Luke 19
19
1စီးရာပ်သော် ကိုယ်တော်ယေရှုကော ယေရိခေါမြို့လည် ပလာပ်ကဲ့အယ် ကြွလာမ်မာ့။ 2အင်းမာမြို့ဝါး ဇက္ခဲကော်ကားကာ တီတ်ဆာဟော်ဝါ လင်းမာ့။ ဟီမ်ငေါ အခွန်ကောက်တာဝန်ခံဟော်ဝါ ထာကယ်အယ် တအားဆွာမ်းတင်းငါးကာဟီမ် ထာမာ့။ 3ဟီမ်ငေါ ကိုယ်တော်ယေရှု ဟင်ထာမာ့ငေါကားလည် ယူပ်မူကာပ်ရီး ဟီမ်ငါအရပ်ကော တောမ်ကဲ့အယ် ကိုယ်တော်ပါအာ တီတ်ဆာဖူမ် ဝိုင်းနောကဲ့အယ် လင်းဟီးကားသယ်မာ့ တီတ်ဆာလာပ်သယ် ကျော်လောကဲ့အယ် အယူပ်မူရယ်လင်းမာ့။ 4အင်းသယ် ဟီမ်ငေါ ကိုယ်တော်လည် ယူပ်မူတီမ် မန်းနာကြိုလောကဲ့ ကာပ်စီးရာပ်သော် ဆငြီမ်းတွန် စုတ်အား ဟေကဲ့လင်းမာန်မာ့။ မဟာအောမ်ကယ်လိုးငေါနော ကိုယ်တော်ကော အင်းမာလမ်းနယ် ပလာပ်ကယ်အယ် လာမ်ကားသယ်မာ့ ထာမာ့။ 5ကိုယ်တော် အင်းမာနေရား ထုတ်အာမ်စန်းနော ဇက္ခဲလည် ယူဟေကဲ့အယ် “ဇက္ခဲ၊ အမြန် ဆာပ်လီစာပ့်။ ယေမာပ် နာန်ငါကျဉ်းမား ငါတည်းလောပ်ကာ့” ငေါကဲ့အယ် မိန့်နောမာ့။ 6အင်းသယ် ဇက္ခဲကော ဆငြီမ်းတွန် စုတ်အားအယ် အမြန်ဆာပ်လီကဲ့အယ် ကိုယ်တော်ယေရှုလည် ပျော်ပျော်ရယ် ကြိုဆိုလောမာ့။ 7အင်းမာလည် ယူပ်မူဟီးကားကာ့ တီတ်ဆာဖူမ်ငေါ “ဟီမ်ငေါ ဒုစရိုက်သမားကာ့ ကျဉ်းမား လာမ်ကဲ့အယ် တည်းလာမာ့” ငေါကဲ့အယ် ဝေဖန်နောကဲ့ သပေါက်ချီးမာ့။ 8စီးရာပ်သော် ဇက္ခဲကော စာပ်ကဲ့အယ် ကိုယ်တော်လည် “အရှင်၊ အရှင်၊ ငါဆူပိုင်ဆိုင်နောကားဖူမ်နယ် အပေါ်ဟာကားဟီမ်နာပ်ခနန်း တစ်ဝက် ခွဲလောကဲ့အီနာပ်။ အင်းမာပြာန်နယ် တီတ်ဆာဖူမ် ပါအာအယ် မတရားစိမ်ပေးကားကာ အခွန်ဖူးဖူမ်နယ် လေးဆပိုလောကဲ့ အီဟာမ်းနာပ်” ငေါကဲ့အယ် လျှောက်တင်နော်မာ့။ 9ကိုယ်တော်ကော ဇက္ခဲလည် “နာန်ငေါ အာဗြဟံငါ မျိုးဆက် ထာကယ်မာ့ ယေမာပ်အယ် စားလောကဲ့အယ် နာန်နောက် နာန်ငါမိသားစုအားလုံးနယ် ဘုရားရှင်ငေါ် ကယ်တင်နောဝါပ်။ 10တီတ်ဆာကာ့ဆာရီး မီမ်ငါးကာ့ ဟီမ်နာပ်သယ် သမ်ကဲ့အယ် ကယ်တင်နောတီမ် ကြွလီကာထာမာ့” ငေါကဲ့အယ် မိန့်နောမာ့။ 11ဂျေရုဆလင်မြို့ဝါး ထံပီစ်သယ်မာ့ ဘုရားရှင်ငါ သာသနာတော်ကော ချက်ချင်းပေါ်လီကိုက်ပန် ငေါကဲ့အယ် မသာပ်ကဲ့အယ် တီတ်ဆာ ပရိသတ်သာပ်ကော် ကိုယ်တော် ဟောပြောသွန်သင် နောကားဖူမ်နယ် ဆက်သောကဲ့အယ် သပ်ကဲ့အယ် လင်းငါးအချိန်နယ် ကိုယ်တော်ကော ပုံဥပမာ ကြအာလည် ထပ်သောကဲ့အယ် မိန့်နောကားကော 12“တစ်ခါလည် ရာထူးကြီးလောကားတီတ်ဆာဟော်ဝါကော ဟီမ်ငါဒေသပါအာ ဘုရင်အဖြစ် တင်မြှောက်သောကား ခံနောကဲ့အယ် လီဟာမ်းငါးအခါလည် အုပ်ချူပ်သောတီမ် ဘုရင်ကြီး ငါကားကာ စာပါအာမာ့ တိုင်းပြည်ရာ လာမ်မာ့။ 13အင်းမာညယ် အလာမ်ကြီစ်ရယ် ဟီမ်ငေါ အစေခံဆယ်ယောက်သယ် ကော်ကဲ့အယ် ဟော်ဝါစီလည် ဖူးတစ်မိနာ့aစီ အီကဲ့အယ် ‘အင်းကာ ဖူးလည် အသုံးပြုလောကဲ့အယ် ငါအလီဟာမ်ဟော်ပ်ကာအချိန်ထိ အင်းမာဖူးနောက် စီးပွားသမ်ဟီးလိတ်’ ငေါကဲ့အယ် ငေါပေးရီမာ့။ 14အင်းညယ်ငေါရီး ဟီမ်ငါဒေသပါအာမာ့ တီတ်ဆာဖူမ်ငေါ အင်းမာ့ ရာထူးကြီးလောကားဟီမ်နယ် ဘုရင်ထာစီမ်ကာပ်အိုသယ်မာ သံတမန် ကြအာလည် သာပ်ကဲ့အယ် ‘ အင်းကာဟီမ်နယ် ဘုရင်အဖြစ် အလေကော် ပေးကာပ်အို’ ငေါကဲ့အယ် ဘုရင်ကြီးလည် လျှောက်တင်နော်စီမ်မာ့။ 15အင်းညယ်ငေါဝမ်ရီ ဘုရင်ကြီးကော အင်းမာ ရာထူးကြီးလောကားဟီမ်နယ် ဘုရင်အဖြစ်တင်မြောက်သောစီးရာမ်စန်နော် ဟီမ်ငါ တိုင်းပြည်ရာ လီဟာမ်းမာ့။ အင်းမာနောက်သယ် ဟီမ်ငေါ ဟီမ်ဖူးအီပေးရီကာ အစေခံဖူမ်ငေါ စီးပွားသမ်ကဲ့အယ် အမြတ်မနေလူမာ့ ငေါကားလည် မီမ်းဟော်ကာပ်ကယ် ဟီမ်ပါအာ ကော်ရီတီမ် အမိန့်အီရာမ်မာ့။ 16ပထမအစေခံငေါ ထုတ်အီကဲ့အယ် ‘အရှင်အီပေးကား အင်းကာဖူးလည် ငါဆူကော ဆယ်ဆ တိုးပွားလောကွန်းနယ် အောမ်ပေးမာ့’ ငေါကဲ့အယ် လျှောက်တင်နော်မာ့။ 17ဘုရင်ငေါ် ‘အောမ်ငါး ကလန်မာ့။ နာန်ငေါ အမှုကိစ္စဆဟာလည် သစ္စာငါကား အစေခံကလန် ထာကယ်မာ့ မြို့ဆယ်မြို့ လည် အုပ်ချုပ်ခွင့် အိကား’ ငေါကဲ့အယ် မိန့်နောမာ့။ 18ဒုတိယ အစေခံရီး လီကဲ့အယ် ‘အရှင်အီပေးကား ဖူးတစ်မိနာ့လည် ငါးဆ ပွားလီကွန်နယ် အောမ်ပေးမာ့’ ငေါကဲ့အယ် လျှောက်တင်နာန်စန်နော် 19ဘုရင်ငေါ် ‘နာန်နယ် မြို့ငါးမြို့ လည် အုပ်ချုပ်ခွင့် အိနာ့’ ငေါကဲ့အယ် မိန့်နောမာ့။ 20အခြားအစေခံငေါ လီကဲ့အယ် ‘အရှင် ၊ ငါဆူကော အရှင်ငါ ဖူးလည် ပုဝါနောက် ဒေါက်ကယ်အယ် သိမ်းနောပေးမာ့။ ပါး ယူဝမ်နိတ်။ 