Luke 20
20
1ရာပ်အာလည် ကိုယ်တော်ယေရှုကော တီတ်ဆာလာပ်သယ် ဗိမာန်တော်ဝါမ်းနား ဘုရားရှင်ငါ မင်္ဂလာသတင်းကလန်ဖူမ်နယ် ဟောလောကဲ့လင်းငါးချိန်နယ် ပုရောဟိတ်အကြီးအကဲဖူမ်၊ ကျမ်းထောကား ဆရာဖူမ်နောက် ဂျူးလူမျိုး အသက်တုန်းငါးတီတ်ဆာဖူမ်ငေါ ထုတ်အီဟီးကဲ့အယ် 2ကိုယ်တော်လည် “အင်ကာဖူမ်နယ် မဟာအခွင့်အာဏာနောက် နာန်အောမ်ငါးသယ်။ အင်းမာအခွင့်အာဏာလည် နာန်နန်း ဟင်အီပေးကားသယ်” ငေါကဲ့အယ် စီမ်ညူဟီးမာ့။ 3အင်းမာချိန်နယ် ကိုယ်တော်ကော “ငါကော နီမ်နယ် မေးခွန်းကြအာ စီမ်ညူနာပ်။ နီမ် ဖြေလောဟီးလိတ်။ 4ယောဟန်ငေါ် တီတ်ဆာလာပ်သယ် ဝေးငဟူပ်ကာမင်္ဂလာ အီကားကော ဟင်အခွင့်အာဏာအီပေးကားသယ် ဘုရားရှင်ပါအာအယ်နာန် အင်းညယ်အဟီပ်ရီ တီတ်ဆာ ဟော်ဝါဟော်ဝါပါအာအယ်နာန်” ငေါကဲ့အယ် စီမ်ညူဝမ်မာ့။ 5အင်းမာချိန်နယ် ဟီမ်နာပ်ကော အချန်းချန်း ဆွေးနွေးလောဟီးကဲ့အယ် “ဟီမ်ငါ အခွင့်အာဏာကော ဘုရားရှင်ပါအာအယ် ငေါကဲ့အယ် ဖြေလောဝါပ်သော် ကိုယ်တော်ကော ‘အင်းညယ်ငေါက်သော် မဟာအောမ်ကယ် နီမ်ငေါ ယောဟန်နယ် အယုံနော်ဟီကာသယ်’ ငေါကဲ့အယ် ငေါဟာမ်းကာ။ 6တီတ်ဆာဟော်ဝါဟော်ဝါပါအာအယ် ငေါကဲ့အယ် ဖြေလောရီး တီတ်ဆာလာပ်ကော ယောဟန်နယ် ပရောဖက်တစ်ပါးထာမာ့ ငေါကဲ့အယ် ယုံကြည်လောဟီးကား သယ်မာ့ အလေလည် သလောင်ဆီနောက် ရှီးကွန်းနယ် ကမာတ်ချိကာ” ငေါကဲ့အယ် ငေါဟီးမာ့။ 7အင်းသယ် ဟီမ်နာပ်ကော ယောဟန် ဝေးငဟူပ်ကာမင်္ဂလာအီတီမ် အခွင့်အာဏာ ဟင်ပါအာအယ် လူရီမာ့ ငေါကားလည် မီမ်းဟော်ဝို ငေါကဲ့အယ် ညာမ်းနောဟီးမာ့။ 8အင်းမာချိန်နယ် ကိုယ်တော်ယေရှုကော “အင်းညယ်ငေါက်သော် ငါ အင်းကာညယ်အောမ်တီမ် အခွင့်အာဏာ ဟင်အီပေးမာ့ ငေါကားလည် နီမ်နယ် ဖြေလော့ကာယို” ငေါကဲ့အယ် မိန့်နောမာ့။ 9စီးရာပ်သော် ကိုယ်တော်ယေရှုကော တီတ်ဆာ ပရိသတ်ဖူမ်နယ် ပုံဥပမာ ကြအာလည် မိန့်နောကားကော “တီတ်ဆာဟော်ဝါကော စပျစ်ခြံ ခြံနာ့လည် စေါက်စီးကဲ့အယ် ဟီမ်ငေါ အင်းမာခြံနယ် ခြံအငှားသမားကြအာလာပ်သယ် ငှားလောကဲ့အယ် မာပ်မာပ်စာပ်စာပ်ရယ် ခရီးပူပေး ရာမ်မာ့။ 10စပျစ်ရှီစ်ရှီ ပေါ်လီကာချိန်နယ် ဟီမ်ငေါ အစေခံဟော်ဝါလည် သာပ်ကဲ့အယ် စပျစ်ခြံနားအယ် ပူရီကား စပျစ်ရှီစ်ရှီကာ ဝေစုလည် လာစီမ်းငါမာ့။ အင်းညယ်ငေါဝမ်ရီ အင်းမာအစေခံနယ် ခြံငှားလာပ်ကော် သမ်းကနာကယ်အယ် မဟာလည်ဟာမ်း အအီရယ် ငါပ်ပူဟာမ်းမာ့။ 11ရာကာပ်ဝါ့ ခြံပိုင်ရှင်ငေါ နောက်သယ် အစေခံဟော်ဝါလည် သာပ်ထာမ်းမာ့။ အင်းညယ်ငေါဝမ်ရီ ခြံငှားလာပ်ကော် အင်းမာဟီမ်နယ် သမ်းကနာဟီကယ်အယ် မန်းကတန်ကွန်နယ် အောမ်စီးမားလည် မဟာလည်ဟာမ်း အအီရယ် သာပ်ထာမ်းငါမ်မာ့။ 12နောက်သယ်ကာပ်ဝါ့ ခြံပိုင်ရှင်ငေါ နောက်ထပ် အစေခံဟော်ဝါလည် သာပ်ထာမ်းညာ ဟီမ်နာပ်ကော အင်းမာ အစေခံနယ်နား အနာလူကွန်းနယ် သမ်းကနာကယ်အယ် စပျစ်ခြံပြာန်ငါ ငါပ်ပူဝါမ်မာ့။ 13အင်းမာချိန်နယ် စပျစ်ခြံပိုင်ရှင်ငေါ ‘ငါမညယ် အောမ်ထော်ပ်ကားသယ်။ ငါမူမ်းထော်ကာ ငါကာ ဆာလည် သာပ်လာမ်နာပ်။ ခြံငှားလာပ်ကော် ငါ့ဆာလည် ယူပ်မူဟီးရာမ်းနော လေးစားလောဟိနာပ်’ ငေါကဲ့အယ် တွေးလောကဲ့အယ် ဟီမ်ငါဆာလည် သာပ်လာမ်မာ့။ 14အင်းညယ်ငေါဝမ်ရီ ခြံငှားလာပ်ကော် ခြံပိုင်ရှင်ငါဆာ လီကားလည် ယူပ်မူဝမ်စန်းနော ‘အင်းကာဟီမ်ငေါ အင်းကာခြံနယ် အမွေလုကားဟီမ်ထာမာ့။ ဟီမ်လုကား အမွေကော် အလေဟနန်း ထာရီကွန်းနယ် ဟီမ်နယ် ကတ်ရှီးဟီးရာမ်မယ်’ ငေါကဲ့အယ် အချန်းချန်း ငေါဟီးကဲ့အယ် 15ဟီမ်နာပ်ကော အင်းမာ့စပျစ်ခြံပိုင်ရှင်ငါ ဆာလည် စပျစ်ခြံပြာန်ငါ တူန်းပူကယ်အယ် ကတ်ရှီးဟီးရာမ်မာ့။ အင်းညယ်ငေါက်သော် စပျစ်ခြံပိုင်ရှင်ငေါ ဟီမ်နာပ်သယ် မဟာအောမ်ဟပ်ကားသယ်။ 16စပျစ်ခြံပိုင်ရှင်ငေါ ဟီမ်ကိုယ်တိုင် လီကဲ့အယ် စပျစ်ခြံငှားလာပ်သယ် ကတ်ရှီးရာမ်ကား။ စီးရာပ်သော် စပျစ်ခြံနယ်ရား အခြားတီတ်ဆာလာပ်ခနန်း အီဟာမ်းကာ” ငေါကဲ့အယ် မိန့်နောမာ့။ သပ်မူကာ ဟီမ်နာပ်ရီး “အင်းကာ့ ကိစ္စကော တိုက်မာဟာမ်း ထာရီစီမ်းကာယုတ်” ငေါကဲ့အယ် ငေါဟီးမာ့။ 17အင်းညယ်ငေါဝမ်ရီ ကိုယ်တော်ကော ဟီမ်နာပ်သယ် ယူစာပ်စာပ်ရယ် “‘ကျဉ်းစာကားဟီမ်နာပ် အလိုလော်ကယ် သက်ပေးကား သလောင်ဆီကော အင်းမာကျဉ်းငါ အရေးပါလောဟန်ဆုံး သလောင်ဆီ ထာရီမာ့’ ငေါကဲ့အယ် ကျမ်းစာပါအာ ရေးလောပေးကားကော မဟာလည် ငေါကာပ်ကာသယ်။ 18အင်းကာ့ သလောင်းဆီaစုတ်အား လက်စာပ်အာမ်ငါ ဟီမ်နာပ်ကော သာမ်ငါစီ အာပ်လာမ်ကား။ အင်းကာ့ သလောင်ဆီရီး ဟော်ဝါဟော်ဝါကာ စုတ်အား လက်စာပ်ပါတ်သော် အင်းမာဟီမ်ငေါ မုတ်စာပ်ကလယ်ကယ်အယ် လင်းဟူမ်မာန်ကား” ငေါကဲ့အယ် မိန့်နောမာ့။ 19ပုရောဟိတ်အကြီးအကဲဖူမ်၊ ကျမ်းထောကား ဆရာဖူမ်ငေါ ကိုယ်တော်ကော ဟီမ်နာပ်သယ် ရည်ညွှန်းနောကဲ့အယ် အင်းကာ့ ပုံဥပမာလည် မိန့်နောမာ့ ငေါကားလည် မီမ်းဟော်ကယ်မာ့ ဟီမ်နာပ်ကော ကိုယ်တော်လည် ချက်ချင်းညယ်ဟာမ် လင်ဟီးကာပ်ရီ ဟီမ်နာပ်ကော တီတ်ဆာ ပရိသတ်ဖူမ်နယ် ကစာပ်ကဲ့လင်းဟီးကယ်မာ့ လင်ဟီယို။ 20အင်းသယ် ဟီမ်နာပ်ကော ကိုယ်တော်လည် ထံထံညယ် ထက်ကဲ့အယ် အမှားကြအာကြအာ သပေါက်ကွန်းနယ် အောမ်ကဲ့အယ် ရောမအုပ်ချုပ်သောကားဟီမ်နာပ်ပါအာ လင်ကဲ့အယ် အပ်သောရင်ကွန်နယ် ဖြောင့်မတ်သောကားတီတ်ဆာညယ် ဟန်ဆောင်နောပေးကား သူလျှိုလာပ်သယ် ကိုယ်တော်ပါအာ သာပ်ချီးရာမ်မာ့။ 21အင်းမာ့ တီတ်ဆာကလန် ဟန်ဆောင်နောကား သူလျှိုဖူမ်ငေါ ကိုယ်တော်လည် “ဆရာ၊ ဆရာကာ့ သွန်သင်မှုကော မှန်ကန်နောကားလည် ဟောလောကဲ့အယ် ဟင်နယ်ဟာမ်း မီပ်မန်းအလိုက်သောရယ်၊ ဘုရားရှင်ငါ လမ်းစဉ်နယ် အမှန်အတိုင်းရယ် ဟောပြောသွန်သင်နောမာ့ ငေါကားလည် အလေဆူလာပ် မီမ်းဟော်မာ့။ 22အင်းသယ် ရောမဘုရင်ကြီးလည် အခွန်ဆက်သလောကားကော တရားတော်နောက် ညီလောမာ့ ညီလို ငေါကားလည် အလေဆူလာပ်သယ် ဆောမ်းနိတ်” ငေါကဲ့အယ် လျှောက်တင်နော်ဟီမာ့။ 23ကိုယ်တော်ကော အင်းမာဟီမ်နာပ်ကာ့ ပရိယာယ်လည် မီမ်းဟော်ကယ်မာ့ 24အင်းမာဟီမ်နာပ်သယ် “ငါနန်း ဒေနာရီဒင်္ဂါး ပါတ်အာလည် ပြလောလိတ်။ အင်းမာ ဒေနာရီဒင်္ဂါးပါအာ ဟင်ငါပုံနောက်နံမယ်ပါလောသယ်” ငေါကဲ့အယ် စီမ်ညူဝမ်မာ့။ အင်းမာချိန်နယ် အင်းမာဟီမ်နာပ်ကော “ရောမဘုရင်ကြီးကာ နံမယ်နောက်ပုံ ပါလောမာ့” ငေါကဲ့အယ် ဖြေလောဟာမ်းမာ့။ 25အင်းမာချိန်နယ် ကိုယ်တော်ကော “ရောမဘုရင်ကြီးနောက် ဆိုင်နောကား အရာလည် ရောမဘုရင်ကြီးနန် အီဟီးလိတ်။ ဘုရားရှင်နောက် ဆိုင်နောကား အရာဖူမ်နယ် ဘုရားရှင်နန်း ဆက်သလောဟီးလိတ်” ငေါကဲ့အယ် မိန့်နောမာ့။ 26ဖြောင့်မတ်သောကားတီတ်ဆာညယ် ဟန်ဆောင်နောကား သူလျှိုလာပ်ကော တီတ်ဆာပရိသတ်သာပ်ကာ မန်းနား ကိုယ်တော်လည် အမှားသပေါက်ကွန်းနယ် အောမ်ငါးအလူရယ် လင်းငါးပြာန်နယ် ကိုယ်တော်ဖြေလောဟာမ်းငါးလည် အန်းနောကဲ့အယ် ဆီမ်ရှင်းရှင်း လင်းဟီးရာမ်မာ့။ 27တီတ်ဆာဖူမ်ရှီးစီးကဲ့အယ် အသက်ဆိုင်းဟာမ်းငါးလည် အယုံကြည်လောကား ဇဒ္ဒုကဲb ကြအာကော ကိုယ်တော်ပါအာ လီကဲ့အယ် 28“ဆရာ၊ မောရှေဥပဒေကျမ်းပါအာ ‘အိက်ငါကား တီတ်ဆာဟော်ဝါကော ရှိတ်ဆာအပေါ်ရယ် ရှီးရာပ်သော် နရှီကော် ဟီမ်ငါအန်းချန်ငါ အမွေဆက်ခံနောကား ဆဟာ ငါကွန်းနယ် ရှီးရာကာ့ အန်းချန်ငါ အိက်သယ် လက်ထပ်သောထော်မာ့။ ဟီမ်ငါအန်းချန်ငါ မျိုးဆက်ကျန်နောကွန်းနယ် ဟီမ်နာပ်ကယ်ဟောကာ ဆာလည် ရှီးရာကာ့ ဟီမ်ငါအန်းချန်ငါ ဆာအဖြစ် သက်မှတ်သောပေးထော်မာ့’ ငေါကဲ့အယ် ရေးလောပေးမာ့။ 29အင်းညယ်ငေါက်သော် တစ်ခါလည် အန်းချန်နရှီ ခုနစ်ယောက် ငါကဲ့အယ် တုန်းဟန်ဆုံး အန်းချန်ငေါ် ကျေးမီပ်စေါက်အာမ်ရီး ရှိတ်ဆာအလူရယ် ရှီးပေးရာမ်မာ့။ 30ဒုတိယ တုန်းဟန်ဆုံးငေါ အင်းမာ မုဆိုးမလည် လက်ထပ်သာမ်ရီ ရှိတ်ဆာအပေါ်ရယ် ရှီးဟာမ်းမာ့။ 31စီးရာပ်သော် တတိယဟော်ဝါရီး အင်းမာအတိုင်းညယ် ထာဝါမ်ကဲ့အယ် အန်းချန်နရှီ ခုနစ်ယောက်ကော အင်းမာမုဆိုးမနောက် ကျေးမီပ်စေါက်စီးကဲ့အယ် ရှီးဟူမ်မာန်မာ့။ 32နောက်ဆုံးငါးကော အင်းမာမုဆိုးမရီး ရှီးရာမ်မာ့။ 33အင်းညယ်ငေါက်သော် အင်းမာ ယာပ်ရှီကော အန်းချန်နရှီ ခုနစ်ယောက်စလုံးနောက် လက်ထပ်တီကာသယ်မာ့ ဘုရားရှင်ငေါ် ဟီမ်နာပ်သယ် ရှီးပါအာအယ် အသက်ဆိုင်းဟာမ်းစီမ်းမန်းနော အင်းမာ မုဆိုးမကော ဟင်ငါအိက် ထာ့ကားသယ်” ငေါကဲ့အယ် စီမ်ညူမာ့။ 34အင်းမာချိန်နယ် ကိုယ်တော်ကော “အင်းကာ့ လောကီသားဖူမ်ငေါ် လက်ထပ်သောကားဖူမ်၊ အီရောက်ကားဖူမ် ငါဟီးမာ့။ 35အင်းညယ်ငေါဝမ်ရီ ရှီးပါအာအယ် အသက်ဆိုင်းဟာမ်းစီမ်းကဲ့အယ် ရွှေမြို့တော်ဝါ လင်းတီမ် ထိုက်တန်နော်ကာ ဟီမ်နာပ်ကော လက်ထပ်သောကားဖူမ်၊ အီရောက်ကားဖူမ် အောမ်ဟပ်ကား အဟီပ်ကယ်ညယ်။ 36ဟီမ်နာပ်ကော နောက်သယ်ကာပ်ဝါ ရှီးကားရီး ငါစောမ်းဟပ်ကာ ဟီပ်ယို။ မဟာအောမ်ကယ်လိုးငေါနော ဟီမ်နာပ်ကော အရှီးရင်ငါကာ့ ဟမန်းနာပ်နောက် တူလောမာ့။ ဟီမ်နာပ်ကော ရှီးပါအာအယ် အသက်ဆိုင်းဟာမ်းငါးဟီမ်နာပ် ထာကယ်မာ့ ဘုရားရှင်ငါ ရှိတ်ဆာဖူမ်ရီး ထာဟီမာ့။ 37ဝမ်လူပ်ကား ပေါက်ဆော့တ်တာ အကြောင်းရေးလောပေးကား ကျမ်းစာပါအာ မောရှေကော် ‘ဘုရားရှင်ငေါ် မယားမားလည် ရှီးစီးကားကာ အာဗြဟံ၊ ဣဇက်၊ ယာကုပ်သာပ်ကာ့ ဘုရား ထာမာ့’ ရယ် ဟီမ်နောက်ဟီမ် ငေါကဲ့အယ် ရှီးကားဟီမ်နာပ် ပြန်နောကဲ့ဆိုင်းဟာမ်းငါးအကြောင်းနယ် ငေါပေးကား ထာမာ့။ 38ဘုရားရှင်ငေါ် ရှီးကားဟီမ်နာပ်ကာ့ ဘုရားဟီပ်ယို။ ဆိုင်းကဲ့လင်းငါး ဟီမ်နာပ်ကာ့ ဘုရား ထာမာ့။ ငေါကာပ်ကာကော် အင်းမာဟီမ်နာပ်အားလုံးငေါ ဘုရားရှင်နောက်တူတူ အသက်ဆိုင်းကဲ့ လင်းငါး” ငေါကဲ့အယ် မိန့်နောမာ့။ 39အင်းမာချိန်နယ် ကြအာကာ့ ကျမ်းထောကား