းကာဟီမ်ရီး ယေရှုနောက် အပေါင်းအပါ ထာမာ့” ငေါကဲ့အယ် ငေါမာ့။ 57အင်းမာချိန်နယ် ပေတရုကော “ယာပ်ရှီ၊ ငါကော ဟီမ်နယ် မီမ်းဟို” ငေါကဲ့အယ် ညာမ်းနောမာ့။ 58တအောင်းဟာ မာပ်အာမ်စန်းနော တီတ်ဆာဟော်ဝါကော ပေတရုလည် ယူပ်မူဝမ်ကယ် “နာန်ငေါ ဟီမ်နာပ်ပါအာမာ့ ဟော်ဝါထာမာ့” ငေါကယ်မာ့ ပေတရုကော “ငါကော ဟီမ်နာပ်ပါအာမာ့ ဟီပ်ယို” ငေါကဲ့အယ် ငြင်းနောဟာမ်းမာ့။ 59နောက်တစ်နာရီမာပ်အန်မားလည် အခြားဟော်ဝါရီး “အင်းကာဟီမ်ရီး ဂါလိလဲပြည်သား ထာကာကာ့ ယေရှုနောက်တူတူ ငါကဲ့လင်းငါး သေချာလောမာ့” ငေါကဲ့အယ် အခိုင်မာငေါမာ့။ 60အင်းညယ်ငေါဝမ်ရီ ပေတရုကော “မိတ်ဆွေ၊ နာန်မဟာငေါမာ့ ငေါကားလည် ငါမီမ်းဟို” ငေါကဲ့အယ် ညာမ်းနောမာ့။ အင်းမာညယ် ငေါကဲ့လင်းငါးအချိန်နယ် အူကြေရာမ်မာ့။ 61အင်းမာချိန်နယ် ကိုယ်တော်ကော ပေတရုကာဘက်လာ မန်းကဲ့အယ် ယူဝမ်မာ့။ ပေတရုကော ကိုယ်တော်မိန့်နီကာ “ယေမာပ် အူအကြေကြီစ်ရယ် ငါလည် မီမ်းဟော်ဝို ငေါကဲ့အယ် ဆွန်းကြိမ်တိုင်တိုင် ညာမ်းနောပ်ကာ” ငေါကားလည် သတိလူဝမ်ကယ်မာ့ 62ပြာန်ငါ ပူကဲ့အယ် မားချလောကဲ့ ဟပ်ကဲ့လင်းမာန်မာ့။ 63အင်းမာချိန်နယ် ကိုယ်တော်ယေရှုလည် ထက်ကဲ့လင်းငါး စစ်သားလာပ်ကော် ကိုယ်တော်လည် လှောင်နောကဲ့အယ် သမ်းကနာဟီမာ့။ 64ကိုယ်တော်ကာ မီစ်တူဖူမ်နယ် ဟူမ်နောက် ပတ်သောပေးဟီးကဲ့အယ် “နာန်နယ် ဟင်သမ်းငါး ငေါကားလည် ဟောလောလိတ်” ငေါကဲ့အယ် 65နည်းအမျိုးမျိုးနောက် ကိုယ်တော်လည် စော်ကားလောကဲ့အယ် သပေါက်ချီးမာ့။ 66ဟလာမ်းလားဝမ်စန်နော် ဂျူးပုရောဟိတ်အကြီးအကဲဖူမ်၊ ကျမ်းထောကား ဆရာဖူမ်ပါလောကားကာ့ ဂျူးလူမျိုးခေါင်းဆောင်ဖူမ်ငေါ တရားလွှတ်တော်cဝါ စုလောကဲ့အယ် လင်းဟီးကားအချိန်နယ် ကိုယ်တော်လည် ကော်ဟီးရီမာ့။ ဟီမ်နာပ်ကော ကိုယ်တော်လည် 67“နာန်ငေါ မေရှိယ ဟီပ်နေး၊ အလေလည် ငေါလိတ်” ငေါကဲ့အယ် ငေါဟီးမာ့။
ကိုယ်တော်ကော “နီမ်နယ် ငါဆောမ်းရီး နီမ်ငေါ ငါလည်ယုံနော်ဟီယို။ 68မေရှိယအကြောင်း နီမ်နယ် ငါစီမ်ညူရီး နီမ်ဖြေလော်ဟီယို။ 69အင်းညယ်ငေါဝမ်ရီ ရာအချိန်အယ် စားလောကဲ့အယ် တီတ်ဆာကာ့ဆာကော တန်ခိုးတော်အလုံးစုံနောက် ပြည့်စုံနော်ကာကာ့ အဝါဘုရားရှင်ငါ လက်ယာဘက်လာ ထောင်းဟပ်ကာ” ငေါကဲ့အယ် မိန့်နောမာ့။ 70အင်းမာချိန်နယ် အင်းမာဟီမ်နာပ်အားလုံးငေါ “အင်းကာညယ်ငေါက်သော် ဘုရားရှင်ငါ ဆာဟီပ်နေး” ငေါကဲ့အယ် ငေါစမ်းနော
ကိုယ်တော်ကော “နီမ်ငေါကားတိုင်း ဟီပ်မာ” ငေါကဲ့အယ် ပြန်နောကဲ့မိန့်နောမာ့။ 71အင်းမာချိန်နယ် အင်းမာဟီမ်နာပ်ရီး “ဟီမ်ငါ ဆတူမ်းနားအယ် အင်းကာညယ်ငေါကားလည် အလေကိုယ်တိုင် သပ်မူဝါပ်သယ်မာ့ အခြားသက်သေ လိုလော်စော်မန်” ငေါကဲ့အယ် ငေါဟီးမာ့။
Currently Selected:
Luke 22: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
