Luke 21
21
1စီးရာပ်သော် ကိုယ်တော်ယေရှုနောက် တပည့်တော်လာပ် ဗိမာန်တော်ဝါမ်းငါး ငါကားအချိန်နယ် ကိုယ်တော်ကော အိုးပါအပါ ယူညာပ်အာမ်စန်းနော ဆွာမ်းငါးဟီမ်နာပ်ကော ဗိမာန်တော်ဝါမ်းငါးမာ့ အလှူခံသေတ္တာပါအာ ဟီမ်နာပ်ကာ့ အလှူဖူးဖူမ်နယ် စာမ်းကဲ့ လင်းငါးလည် ယူပ်မူဝမ်မာ့။ 2အပေါ်ဟာကား မုဆိုးမဟော်ဝါရီး တန်ဖိုးနည်းလောဟန်ဆုံး ထာကာကာ့ ကြေးနီဒင်္ဂါးa ကယ်ပါတ်သယ် အလှူခံသေတ္တာနား စာမ်းငါးလည် ယူပ်မူဝမ်မာ့။ 3အင်းမာချိန်နယ် ကိုယ်တော်ကော “နီမ်နယ် ငါငေါ့နာပ်။ အင်းမာ အပေါ်ဟာကားကာ့ မုဆိုးမကော အခြား တီတ်ဆာလာပ်ကာ ထက်သယ် ပိုလောကဲ့အယ် အလှူဒါန အီရီကား ထာမာ့။ 4မဟာအောမ်ကယ်လိုးငေါနော အခြားတီတ်ဆာလာပ်ကော ဟီမ်နာပ်ပါအာ ပိုလောကား စည်းစိမ်ဖူမ်ပါအာမာ့ ကြအာလည်ဟာ လှူလောဟီးဟာမာ့။ အင်းညယ်ငေါဝမ်ရီ အင်းမာ့ မုဆိုးမကော အပေါ်ဟာရီး ဟီမ်ရောက်တီမ်အူတီမ် လိုအပ်သောကား ဖူးအားလုံးနယ် လှူလာမ်ငါ ထာမာ့” ငေါကဲ့အယ် မိန့်နောမာ့။ 5စီးရာပ်သော် ကိုယ်တော်ကာ တပည့်တော်ကြအာကော ဘုရားရှင်နန်း တီတ်ဆာလာပ် လှူလောပေးကားကာ့ ပစ္စည်းဖူမ်၊ ကလန်ငါကာ သလောင်ဆီဖူမ်နောက် အလှဆင်နောပေးကားလည် ချီးမွမ်းနောကဲ့အယ် လင်းဟီးမာ့။ 6အင်းမာချိန်နယ် ကိုယ်တော်ကော “နီမ်ယူပ်မူကားဖူမ်အားလုံးငေါ သလောင်ဆီတူဝါဟာမ်း ဗိမာန်တော်ပါအာ အကျန်နော်စောမ်ငါအထိ အရာအားလုံးဖျက်ဆီး ခံနောထော်ပ်ကားအချိန် ထုတ်အိကား” ငေါကဲ့အယ် မိန့်နောမာ့။ 7အင်းမာချိန်နယ် တပည့်လာပ်ကော ကိုယ်တော်လည် “ဆရာ၊ အင်းမာအရာဖူမ်ငေါ မဟာချိန်နယ် ထာရိကားသယ်။ အင်းမာဖူမ် ထာရီကိုက်ပန်းငေါက်သော် မဟာနိမိတ်လက္ခဏာဖူမ် ထာရီပ်ကားသယ်” ငေါကဲ့အယ် စီမ်ညူကဲ့အယ် လျှောက်တင်နော်ဟီမာ့။ 8ကိုယ်တော်ကော “နီမ်ငေါ သမီပ်ကာ့ လှည့်စားလောကား အခံနော်ထော်ရယ် လင်းကွန်နယ် လေးအောမ်ဟီးလိတ်။ တီတ်ဆာဖူမ်ငေါ ငါကာ နံမယ်လည် သုံးနော အယောင်ဆောင်နောကဲ့အယ် ‘ငါကော မေရှိယ ထာမာ့’ နောက် ‘အချိန်ထုတ်ပီပ်’ ငေါကဲ့အယ် ငေါဟိကာ။ အင်းမာဟီမ်နာပ်သယ် ယုံနော်ဟီရာ့။ 9နီမ်ငေါ စစ်ပွဲဖူမ်နောက် တော်လှန် ပုန်ကန်နော့ကာသတင်းဖူမ်နယ် သပ်မူဝမ်နော် ကစာပ်ချီရာ့ပ်။ မဟာအောမ်ကယ်လိုးငေါနော အင်းကာအရာဖူမ်ငေါ အရာမ်ထာရိကား ထာမာ့။ အင်းညယ်ငေါဝမ်ရီ အင်းကာကော ကမ္ဘာကြီးကာ့ အဆုံးသတ် ဟီပ်ခူအူမ်း။ 10လူမျိုးတစ်မျိုးနောက်တစ်မျိုး နိုင်ငံတစ်နိုင်ငံနောက် တစ်နိုင်ငံ စစ်ဖြစ်သောဟိကာ။ 11နေရာအနှံ့ပြားပါအာ ငြီမ်းဆန်နောတင်းငါးဖူမ်၊ ရောက်ကားအူကား ငတ်သောကား၊ ကပ်ရောဂါ ဆိုက်သောကားဖူမ် ကြုံနောဟီးထော်ပ်ကား။ ဟမောက်စုတ်အားရီး ထူးဆန်းနောကဲ့အယ် ကစာပ်မီကာ နိမိတ်လက္ခဏာဖူမ် ပေါ်လိကား။ 12အင်းညယ်ငေါဝမ်ရီ အင်းကာအဖြစ်ပျက်ဖူမ် အထာကြီစ်သယ် တီတ်ဆာလာပ်ကော ငါကာကြောင့်နယ် နီမ်နယ် လင်ကဲ့အယ် နှိပ်စာပ်သောကဲ့အယ် ဓမ္မာရုံဖူမ်ငါး စွပ်စွဲလောကဲ့အယ် ထောင်ငါး စာမ်းဟီးရာမ်ကား။ ဘုရင်နောက် အုပ်ချုပ်သောကားဟီမ်နာပ်ကာမန်းနား ကော်ကဲ့အယ် စစ်ဆေးလောကားဖူမ်ရီး ကြုံနောဟီးထော်ပ်ကား။ 13အင်းညယ်ငေါဝမ်ရီ အင်းကာကော ငါကာအကြောင်းနယ် သက်သေခံနောတီမ် အခွင့်အရေး ထာရီပ်ကား။ 14အင်းသယ် ကိုယ်ကာနောက်ကိုယ် မညယ်ကာကွယ်လောကဲ့အယ် သပေါက်ထော်ပ်ကားလည် စိုးရိမ်နော်ဟီရာ့။ 15မဟာအောမ်ကယ်လိုးငေါနော နီမ်ငါ ရန်သူလာပ်ကော နီမ်နယ် အညာမ်းနောဟာမ်းရင်ကွန်နယ် အင်းညယ်အဟီပ်ရီ နီမ် မှားလောမာ့ ငေါကဲ့အယ် အငေါရင်ကွန်နယ် နီမ်နယ် မညယ်သပေါက်ထာမ်းထော်ပ်ကားငေါကား ဉာဏ်ပညာဖူမ်နယ် နီမ်ဟနန်း ငါကိုယ်တိုင်အိကား။ 16နီမ်ငါ အော်ပ်ဝါ၊ အန်းချန်နရှီ၊ ဆွေမျိုး၊ မိတ်ဆွေဖူမ်ကိုယ်တိုင်ဟာမ်း နီမ်နယ် သစ္စာဖောက်သောဟိကာ။ နီမ်ပါအာမာ့ ကြအာကော ကတ်ရှီးကား ခံနောထော်ပ်ကား။ 17ငါကာတွက်ကြောင့်နယ် တီတ်ဆာတိုင်းငေါ နီမ်နယ် ယူနီဟိကာ။ 18အင်းညယ်ငေါဝမ်ရီ နီမ်ငါ ဟလာမ်းဟူပ်စုတ်အားမာ့ ဟောသား သာဟာဟာမ်း ပျက်စီးလောထော်ပ်ကားယို။ 19ခက်ခဲလောကားအချိန်နောက် ရင်ဆိုင်နောထော်မာ့ငေါရီး ငါလည် ယုံကြည်လောကားလည် လက်လျှော့လောဟီးရာ့။ အင်းညယ်ငေါက်သော် နီမ်ငေါ နိစ္စထာဝရအသက်သယ် လူဟိကာ” ရယ် မိန့်နောမာ့။ 20“ဂျေရုဆလင်မြို့လည် ရန်သူစစ်သားဖူမ် ဝိုင်းနောကဲ့အယ် လင်းငါးလည် ယူပ်မူဝမ်းနော အင်းမာမြို့ကော ပျက်စီးလောနိက်ပန်း ငေါကားလည် မီမ်းဟော်ဟီလိတ်။ 