ဆရာဖူမ်ငေါ “ဆရာ၊ ဆရာကာ့ အဖြေကော် မှန်ကန်နောမာ့” ငေါကဲ့အယ် လျှောက်သောဟီးမာ့။ 40အင်းမာနောက်သယ် ဟင်ဟာမ်း ကိုယ်တော်လည် မေးခွန်းဖူမ် စီမ်ညူဟီးစာပ်စော်မန်။ 41အင်းမာနောက်သယ် ကိုယ်တော်ကော အင်းမာနေရားမာ့ တီတ်ဆာလာပ်သယ် “ကျမ်းထောကား ဆရာလာပ်ကော မေရှိယလည် ဘုရင်ဒါဝိဒ်ကာ ဆာရယ် ငေါဟီးမာ့။ အင်းမာလည် နီမ် မညယ်နားလည်လော်ဟီသယ်။ 42ဆာလံကျမ်းပါအာ ဘုရင်ဒါဝိဒ် ကိုယ်တိုင်ငေါ
ဘုရားရှင်ငေါ် ငါကာ့ အရှင်နယ် 43‘နာန်ငါ ရန်သူလာပ်သယ် နာန်ငါ သာသဖာတောမ်နား သာသာမ်ငါးကာ့ ခုံထာကွန်နယ် ငါချလောပေး ကားအချိန်ထိ ငါကာ့ လက်ယာဘက်လာ ထောင်းနိတ်’ ငေါကဲ့အယ် ငေါရီမာ့။ 44အင်းညယ်ငေါက်သော် ဘုရင်ဒါဝိဒ်ကော မေရှိယလည် ‘ငါကာ့ အရှင်’ ငေါကဲ့အယ် ငေါကားသယ်မာ့ မေရှိယကော ဒါဝိဒ်ကာမျိုးဆက် မညယ် ထာရင်နာန်ကားသယ်” ငေါကဲ့အယ် မိန့်နောမာ့။ 45ကိုယ်တော်ကော တီတ်ဆာပရိသတ်ဖူမ် သပ်ကဲ့လင်းငါးချိန်နယ် တပည့်လာပ်သယ် 46“ကျမ်းထောကား ဆရာဖူမ်နယ် သတိအောမ်ဟီးလိတ်။ ဟီမ်နာပ်ကော ဆာမ်ဆူန်စုတ်ဝိဝီသယ် ဖူမ်ဟီးကဲ့အယ် ဟာညာပ်မူကားလည် ကြိုက်သောဟီးဟာမာ့။ ဈေးရားမာ့ တီတ်ဆာတိုင်းငါ လေးလေးစားစားရယ် နှုတ်ဆက် ကြိုဆိုလောကားလည်ရီး ကြိုက်သောဟီးမာ့။ ဓမ္မာရုံဖူမ်ပါအာရီ မန်းနား ထောင်းမူကာလည် ကြိုက်သောဟီးမာ့။ ရောက်ကားအူကားပွဲဖူမ်ပါအာရီ ကလန်ဟန်ဆုံး စာပွဲဝိုင်းငါး ထောင်းငါးလည် ကြိုက်သောဟီးမာ့။ 47မုဆိုးမလာပ်ကာ့ ပစ္စည်းဥစ္စာဖူမ်နယ်ရား ပက်သော်ညာပ်ကယ်အယ် သိမ်းနောဟီးဟာကယ်အယ် ဆုစိမ်ငါးအချိန်နယ်ရီး စုတ်စုတ်ရယ် ဟန်ဆောင်နောကဲ့အယ် ဆုစိမ်ဟီးဟာမာ့။ ဘုရားရှင်ငေါ် အင်းမာဟီမ်နာပ်သယ် ပြင်းထန်နော်ကာ အပြစ်သယ် အိကား ထာမာ့” ငေါကဲ့အယ် မိန့်နောမာ့။
Currently Selected:
Luke 20: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