21အရှင်ငေါ် စည်းကမ်းကြီးလောကဲ့အယ် နာန်ပိုင်ဆိုင်နောကား ဥစ္စာအဟီပ်ရယ် သိမ်းနောကဲ့ လာပေးဟာမာ့ နာန်အစေါက်ပေကာ ရှီစ်ရှီပရှီဖူမ်နယ် လှပ်ကဲ့သိမ်းနောဟာကာ့ဟီမ်ထာကယ်မာ့ အရှင်နယ် ငါဆူကော ကစာပ်ကယ်မာ့ အင်းကာညယ် အောမ်ထော်ကားထာမာ့’ ငေါကဲ့အယ် လျှောက်တင်နောမာ့။ 22အင်းမာချိန်နယ် ဟီမ်ငေါ အစေခံနယ် ‘ဆိုးယုတ်သောကား အစေခံ၊ နာန်သပေါက်ကားအတိုင်းညယ် နာန်နယ် ငါစီရင်နောပ်ကာ။ ငါကော ငါအပိုင်နော်ကာ အရာလည် သိမ်းနောကဲ့အယ် လာဟာကဲ့အယ် ကိုယ်အစောက်ကာဖူမ်နယ် လှပ်ခါကာ စည်းကမ်းကြီးလောကားဟီမ် ငေါကားလည် မီမ်းဟော်စာပ်စာပ်ရယ် 23ငါအီပေးကား ဖူးလည် မဟာအောမ်ကယ် ဘဏ်နား အအပ်သောပေးရီကာသယ်။ ဘဏ်နား အပ်သောပေးရာပ်သော် ငါလီဟာမ်းငါးအချိန်နယ် အတိုးလုကား’ ငေါကဲ့အယ် မိန့်နာန်မာ့။ 24အင်းမာနောက်သယ် ဘုရင်ငေါ် အခြားအစေခံ နာပ်သယ် ကော်ကဲ့အယ် ‘ဟီမ်ပါအာမာ့ ဖူးလည် လာကဲ့အယ် ဖူးဆယ်မိနာ့ ငါကား အစေခံဟနန်း အီရာမ်နိတ်’ ငေါကဲ့အယ် အမိန့်အီရာမ်စန်းနော 25ဟီမ်နာပ်ကော ‘အရှင်၊ ဟီမ်ပါအာကော် ဖူးဆယ်မိနာ့ ငါစီးရာပ်’ ငေါကဲ့အယ် ပြန်နောကဲ့ လျှောက်တင်နော်ဟီမာ့။ 26အင်းမာချိန်နယ် ဘုရင်ငေါ် ‘နီမ်နယ် ငါငေါကားကော၊ မဟာမဟာ ငါကဲ့အယ် အင်းမာလည် ပွားလောကွန်းနယ် အောမ်ရင်ငါး ဟီမ်နာပ်ခနန်း ပိုလောကဲ့ အိကား။ ပွားလောကွန်းနယ် အအောမ်ရင်ငါး ဟီမ်ငေါ ဟီမ်ပါအာ ငါကားကာဖူမ်နယ်ဟာမ်း သိမ်းနောကား ခံနောထော်ပ်ကား။ 27ရာ့ ငါဘုရင်အဖြစ် အုပ်ချုပ်သောကားလည် အလာကာပ်ကား ရန်သူဖူမ်နယ် အင်းကာနေရား ကော်ဟီးရီလိတ်။ ဟီမ်နာပ်သယ် ငါကာမန်းနား ကတ်ရှီးဟီးရာမ်နိတ်’ ငေါကဲ့အယ် အမိန့်အီရာမ်မာ့” ငေါကဲ့အယ် မိန့်နောမာ့။ 28ကိုယ်တော်ကော အင်းညယ် ဟောလောစီးရာမ်စန်နော် တပည့်တော်လာပ်ကာမန်းနား ဟာကဲ့အယ် ဂျေရုဆလင်မြို့ဝါ ဆက်သောကဲ့အယ် ကြွလာမ်မာ့။ 29ဟီမ်နာပ် သံလွင်တောင်နောက် ထံဟပ်ပါအာမာ့ ဗက်ဖာဂေထိန်နောက် ဗေသနိထိန် ထံဟပ်ပါအာ ထုတ်အာမ်စန်းနော မန်းနာ လာမ်ဖာမ်းတီမ် တပည့်တော် ကယ်ဟောလည် သာပ်လာမ်မာ့။ 30ကိုယ်တော်ကော အင်းမာတပည့်ကယ်ဟောလည် “နီမ်ငါ မန်းနားကာ့ ထိန်ပါအာ လာမ်ဟီးလိတ်။ ထိန်ငါး ဆာမ်ငါမ်ငါးနောက် ဟင်ဟာမ်းအစီးလောမာန်ဟော်ပ်ကာကာ့ မြည်းဆဟာ နူဝါလည် အင်းမာနေရား ဟော်ပ်ပေးကားလည် ယူပ်မုကား။ အင်းမာလည် ဆည်ဟပ်ကဲ့အယ် ငါပါအာ ကော်ဟီးရီလိတ်။ 31ဟော်ဝါဟော်ဝါကော 'နီမ်ငေါ မဟာအောမ်ကယ် မြည်းဆဟာလည် ဆည်ဟပ်ချီးကားသယ်' ငေါကဲ့အယ် စီမ်ညူဝမ်းနော 'အင်းမာလည် အရှင်ငေါ် လိုလောကယ် ထာမာ့' ငေါကဲ့အယ် ငေါဟီးလိတ်” ငေါကဲ့အယ် မိန့်နောမာ့။ 32အင်းမာတပည့်ကယ်ဟောကော ထိန်ငါး ထုတ်အာစန်းနော ကိုယ်တော်ယေရှု ငေါကားဖူမ်အားလုံးနယ် အင်းမာနေရားဟော့ပ်တောဟီးမာ့။ 33ဟီမ်နာပ် မြည်းဆဟာလည် ဆည်ဟပ်ကဲ့ လင်းငါးအချိန်နယ် အင်းမာ မြည်းရှိတ်သာပ်ကော “နီမ်ငေါ မဟာအောမ်ကယ် မြည်းဆဟာလည် ဆည်ဟပ်ချီးကားသယ်” ငေါကဲ့အယ် စီမ်ညူဟီးကယ်မာ့ 34ဟီမ်နာပ်ရီး “အင်းမာမြည်းလည် အရှင် လိုလောကယ် ထာမာ့” ငေါကဲ့အယ် ဖြေလောဟာမ်းမာ့။ 35ဟီမ်နာပ်ကော မြည်းဆဟာလည် ကိုယ်တော်ပါအာ ကော်ရီကဲ့အယ် မြည်းဆဟာကာ့ ကဆာမ်းငါး အဝတ်ဖူမ် ကမ်းကဲ့အယ် ကိုယ်တော်လည် အင်းမာစုတ်အား ထောင်းတီမ် ကူညီလောကဲ့အယ် အီဟီးမာ့။ 36အင်းမာမြည်းလည် စီးလောကဲ့အယ် ဂျေရုဆလင်နာ လာမ်ငါးလမ်းမာ တီတ်ဆာပရိသတ်ဖူမ်ငေါ် ကိုယ်တော်နန်း ဟီမ်နာပ်ကာ့ အဝတ်ဖူမ်နယ် လမ်းတုန်းငါး ကမ်းကဲ့အီပေးဟီးမာ့။ 37ကိုယ်တော်ယေရှု သံလွင်တောင်ငါးအယ် ဆာပ်ထေကာချိန်နယ် တပည့်တော်ဖူမ်ငေါ ကိုယ်တော်ယေရှု အောမ်မီကားဖူမ်ပါအာ အန်းနောမီးကား အရာအားလုံးနန်း ပျော်လောဟီးစာပ်ရယ် ကလူပ်ကားအသံနောက် ဘုရားရှင်နယ် ချီးမွမ်းနောဟီးမာ့။ 38ဟီမ်နာပ်ကော “ဘုရားရှင်ငါ နာမတော်နောက် ကြွလီကာဘုရင်နယ် ချီးမွမ်းနောမာ့။ ရွှေမြို့တော်ပါအာ ငြီမ်းချမ်းနောစန်ညူပ်၊ ဘုရားရှင်ငါ ဘုန်းတန်ခိုးတော်ကော် ထွန်းလင်းနောစန်ညူပ်” ငေါကဲ့အယ် ရမ်းဟီးမာ့။ 39အင်းမာချိန်နယ် တီတ်ဆာလာပ်ပါအာမာ့ ဖာရိရှဲကြအာကော ကိုယ်တော်လည် “ဆရာ၊ နာန်ငါ တပည့်ဖူမ်နယ် အင်းကာညယ် ရမ်းဟီးကားလည် ရပ်တောတီမ် အမိန့်အီရာမ်စာန်း” ငေါကဲ့အယ် ငေါဟီးမာ့။ 40အင်းမာချိန်နယ် ကိုယ်တော်ကော ဟီမ်နာပ်သယ် “နီမ်နယ် ငါငေါ့နာပ်၊ တကယ်လို့ ငါကာတပည့်ဖူမ် ရမ်းငါးလည် ရပ်သောစီမ်းပါတ်သော် သလောင်ဆီဖူမ် ရမ်းဟိကာ” ငေါကဲ့အယ် မိန့်နောမာ့။ 41အင်းမာနောက်သယ် ကိုယ်တော်ကော ဂျေရုဆလင်မြို့နောက် ထံပါအာထုတ်ကဲ့အယ်ဂျေရုဆလင်မြို့လည် ယူပ်မူဝမ်စန်းနော မီပ်ဝေးလက်ကဲ့အယ် 42“မဟာကော် နာန်ပါအာ ငြီမ်းချမ်းနောကားလည် လာရီမာ့ ငေါကားလည် နီမ်ငါ မြို့သူမြို့သားလာပ်သယ် ငါ မီမ်းဟော်စီမ်ကာပ်မာ့။ အင်းညယ်ငေါဝမ်ရီ ရာ့အချိန်နယ် အင်းမာအရာလည် နီမ်မီမ်းဟော်ပ်ကား ဟီပ်စော်မန်။ 43မဟာအောမ်ကယ်လိုးငေါနော နာန်ငါ ရန်သူဖူမ်ငေါ နီမ်ငါ ပတ်ပတ်လည်ပါအာ မြို့ရိုးလည် စာကဲ့အယ် နီမ်နယ် ဝိုင်းနောပေးကဲ့အယ် အရပ်လေးမျက်နှာပါအာအယ် တိုက်ခိုက်သောပ်ကာ အချိန် ထုတ်အီကိုက်ပန်း။ 44ဟီမ်နာပ်ကော နီမ်အားလုံးနယ် ကက်ရှီးကဲ့အယ် မြို့လည်ရာ သလောင်ရှီ တူဝါကာ့စုတ်အား တူဝါ အကျန်နော်ရယ် လင်းစာပ်အာမ်ကွန်းနယ် ဖျက်စီးလောပ်ကာ့။ မဟာအောမ်ကယ်လိုးငေါနော နီမ်ငေါ ဘုရားရှင်ငေါ် နီမ်နယ် ကယ်လောတီမ် ကြွလီကာလည် အမီမ်းဟော်ကယ် ထာမာ့” ငေါကဲ့အယ် မိန့်နောမာ့။ 45စီးရာပ်သော် ကိုယ်တော်ယေရှုကော ဗိမာန်တော်ဝါမ်းနား ဆာမ်ကဲ့အယ် အင်းမာနေရား ဈေးငဟေကယ်အယ် လင်းဟီးကာ့ ဈေးသည်ဖူမ်နယ် ငါပ်ပူကဲ့အယ် 46“‘ငါကာကျဉ်းcငေါ ဆုစိမ်ငါး ဝတ်ပြုလောကား နေရာထာထော်ပ်ကား’ ငေါကဲ့အယ် ကျမ်းစာပါအာ ရေးလောပေးရီး ရာ့ နီမ်ငေါ ဗိမာန်တော်လည် သူခိုးဓမြဖူမ် လင်းငါးနေရာ ထာကွန်နယ် အောမ်ဟီးမာ့” ငေါကဲ့အယ် မိန့်နောမာ့။ 47ကိုယ်တော်ကော ဗိမာန်တော်နား ရာပ်တိုင်း ဟောလောကဲ့လင်းမာ့။ အင်းညယ်ငေါဝမ်ရီ ပုရောဟိတ်အကြီးအကဲဖူမ်၊ ကျမ်းထောကား ဆရာဖူမ်နောက် ဂျူးလူမျိုးအကြီးအကဲဖူမ်ငေါ် ကိုယ်တော်လည် ကတ်ရှီးတီမ် ကြိုးစားလောကဲ့လင်းဟီးမာ့။ 48အင်းညယ်ငေါဝမ်ရီ တီတ်ဆာဖူမ်အားလုံးကော ကိုယ်တော်ယေရှု ဟောပြောလောကားဖူမ်နယ် ကလန်မယ် လေးအောမ်ကဲ့အယ် သပ်လာပ်ချီးကယ်မာ့ ဟီမ်နာပ်ကော ကိုယ်တော်လည် ကတ်ရှီးတီမ် နည်းလမ်းနယ်ကြံနောကဲ့ အလူဟာရယ်လင်းဟီးမာ့။
Currently Selected:
Luke 19: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