21အင်းမာအချိန် ထုတ်ပီပ်သော် ယုဒပြည်ပါအာ ငါကားကာ့ တီတ်ဆာဖူမ် တောင်စုတ်အား ကာပ်ချေဟီးလိတ်။ မြို့နားငါကားတီတ်ဆာဖူမ်ရီး မြို့ပြာန်ငါ ပူပေးဟီးရာမ်နိတ်။ ထိန်ငါး လင်ဟီးငါး တီတ်ဆာလာပ်ရီ မြို့ဝါး လာမ်ဟီရာ့။ 22မဟာအောမ်ကယ်လိုးငေါနော အင်းမာ မာန်းရာပ်ကော် ဂျေရုဆလင်မြို့ဝါးမာ့ တီတ်ဆာဖူမ်နယ် အပြစ်အိကား ထာကယ်အယ် ပရောဖက်သာပ်ကာ့ ကျမ်းစာပါအာ ရေးလောပေးကား အကြောင်းဖူမ် အမှန်တကယ် ထာရီပ်ကား ထာမာ့။ 23အင်းမာချိန်နယ် အင်းမာဒေသပါအာမာ့ တီတ်ဆာဖူမ်အားလုံးငေါ ဆင်းရဲဒုက္ခတုန်းဖူမ် ခံစားလောထော်ပ်ကား ထာကယ်အယ် ဘုရားရှင်ငေါ် အင်းမာတီတ်ဆာလာပ်သယ် ပြင်းနောတင်းငါး အပြစ်အိကားသယ်မာ့ ပူစ်ကာမ်ငါးယာပ်ရှီဖူမ်နောက် ဆာစောက်ရှီစောက်ကားအရွယ် အမေ လာပ်ခနန်း ဆိုးလောဟန်ဆုံး ထာမာ့။ 24အင်းမာ့တီတ်ဆာပါအာမာ့ ကြအာကော တာမ်နောက် ဝမ်းကဲ့အယ် ကတ်ရှီးကား ခံနောထော်ပ်ကား။ အခြားဟီမ်နာပ်သယ်ရီး ထောင်သားအဖြစ် အခြားတိုင်းပြည်ပါအာ လင်ကဲ့အယ် ကော်ကား ခံနောထော်ပ်ကား။ ဂျူးလူမျိုးအဟီပ်ကာ တီတ်ဆာဖူမ်ငေါ ဂျေရုဆလင်မြို့လည် သိမ်းနောကဲ့အယ် ဘုရားရှင် ခွင့်အီပေးကား အချိန်ထုတ်ကွန်နယ်အထိ အင်းမာ့မြို့ဝါးမာ့ တီတ်ဆာလာပ်သယ် ဖိနှိပ်ချုပ်ချယ်လော်ဟိကာ” ငေါကဲ့အယ် မိန့်နောမာ့။ 25“စမီစ်၊ ဆသားနောက် ကြယ်ဖူမ်ပါအာ ထူးဆန်းနောကား နိမိတ်လက္ခဏာဖူမ် ပေါ်လောရီပ်ကား။ ပင်လယ်ကာ့ လိုင်းသံဖူမ်ကြောင့်နယ် ကမ္ဘာပေါ်ဝါးကာ တီတ်ဆာတိုင်းငေါ နီပ်ကဲ့အယ် ကစာပ်ချီကယ်အယ် မဟာအောမ်ထော်ပ်နာ့ဟာမ်း အမီမ်းဟော်စောမ်ရယ် လင်းဟိကာ။ 26ဟမောက်စုတ်အားမာ့ အရာအားလုံးငေါ မူလနေရာပါအာအယ် နေရာရွေ့လာမ်ကယ်မာ့ နောက်သယ်ကာပ်ဝါ့ ထာရီပ်ကား ဘေးအန္တရာယ်လည် ယူပ်မူကယ်မာ့ တီတ်ဆာလာပ်ကော ကစာပ်တင်ကယ်အယ် သတိလစ်သောဟီးဟူမ်မာန်ကား။ 27အင်းမာနောက်သယ် တီတ်ဆာကာ့ဆာကော တန်ခိုးတော်ဖူမ်၊ ဘုန်းတန်ခိုးတော်ဖူမ် ထွန်းလင်းတောက်ပါးလောစာပ်ရယ် ဟလာမ်းဟီစ်ကြာပ်ကြားပါအာအယ် ကြွလီကာလည် တီတ်ဆာဖူမ် ယူပ်မူဟီးမုကား။ 28အင်းသယ် အင်းကာ ကစာပ်မီကာဖူမ် စားလောကဲ့အယ် ထာရီကားအချိန်ငါ ဘုရားရှင်ငေါ် နီမ်နယ် ဒုက္ခဆင်းရဲ ပါအာအယ် ကယ်တင်နောကိုက်ပန်းသယ်မာ့ စာပ်ကဲ့အယ် ဟလာမ်းဟူပ်သယ် ငါမ်းပေးဟီးလိတ်” ငေါကဲ့အယ် မိန့်နောမာ့။ 29စီးရာပ်သော် ကိုယ်တော်ကော ဟီမ်နာပ်သယ် ပုံဥပမာ ကြအာလည် မိန့်နောကားကော“ ဆငြီမ်းတွန်နောက် အခြားတွန်ဖူမ်နယ် ယူဟီးလိတ်။ 30သလပ်နူန်နောဖူမ် ပူရီကားလည် ယူပ်မူဝမ်းနော နွေရာသီ ထုတ်အီကိုက်ပန်း ငေါကားလည် အလိုလို မီမ်းဟော်ဟီမာ့။ 31အင်းမာတိုင်းမန်း ရာငါမိန့်နီကာ့ အင်းကာအရာဖူမ် ထာရီကားလည် နီမ်ယူပ်မူဟီးရာမ်းနော ဘုရားရှင်ငါ သာသနာတော် ထုတ်အီတီမ် ထံမီရာမ်း ငေါကားလည် နီမ် မီမ်းဟော်ဟီလိတ်။ 32ငါအမှန်နယ် ငေါ့နာပ်။ ရာအသက်ဆိုင်းကဲ့အယ် လင်းငါးကာ တီတ်ဆာဖူမ်အားလုံး အရှီးကြီစ်သယ် အင်းကာ အဖြစ်အပျက်ဖူမ် အကုန်လုံး ထာရီပ်ကား ထာမာ့။ 33ဟမောက်နောက် ကာကော ထာဝရရယ် တည်လောကဲ့လင်းဟပ်ကာအဟီပ်ရီ ငါသပေါက်ကားဖူမ်ငေါ အမြဲတမ်း တည်လောကဲ့လင်းဟပ်ကာ ထာမာ့”။ 34“အင်းသယ် ရောက်ကားအူကား ပွဲအောမ်မာန်၊ မူးလောညာပ်အာမ်၊ ဘဝဟနန် ပူလောဝါမ်ဖူမ်နောက် နီမ်ငါအချိန်ဖူမ်နယ် အဆွန်စီမ်ကုန်နယ် လေးအောမ်ဟီးလိတ်။ အင်းမာညယ် အချိန်ဆွန်ကဲ့အယ် လင်းမန်းနော ထောင်ချောက်မိလောကယ်ညယ် နီမ်အမသာပ်ပေကာ အချိန်နယ် ငါ လီဟာမ်းငါးအခါလည် နီမ်ငေါ အရာမ်သင့် ထာဟိကာယို။ 35မဟာအောမ်ကယ်လိုးငေါနော အင်းမာ မာန်းရာပ်ကော် အင်းကာ့ကမ္ဘာမြေပါအာ လင်းဟီးကားဖူမ်အားလုံးပါအာ ထုတ်အိကားသယ်မာ့။ 36အင်းသယ် နီမ်ရီး ထာရီပ်ကား အရာဖူမ်ပါအာအယ် လောပ်သော်ကယ်အယ် တီတ်ဆာကာ့ဆာမန်းနား စာပ်ကဲ့လင်းရင်ကွန်နယ် အချိန်တိုင်းရယ် လေးအောမ်စာပ်ရယ် အမြဲတမ်း ဆုစိမ်ကဲ့အယ် လင်းဟီးလိတ်” ငေါကဲ့အယ် မိန့်နောမာ့။ 37အင်းမာစီးရာပ်သော် ကိုယ်တော်ကော နိတ်ခူလည်ငေါက်သော် ဗိမာန်တော်ဝါမ်းပါအာ ဟောပြောသွန်သင်နောကဲ့အယ် နန်ကြည်ဟန်ထုတ်ပီပ်သော် မြို့နားအယ် ပူရီကဲ့အယ် နန်ကြည်အချိန်နယ် သံလွင်တောင်စုတ်အားဟာ ဆွန်စီမ်းမာ့။ 38တီတ်ဆာဖူမ်ငေါ ကိုယ်တော်ကာ တရားဖူမ်နယ် သပ်တီမ် သယ်လည်စောစီ ဗိမာန်တော်ဝါမ်းငါး လီဟီးမာ့။
Currently Selected:
Luke 21: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
